1-2. Olsem wanem yumi ken bihainim edvais i stap long Provep 4:25? Stori long wanpela eksampel.

TINGIM ol dispela eksampel. Wanpela lapun sista i tingim ol gutpela samting i bin kamap long laip bilong em long bipo. Maski laip bilong em long nau i gat ol hatwok, em i givim bel yet long mekim wok bilong Jehova inap long skel bilong em. (1 Kor. 15:58) Olgeta de em i save piksaim em yet na ol wanblut bilong em i stap long nupela taim em God i tok promis long en. Narapela sista i tingim olsem wanpela sista i bin rongim em, tasol em i no tingim tingim na holim yet bel nogut long em. (Kol. 3:13) Wanpela brata i luksave long ol rong em i bin mekim long bipo, tasol em i putim tingting long stap gut long God kirap long nau na i go.—Sng. 51:10.

² Wanem samting i wankain long dispela 3-pela Kristen? Olgeta i bin tingim ol dispela samting i bin painim ol long bipo, tasol oltaim ol i no laik tingim tingim ol dispela samting, nogat. Ol i “lukluk i go stret” long ol samting bai kamap bihain.—Ritim Provep 4:25.

3. Wai na yumi mas “lukluk i go stret” long ol samting bai kamap bihain?

³ Wai na em i bikpela samting long yumi mas “lukluk i go stret” long ol samting bai kamap bihain? Sapos man i wok long lukluk i go long baksait, em bai no inap long wokabaut stret. Olsem tasol, yumi no inap mekim gut wok bilong Jehova sapos oltaim yumi wok long tingim tingim ol samting i bin kamap long laip bilong yumi long bipo.—Luk 9:62.

4. Long dispela atikol, yumi bai stori long wanem ol samting?

⁴ Long dispela atikol, yumi bai stori long 3-pela samting we inap mekim na yumi tingim yet ol samting i bin kamap long bipo. Ol dispela samting em: (1) driman long laip bilong yumi long bipo, (2) pasin bilong bel nogut, na (3) pasin bilong larim bel i kotim yumi oltaim. Taim yumi skelim wan wan bilong ol dispela samting, yumi bai luksave long olsem wanem ol stiatok bilong Baibel inap helpim yumi na bai yumi no ken tingim tingim “ol samting bilong  bipo,” nogat, i gutpela yumi tingim “ol samting bai kamap bihain.”—Fili. 3:13.

5. Eklisiastis 7:10 i tok yumi mas was gut long wanem samting?

⁵ Ritim Eklisiastis 7:10. Lukim olsem dispela ves i no tok i gat rong long mekim dispela askim olsem: “Wai na taim bipo i gutpela?” Ol gutpela memori em presen yumi kisim long Jehova. Tasol ves i tok: “No ken tok, ‘Wai na taim bipo i gutpela moa winim dispela taim nau?’” Yumi mas was gut na bai yumi no ken kisim pasin bilong skelim laip bilong yumi long bipo wantaim laip bilong yumi long nau, na yumi kisim tingting olsem olgeta samting i go nogut moa long nau. Narapela Baibel i trensletim dispela ves olsem: “No ken askim, ‘O, wai na ol samting i bin gutpela moa long bipo?’ I no savetingting long tromoi dispela askim.”

6. Wai na yumi no ken holim tingting olsem laip bilong yumi long bipo i bin gutpela tru? Stori long wanpela eksampel.

⁶ Wai na yumi no ken holim tingting olsem laip bilong yumi long bipo i bin gutpela tru? Sapos yumi driman long laip bilong yumi long bipo, dispela inap mekim na yumi tingim tasol ol gutpela samting i bin kamap long bipo. Na yumi lusim tingting long ol hevi i bin painim yumi long bipo. Tingim eksampel bilong lain Israel long pastaim. Bihain long ol i lusim Isip, wantu tasol ol i lusim tingting long ol bikpela hevi ol i bin karim long dispela ples. Ol i wok long tingim tingim ol gutpela kaikai ol i bin kisim. Ol i tok: “Mipela i tingim taim mipela i bin stap long Isip, mipela i save kaikai pis em mipela i kisim nating. Na mipela i save kisim ol kukamba, ol melen, ol anian, na galik.” (Nam. 11:5) Tasol yu ting tru tru ol i “kisim nating” ol dispela kaikai? Nogat. Lain Israel i bin karim bikpela pen na hevi; long dispela taim ol i bin stap olsem ol sleiv na ol Isip i bin mekim nogut tru long ol. (Kis. 1:13, 14; 3:6-9) Tasol ol i lusim tingting long ol hevi ol i bin karim na ol i laikim ol samting em ol i bin kisim long bipo. Ol i tingim ol samting i bin kamap bipo, na ol i lusim tingting long ol samting Jehova i mekim bilong helpim ol. Jehova i no amamas long pasin ol i mekim.—Nam. 11:10.

7. Wanem samting i helpim wanpela sista long abrusim pasin bilong driman long laip bilong em long bipo?

⁷ Olsem wanem yumi ken abrusim pasin bilong  driman long laip bilong bipo? Skelim eksampel bilong wanpela sista husat i mekim wok long Brooklyn Betel kirap long 1945. Sampela yia bihain, em i maritim wanpela brata long Betel na tupela i wok long Betel inap planti yia. Tasol long 1976, man bilong em i sik. Dispela sista i tok taim man bilong em i luksave olsem klostu taim em bai dai, em i givim gutpela tok long em bilong helpim em long karim hevi bilong i stap wanpis. Em i tokim meri bilong em: “Yumi bin kisim amamas long marit bilong yumi. Tasol planti ol i no bin kisim amamas olsem.” Na em i tok moa olsem: “No ken tingting oltaim long ol samting bilong bipo—tasol bai yu holim yet ol dispela tingting. Isi isi bel bilong yu bai orait gen. Yu no ken kros o bel nogut na sori long yu yet. Yu mas amamas long ol gutpela samting na ol amamas yu bin kisim. . . . Pasin bilong holim ol samting long tingting em wanpela presen God i bin givim long yumi.” Ating yu bai wanbel olsem dispela em gutpela edvais, a?

8. Sista bilong yumi i no tingim tingim ol samting bilong bipo na olsem wanem dispela i bin helpim em?

⁸ Sista bilong yumi i bihainim dispela edvais em i bin kisim. Em i mekim wok bilong Jehova i go inap long taim em i gat 92 krismas na em i dai. Sampela yia paslain long em i dai, em i tok: “Taim mi tingim bek dispela 63 yia mi bin mekim wok bilong Jehova fultaim, mi inap tok olsem, mi amamas long i stap bilong mi insait long ol dispela yia.” Wai? Em i tok moa olsem: “Samting i mekim na mi stap amamas tru, em gutpela lain brata bilong yumi na gutpela samting yumi wetim, em yumi bai stap wantaim ol brata na sista bilong yumi long Paradais bai kamap long graun, na mekim wok bilong dispela wanpela God tru, Jehova, i go inap oltaim oltaim.” * Em i stap gutpela piksa tru long pasin bilong tingim tingim ol gutpela samting bai kamap bihain!

9. Olsem Wok Pris 19:18 i kamapim, wai na yumi inap pilim hatwok long lusim pasin bilong bel nogut long wanpela?

⁹ Ritim Wok Pris 19:18. Sampela taim yumi inap pilim hatwok long lusim pasin bilong bel  nogut na yumi no laik fogivim wanpela wanbilip, gutpela pren, o wanblut em ol i bin rongim yumi. Olsem, wanpela sista i bin bel hevi taim wanpela wanbilip i sutim tok long em olsem em i bin stilim mani bilong em. Bihain, dispela wanbilip husat i bin sutim tok long em i tok sori long pasin em i bin mekim, tasol dispela sista i bel hevi tru na i hatwok long em i lusim tingting long samting i bin kamap. Olsem wanem? Yu bin pilim olsem tu? Maski yumi no bungim wankain hevi, ating planti bilong yumi inap pilim hatwok long lusim pasin bilong bel nogut na yumi no laik fogivim wanpela husat i bin rongim yumi.

10. Wanem samting inap helpim yumi sapos yumi pilim hatwok long lusim pasin bilong bel nogut?

¹⁰ Wanem samting inap helpim yumi sapos yumi pilim hatwok long lusim pasin bilong bel nogut long wanpela? Tingim olsem Jehova i save lukim olgeta samting. Em i save long olgeta samting i kamap long laip bilong yumi, na em i save tu taim ol narapela i mekim pasin i no stret long yumi. (Hib. 4:13) Em i save pilim hevi bilong yumi. (Ais. 63:9) Na em i tok promis olsem klostu nau em bai pinisim ol pen na hevi em yumi karim long han bilong ol man em ol i mekim pasin i no stret long yumi.—Rev. 21:3, 4.

11. Taim yumi lusim pasin bilong bel nogut, olsem wanem yumi helpim yumi yet?

¹¹ Tingim tu olsem taim yumi lusim pasin bilong bel nogut long narapela, yumi helpim yumi yet. Sista bilong yumi em yumi bin stori long em long paragraf 9 i luksave long dispela samting. Bihain long sampela haptaim i lus, em i lusim pasin bilong bel nogut na em i fogivim dispela sista husat i bin sutim tok long em. Em i luksave olsem sapos yumi fogivim ol narapela, Jehova bai fogivim yumi tu. (Mat. 6:14) Em i save olsem pasin dispela sista i bin mekim i no stret, tasol em i mekim disisen long lusim pasin bilong bel nogut long sista bilong em. Dispela i mekim na em i stap amamas na em i putim tingting olgeta long mekim wok bilong Jehova.

12. Yumi kisim wanem skul long 1 Jon 3:19, 20?

¹² Ritim 1 Jon 3:19, 20. Sampela taim yumi save pilim olsem bel i kotim yumi. Olsem, bel bilong sampela manmeri inap kotim ol bikos ol i tingim bek ol samting ol i bin mekim paslain long ol i kisim save long tok i tru. Ol narapela em bel i kotim ol bikos ol i tingim ol rong ol i bin mekim bihain long ol i kisim baptais. Em nomol long yumi olgeta i pilim olsem. (Rom 3:23) Em tru olsem yumi laik bihainim stretpela pasin. Tasol “planti taim yumi olgeta i save popaia.” (Jems 3:2; Rom 7:21-23) Yumi no save amamas taim bel i kotim yumi, tasol gutpela samting inap kamap taim bel i kotim yumi. Wai na yumi tok olsem? Bikos taim bel i kotim yumi, dispela inap kirapim yumi long senisim sampela pasin bilong yumi, na yumi bai tingting strong long no ken mekim gen wankain rong em yumi bin mekim.—Hib. 12:12, 13.

13. Wai na yumi mas was gut na bai yumi no larim bel i kotim yumi oltaim?

¹³ Sampela taim bel inap kotim yumi yet maski yumi tanim bel pinis long ol rong bilong yumi na Jehova i fogivim yumi pinis. Sapos oltaim yumi larim bel i kotim yumi, dispela inap nogutim yumi. (Sng. 31:10; 38:3, 4) Wai na yumi tok olsem? Tingim eksampel bilong wanpela sista em bel i wok yet long kotim em long ol rong em i bin mekim long bipo. Em i tok: “Mi ting mi no ken mekim moa wok bilong Jehova, long wanem, ating em i no laikim mi moa.” Ating planti bilong yumi i pilim olsem tu. Em i bikpela samting long yumi mas was gut na bai yumi no larim bel i kotim yumi oltaim. Satan bai amamas tru sapos yumi givap na stop long mekim wok bilong Jehova, tasol Jehova i laikim yumi yet na em i no givap long yumi!—Skelim 2 Korin 2:5-7, 11.

14. Hau na yumi inap save stret olsem Jehova i no givap long yumi?

¹⁴ Ating yumi bai tingting olsem, ‘Hau na mi  inap save stret olsem Jehova i no givap long mi?’ Sapos yumi mekim dispela askim, dispela i makim olsem Jehova inap fogivim yumi. Inap planti yia i go pinis, Wastaua i tok: “Sapos yumi gat wanpela pasin i no stret na bipo yumi bin wokabaut long dispela pasin na em i strong tru long skin bilong yumi, ating planti taim bai yumi pundaun na mekim gen. . . . Tasol bel bilong yu i no ken bagarap olgeta long dispela. Yu no ken ting yu bin mekim dispela kain rong Jehova i no inap lusim tingting long en. Satan i laik bai yu ting olsem. Sapos yu bel hevi stret na yu kros long skin bilong yu yet long yu bin pundaun na mekim gen dispela rong, yu ken save, yu inap i kam bek long Jehova. Yu no ken les long mekim pasin daun na go long God, na beten askim em long lusim rong bilong yu na mekim yu i kamap klin na helpim yu. Yu mas i go long em olsem pikinini i save go long papa taim em i gat hevi, maski hamas taim yu mas askim em gen long lusim dispela rong. Jehova i gat pasin sori, olsem na em bai helpim yu.” *

15-16. Sampela bratasista i pilim olsem wanem taim ol i luksave olsem Jehova i no givap long ol?

¹⁵ Ol manmeri i lotuim Jehova, planti bilong ol i kisim bel isi taim ol i luksave olsem Jehova i no givap long ol. Olsem, sampela yia i go pinis, wanpela brata i pilim tru ekspiriens em i bin ritim long wanpela atikol bilong dispela hap “Baibel i Save Senisim i Stap Bilong Man.” Long dispela atikol, wanpela sista i tok stret olsem planti hevi i bin painim em long laip bilong em, olsem na em i pilim hatwok long bilip olsem Jehova i laikim em. Em i pilim olsem yet inap planti yia bihain long em i kisim baptais. Tasol taim em i tingim tingim long bel pe bilong baim bek ol man, dispela i helpim em long bilip olsem Jehova i laikim em. *

¹⁶ Olsem wanem ekspiriens bilong sista i helpim dispela brata? Em i tok: “Taim mi yangpela, mi bin kalabus long pasin bilong lukim ponografi, na mi bin wok strong long lusim dispela pasin. Tasol i no longtaim i go pinis, mi insait gen long dispela pasin. Mi go long ol elda Kristen long kisim helpim, na mi wok long daunim dispela hevi. Ol elda i strongim mi olsem God i laikim mi tru na em i marimari long mi. Maski i olsem, sampela taim mi save pilim olsem mi samting nating tasol, i olsem Jehova i no inap laikim mi. Tasol mi kisim bikpela helpim tru taim mi ritim ekspiriens  bilong [dispela sista]. Nau mi luksave olsem taim mi bin tingim olsem God i no inap lusim rong bilong mi, i olsem mi tok ofa bilong Pikinini bilong em i no inap long karamapim sin bilong mi. Mi putim gut dispela atikol bambai mi ken ritim na tingim tingim long bel taim mi pilim olsem mi samting nating tasol.”

17. Olsem wanem Pol i abrusim pasin bilong larim bel i kotim em oltaim?

¹⁷ Ol kain ekspiriens olsem i kirapim yumi long tingim stori bilong aposel Pol. Paslain long em i kamap wanpela Kristen, em i bin mekim ol bikpela rong. Pol i tingim yet ol rong em i bin mekim, tasol em i no tingim tingim ol dispela samting long olgeta taim. (1 Tim. 1:12-15) Em i tingim pe bilong baim bek man olsem presen God i givim long em. (Gal. 2:20) Dispela i helpim Pol long abrusim pasin bilong larim bel i kotim em oltaim, na em i putim tingting olgeta long mekim gut wok bilong Jehova.

18. Yumi kisim wanem skul long dispela atikol?

¹⁸ Yumi kisim wanem skul taim yumi skelim ol poin yumi stori long en long dispela atikol? (1) Ol gutpela memori em blesing yumi kisim long Jehova; tasol maski laip bilong yumi long bipo i bin gutpela, laip bilong yumi long nupela taim bai i gutpela moa. (2) Ol narapela inap rongim yumi, tasol sapos yumi fogivim ol, dispela bai helpim yumi long putim tingting long mekim wok bilong Jehova. (3) Sapos oltaim yumi larim bel i kotim yumi, dispela inap pasim yumi long amamas long mekim wok bilong Jehova. Olsem na wankain olsem Pol, yumi mas bilip tru olsem Jehova i fogivim yumi.

19. Hau na yumi save olsem long nupela taim, yumi no inap tingim moa ol samting bilong bipo?

¹⁹ Yumi bilip na wet long kisim laip oltaim long bihain. Long nupela taim em God i tok promis long kamapim, yumi no inap tingim moa ol samting bilong bipo. Baibel i stori long dispela taim bihain, na em i tok: “Yupela i no inap tingim gen ol samting bilong bipo.” (Ais. 65:17) Tingim dispela: Sampela bilong yumi i mekim wok bilong Jehova inap planti yia na yumi kamap lapun pinis, tasol long nupela taim, yumi bai kamap yangpela gen. (Jop 33:25) Olsem na yumi mas tingting strong long no ken putim tingting olgeta long ol samting i kamap long bipo. Mobeta yumi putim tingting i go long nupela taim bai kamap bihain, na yumi laik mekim olgeta samting yumi inap mekim bilong stap long dispela taim bai kamap bihain!