1-2. Fa wi kan du san skrifi na Odo 4:25? Gi wan eksempre.

PRAKSERI den dri eksempre disi: Wan owru sisa e prakseri den bun sani di a ondrofeni di a ben moro yongu. Aladi a libi fu en moro muilek now, toku a e tan du ala san a man gi Yehovah (1 Kor. 15:58). Ala dei a e prakseri fa a o de te en nanga den famiri nanga den mati fu en de na ini a paradijs. Wan tra sisa e memre fa wan sma na ini a gemeente hati en firi, ma a bosroiti fu no hori en na ati (Kol. 3:13). Wan brada no frigiti den fowtu di a meki, ma toku a e du ala san a man fu tan dini Yehovah nanga en heri ati.​—Ps. 51:10.

² San ala den dri sma disi e du? Den ala dri e memre san pasa na ini den libi, ma den no e tan prakseri den sani disi ala yuru. Na presi fu dati den e „luku go na fesi”.​—Leisi Odo 4:25.

3. Fu san ede a prenspari fu „luku go na fesi”?

³ Fu san ede a prenspari fu „luku go na fesi”? Efu wan sma e tan luku go na baka te a e waka, dan a no o man si pe a e poti en futu. Na so a de tu nanga a dini di wi e dini Yehovah. Wi no o man du ala sa wi man gi Yehovah efu ala ten wi e prakseri san ben miti wi noso san wi ben du fosi.​—Luk. 9:62.

4. San wi o luku na ini na artikel disi?

⁴ Na ini na artikel disi wi o taki fu dri sani di kan meki taki wi tan luku go na baka. * Dati na: (1) Te wi e winsi taki sani ben de leki fosi, (2) te wi e hori sma na ati èn (3) te wi e tan prakseri den fowtu di wi meki. Wi o si fa Bijbel kan yepi wi fu no tan prakseri ’den sani di de na wi baka’, ma fu prakseri ’den sani di de na wi fesi’.​—Fil. 3:13.

5. Soleki fa Preikiman 7:10 e sori, dan san wi no musu du?

⁵ Leisi Preikiman 7:10. Luku taki a vers disi no e taki dati a fowtu fu taki: „Fosi, sani ben bun.” Na Yehovah meki wi na so wan fasi, taki wi kan memre den bun sani di ben pasa fosi. Na presi fu dati a vers e taki: „No taki: ’Fosi, sani ben betre moro now.’” Sobun, wi musu luku bun taki wi no e denki taki a libi ben moro bun fosi èn taki now noti no e go bun.

6. Fu san ede a no de wan koni sani fu tan denki taki wi libi ben moro bun fosi? Gi wan eksempre.

⁶ Fu san ede a no de wan koni sani fu tan denki taki wi libi ben moro bun fosi? Fu di furu tron wi e frigiti taki a no soso bun sani ben miti wi, ma ogri sani ben pasa tu. Luku na eksempre fu den Israelsma fu owruten. Baka di den komoto na Egepte, esi-esi den frigiti o hebi a libi ben de drape. Den ben prakseri soso a bun nyanyan di den ben e kisi. Den ben taki: „Wi sabi ete fa wi ben e nyan furu fisi na ini Egepte fu di a ben bunkopu so. Wi ben e nyan komkomro, watramun, ayun, nanga knofroku!” (Num. 11:5) Ma na so a ben makelek fu feni a nyanyan dati? Nôno. Den Israelsma ben nyan bun furu pina na a ten dati. Den ben de srafu na ini Egepte (Eks. 1:13, 14; 3:6-9). Ma bakaten den ben frigiti fa den ben pina èn den ben winsi taki sani ben de leki fosi. Den ben tan luku go na baka, na presi fu prakseri den bun sani di Yehovah ben du gi den. Yehovah no ben breiti nanga dati.​—Num. 11:10.

7. San yepi wan sisa fu no tan prakseri taki a libi di a ben abi fosi ben moro bun?

⁷ San o yepi wi fu no denki taki fosi sani ben moro bun? Luku na eksempre fu wan sisa di ben bigin wroko na Brooklyn Betel na ini 1945. Wan tu yari baka dati a trow nanga wan brada fu Betel èn makandra den dini furu yari drape. Ma  na ini 1976 en masra kon siki. A sisa taki dati di en masra si taki a no ben o libi langa moro, en masra gi en bun rai di yepi en baka di a dede. En masra taigi en: „Wi ben abi wan koloku trowlibi. Furu sma no e ondrofeni dati noiti.” Ma a taigi en wefi tu: „Aladi yu no sa man frigiti fa sani ben de fosi, toku yu no musu go sidon prakseri den sani dati nomo. Baka wan pisi ten yu sa si taki a e go moro bun. No atibron fu di sani waka na so wan fasi, èn no go firi sari gi yusrefi. Yu musu breiti taki yu ben ondrofeni den sani disi di gi yu prisiri, èn taki yu kisi den blesi disi. Baka wan pisi ten, yu sa si taki den sani di yu e memre fu fositen sa gi yu prisiri. Den sani dati na presenti di Gado gi wi.” Yu no feni taki disi na bun rai?

8. Fa wan sisa kisi wini fu a rai di en masra ben gi en?

⁸ A sisa teki a rai fu en masra. A tan dini Yehovah nanga en heri ati teleki a dede di a ben abi 92 yari. Wan tu yari fosi a dede a taki: „Te mi sidon prakseri den 63 yari di mi de kaba na ini a furuten diniwroko fu Yehovah, dan mi kan taki trutru dati mi abi wan bun libi.” Fu san ede? A sisa taki dati wi kan de koloku fu di wi abi brada nanga sisa di de leki wi famiri èn wi abi a howpu fu libi makandra nanga den na ini a paradijs. Wi o dini wi Gran Mekiman, a wan-enkri tru Gado Yehovah, fu têgo. * Wi kan leri furu fu a sisa disi di ben tan prakseri den moi sani di Yehovah pramisi gi a ten di e kon!

9. Soleki fa Lefitikus 19:18 e sori, dan o ten a kan muilek gi wi fu gi wan sma pardon?

⁹ Leisi Lefitikus 19:18. Te wan sma na ini a gemeente, wan bun mati noso wan famiriman fu wi du wan hati sani nanga wi, dan a kan muilek son leisi fu gi en  pardon. Fu eksempre, wan sisa ben taki dati wan tra sisa fu a gemeente ben fufuru en moni. Bakaten a sisa kon si taki dati no ben tru èn a go aksi a tra sisa pardon. Ma a sisa ben mandi èn a no ben man frigiti a tori. Oiti yu ben firi so? Awinsi a srefi sani no miti yu, toku a pasa nanga furu fu wi taki wi ben mandi nanga wan sma èn taki wi ben denki taki noiti wi ben o man gi a sma pardon.

10. San kan yepi wi fu no hori sma na ati?

¹⁰ San kan yepi wi fu no hori sma na ati? Wi musu hori na prakseri taki Yehovah e si ala sani. A sabi ala san e miti wi èn a e si te sma no e libi bun nanga wi (Hebr. 4:13). A e firi gi wi te wi e pina (Yes. 63:9). A pramisi tu taki a o puru ala den takru bakapisi di wi e ondrofeni nownow fu di sma no e libi bun nanga wi.​—Openb. 21:3, 4.

11. Sortu wini wi e kisi te wi e gi trawan pardon?

¹¹ Wi musu hori na prakseri tu taki te wi e gi tra sma pardon, dan wi o firi moro bun. Na dati a sisa di kari na ini paragraaf 9 kon si. Baka wan pisi ten a gi a tra sisa pardon èn a no ben hori en na ati moro. A kon frustan taki te wi e gi tra sma pardon, dan Yehovah e gi wi pardon tu (Mat. 6:14). A ben sabi taki a sani di a sisa ben du no ben bun, ma toku a gi en pardon. Disi meki taki a ben de moro koloku èn taki a ben man dini Yehovah sondro taki tra sani ben e puru en prakseri.

12. San wi kan leri fu 1 Yohanes 3:19, 20?

¹² Leisi 1 Yohanes 3:19, 20. Wi alamala e kisi konsensi fonfon son leisi. Fu eksempre, son sma abi konsensi fonfon fu den sani di den du fosi den kon dini Yehovah. Tra sma abi konsensi fonfon fu fowtu di den meki baka di den dopu (Rom. 3:23). A no de fu taki dati wi wani du san bun. Ma „wi alamala e sondu furu tron” (Yak. 3:2; Rom. 7:21-23). Aladi a no switi te wi e kisi konsensi fonfon, toku na wan bun sani. Fu san ede wi kan taki dati? Fu di te wi e sari fu den sani di wi du, dan wi o wani tyari kenki kon èn wi no o wani meki a srefi fowtu baka.​—Hebr. 12:12, 13.

13. Fu san ede wi musu feti nanga a denki taki Yehovah no wani gi wi pardon?

¹³ Na a tra sei wan sma kan tan abi konsensi fonfon srefi baka te a sori berow èn baka te Yehovah gi en pardon. A sani disi no bun gi wi srefisrefi (Ps. 31:10; 38:3, 4). Fu san ede? Luku na eksempre fu wan sisa di ben tan prakseri den fowtu di a ben meki na ini a ten di pasa. A taki: „Mi ben firi leki na fu soso mi e meki muiti fu dini Yehovah fu di toku mi no o kisi frulusu.” Furu fu wi e firi so. Sobun, wi musu feti nanga a denki taki Yehovah no wani gi wi pardon. Fu san ede? Fu di Satan ben o breiti srefisrefi efu wi tapu fu dini Yehovah aladi Yehovah gi wi pardon kaba!​—Luku 2 Korentesma 2:5-7, 11.

14. Fa wi kan sabi seiker taki Yehovah de klariklari fu gi wi pardon?

¹⁴ Toku wi kan aksi wisrefi: ’Fa mi kan sabi seiker taki Yehovah de klariklari fu gi mi pardon?’ Efu yu e aksi yusrefi a sani dati, dan dati e sori kaba taki Yehovah kan gi yu pardon. Furu yari pasa wan Waktitoren ben taki fa wi ben kan firi efu wi ben abi wan takru gwenti fosi èn efu wi fadon baka na ini. A Waktitoren taki: „No lasi-ati. No denki taki Yehovah  noiti no o gi yu pardon. Na dati Satan ben o wani yu prakseri. Efu yu e firi sari èn efu a e hati yu taki yu meki wan fowtu, dan dati e sori taki yu a no wan takru sma èn taki Yehovah kan gi yu pardon. Tan abi sakafasi èn tan begi Gado fu gi yu pardon. Aksi en tu fu yepi yu fu abi wan krin konsensi èn fu no meki a srefi fowtu baka. Neleki fa wan pikin no e frede fu go na en papa nanga a srefi problema ibri tron baka, na so yu musu tan aksi Yehovah fu yepi yu. Yehovah o yepi yu fu di a lobi yu.”

15-16. Fa son sma ben e firi di den kon frustan taki Yehovah lobi den ete?

¹⁵ Furu anbegiman fu Yehovah kisi trowstu di den frustan taki Yehovah lobi den ete. Fu eksempre, wan tu yari pasa wan brada kisi deki-ati di a leisi wan fu den ondrofenitori na ini den artikel „Bijbel e kenki sma libi”. Na ini na artikel wan sisa ben taki dati den sani di ben pasa nanga en di a ben yongu, ben meki en muilek gi en fu bribi taki Yehovah lobi en. Srefi baka di a dopu a feti nanga a firi disi furu yari. Ma di a denki dipi fu a lusu-paiman, dan dati yepi en fu bribi taki Yehovah lobi en. *

¹⁶ Fa na ondrofenitori fu a sisa yepi a brada? A brada skrifi: „Di mi ben yongu, mi ben feti nanga a gwenti fu luku porno. No so langa pasa mi fadon baka na ini a takru gwenti disi. Mi suku yepi na den owruman èn mi ben man tapu nanga a gwenti disi. Den owruman sori mi taki Gado lobi mi èn taki a wani yepi mi. Toku son leisi mi e firi ete taki mi no warti noti èn taki Yehovah no kan lobi mi. Na ondrofenitori fu a sisa disi yepi mi trutru. Now mi e frustan taki te mi e taki dati Gado no gi mi pardon, dan dati e sori taki mi no e bribi taki na ofrandi fu en Manpikin kan tapu den sondu fu mi. Mi koti na artikel disi puru na ini A Waktitoren so taki mi kan leisi en baka èn denki dipi fu en solanga mi e kisi a firi taki Yehovah no lobi mi.”

17. San yepi na apostel Paulus fu no tan prakseri den ogri di a ben du fosi?

 ¹⁷ Den sortu ondrofenitori disi e meki wi prakseri na apostel Paulus. Fosi a tron wan Kresten a ben du wan tu bigi ogri. Paulus no ben frigiti san a ben du, ma a no ben tan prakseri den sani dati (1 Tim. 1:12-15). A ben si a lusu-paiman leki wan kado di Gado ben gi en (Gal. 2:20). Sobun, Paulus no ben denki taki Yehovah no ben gi en pardon, ma a ben e du ala san a man fu dini Yehovah nanga en heri ati.

18. San wi leri na ini na artikel disi?

¹⁸ San wi leri na ini na artikel disi? (1) A de wan blesi taki wi kan memre den bun sani di wi ondrofeni, ma awinsi o switi wi libi ben de na ini a ten di pasa, a libi na ini a nyun grontapu o moro switi. (2) Tra sma kan du hati sani nanga wi, ma te wi e gi den pardon, dan wi o man poti moro prakseri na a anbegi fu Yehovah. (3) Te wi e denki taki Yehovah no gi wi pardon, dan dati kan tapu wi fu dini Yehovah nanga prisiri. Sobun, neleki Paulus wi musu bribi taki Yehovah de klariklari fu gi wi pardon.

19. Fa wi du sabi taki na ini a nyun grontapu wi no o prakseri sani di o meki wi sari?

¹⁹ Wi abi a howpu fu libi fu têgo. Na ini a nyun grontapu wi no o prakseri sani di o meki wi sari. Bijbel e taki fu a ten dati: „Sma no o memre den fositen sani moro” (Yes. 65:17). Prakseri a sani disi: Sonwan fu wi bigin dini Yehovah di wi ben yongu, ma now wi kon owru. Ma na ini a nyun grontapu wi o kon yongu baka (Yob 33:25). Fu dati ede, meki wi no tan luku go na baka. Na presi fu dati, meki wi luku go na fesi èn meki wi du ala san wi man fu doro na ini a nyun grontapu!