1-2. Akapeea tatou me aru i te akoanga i roto ia Maseli 4:25? Oronga mai i tetai akaraanga.

AKAMANAKO ana i teia au akaraanga. Akamaara ua rai te tuaine pakarikari Kerititiano i te au tuatau mataora tei tupu ana. Noatu tona oraanga ngata i teianei, kua rave maroiroi aia i tei rauka iaia no Iehova. (1 Kori. 15:58) I te au rā ravarai ka akamanako aia i tona au akaperepere e noo mataora ra ratou i roto i te ao ou tei taputouia mai. Akamaara ua rai te tuaine e kua akariri mai tetai taeake iaia, inara kua iki aia i te akakore i tana ara. (Kolo. 3:13) Akamaara ua rai te taeake i te kino i rave ana aia, inara kua iki aia kia vai tiratiratu e aere ua atu ki mua.—Sala. 51:10.

² Eaa te mea aiteite ki teia taeake Kerititiano e toru? Kua akamaara ua rai ratou i tei tupu ana, inara kare ratou i akamou ana ki reira. Mari ra, kua “akara tika atu” ratou ki te tuatau ki mua.—E tatau ia Maseli 4:25.

3. Eaa ra tatou ka “akara tika atu” ei ki te tuatau ki mua?

³ Eaa i puapinga ai kia “akara tika atu” ki te tuatau ki mua? Mei te tangata e aaere ra ki mua ma te akara ua ki muri, kare tatou e aere ki mua i te tavini ia Iehova me akara ua tatou ki muri i te au mea tei tupu ana.—Luka 9:62.

4. Eaa ta tatou ka uriuri i roto i teia atikara?

⁴ I roto i teia atikara, ka uriuri tatou e toru ereere ka akakeu ia tatou kia akamaara ua rai i tei tupu ana. * Tetai o teia:  (1) te au mea o mua ana, (2) te akamoupuku, e te (3) te manako apa ua. I roto i teia au turanga tataki tai, ka tauturu te au kaveinga Pipiria ia tatou, eiaa e akamanako i “te au mea i muri ra,” mari ra ka uapou ua atu i “tei mua ra.”—Phili. 3:13.

5. Ia Koheleta 7:10 eaa te ereere te akamatakiteia maira tatou?

⁵ E tatau ia Koheleta 7:10. Akara ana kare teia irava i karanga ana e kino i te ui: “Eaa te mea i meitaki ei tei muatangana ra au rā?” E apinga aroa na Iehova te maaraara anga i te au mea meitaki. Mari ra, te karanga ra teia irava: “Auraka koe e karanga e, ‘Eaa te mea i meitaki ei tei muatangana ra au rā i teianei au rā?’” Te ereere, me akaaite tatou i to tatou oraanga i mua ana ki teianei tuatau, i te tuatua anga e e kino atu teia rā. Na ko ra tetai urianga Pipiria: “Auraka e ui e, ‘Eaa i meitaki ei te au rā o mua ana?’ Kare teia i te uianga tau.”

6. Eaa i kino ei te akamaara ua e meitaki atu to tatou oraanga i mua ana? Oronga mai i tetai akaraanga.

⁶ Eaa i kino ei te akamaara ua e meitaki atu to tatou oraanga i mua ana? Ka akakeu te au mea o mua ana ia tatou kia akamaara ua rai i te au mea meitaki tei tupu. E ka akaiti i te oraanga kino tei tupu ana kia tatou. Akamanako ana i te akaraanga o te iti tangata Iseraela. Akaruke anga ia Aiphiti, kua viviki ratou i te akangaropoina i to ratou oraanga kino. Mari ra, kua akamou ratou i te manako ki te au kai memeitaki i kai ana. Karanga ratou: “Te manako nei oki tatou i te ika, ta tatou i kai ua i Aiphiti ra; e te kukuma, e te meleni, e te kesira, e te oniani, e te sumi!” (Nume. 11:5) Inara e māmā ua ainei i te “kai ua” i ta ratou i kai akera? Kare. Kua takinokinoia te iti tangata Iseraela i te reira taime, kua pāpāia ratou ei aronga tuikaa i Aiphiti. (Exo. 1:13, 14; 3:6-9) Kua ngaropoina ia ratou te reira tuatau kino e kua inangaro ratou i te reira  tuatau. Kua iki ratou i te akamou ki runga i “te au mea meitaki o mua ana” kare ki te au mea meitaki ta Iehova i rave no ratou. Mareka kore a Iehova i to ratou tu.—Nume. 11:10.

7. Eaa tei tauturu i tetai tuaine kia kopae i te ereere o te au mea o mua ana?

⁷ Akapeea tatou me kopae i te ereere o te au mea o mua ana? Akamanako ana i te akaraanga o tetai tuaine tei angaanga ana i Betela, Brooklyn i te 1945. Tetai mataiti i muri mai, kua akaipoipo aia i tetai taeake i Betela, e kua angaanga kapiti raua ki reira no tetai mataiti roa. Inara, kua rokoia tana tane e te maki i te au mataiti 1970. Karanga mai aia, i te kite anga tana tane ka mate aia kua oronga mai aia i teia akoanga manea no toku turanga takaua. Akakite mai aia: “Mataora to taua oraanga akaipoipo. Maata te tangata kare ratou i kite ana i teia tu.” Akamaroiroi maira aia: “Eiaa e akamaara ua i tei tupu ana—noatu ka maara ia koe te reira. Na te tuatau koe e akamaru. Auraka e taitaia e te maromaroa. E rekareka i toou oraanga mataora e te au akameitakianga tei tupu ana. . . . E apinga aroa na te Atua te maaraara anga.” Ka āriki ainei koe e e akoanga manea teia?

8. Akapeea to tatou tuaine i puapingaia ai kia kore e akamaara i tei tupu ana?

⁸ Kua akono teia tuaine i teia akoanga manea. Kua tavini tiratiratu aia ia Iehova e tae ua atu ki tona matenga e 92 mataiti. I nga mataiti i mua ana, karanga mai aia: “I te oki anga i te akara ki muri e tere atu i te 63 mataiti i roto i te angaanga tamou a Iehova, te rauka nei rai iaku i te tuatua e e oraanga merengo anga tikai toku.” No teaa ra? Akamārama mai aia: “Ko tei akamerengo i te oraanga ra koia oki to tatou akataeake anga umere e te manakonako anga kia ora ma to tatou au taeake e te au tuaine i runga i tetai enua parataito, i te tavini anga i Tei Anga Mekameka ia tatou, te Atua mou anake ra, ko Iehova e tuatau  ua atu.” * E akaraanga manea teia tei akara tika ki te tuatau ki mua!

9. Ia Levitiku 19:18, aea e ngata ai ia tatou i te akakore i te akamoupuku?

⁹ E tatau ia Levitiku 19:18. Ka ngata ia tatou i te akakore i te akamoupuku me akakino tarevakeia tatou e tetai taeake akarongo, oa mou, e tetai kopu tangata. Ei akaraanga, kua akaapa tarevakeia tetai tuaine no te keia i te moni a tetai tuaine. Muri mai kua tataraara te tuaine tei akaapa, inara kua akamoupuku te tuaine tei akatarevakeia. Kua kite ana koe i teia tu? Noatu kare i tupu ana teia tu kia tatou, maata anga ia tatou ka akamoupuku e kare rava e rauka ia tatou i te akakore i te ara.

10. Eaa te ka tauturu ia tatou me akamoupuku tatou?

¹⁰ Eaa te ka tauturu ia tatou me akamoupuku tatou? E akamaara te kite maira a Iehova i te au mea e tupu ana. Kite aia e eaa te tupu ra kia tatou, e te au mea tau kore e na roto ana tatou. (Ebe. 4:13) Ka tangi mai aia ia tatou e mamae ra. (Isa. 63:9) Kua taputou mai aia e ka takore aia i te au tu kino ravarai e tupu ana kia tatou.—Apo. 21:3, 4.

11. Akapeea tatou e puapingaia ai me akakore tatou i te akamoupuku?

¹¹ Ka akamaara katoa tatou me akakore i te akamoupuku, ka meitaki rai tatou. Ko teia ta te tuaine i akatarevakeia i kite mai. Aere ua rai, kua rauka iaia i te akakore i te ara a tetai ke. Kite mai aia me akakore tatou i te ara a tetai ke, ka akakore a Iehova i ta tatou ara. (Mata. 6:14) Kare aia i kimi kotoeanga me kore kua akaapa i tei akakino mai iaia, mari ra kua iki aia i te akakore i te ara. Tei tupu mai, kua mataora akaou to tatou tuaine e kua rave akaou i tana angaanga kia Iehova.

12. Eaa ta 1 Ioane 3:19, 20 e akakite maira?

¹² E tatau ia 1 Ioane 3:19, 20. E manako apa ua ana tatou. Ei akaraanga, e manako apa ua ana tetai pae no te au tarevake ta ratou i rave i mua ake ka apii ei i te tuatua mou. Ka manako apa ua tetai no te tarevake ta ratou i rave i muri ake i te papetitoanga. E mea matauia teia au manako ngakau. (Roma 3:23) Ka inangaro ra tatou i te rave i te tika. Inara, te “apa anake nei tatou i te au mea katoa e manganui.” (Iako. 3:2; Roma 7:21-23) Noatu kare tatou e reka ana i teia tu, ka riro ei meitaki no tatou. Eaa te tumu? No te mea ka akakeu te manako apa ua ia tatou kia akatikatika i to tatou aerenga e ka aruaru kia kore e rave akaou i te reira.—Ebe. 12:12, 13.

13. Eaa tatou ka matakite ei i te ereere no te manako apa ua?

¹³ I tetai tua, ka tupu rai te manako apa ua—noatu e kua tataraara tatou e kua akakore mai a Iehova i ta tatou ara. Kino pakari teia manako apa ua. (Sala. 31:10; 38:3, 4) Akapeea? Akamanako i te akaraanga o tetai tuaine kua roa i te akakore anga i tana ara. Karanga aia: “Manako au kare au e aruaru pakari i te tavini ia Iehova no te mea kua tureti.” Mārama tatou i te manako taitaia o teia tuaine. No reira, e matakite eiaa e puereereia e teia tu manako apa ua. Akamanako ana me tuku tatou i te au, ka rekareka a Satani—noatu e te akaperepere maira a Iehova ia tatou!—Akaaite ia 2 Korinetia 2:5-7, 11.

14. Akapeea tatou e papu ei kare a Iehova i akaruke ia tatou?

¹⁴ Penei ka manako tatou, ‘Akapeea au  e kite ei kare a Iehova i akaruke iaku?’ Tera te tu, me ui i teia uianga, te pau katoa ra tatou i te reira. I te au mataiti i topa akenei, akakite Te Punanga Tiaki: “E [penei] ka kite tatou ka turori e ka inga putuputu tatou no tetai angaanga kino ta tatou i rave ana . . . . Auraka e taitaia. Eiaa e manako kare rava a Iehova e akakore i taau ara. Inangaro a Satani ia koe kia manako akapera. No te mea te taitaia ra e te riri ra koe ia koe uaorai, e akairo te reira te anoano ra koe i te tauturu. Auraka e emiemi, e uri ma te akaaka e te ngakau tae ki te Atua, te patianga iaia kia akakore mai i taau ara, e orei mai e te tauturu mai ia koe. Aere kiaia mei tetai tamaiti ka aere ki tona papa no te manamanata, noatu me rave putuputu i te reira, ka tauturu aroa mai a Iehova ia koe no tona aroa takinga meitaki.” *

15-16. Eaa te manako o tetai pae me mārama ratou kare a Iehova i akaruke ia ratou?

¹⁵ Pumaana te maata anga o te iti tangata o Iehova i te kite kare a Iehova e akaruke ia ratou. Ei akaraanga, i tetai mataiti akenei kua akakeuia tetai taeake mei te tatau anga i te akaraanga o tetai tuaine i roto i te atikara “Taui te Pipiria i te Oraanga.” I roto i teia atikara, kua akakite te tuaine no tona oraanga kino i mua ana kua ngata iaia i te irinaki e ka akaperepere mai a Iehova iaia. Kua akakoromaki aia i teia tu no tetai tuatau roa i muri mai i tona papetitoanga. Inara, iaia e akamanako oonu ra i te atinga oko kua taui marie aia i tona manako. *

¹⁶ Akapeea tona akaraanga i te tauturu anga i te taeake? Tata aia: “Toku mapu anga ākā angaanga iaku i te akakore i te akarakara i te au mea tau kore te au peu ainga viivii. I ou akenei kua akamata akaou au i te akara i te reira. Pati au ki te aronga pakari Kerititiano no te tauturu, e kua rauka marie iaku i te akakore i teia peu. Kua tauturu mai te aronga pakari iaku kia kite e te akaperepere maira te Atua iaku. I tetai au taime e manako puapinga  kore ana au e kare rava a Iehova e aroa mai iaku. Kua riro te tua o [teia tuaine] ei tauturu iaku. Mārama mai au i teianei me akamanako au kare te Atua e akakore mai i taku ara, tera te aiteanga, te karanga ra au kare te atinga oko o taau Tamaiti e rava no te akakore i taku ara. Kua pakoti au i teia atikara, ei tatau ua rai naku e te akamaara i te reira me manako puapinga kore au iaku uaorai.”

17. Akapeea te apotetoro ko Paulo i kopae ei i te ereere manako apa ua?

¹⁷ Akamaara maira teia au tua kia tatou i te apotetoro ko Paulo. Mua ake ka riro mai ei aia ei Kerititiano, e maata tana kino i rave. Maara ia Paulo tana i rave, kare ra aia i akamou tona manako ki reira. (1 Timo. 1:12-15) Manako aia e e apinga aroa te atinga oko kiaia. (Gala. 2:20) Rauka atura ia Paulo i te kopae i te ereere o te manako apa ua e kua akamou ki runga i te tavini pu ia Iehova e aere ua atu.

18. Eaa ta tatou i apii mai mei teia atikara?

¹⁸ Eaa ta tatou i apii mai mei te uriuri anga i te au ereere i roto i teia atikara? (1) E apinga aroa na Iehova te maaraara anga i te au mea meitaki; noatu te meitaki i to tatou oraanga i mua ana, ka meitaki roa atu to tatou oraanga a te tuatau ki mua. (2) Ka mamae rai tatou, inara me iki tatou i te akakore i te ara, ka rauka ia tatou i te aere ua atu ki mua. (3) Ka arai te manako apa ua ia tatou mei te tavinianga ia Iehova ma te rekareka. Mei ia Paulo rai, ka anoanoia tatou kia irinaki e ka akakore a Iehova i ta tatou ara.

19. Akapeea tatou e kite ei kare tatou e taitaia i roto i te ao ou?

¹⁹ E manakonakoanga to tatou no te ora e tuatau ua atu. I roto i te ao ou o te Atua, kare rava tatou e maara i te au mea tei tupu ana. A te reira tuatau, karanga te Pipiria: “Kare oki tei muatangana ra e maaraia.” (Isa. 65:17) Akamanako ana: Kua maata mai e kua ruaine tetai ia tatou i roto i ta Iehova angaanga, i roto i te ao ou ka mapu akaou tatou. (Iobu 33:25) E aruaru i reira tatou eiaa e akamaara i tei tupu ana. Mari ra, e akamou ki runga i te tuatau ki mua e te aruaru i te reira!