1-2. Nga tulaabelesya biyeni malayilile aajanika muli Tusimpi 4:25? Amba chikozyano.

YEEYA atala azikozyano zitatu zitobela. Muchizi wakomena ulikuyeeya zintu zibotu zyakachitika chiindi mubuumi bwakwe. Nikuba kuti lino ulikuswaanana abuyumu-yumu, ulikwiinkilila kunembo kabelekela Jehova amanguzu aakwe woonse. (1 Kor. 15:58) Buzuba abuzuba ulibona kali munyika mpya abamumpuli yakwe abeenzinyina. Umwi muchizi wayeeya chintu chitali kabotu nchaakachitilwa amweenzinyina pesi wasala kumulekelela. (Kol. 3:13) Umwi mukwesu wayeeya chibi nchaakachita chiindi. Pesi wasala kukkala kasyomeka kuli Jehova.—Int. 51:10.

² MaKristu aaya aatatu afenene biyeni? Boonse bayeeya zintu zyakabachitikila chiindi pesi teebazumizya zintu eezyo kuti zibakachizye kubelekela Jehova pe. Basala “kulanga buyo kumbele.”—Bala Tusimpi 4:25.

3. Nkamboonzi nitweelede ‘kulanga kunembo’?

³ Nkamboonzi nikuyandikana ‘kulanga kunembo’? Muntu takonzyi pe kweenda kabotu kuti weenda kalanga musule. Andiswe tatukonzyi pe kubelekela Jehova kuti twakkala katulanga zintu nzitwakachita chiindi.—Lk. 9:62.

4. Tulalanga-langaanzi muchiiyo eechi?

⁴ Muchiiyo eechi, tuyanda kubona zintu zitatu zikonzya kupa kuti tukkale katuyeeya zintu zyakachitika chiindi. Zintu eezi ziswaanizya (1) kulombozya buumi bwachiindi, (2) kutalekelela (3) akukkala katulipa mulandu. Tulabona kuti Bbayibbele nga lilatugwasya biyeni kuti tutalangi zintu “zili musyule” pesi tulange “zintu zili kumbele.”—Flp. 3:13.

5. Kweendelana alugwalo lwa Mukambausi 7:10, niinzi nchituteelede kuchita?

⁵ Bala Mukambausi 7:10. Lugwalo oolu talwaambi kuti nkubi kulibuzya kuti: “Nkamboonzi mazuba aachiindi nchaakali mabotu?” Teekubi pe kulibuzya oobo nkaambo Leza wakatulenga katukonzya kuyeeya zintu zibotu zyakachitika chiindi. Pesi lugwalo oolu luti: “Utaambi kuti, ‘Ino nkaambo nzi mazuba aakaindi ncaakali mabotu kwiinda mazuba aano?’” Muli aamwi majwi, tatweelede kukozyanisya mazuba aachiindi amazubaano mpawo twaambe kuti mazuba aano mayumu.

6. Nkamboonzi nibutali busongo kulombozya buumi mbutwakali kupona chiindi? Amba chikozyano.

⁶ Nkamboonzi nibutali busongo kulombozya buumi mbutwakali kupona chiindi? Nkaambo tulakonzya kuyeeya zintu zibotu luzutu akuluba buyumu-yumu mbutwakali kuswaana. Atubone chikozyano chamaIsrayeli. Bakaluba kuti buumi bwakali buyumu biyeni kuEgepita. Pesi bakali kuyeeya chakulya chinono nchibakali kupegwa. Bakaamba kuti: “Eelo kaka twaziyeeya nswi nzyotwakali kulya kakunyina kuula mu Egepita, alimwi amakowa, banamunywa, mahanyisi amagaliki!” (My. 11:5) Pesi nisimpe na kuti bakali kulya chakulya eechi ‘kakunyina kuchuula?’ Peepe. MaIsrayeli bakali kupenzegwa loko. Aachiindi eecho bakali bazike kuEgepita. (Kul. 1:13, 14; 3:6-9) MaIsrayeli bakabuluba buyumu-yumu mbubakali kuswaana mpawo bakali kuyeeya kuti babweede. Bakali kukkala kabayeeya buumi mbubakali kupona chiindi kutali kubikkila maanu kuzintu zibotu Jehova nzyaakabachitila. Eezi teezyakamubotezya pe Jehova.—My. 11:10.

7. Niinzi chakagwasya umwi muchizi kuti atakkali kayeeya zintu zyakachitika musule?

⁷ Niinzi chikonzya kutugwasya kuti tutakkali katuyeeya zintu zyakachitika musule? Atubone chikozyano chamuchizi wakasaanguna kubeleka kuBbeteli kuBrooklyn mu1945. Mukuya kwachiindi, wakazookwatwa awumwi mukwesu ngubakali aamwi kuBbeteli alubo bakabeleka kuBbeteli kwaminyaka myiingi.  Pesi mu1976 mulumaakwe wakasaanguna kuchiswa. Naakaba aafwiifwi kufwa, mulumaakwe wakamubuzya majwi akamugwasya kuti alisimye. Wakamubuzya kuti: “Twali kubotelwa mulukwatano lwesu. Mbache loko bantu babotelwa oobo. Nikuba kuti tukooziluba pe zintu zibotu zyakachitika mubuumi bwesu pesi utakkali kuyeeya nzizyo. Mukuya kwachiindi uzooba kabotu. Utakataazikani loko pe alubo utamani manguzu. Botelwa achiindi chibotu nchitwakalaacho mukubelekela Jehova. . . . Leza wakatulenga katukonzya kuyeeya zintu zyakachitika.” Majwi aaya akamusungwaazya loko muchizi ooyu.

8. Umwi muchizi wakagwasigwa biyeni amajwi ngaakabuzigwa amulumaakwe?

⁸ Muchizi ooyu wakaabelesya majwi ngaakabuzigwa amulumaakwe. Wakazumanana kubelekela Jehova kusikila naakafwa kali aminyaka iili 92. Kakuli kwasyaala minyaka miche kuti afwe wakaamba kuti: “Kuti ndayeeya minyaka iili 63 njindakabelekela Jehova mumulimu wachiindi choonse nga ndabona kuti ndakapona buumi bulaampindu.” Nkamboonzi naakati wakapona buumi bulaampindu? Wakati: “Chipa kuti tupone buumi bulaampindu nkuti, tuli abakwesu abachizi batuyanda. Alubo tuli abulangilizi bwakupona ambabo kukabe kutamani munyika yaparadayizi katubelekela Mulengi wesu Mupati, Jehova Leza wesu.” Muchizi ooyu nchikozyano chibotu loko chamuntu wakabikkila maanu kuzintu zili kunembo.

9. Kweendelana a Levitiko 19:18 ndiilili nikukonzya kutuyumina kulekelela umwi muntu?

⁹ Bala Levitiko 19:18. Chiindi chiingi nkuyumu kulekelela muntu watubisizya kapati kuti kali mukombima, mweenzuma naakuti bbululu wesu. Muchikozyano, umwi muchizi wakatamikizya umwi muchizi kuti wamubbida mali yakwe. Mukuya kwachiindi, wakabona kuti nzyaakali kumutamikizya teenzizyo pe  mpawo wakakumbila lulekelelo pesi muchizi wakatamikizigwa kwakamuyumina kuti amulekelele. Kuli nikwakali kwakuyumina na kulekelela umwi muntu? Nikuba kuti tunaswaanana achiimo chili mbuli chamuchizi ooyu pesi biingi besu nga kwatuyumina kulekelela umwi muntu.

10. Niinzi chikonzya kutugwasya kuti kakutuyumina kulekelela bamwi?

¹⁰ Niinzi chikonzya kutugwasya kuti kakutuyumina kulekelela bamwi? Tweelede kuyeeya kuti Jehova ulazibona zintu zyoonse. Ulazibona zintu zyoonse zituchitikila kuswaanizya akutajatwa kabotu. (Heb. 4:13) Zilamuchisa chiindi nituli mumapenzi. (Is. 63:9) Utusyomezya kuti uyoomaninsya machise woonse ngituswaana akaambo kakutajatwa kabotu.—Ciy. 21:3, 4.

11. Kulekelela bamwi kutugwasya biyeni?

¹¹ Alubo tweelede kuziba kuti kulekelela bamwi kugwasya ndiswe. Eezi nzizyo nzyaakabona muchizi wakatamikizigwa kuti wakabba mali. Mukuya kwachiindi wakazoomulekelela muchizi ooyo. Wakabona kuti kulekelela bamwi kupa kuti Jehova atulekelele. (Mt. 6:14) Taakawubansya zyakachitwa amuchizi ooyo pe pesi wakasala kumulekelela. Eezi zyakapa kuti muchizi ooyu abotelwe loko akuti ayinkilile kunembo kabelekela Jehova.

12. Lugwalo lwa 1 Johane 3:19, 20 lutuyiisyaanzi?

¹² Bala 1 Johane 3:19, 20. Chimwi chiindi toonse nga twalipa mulandu. Muchikozyano, bamwi nga balipa mulandu akaambo kazintu zibi nzibakali kuchita kabatanayiya kasimpe. Alubo bamwi nga balipa mulandu akaambo kazibi nzibakachita kabali babbabbatizigwa. (Rom. 3:23) Nisimpe kuti tuyanda kuchita zintu zili kabotu pesi “toonse tulalubizya ziindi zinji.” (Jak. 3:2; Rom. 7:21-23) Nikuba kuti kulipa mulandu kulachisa pesi kulagwasya. Kutugwasya biyeni? Kulakonzya kutugwasya kuti tubambulule akuti tutazooyindululi pe.—Heb. 12:12, 13.

13. Nkamboonzi nituteelede kukkala katulipa mulandu?

¹³ Chimwi chiindi tulakonzya kulipa mulandu zyiindilide nikuba kuti twakasiya zibi nzitwakachita akuti Jehova kali wakatondeezya kuti wakatulekelela. Kulipa mulandu munzila iili boobo takuli kabotu pe. (Int. 31:10; 38:3, 4) Nkamboonzi nikutali kabotu? Atubone chikozyano chawumwi muchizi wakali kukkala kalipa mulandu akaambo kazibi nzyaakachita chiindi. Wakati: “Ndakalibuzya kuti tandeelede kubelekela Jehova pe amoyo woonse nkaambo tandikafutuki kale pe.” Biingi besu nga balimvwa mbuli muchizi ooyu. Tatweelede kukkala katulipa mulandu. Nkamboonzi? Nkaambo kukkala katulipa mulandu kulakonzya kupa kuti tuleke kubelekela Jehova nikuba kuti nga utuchiyanda. Kuti twachita oobo tulapa kuti Saatani abotelwe.—Kozyanisya a 2 Bakorinto 2:5-7, 11.

14. Nga tulaziba biyeni kuti Jehova wakatulekelela?

¹⁴ Chimwi chiindi tulakonzya kulibuzya kuti, ‘Nga ndilaziba biyeni kuti Jehova wakandilekelela?’ Kulibuzya mubuzyo ooyu kutondeezya kuti Jehova wakakulekelela. Imwi Ngaziyakulinda yachiindi yakati: “Tulakonzya kwiindulula zintu nzitwakabisya. Tulakonzya kuchita oobo akaambo kakuti nga teetwakachincha munzila iimaninide pe chiindi nitwakasaanguna kubelekela Jehova. . . . Pesi utamani manguzu. Utabonaanga wakachita chibi chipati zyakuti tukonzyi kulekelelwa pe. Saatani uyanda kuti tuyeeye mbuboobo. Kulisola akaambo kakuyindulula chibi kutondeezya kuti uli munzila akuti Jehova uchikuyanda. Tondeezya kulibombya kwiinda mukukomba kuli Jehova kuti akulekelele akuti  akugwasye kuti utanoolipi mulandu. Mwana ulakonzya kwiinka twiingi kuli wisi kayanda kuti akamugwasye chintu chimwi mpawo wisi nga wamugwasya. Munzila iikozyenie andiswe kuti twayindulula chibi mpawo twakumbila kuli Jehova kuti atulekelele, ulatulekelela.”

15-16. Bamwi bakamvwa biyeni chiindi nibakabona kuti Jehova wakabalekelela?

¹⁵ Bakombi baJehova biingi bakagwasigwa chiindi nibakabona kuti Jehova wakabalekelela. Muchikozyano, muminyaka miche yakayinda umwi mukwesu wakawumbulizigwa anzyaakabala muNgaziyakulinda. MuNgaziyakulinda eeyo, kwakali chikozyano chawumwi muchizi wakali kubonaanga Jehova takonzyi kumulekelela akaambo kazibi nzyaakachita chiindi. Muchizi ooyu wakayinkilila kunembo kalipa mulandu nikuba nikwakayinda chiindi kali wabbabbatizigwa. Pesi kuyeeyesesya atala achinunuzyo kwakapa kuti aleke kulipa mulandu.

¹⁶ Chikozyano chamuchizi chakamugwasya biyeni mukwesu ooyu? Wakati: “Kandichili muniini ndakali apenzi lyakweebela ponogilafu alubo kwakali kundiyumina kuti ndileke kwiiyebela. Ndakazooyebela lubo lino-lino. Pesi ndakayinka kubaalu kuti bandigwasye. Lino ndilikubeleka changuzu kuti ndileke kwiiyebela. Baalu bakandigwasya kubona kuti Jehova ulaaluyando akuti ulakonzya kundilekelela. Nikuba boobo, chimwi chiindi nga ndalimvwa kanditagwasyi pe akubonaanga Jehova tandiyandi pe. Kubala makani ali atala amuchizi ooyu kwakandigwasya. Ndakabona kuti kulibuzya kuti Leza takonzyi pe kundilekelela kulifenene akwaamba kuti chinunuzyo chamwanaakwe tachikkwani pe kumaninsya mulandu wangu. Ndakadabula akubamba pepa lilaamakani aaya kuchitila kuti ndaabale chiindi mizeezo yakulipa mulandu niyasika.”

17. Niinzi chakagwasya mwaapostolo Pawulu kuti atakkali kalipa mulandu?

¹⁷ Zikozyano eezi zituyeezya chikozyano chamwaapostolo Pawulu. Katanaba muKristu wakachita zibi zyiingi. Nikuba kuti Pawulu taakaziluba pe nzyaakachita pesi taakali kukkala kalipa mulandu pe. (1 Tim. 1:12- 15) Wakali kusyoma kuti wakalekelelwa nkaambo wakali kubona chinunuzyo mbuli chipo nchaakamupa Leza. (Gal. 2:20) Eezi zyakagwasya Pawulu kuti atakkali kalipa mulandu pesi abikkile maanu kukubelekela Jehova.

18. Twayiyaanzi muchiiyo eechi?

¹⁸ Twayiyaanzi muchiiyo eechi? (1) Kuyeeya zintu zyakatuchitikila musule nchipo chizwa kuli Jehova pesi tatweelede kuyeeya kuti buumi mbutwakapona musule mbubotu kwiinda mbutuyoopona kunembo munyika mpya. (2) Bamwi balakonzya kutubisizya pesi kubalekelela kulatugwasya kuti twiinkilile kunembo katubelekela Jehova. (3) Kukkala katulipa mulandu kulakonzya kupa kuti tukachilwe kubelekela Jehova katubotelwa. Mbuli Pawulu tweelede kusyoma kuti Jehova wakatulekelela.

19. Tuzizi biyeni kuti munyika mpya tatuchinooyeeyi zintu zitape kuti tulipe mulandu?

¹⁹ Tulaabulangilizi bwakupona kukabe kutamani. Munyika mpya tatuchinooyeeyi zintu zitape kuti tulipe mulandu. Kalipandulula chiindi eecho Bbayibbele lyaamba kuti: “Zintu zyakaindi tazikaibalukwi limbi pe.” (Is. 65:17) Amuyeeye kuti bamwi bakombi baJehova bachembaala pesi munyika mpya bazooba baniini lubo. (Job. 33:25) Toonse atube amakanze akutalombozya buumi mbutwakali kupona musule pesi atulange kunembo, tuchite zyoonse nzitukonzya kuti tukapone munyika mpya.