1-2. Сар шај те шуна о совет таро Изреки 4:25? Вакер пример.

РАЗМИСЛИН башо акала трин примерија. Јекх попхури пхен размислинела башо шукар времија кеда сине терни. Иако о живото акана тано попхаро, ој понадари да керела са со шај башо Јехова (1. Кор. 15:58). Секова диве ој замислинела сар живинела заедно пле фамилијаја хем пле амаленцар ко рај. Јекх јавер пхен сетинела пе кај некој таро собрание поврединѓа ла, ама одлучинѓа те на икерел холи башо адава (Кол. 3:13). Јекх пхрал сетинела пе ко грешке со керѓа лен англедер, ама дела пестар са те ачховел верно е Јеховаске акана (Пс. 51:10).

² Со иси лен заедничко акале трине христијанен? Иако сарине ола сетинена пе ко адава со уло поангле, ола на размислинена стално башо адала буќа. Наместо адава, ола дикхена „право англе“ ко адава со авела ки иднина. (Читин Изреки 4:25.)

3. Соске ваљани те дикха „право англе“ ки иднина?

³ Соске тано важно те дикха „право англе“ ки иднина? Кеда некој стално иранела пе палал, нашти те џал право. Амен да нашти целосно те служина е Јеховаске ако стално мислинаја ко адава со сине поангле (Лука 9:62).

4. Со ка дикха ки акаја статија?

⁴ Ки акаја статија ка дикха трин буќа со шај те чхивен амен те живина ко адава со сине поангле. * Адала тане:  1) те жалина пало пуране диве, 2) те икера холи, 3) претерано те осетина амен крива. Ка дикха сар о библиска начелија шај те поможинен аменге те на концентририна амен ко адава со сине поангле, него те дикха адава сој тано англи аменде (Фил. 3:13).

5. Спрема Проповедник 7:10, со на ваљани те кера?

⁵ Читин Проповедник 7:10. Акава стихо на вакерела кај тано погрешно те пуча амен: „Соске о пуране диве сине шукар?“ О шукар споменија тане поклон таро Јехова. Наместо адава, ко стихо пишинела: „Ма вакер: ’Соске о пуране диве сине пошукар таро авдисутне?‘“ Јавере лафенцар, опасно тано те споредина амаро живото со сине амен поангле адалеа сој акана, хем те мислина кај акана тано полошно него англедер.

6. Соске нане мудро стално те мислина кај амаро живото порано сине пошукар? Вакер пример.

⁶ Соске нане мудро стално те мислина кај амаро живото порано сине пошукар? Адалеске со адава шај те керел те сетина амен само ко шукар буќа, а те бистра о лошна. На пример, размислин башо Израелција. Откеда геле песке таро Египет, ола сигате бистерѓе кобор сине ленге пхаро адатхе. Наместо адава, мислинена сине само ки шужи храна со сине лен адари. Ола вакерена сине: „Бут шукар сетинаја амен ко мачхе со хаја сине бизо паре ко Египет, хем ко краставице, ко бостања, ки праза, ки пурум хем ки сир!“ (4. Мој. 11:5). Ама дали чаче хана сине „бизо паре“? На. О Израелција скупо платинѓе башо адава. Ко адава време, ола сине бут мучиме сар робија ко Египет (2. Мој. 1:13, 14; 3:6-9). Ама, покасно бистерѓе са адала муке. О Израелција жалинена сине пало пуране диве наместо те мислинен ко шуже буќа со керѓа ленге о Јехова откеда иклиле таро Египет. Е Јеховаске на свиџинѓа пе ленгоро стави (4. Мој. 11:10).

7. Со поможинѓа јекхе пхењаке те на жалинел пало пуране времија?

⁷ Сар шај те избегина и замка ки која со пеле о Израелција? Те дикха о пример јекхе  пхењакоро со али те служинел ко Бетел ко Бруклин ко 1945 берш. Некобор берша покасно, леља пе јекхе пхралеа со сине ко исто Бетел, хем служинѓе заедно бут берша. Ама, ко 1976 берш, лакоро ром насвалило. Кеда сине свесно кај ка мерел, денѓа ла несаве шуже советија со ка поможинен сине лаке пало лескоро мерибе. Ов вакерѓа лаке: „Сине амен бут шужо брако. Бут мануша на доживинѓе адава“. Ама, исто аѓаар поттикнинѓа ла: „Ма живин ко адава со сине поангле — иако о споменија ка ачховен туке. О време ка сасљарел тле ране. Ма ов превише обесхрабрими хем тажно башо буќа со случинѓе пе туке. Ов бахтали башо шукар времија со накхлем џикоте служинѓем заедно е Јеховаске. О споменија тане поклон таро Девел“. Акава сине бут шужо совет!

8. Сар поможинѓа амаре пхењаке о совет таро лакоро ром?

⁸ Амари пхен шунѓа о совет пле ромескоро, хем верно служинѓа е Јеховаске џикоте на мули ко 92 берш. Некобор берша англедер те мерел, ој вакерѓа: „Кеда ка размислинав башо повише таро 63 берша со накхљум ки служба е Јеховаске, шај те вакерав кај чаче сине ман бут бахтало живото“. Соске? Ој објаснинела: „Амен шај те овел амен бахтало живото адалеске со сием дело таро јекх бут шужо пхралипе хем иси амен надеж те живина амаре пхраленцар хем пхењенцар ки рајско пхув, аѓаар со ка служина амаре Баре Створителеске, е јекхе чачутне Девлеске, о Јехова, ки цели вечност“. * Шај те сикљова бут тари акаја пхен која со концентриринѓа пе ко е Јеховаскере ветувања!

9. Сар со пишинела ки 3. Мојсеева 19:18, кеда шај те овел бут пхаро те простина некаске?

⁹ Читин 3. Мојсеева 19:18. Бут пути пхаро аменге те простина кеда грешинела аменге амаро пхрал или пхен таро собрание, паше амал или некој тари фамилија. На пример,  јекх пхен сине погрешно обвиними тари јекх јавер пхен кај чорѓа латар паре. Покасно и пхен со обвининѓа ла извининѓа пе, ама и пхен сине бут разочарими хем нашти сине те бистрел адава со уло. Дали ту да доживинѓан нешто асавко? Чак иако на сием сине ки исто ситуација, повише џене амендар икерѓе холи хем мислинѓе кај никогаш нашти те простинен околеске со грешинѓа ленге.

10. Со ка поможинел аменге ако сием некастар повредиме?

¹⁰ Со ка поможинел аменге ако сием некастар повредиме? Прво, ма бистре кај о Јехова дикхела са. Ов тано свесно башо са о буќа со случинена пе аменге, сар сој и неправда со трпинаја ла (Евр. 4:13). На осетинела пе шукар кеда амен цидаја муке (Иса. 63:9). Освен адава, ветинела кај јекх диве ка цидел са о дукха со доживинаја лен тари неправда (Отк. 21:3, 4).

11. Соске тано башо амаро шукарипе те на икера холи?

¹¹ Исто аѓаар, на мангаја те бистра кај адава со на икераја холи тано башо амаро шукарипе. Адава халили и пхен со сине погрешно обвиними. Сар со накхела сине о време, ој успејнѓа те простинел е јавере пхењаке. Халили кај, кеда простинаја е јаверенге, о Јехова простинела аменге (Мат. 6:14). Ој џанља кај адава со керѓа и јавер пхен сине погрешно, ама на икерѓа холи. Акава поможинѓа амаре пхењаке те овел побахтали хем понадари да те служинел е Јеховаске.

12. Со сикљоваја таро 1. Јованово 3:19, 20?

¹² Читин 1. Јованово 3:19, 20. Секова јекх амендар понекогаш осетинела пе криво башо нешто. На пример, некој осетинела пе криво башо буќа со керѓа лен англедер те џанел о чачипе тари Библија. Јавера осетинена пе крива башо грешке со керѓе откеда крстинѓе пе (Рим. 3:23). Џанѓола пе, амен мангаја те постапина исправно, ама „сарине амен бут пути грешинаја“ (Јак. 3:2; Рим. 7:21-23). Иако кеда осетинаја амен крива нане аменге шукар, сепак адава шај те овел башо амаро шукарипе. Соске? Адалеске со адава шај те поттикнинел амен те испрајна амен кеда постапинаја погрешно хем те ова одлучна те на кера палем о иста грешке (Евр. 12:12, 13).

13. Соске на ваљани те дозволина понадари да те осетина амен претерано крива?

¹³ Ама, шај те осетина амен претерано крива, или јавере лафенцар, понадари да те мучинел амен о чувство кај сием крива иако каинѓем амен хем о Јехова сикавѓа кај простинѓа аменге. Адава шај те овел бут опасно (Пс. 31:10; 38:3, 4). Соске? Размислин баши јекх пхен која со понадари да осетинела пе сине криво башо грешке со керѓа лен поангле. Ој вакерѓа: „Мислинѓум кај на ваљани те трудинав ман бут ки служба е Јеховаске соске шај те на овав спасими“. Бут џене амендар шај осетинѓе пе исто сар акаја пхен. Адалеске бут тано важно те пазина амен те на пера ки замка те осетина амен претерано крива. О Сатана ка овел бут бахтало ако чхинаваја те служина е Јеховаске, иако о Јехова више простинѓа аменге! (Споредин 2. Коринќаните 2:5-7, 11.)

14. Сар шај те ова сигурна кај о Јехова на откажинела пе амендар?

¹⁴ Сепак, шај те пуча амен: „Сар шај те овав сигурно кај о Јехова на откажинѓа пе мандар?“ Адава со пучеа тут акава пучибе, сикавела кај о Јехова шај те простинел туке. Англедер бут берша, ки Стражарско кула пишинела сине: „Шај бут пути кераја и исто грешка. Шај адава те овел јекх лошно  навика која иси ла хор корено ки аменде панда англедер те почмина те служина е Девлеске... Ама, ма разочарин тут. Ма мислин кај керѓан грево кова со о Јехова никогаш нане те простинел ле. О Сатана мангела баш аѓаар те размислине. Адава со мучинеа тут хем со жалинеа баши исто грешка со кереа ла, сикавела кај на сиан лошно мануш хем кај о Јехова шај те простинел туке. Понадари да понизно хем искрено молин тут е Јеховаске те простинел туке, те поможинел туке те овел тут чисто совест хем те дел тут сила те на кере и исто грешка. Ов слободно те роде лестар помош сар јекх тикно чхаво со родела пле дадестар помош кеда иси ле проблемија. О Јехова великодушно ка поможинел туке адалеске со ов тано шукар“.

15-16. Сар несаве осетинѓе пе кеда халиле кај о Јехова на откажинѓа пе лендар?

¹⁵ Бут слуге е Јеховаскере аракхле утеха кеда халиле кај о Јехова на откажинѓа пе лендар. На пример, англедер некобор берша, јекх пхрал сине охрабримо таро јекх искуство со иклило ки рубрика „И Библија менинела животија“. Ки акаја статија, јекх пхен вакерѓа кај адалеске со случинѓе пе лаке лошна буќа ко лакоро живото, сине лаке пхаро те верујнел кај о Јехова шај те мангел ла. Аѓаар осетинела пе сине бут берша чак откеда крстинѓа пе. Ама, откеда хор размислинѓа баши откупнина, почминѓа те дикхел појавер ко буќа. *

¹⁶ Сар лакоро искуство поможинѓа е пхралеске? Ов пишинѓа: „Кеда сиум сине терно, сиум сине зависно тари порнографија, хем сине манге бут пхаро те чхинавав те керав адава. Англедер несаво време палем керѓум исто грешка. Родинѓум помош таро старешине хем похари успејнѓум те накхавав акава проблеми. О старешине поможинѓе манге те овел ман доверба ко Јехова кај мангела ман хем мангела те простинел манге. Сепак, понекогаш осетинава ман сине сар те пхене на врединава хем кај нашти о Јехова те мангел ман. О искуство [акале пхењакоро] бут поможинѓа манге. Акана хаљовава кај, кеда мислинава кај о Јехова нашти те простинел манге, адава тано исто сар те пхенав кај и  жртва лескере Чхавескири нане доволно те шај те учхарел мле гревија. Икалѓум манге акаја статија те шај те читинав ла хем те размислинав баши лате секогаш кеда претерано осетинава ман кај на врединава“.

17. Со поможинѓа е Павлеске те на перел ки замка те осетинел пе претерано криво?

¹⁷ Асавке примерија сетинкерена амен ко апостол Павле. Англедер те овел христијани, ов керѓа некобор сериозна грешке. Иако на бистерѓа адава со керѓа, о Павле на мислинела сине стално ко адава (1. Тим. 1:12-15). Ов дикхела сине ки откупнина сар поклон со о Девел денѓа лично леске (Гал. 2:20). Ко асавко начин, о Павле на пело ки замка те осетинел пе понадари да криво башо са со керѓа, наместо адава концентриринѓа пе те дел е Јеховаске пло најшукар.

18. Со сиклилем тари акаја статија?

¹⁸ Со сиклилем тари акаја статија? 1) Те сетина амен ко шуже буќа тано поклон таро Јехова. Ама, бизи разлика кобор сине амаро живото шужо англедер, о живото ко нево свето ка овел панда пошужо. 2) Иако јавера шај те поврединен амен, кеда одлучинаја те простина ленге шај радосно те служина е Јеховаске. 3) Ако осетинаја амен претерано крива адава шај те лел амари радост. Адалеске сар о Павле, ваљани те верујна кај о Јехова простинѓа аменге.

19. Котар џанаја кај ко нево свето нане те жалина башо буќа со сине поангле?

¹⁹ Амен шај те живина засекогаш. Ко нево свето нане те жалина башо буќа со сине англедер. Башо адава време, и Библија вакерела: „Ко адава со сине поангле, нане те сетинен тумен“ (Иса. 65:17). Само размислин: Несаве амендар кола со бершенцар служинена е Јеховаске хем пхуриле, ко нево свето ка овен палем терне (Јов 33:25). Адалеске, те ова одлучна те на живина ко адава со сине поангле. Наместо адава те концентририна амен ко нево свето хем те кера са со шај те реса адари!