1-2. Akore ty azontikagne agnorihagne i toro lalagne amy Ohabolana 4:25 aoy? Magnomeza ohatse.

DINEHO ty raha natao ty rahalahy naho rahavave retoagne: Mahatsiaro ty raha mahafinaritse niaigna’e taloha ty rahavave fa bey raike. Tsy mora ty fiaigna’e amy izao, faie mikezake hanao ze fara heri’e amy ty fanompoagne i Jehovah avao reke. (1 Kor. 15:58) Isan’andro reke, le misaintsaigne ty ho fiaigna’e miarake amy ty longo’e naho ty nama’e amy tontolo vaovao ao. Mahatsiaro ty fahadisoagne natao ty mpiara-manompo tama’e ka ty rahavave raike. Faie nifily ty hagnaligno izay reke. (Kol. 3:13) Mahatsiaro ty fahadisoagne natao’e taloha ka ty rahalahy raike. Faie tsy nifantoke amy izay reke fa amy ze raha azo’e atao mba tsy hivalihagne amy i Jehovah.​—Sal. 51:10.

² Ino ty raha itoviza iareo telo? Sambe mahatsiaro ty raha niaigna’e taloha iareo faie nanapa-kevetse ty tsy hifantoke amy izay sasa. Ndra aleo iareo “magnente soa ty raha aloha agne”, ndra ty raha tamae iareo amy ty hoavy​—Vakio ty Ohabolana 4:25.

3. Nagnino tika ro mila “magnente soa ty raha aloha agne”?

³ Nagnino tika ro mila “magnente soa ty raha aloha agne”? Naho magnente afara agne avao ohatse ty ndaty raike naho fa mandeha, le tsy hahavita handeha mahitsy ndra hitsile lalan-kafa. Hoe izay ka, fa tsy ho afake hanohy ty fanompoa’e i Jehovah ty ndaty raike naho lava mieretseretse avao ty raha niaigna’e taloha.​—Lioka 9:62.

4. Ino ty hodinehentikagne ato?

⁴ Hodinehentika amy ty lahatsoratse toy ty raha telo va’e hahavy antikagne tsy hifantoke amy ty hoavy. * Voaloha’e, ty raha mahafinaritse niaignantika taloha. Faharoe, ty fahadisoagne natao ty hafa tamantika. Fahatelo, ty raha tsy mete nataontika. Hotreantikagne ka fa misy toro lala ty Baiboly afake magnampe antika tsy hifantoke  amy ‘ty raha afara agne’ fa amy ‘ty raha alohantikagne eo.’​—Fil. 3:13.

5. Ino ty raha tsy toko’e hataontika arake ty Mpitoriteny 7:10?

⁵ Vakio ty Mpitoriteny 7:10. Tsy te hirehake o andine’eo tie tsy mete ty mahatsiaro ndra mitadidy ty raha soa niaignantika taloha. Ty anto’e, fagnomezagne boake amy Jehovah o fitadidiagneo. Fa hoe reke: “Ko mirehake tie: ‘Nagnino koahe ty raha taloha ro soa naho oharegne ty amy izao?’” Toko’e hitao areke tika mba tsy hampitaha ty fiaignantikagne taloha naho ty fiaignantikagne amy izao, le hieretseretse tie: ‘Ndra aleoko avao i fiaignako talohay.’ Ty anto’e, rehafe ty tapa’e fara’e amy i andine’ey tie tsy fahendreagne ty fanoagne izay.

6. Nagnino ro tsy fahendreagne ty lava ametsevetseantikagne avao tie soa ty fiaignantika taloha naho oharegne ty amy izao? Magnomeza ohatse.

⁶ Nagnino ro tsy fahendreagne ty lava ametsevetseantikagne avao tie soa ty fiaignantika taloha naho oharegne ty amy izao? Naho itika manao izay, le ze raha soa niaignantikagne avao ro ho tsiarontika, fa ty fijaleagne nanjò antika tamy izay halignontika. Dineho ohatse ty raha natao o Israelitao. Naho fa niala ta Ejipta agne iareo, le avy le nihaligno iareo tie nijale iareo tie tagne. Fa nagnino? Satria nifantoke tamy ty hanegne nihane iareo tagne avao iareo. Hoe iareo: ‘Tsiaro’ay ty fiagne nihane’ay maimaimpoagne ta Ejipta agne naho ty kòkòmbra, vazavo, tongolo rave’e, tongolo zipo vaho ty tongolo lay.’ (Nom. 11:5) Nihane iareo maimaim-poagne avao vata’e o hanegne rehoe? Aha’a. Iareo aza tena nijale, satria sinere o Ejipsianao hiasa mafe manahake o ndevò. (Eks. 1:13, 14; 3:6-9) Faie nihaligno iareo ze fijaleagne niaigna iareo tagnate ty taogne maro zay naho fa tafara tatoy. Ty raha nahafinaritse niaigna iareo tagne avao ro nifantoha iareo, hafara’e nihaligno iareo ty raha soa natao i Jehovah hoahy iareo. Tena tsy nahafale i Jehovah ze raha natao iareo zay.​—Nom. 11:10.

7. Ino ty nagnampe ty rahavave raike tsy hametsevetse lava tie nisoa ty fiaigna’e taloha naho oharegne ty amy izao?

⁷ Inogne ty hagnampe antika hiala amo o fandrike raike iohoe? Dineho ty raha niaigna ty rahavave raike toy. Nanompo tamy i Betela i Brooklyn tagne reke nanomboke tamy 1945.  Nanambaly rahalahy Betelita raike zay reke taogne tsiampeampe tafara izay, le niarake nanompo tamy i Betela tao iareo tagnate ty taogne maro. Faie narare o vali’e iohoe tamy 1976 tagne ho agne. Naho fa nihay i rahalahỳ tie ho mate reke, le nimei’e torohevetse ty vali’e mba hagnampe aze hahavita hiatreke ty fiaigna’e. Hoe i rahalahỳ tama’e: “Tena nisambatse tika. Maro amy ty raha niaignantika ro tsy niaigna ty ankamaroa o mpivalio.” Hoe ka reke: “Maregne fa tsy ho haligno’o ty raha soa niarahantikagne faie ko le mametsevetse izay loatse fa mifantoha amy ty hoavy. Naho fa mandeha ty fotoagne, le ho sitragne avao ty alahelo’o. Ko kivy ndra magnomey tsiny ty vata’o. Mifalea noho i fotoagne mahafinaritse niarahantikagne nanompo i Jehovah rey. Naho fa mahatsiaro irey rehe afara agne, le ho fale. ... Fagnomezagne fanjaka nimein’Andrianagnahare antika o fitadidiagneo.” Tsy trea’o vao tie tena soa o torohevetse iohoe?

8. Ino ty soa nirambese i rahavavey naho fa nagnorike i toroheve i vali’ey reke?

⁸ Tena norihe i rahavaventikagney i torohevetse nimey i vali’e azey. Nanompo i Jehovah avao reke amparake ty nimateza’e, tamy ireke 92 taogne. Hoe reke taogne tsiampeampe taloha ty nimateza’e: “Naho fa mieretseretse ze 63 taogne nanompoako marain-tsy hariva zay raho, le afake mirehake tie tena nahafa-po ahy ty fiaignako.” Nagnino? Hoe reke: “Mahavy antika hahatsiaro ho afa-po amy ty fiaignagne ty fahatsapagne tie agnisa ty mpirahalahy magneran-tane tika. Eo ka ty fanantenantika hiarake hiaigne amy iareo naho fa amy i paradisay agne, sady hanompo i Mpamorogne Lahibeỳ, le i Jehovah, i Andrianagnahare maregney.” * Tena modely soa ho antika reke satria nifantoke tamy ty raha ampitamae i Jehovah amy ty hoavy.

9. Mirehake ty Levitikosy 19:18 fa tsy toko’e hitagne am-po tika. Naho fa ombia ro va’e ho sarotse amantika ty hagnorike io?

⁹ Vakio ty Levitikosy 19:18. Mateteke ro sarotse amantika ty mamela heloke, naho fa ty  mpiara-manompo amantika, ndra ty namantika maifitse antika, ndra ty longontika ro manao raha mahaboseke antika. Izao ohatse ty raha nanjò ty rahavave raike toy. Nasara ze rahavave raike zay ho nangalatse ty vola’e reke. Naho fa nihay i rahavavey tafara tatoy tie tsy ie o nangalatse i vola’ey io, le niala tsiny tama’e i rahavavey. Faie tsy nahavita namela ty helo i rahavavey reke satria lava nieretseretse avao i raha tsy mete natao i rahavavey. Fa nisy fotoagne vao rehe nahatsapa hoe izay? Faie ndra tie mbe tsy nanjò antika aza ty raha hoe izay, le maro amantika ty magneke fa tsy mora ty mamela heloke kindraike.

10. Inogne ty hagnampe antika hahavita tsy hitagne am-po?

¹⁰ Ino ty hagnampe antika tsy hitagne am-po? Tadidio fa mahavazoho ze kila raha ty Jehovah. Oni’e iaby areke ze raha manjò antika, agnisa izay ty tsy rare’e atao ty hafa amantika. (Heb. 4:13) Tena ore mafe reke naho fa mahavazoho antika mijale. (Isaia 63:9) Mampitamà ka reke fa hafaha’e ze kila raha mampijale antika, agnisa izay o tsy rare’e manjò antikagneo.​—Apok. 21:3, 4.

11. Inogne ty soa ho azontika naho itika mamela heloke?

¹¹ Mila tadidientika ka fa itika avao ro ho soregne naho fa tsy mamela heloke. Tena izay ty nitsapa i rahavave nirehafegne tambone teoy. Faie naho fa nandeha ty fotoagne, le nivita’e avao ty namela ty helo i rahavave nanao kitomboke azey. Ino ty nagnampe aze? Nianara’e fa tsy hamela ty helontika ty Jehovah naho tsy mamela ty hafa tika. (Mat. 6:14) Tsapa’e fa tsy mete ty raha natao i rahavavey tama’e, faie nijobogne ty hamela heloke aze reke. Voka’e, nanjare nahatsiaro ho sambatse reke sady nahavita nifantoke soa tamy ty fanompoa’e i Jehovah ka.

12. Ino ty ianarantika boake amy ty 1 Jaona 3:19, 20?

¹² Vakio ty 1 Jaona 3:19, 20. Va’e hisy fotoagne tika hagnamelo-tegna. Va’e hagnamelo-tegna ohatse tika noho ty raha tsy mete nataontika taloha ty nianarantika ty hamarenagne. Ty ila’e ka va’e hagnamelo-tegna noho ty fahadisoagne natao’e tafara ty nanoagne badisa aze. Va’e sambe mahatsapa izay iaby tika. (Rom. 3:23) Te hanao ty soa avao tika. Faie ‘mateteke tika ro manao fahadisoagne.’ (Jak. 3:2; Rom. 7:21-23) Maregne fa tsy teantika tihoe enjehe ty eretserentika faie misy mahasoa aze avao zay kindraike. Ty anto’e, ty fahatsapantikagne izay, le handrisike antika hagnova ty fomba fiaignantika, sady hagnampe antika ho tapa-kevetse tsy hagneregne i raha tsy mete nataontikagney sasa.​—Heb. 12:12, 13.

13. Nagnino tika ro mila mitao mba tsy hagnamelo-tegna lava avao?

¹³ Faie va’e hisy fotoagne ka tika lava hagnamelo-tegna avao ndra tie fa nibebake aza sady mahatrea porofo tie fa namela antika ty Jehovah. Tena raty ty voka izay. (Sal. 31:10; 38:3, 4) Nagnino? Dineho ty raha nanjò ty rahavaventikagne raike toy. Lava nagnamelo-tegna avao reke noho ty fahotagne lahibey natao’e taloha. Hoe reke: “Nieretseretse raho tie: ‘Nagnino moa raho ro mbe toko’e hikezake mafe hanao ty fanompoagne i Jehovah, ie amy izao fa tsy misy raha azo tamaegne sasa ty amako!’” Va’e maro amantika ty fa nahatsapa hoe izay ka. Mila mitao areke tika mba tsy ho lava hagnamelo-tegna avao. Nagnino? Satria tena ho fale ty Satana naho kivy tika, le mijanogne tsy manompo i Jehovah sasa, ie amy izao ty Jehovah fa namela antika.​—Ampitahao amy ty 2 Korintianina 2:5-7, 11.

14. Akore ty ahafantarantika fa tena namela ty helontika ty Jehovah?

¹⁴ Faie va’e mbe hieretseretse avao tika tie: ‘Akore ty ahafantarako fa tena namela ty heloko ty Jehovah?’ Naho ihe mieretseretse izay, le izay ty mampiseho fa mamela azo reke. Taogne maromaro lasa zay, le nisy Fitalakesan-davitse nirehake hoe izao: “Va’e mahatsapa tika tie misy fahazaragne raty nanagnantikagne taloha, hoe tsy vitantikagne zay ty miala ama’e.  Ty anto’e, mateteke tika ro rese ze fahalementika zay. ... Faie ko kivy ndra mieretseretse tie nanao fahotagne tsy ahazoagne famelan-keloke sasa rehe. I Satana avao ro te hampieretseretse azo izay. Ty anto’e, naho ihe magnamelo-tegna noho ty raha tsy mete natao’o, le izay ty mampiseho tie mbe tsy lasa lavitse loatse rehe, fa mbe managne toe-po soa. Miambanea le mivavaha mateteke amy i Jehovah mba hamela heloke azo, naho hagnomea’e azo feo ty fieretseretagne malio indraike sady mba hagnampea’e azo tsy hagneregne i fahadisoa’oy sasa. O ajajao zao tsy matahotse ty hangatake fagnampeagne aman-drae’e, ndra tie va’e miherenkeregne aze ty olagne mahazo aze. Hoe izay ka tika. Tsy toko’e hisalasala hangatake fagnampeagne amy i Jehovah tika, ndra tie rese ty fahalementika mateteke aza. Tena hagnampe antika reke naho manao izay tika, satria soa fagnahy reke.”

15-16. Ino ty raha tsapa ty Kristiana ila’e naho fa mahatsapa tie tena namela heloke iareo ty Jehovah?

¹⁵ Maro ty mpanompo i Jehovah nanjare nahatsiaro ho maivankivagne naho fa nahatsapa tie tena namela ty helo iareo ty Jehovah. Intoa misy ohatse. Taogne tsiampeampe lasa zay, le nisy rahavave raike nitantara ty raha niaigna’e amy i lahatsoratse manao tihoe rey tie “Magnova Ndaty ty Baiboly.” Nirehake reke fa sarotse tama’e ty nino tie tena namela heloke aze ty Jehovah noho ty raha raty natao’e taloha. Mbe nenjehe ty eretseretse’e avao reke ndra tie tafara ty nanoagne badisa aze aza. Nahatsapa hoe izay avao reke tagnate ty taogne maro. Faie naho fa nisaintsaigne laleke miomba i solovoigney reke, le nanjare rese lahatse vata’e fa tena tea aze ty Jehovah. *

¹⁶ Ino ty voka o tantara iohoe tamy ty rahalahy raike? Hoe reke: “Nagnente sare vetaveta mateteke raho tamy izaho mbe nitanora, le nandevoze’e tamy ty fara’e. Vaho tsiela aza zay, le nirese o fahalemeko iohoe indraike raho. Nangatake fagnampeagne tamo o androanavi-pagnahio raho, le nivitako avao ty niala tamo o fahazaran-draty iohoe. Nagnomey toky ahy iareo fa tena tea ahy ty Jehovah sady namela ty heloko. Faie misy fotoagne raho mbe magnamelo-tegna avao, le mieretseretse tie tsy fagneva ty ho tea i Jehovah sasa raho. Tena nampahery ahy areke i tantara i rahavaveỳ. Tsapako amy izao tie naho ohatse raho mieretseretse fa tsy afake hamela ty heloko ty  Jehovah, le hoe te hirehake ama’e raho tie tsy mahavita mandrongogne ty fahotako i solovoigne natao i Ana-dahi’eỳ. Nafahako i lahatsoratse misy i tantara iohoeỳ, le nindeseko avao, amy izay raho afake mamaky naho misaintsaigne aze naho fa manomboke mieretseretse tie tsy misy dika’e.”

17. Ino ty nagnampe i apostoly Paoly tsy hagnamelo-tegna lava tamy ty raha tsy mete natao’e?

¹⁷ Maniahy antika ty raha niaigna i apostoly Paoly o tantara rehoe. Maro ty raha raty natao’e taloha ty naha-Kristiana aze. Azo antoke fa nitadidy i Paoly i raha natao’e rey, faie tsy nifantoke tamy irey reke. (1 Tim. 1:12-15) Nirambese’e ho fagnomezagne manokagne ho aze i solovoigney. (Gal. 2:20) Tsy nagnamelo-tegna lava tamy i raha tsy mete natao’e rey areke ty Paoly, fa nifantoke tamy ze raha fanjaka azo’e nimeigne i Jehovah.

18. Ino iaby ty raha nianarantika tamy ty lahatsoratse toy ato?

¹⁸ Inogne iaby ty raha nianarantika tato? 1) Fagnomezagne boake amy i Jehovah o fitadidiagneo. Va’e hahatsiaro ty raha mahafinaritse niaignantika taloha areke tika. Faie ndra manao akore ty hasoa ty fiaignantika taloha, le mbe ho soa lavitse noho izay ty ho fiaignantika amy Paradisay ao. 2) Va’e hanao raha mahaboseke antika ty hafa, faie ho afake hanohy ty fanompoantika i Jehovah avao tika naho mifily ty hamela heloke. 3) Naho lava magnamelo-tegna avao tika, le va’e hisakagne antika tsy hanompo i Jehovah ampifaleagne zay. Mila rese lahatse manahake i Paoly areke tika tie fa namela ty helontika ty Jehovah.

19. Akore ty ahafantarantika tie tsy ho tsiarontikagne sasa ze raha nampanahelo antikagne taloha naho fa amy i tontolo vaovaoy ao?

¹⁹ Mitamà ty hiaigne nainai’e amy i tontolo vaovaoy ao tika. Tsy ho tsiarontikagne sasa amy izay ty raha iaby nampanahelo antika. Izao ty raha rehafe ty Baiboly miomba ze fotoagne zay: “Tsy ho tsiarovegne sasa, ... ty raha taloha.” (Isaia 65:17) Eretsereto moa zao: Ho lasa tanora indraike o rahalahy naho rahavaventika fa antetse rey naho fa amy tontolo vaovao agne. (Joba 33:25) Ko le mifantoke loatse amy ty raha niaignantika taloha areke. Mikezaha hifantoke amy ty hoavy ndra amy i tontolo vaovao tamaentikagney, le anò ze hiavia’o agne.