1-2. Konda unfa u sa du di soni di sikifi a Nöngö 4:25.

PAKISEI dee dii woto aki: Wan sisa di ko gaandi kaa ta pakisei dee bunu soni dee bi pasa di a bi möön njönku. Hii fa di libi ko möön taanga dëën, tökuseei a ta du hii soni di a sa, u dini Jehovah (1 Kol. 15:58). Hiniwan daka a ta pakisei unfa hën ku dee sëmbë fëën o dë makandi a di Paladëisi. Wan woto sisa ta mëni unfa wan sëmbë u di kemeente bi du wan soni di bi hati ën gaanfa. Ma di sisa buta taa an o hoi di sëmbë a bëë möön (Kol. 3:13). Wan baaa ta mëni dee föutu dee a bi mbei a di ten di pasa, ma nöunöu a ta möön buta pakisei a di hoi di a musu ta hoi hënseei a Jehovah.​—Ps. 51:10.

² Un soni hiniwan u dee baaa ku sisa aki bi du? Wë hii de tuu bi mëni andi bi pasa a di ten di pasa, ma de an ta pakisei dee soni aki nöömö. Ka u de du di soni dë, nöö de ta buta pakisei a di ten di ta ko.​—Lesi Nöngö 4:25.

3. Faandi mbei a dë fanöudu fuu ta buta pakisei a di ten di ta ko?

³ Faandi mbei a dë fanöudu fuu ta buta pakisei a di ten di ta ko? Wë leti kumafa wan sëmbë an sa waka go tololoo a fesi ee a ta bia ta luku baka, sö nöö wa sa dini Jehovah bumbuu ee hii juu u ta pakisei soni u di ten di pasa.​—Luk. 9:62.

4. Andi woo taki a di woto aki?

⁴ A di woto aki, woo taki u dii soni di sa mbei u buta pakisei tumisi a di ten di pasa. * Dee soni dë da: (1) di mëni di u ta mëni fa di libi fuu bi dë fosu, (2) te u ta hoi sëmbë a bëë, ku (3) te  háti fuu ta fon u u wan soni di u bi du. A hii dee soni aki, woo si unfa dee mama wëti u Bëibel sa heepi u, fu wa buta pakisei tumisi a „dee soni dee bi pasa”, ma u musu ’biinga seei ku dee soni dee dë a u fesi ta ko’.​—Fil. 3:13.

5. Andi Peleikima 7:10 ta piki u taa wa musu du?

⁵ Lesi Peleikima 7:10. Di tëkisi an ta taki taa an dë wan bunu soni u taki taa: „Fosufosu, soni bi bunu.” Di mëni di u sa ta toona mëni bunu soni da wan bunu soni di Jehovah da u. Ma di tëkisi ta taki taa: „Ja musu taki taa: ’Fosufosu, soni bi bunu möön di ten aki.’” U musu köni taa wa tei di libi fuu u fosu maaka ku di libi fuu nöunöu, nöö u taki taa soni ko möön hogi.

6. Faandi mbei an dë wan köni soni fuu ta pakisei taa soni bi ta waka möön bunu da u a di ten di pasa? Konda wan woto.

⁶ Faandi mbei an dë wan köni soni fuu ta pakisei taa soni bi ta waka möön bunu da u a di ten di pasa? U di a sa mbei u mëni dee bunu soni nöö dee bi pasa, nöö u sa fëëkëtë taa fuka bi ta miti u a di ten dë tu. Pakisei di woto u dee Isaëli sëmbë. Di de kumutu a Egepiti, hën hesihesi seei de fëëkëtë unfa libi bi taanga da de ala. A dee bunu soni di de bi ta feni u njan ala nöö de bi ta buta pakisei. De bi taki taa: „U ta mëni jeti fa u bi ta njan fisi a Egepiti u sösö. U bi ta njan kömköm, baasia, ajon, ku lai-ajon!” (Nöb. 11:5) Ma tuu taa dee soni di de bi ta njan bi dë u sösö u? Na seei. Dee Isaëli sëmbë bi ta pena gaanfa seei. A di ten dë, dee Egepiti sëmbë bi tei de ko saafu u de (Ëki. 1:13, 14; 3:6-9). De bi fëëkëtë fa soni bi ta taanga da de, hën de bigi ta hangi di libi u fosu. De bi ta möön buta pakisei a dee soni dee bi pasa kaa, ka u de buta pakisei a dee bunu soni di Jehovah bi du da de. Jehovah an bi ta wai ku di fasi fa de bi ta pakisei.​—Nöb. 11:10.

7. Andi bi heepi wan sisa fu an buta pakisei poi a di fasi fa hën libi bi dë a di ten di ten di pasa?

⁷ Unfa u sa köni ku di soni aki? Buta pakisei a di woto u wan sisa di bi bigi wooko a di Bëtëli  di bi dë a Brooklyn, a di jaa 1945. Baka wantu jaa, hën a tööu ku wan baaa di bi ta wooko a di Bëtëli dë tu, nöö de tu tuu wooko a di Bëtëli dë sömëni jaa longi. Ma a di jaa 1976, hën di sisa aki manu bi ko dë ku suwaki. Di sisa bi taki taa di di baaa si taa an bi o libi longi möön, hën di baaa dëën bunu lai di bi o heepi ën baka te di baaa dëdë. Di baaa bi piki ën taa: „U bi abi wan bunu tööu libi. Sömëni sëmbë an ta feni ën sö.” Ma a bi piki ën tu taa: „Ja o fëëkëtë dee bunu soni dee u bi du makandi, ma na buta pakisei a dee soni dë tumisi e. Möön di ten o ta pasa, möön joo ko ta dë waiwai baka. Na lasi hati, nöö na tjali poi u di soni di o miti i. I musu ta wai taa u bi sa dini Jehovah makandi u wan pisiten. Di mëni di u sa toona mëni soni u di ten di pasa, da wan bunu soni di Gadu da u.” Dee soni di di baaa bi taki aki bunu seei.

8. Unfa wan sisa fuu bi feni wini u wan soni di hën manu bi piki ën?

⁸ Di sisa bi du di soni di hën manu bi piki ën. A bi dini Jehovah ku hii hën hati go dou, u te a ko lasi libi di a bi abi 92 jaa. Wantu jaa ufö a lasi libi, a bi taki taa: „Te mi ta toona mëni dee 63 jaa di mi dini Jehovah a di hii-ten diniwooko, nöö mi sa taki taa mi bi ta dë waiwai tuutuu.” Faandi mbei? Wë a bi taki taa: „Di soni mbei u sa ta dë waiwai sö, da u di u abi baaa ku sisa, söseei u di u abi di biibi taa woo libi makandi ku de a di Paladëisi a goonliba aki. U teego woo dini di Sëmbë di mbei u. Hën da Jehovah, di wan kodo tuutuu Gadu.” * U sa lei sömëni soni a di woto u di sisa aki. A bi ta buta hii hën pakisei a dee soni di Jehovah paamusi u!

9. Na un ten a sa ta möön taanga da u fu wa hoi sëmbë a bëë te u luku Leifitiki 19:18?

⁹ Lesi Leifitiki 19:18. So juu a ta taanga da u fuu da wan sëmbë u di kemeente, nasö wan mati fuu, nasö wan famii fuu, paadon te de du wan soni ku u. Wan sisa u wan kemeente bi taki taa wan woto sisa fufuu möni fëën. Ma bakaten  di sisa di bi taki di soni aki, bi ko si taa soni an dë sö tuutuu, hën a hakisi di woto sisa paadon. Ma di soni bi hati di woto sisa, nöö a bi ta pakisei di soni nöömö. Di soni aki bi miti i wan daka u? Kandë di seei soni aki an miti u wan daka, ma a kan taa gaansë fuu bi hoi sëmbë a bëë u di de bi du wan soni di hati u.

10. Andi sa heepi u te wan sëmbë du wan soni di hati u?

¹⁰ Andi sa heepi u te a ta taanga da u fu wa hoi sëmbë a bëë? U musu hoi a pakisei taa Jehovah ta si hii soni. A ta si andi ku andi ta miti u. Hën da a ta si te wan sëmbë an ta libi a wan leti fasi ku u (Heb. 4:13). A ta hati ën te u ta tja fuka (Jes. 63:9). Nöö Jehovah ta paamusi u taa abiti möön a o puu di pen di u ta fii te sëmbë an libi a wan leti fasi ku u.​—Ako. 21:3, 4.

11. Un wini u ta feni te wa ta hoi sëmbë a bëë?

¹¹ U kë hoi a pakisei tu taa woo ta fii möön bunu te wa ta hoi sëmbë a bëë. Di soni aki di sisa di u bi taki soni fëën a palaklafu 9 bi ko si. An bi tei longi möön, hën a bi da di sisa di bi taki taa a fufuu soni fëën, paadon. Söseei hati fëën an bi ko ta boonu ku ën möön. Di sisa bi ko fusutan taa te u ta da woto sëmbë paadon, nöö Jehovah o da u paadon (Mat. 6:14). A bi sabi taa di soni di di woto sisa bi du ku ën an bi bunu, ma a bi buta taa an o hoi di sisa dë a bëë. Te u kaba fëën, di sisa bi ko ta dë möön waiwai, söseei a bi sa möön buta pakisei a di dini di a ta dini Jehovah.

12. Andi u ta lei a 1 Johanisi 3:19, 20?

¹² Lesi 1 Johanisi 3:19, 20. So juu, háti fuu sa ta fon u. Háti sa ta fon so baaa ku sisa u di de bi du soni di an bi bunu a di ten di de an bi sabi soni u di tuutuu lei. Wotowan háti ta fon de, u di de bi du wan soni di an bunu, baka di de dopu. Dee soni aki an dë njunjun soni (Lom. 3:23). An dë u taki taa u kë ta du soni di bunu. Ma „hii u tuu ta mbei föutu ta misi Gadu” (Jak. 3:2; Lom. 7:21-23). Wa lobi te háti fuu ta fon u, ma tökuseei di soni dë sa tja wini ko. Unfa sö? U di te háti fuu ta fon u, a sa heepi u fuu tooka soni a di libi fuu, söseei a sa heepi u fu wa mbei dee seei föutu dë möön.​—Heb. 12:12, 13.

13. Faandi mbei wa musu mbei háti fuu fon u tumisi poi?

¹³ Ma a sa pasa taa háti fuu ta fon u tumisi poi. Di soni aki ta dë sö te háti fuu ta fon u go dou, hii fa u lei taa u ta tjali u dee soni dee u bi du, söseei hii fa Jehovah lei u taa a da u paadon. Di soni aki sa tja hogi ko da u (Ps. 31:10; 38:3, 4). Na un futu? Luku di woto u wan sisa di háti fëën bi ta fon mën nöömö u dee soni dee a bi du a di ten di pasa. A bi taki taa: „Mi bi ta fii kuma aan wini ee mi du sömëni soni a di dini di mi ta dini Jehovah, u di kandë a lati da mi kaa.” Kandë sömëni fuu ta fii kumafa di sisa aki bi ta fii. Fëën mbei a bunu fu wa mbei háti fuu fon u tumisi poi. Pakisei unfa Saatan o ta wai ee u disa u dini Jehovah, hii fa Jehovah da u paadon kaa!​—Luku 2 Kolenti 2:5-7, 11.

14. Unfa u sa sabi taa Jehovah dë kabakaba u da u paadon?

¹⁴ Ma kandë u sa ta hakisi useei taa: ’Unfa mi sa sabi ee Jehovah dë kabakaba u da mi paadon tuutuu?’ Wë ee i ta hakisi iseei di soni aki, nöö a ta lei kaa taa Jehovah sa da i paadon. Wantu jaa pasa Di Hei Wakitimawosu bi taki taa: „U sa ta mbei dee seei föutu sömëni pasi. A sa ta taanga da u fuu disa wan suwaki fasi di u abi sensi di wa bi ta dini Gadu jeti. . . . Ma na lasi hati. Na si kuma i du wan gaan zöndu di nöiti Jehovah o sa da i paadon fëën. Di soni dë Saatan bi o kë fii pakisei. Di hati di di soni di i du ta hati i, ta lei taa ja dë wan hogihati sëmbë, söseei a ta lei taa Jehovah sa da i paadon.  Abi sakafasi go dou, nöö i begi Gadu faa da i paadon, faa heepi i fii ko abi wan limbolimbo háti, fii ko ta fii möön bunu, söseei begi ën faa heepi i fu ja mbei di seei föutu dë möön. Wan piki mii nango suku heepi nëën tata u di wan seei fuka hedi, aluwasi a bi go nëën sömëni pasa kaa. Fëën mbei i musu ta hakisi Jehovah faa heepi i, nöö a o heepi i tuutuu.”

15-16. Unfa so sëmbë bi fii di de bi ko fusutan taa Jehovah lobi de jeti?

¹⁵ Sömëni sëmbë u Jehovah bi ko feni kötöhati di de si taa Jehovah da de paadon u dee zöndu di de du. Wantu jaa pasa, wan woto u wan sisa bi sikifi a di pisi „Bijbel e kenki sma libi”. Di woto aki bi heepi wan baaa. A di woto dë, di sisa bi taki taa u di sömëni hogi soni bi miti ën nëën libi, mbei a bi taanga dëën faa biibi taa Jehovah sa lobi ën. A bi ta fii sö jeti hii fa a bi dopu kaa. Ma di a bi pakisei fundu u di lusupaima, hën a heepi ën faa biibi taa Jehovah lobi ën tuutuu. *

¹⁶ Unfa di woto u di sisa bi heepi di baaa? Di baaa bi taki taa: „Di mi bi njönku, mi bi ta luku peentje u fanafiti soni u womi ku mujëë, nöö a bi taanga da mi u mi disa di soni aki. Na longi ten pasa, mi bi luku fanafiti soni baka. Mi bi hakisi dee gaanwomi u de heepi mi, nöö mi ta mbei taanga möiti seei u ma luku ën möön. Dee gaanwomi heepi mi u mi biibi taa Gadu lobi mi, söseei taa a da mi paadon. Tökuseei, so juu mi ta fii kuma ma dë wan hojo soni, söseei taa Jehovah an lobi mi. Di woto u di sisa bi heepi mi tuutuu. Nöunöu mi ta fusutan taa te mi taki taa Gadu an o da mi paadon, nöö a dë kuma mi ta taki taa di lusupaima u di Womi Mii fëën an bunu tjika u paka dee zöndu u mi. Mi koti di woto aki puu a di buku u mi sa ta lesi ën, söseei u mi sa ta pakisei fundu fëën te mi bigi ta fii kuma Jehovah an lobi mi.”

17. Andi apösutu Paulosu bi du sö taa háti fëën an fon mën tumisi poi?

¹⁷ Dee lö woto aki ta mbei u pakisei apösutu Paulosu. A bi du sömëni zöndu ufö a bi ko toon wan Keesitu sëmbë. Paulosu an bi fëëkëtë  andi ku andi a bi du, ma an bi ta pakisei dee soni dë nöömö (1 Tim. 1:12-15). A bi ta si di lusupaima kuma wan kado di Gadu bi dëën (Gal. 2:20). Paulosu an bi mbei háti fëën fon mën tumisi poi. Ma a bi ta buta pakisei a di du di a bi musu du hii soni di a bi sa, da Jehovah.

18. Andi u lei a di woto aki?

¹⁸ Andi u lei a dee soni dee u taki a di woto aki? Wë u lei taa: (1) Di mëni di u sa toona mëni soni da wan bunu soni di Jehovah da u. Ma aluwasi ee u bi abi wan bunu libi a di ten di pasa, tökuseei woo abi wan möön bunu libi a di njunjun goonliba. (2) Sëmbë sa du soni di o hati u, ma te u da de paadon, woo sa ta buta pakisei fuu a di dini di u ta dini Jehovah. (3) Wa sa dini Jehovah waiwai, ee háti fuu ta fon u tumisi poi. Fëën mbei kuma Paulosu, u musu biibi taa Jehovah da u paadon.

19. Unfa u du sabi taa fesiten soni an o ta toobi u möön te u dë a di njunjun goonliba?

¹⁹ U ta biibi taa woo libi u teego. Nöö te woo libi a di njunjun goonliba, wa o mëni soni di sa mbei u fii tjali. Di Bëibel ta taki u di ten dë taa: „Sëmbë an o mëni dee fesiten soni möön” (Jes. 65:17). Pakisei ën luku: So fuu di ta dini Jehovah ko gaandi, ma a di njunjun goonliba, woo ko njönku baka (Jöpu 33:25). Boo mbei taanga möiti fuu wa buta pakisei fuu a di ten di pasa. Ma u kë buta hii u pakisei a di njunjun goonliba, söseei nöunöu kaa u kë du hii soni di u sa du fuu sa dë ala!