NKHANI YAKUSAMBIRA 48
‘Ulaŵiskenge Kunthazi’
“Maso ghako ghalaŵiskenge kunthazi, enya, ulaŵiske dodoli panthazi pako.”—ZINTH. 4:25.
SUMU 77 Ungweru mu Charu cha Chisi
CHILATO CHA NKHANI IYI *
1-2. Kasi tingalondezga wuli ulongozgi uwo ukusangika pa Zintharika 4:25? Pelekani chiyelezgero.
GHANAGHANIRANI viyelezgero ivi. Mudumbu muchekuru wakughanaghanira umo wakakondweranga kumanyuma. Nangauli pasono umoyo wake ngwakusuzgikira, kweni wakuchita vyose ivyo wangafiska pakuteŵetera Yehova. (1 Kor. 15:58) Zuŵa lililose wakughanaghanira kuti wali mu charu chiphya pamoza na ŵakutemweka ŵake. Mudumbu munyake wakukumbukira kuti munyake wa mu mpingo wakamukhuŵazga, kweni wasankha kuleka waka kughanaghanira chomene nkhani iyi. (Kol. 3:13) Mubali wakukumbuka ivyo wakanangiska kumanyuma kweni sono wakuchita vyose ivyo wangafiska kuti walutilire kugomezgeka kwa Yehova.—Sal. 51:10.
2 Kasi ntchivichi icho Ŵakhristu wose ŵatatu aŵa ŵakuyana? Wose ŵakukumbuka ivyo vikaŵachitikirapo kumanyuma, kweni ŵakukhalira waka kughanaghana vinthu ivi yayi. M’malo mwake ‘ŵakulaŵiska dodoli kunthazi.’—Ŵazgani Zintharika 4:25.
3. Chifukwa wuli tikukhumbikwira ‘kulaŵiska kunthazi’?
3 Chifukwa wuli ntchakuzirwa ‘kulaŵiska kunthazi’? Para munthu wakwenda uku wakulaŵiska kumanyuma, wakwenda makora yayi. Ndimo vikuŵiraso para tikuteŵetera Yehova. Tingamuteŵetera makora yayi para nyengo zose tikughanaghanira waka ivyo vikachitika kumanyuma.—Luka 9:62.
4. Kasi tidumbiskanenge vichi mu nkhani iyi?
4 Mu nkhani iyi, tidumbiskanenge vinthu vitatu ivyo vingatipangiska kuti tighanaghanirenge chomene vyakumanyuma. * Vinthu ivi ni: (1) vinthu ivyo tikakondwanga navyo kumanyuma, (2) kukhuŵara, na (3) kukhalira waka kujiyimba mulandu. Pa chigaŵa chilichose, tiwonenge umo fundo za mu Baibolo zingatovwilira kuti tileke kughanaghanira chomene “vinthu vyakumasinda,” kweni tighanaghanirenge “vinthu vyakunthazi.”—Fil. 3:13.
VINTHU IVYO TIKAKONDWANGA NAVYO KUMANYUMA
Kasi ni vichi ivyo vingatitimbanizga kuti tileke kulaŵiska kunthazi? (Wonani ndime 5, 9, 13) *
5. Kasi lemba la Mupharazgi 7:10 likuti tikwenera yayi kuchita vichi?
5 Ŵazgani Mupharazgi 7:10. Lemba ili likung’anamura kuti ntchiheni yayi kufumba kuti, “Chifukwa wuli mazuŵa ghakale ghakaŵa ghawemi?” Chifukwa kukumbukira vinthu viwemi ntchawanangwa chakufuma kwa Yehova. M’malo mwake, lemba ili likuti: “Ungayowoyanga chara kuti ‘Chifukwa wuli mazuŵa ghakale ghakaŵa ghawemi kuluska agha?’” Nkhani yagona pakuti tingayaniskanga yayi umoyo withu wasono na wakale chifukwa tingamba kughanaghana kuti sono umoyo ukunozga yayi. Mu Baibolo linyake pa lemba ili pali kulembeka kuti: “Ungayowoyanga chara kuti ‘Kasi ntchifukwa wuli mazuŵa gha kale ghakaŵa ghawemi kuluska gha lero?’ Ni vinjeru yayi kufumba fumbo ili.
Kasi ni vichi ivyo Ŵaisrayeli ŵakabudiska ŵakati ŵafuma mu charu cha Eguputo? (Wonani ndime 6
6. Chifukwa wuli ni vinjeru yayi nyengo zose kughanaghana kuti umoyo withu ukaŵa uwemi kumasinda? Pelekani chiyelezgero.
6 Chifukwa wuli ni vinjeru yayi nyengo zose kughanaghanira kuti umoyo withu ukaŵa uwemi kumasinda? Chifukwa kungatipangiska kukumbuka viwemi pera na kuluwa kuti tikakumanangaso na masuzgo ghanyake. Mwachiyelezgero, ghanaghanirani Ŵaisrayeli. Ŵakati ŵafuma waka mu charu cha Eguputo, ŵakaluwa mwaluŵiro masuzgo agho ŵakakumananga nagho kura. M’malo mwake, ŵakakumbukanga viwemi pera ivyo ŵakakondwanga navyo. Iwo ŵakati: “Takumbuka umo tikalyeranga somba mu Eguputo kwambura kulipira, kweniso vinkhaka, vimwamaji, maliki, hanyezi, na gariki.” (Maŵa. 11:5) Kweni kasi ‘ŵakalipiranga’ nadi yayi chakurya icho ŵakaryanga? Yayi. Ŵaisrayeli ŵakatambuzgikanga chomene. Pa nyengo iyo, ŵakaŵa kuti mbazga ku Eguputo. (Eks. 1:13, 14; 3:6-9) Kweni iwo ŵakaluwa masuzgo ghose agha nakwamba kudokeraso umoyo wakale. Iwo ŵakatondeka kughanaghanira viwemi ivyo Yehova wakaŵa kuti waŵachitira waka. Yehova wakakondwa navyo yayi ivi.—Maŵa. 11:10.
7. Kasi ntchivichi chikawovwira mudumbu munyake kuleka kughanaghanira chomene viwemi ivyo wakakondwanga navyo kumasinda?
7 Kasi tingachita wuli kuti tileke kughanaghanira chomene vinthu ivyo tikakondwanga navyo kumasinda? Ghanaghanirani chiyelezgero cha mudumbu uyo wakamba kuteŵetera pa Beteli ya Brooklyn mu 1945. Vyaka vikati vyajumphapo, wakatorana na mubali uyo nayo wakateŵeterangaso pa Beteli, ndipo ŵakateŵetera lumoza vyaka vinandi. Kweni mu 1976 mfumu wake wakalwara. Mudumbu uyu wakati mfumu wake wati wamanya kuti wakhala pachoko kufwa, wakamupa ulongozgi uwemi wakuti umovwire para iyo wafwa. Wakamuphalira kuti: “Taŵa na nthengwa yakukondweska chomene, iyo ŵanthu ŵanandi ŵandaŵepo nayo.” Kweni wakamuchiskaso kuti, “Nangauli uluwenge yayi vinthu viwemi ivyo tachitiranga lumoza, kweni kughanaghanira vyakumasinda yayi. Para nyengo yajumphapo chitima chichepengeko. Kugongowa yayi na kuŵa na chitima chomene chifukwa cha ivyo vyakuchitikira. Kweni ukondwenge chifukwa cha nyengo yiwemi iyo taŵa nayo pakuteŵetera Yehova lumoza chifukwa ntchawanangwa chakufuma kwa iyo.” Kasi namwe mukuwona kuti uwu ukaŵa ulongozgi uwemi?
8. Kasi mudumbu munyake wakapindura wuli na ulongozgi wakufuma kwa mfumu wake?
8 Mudumbu withu uyu wakalondezga ivyo mfumu wake wakamuphalira. Mwakuti wakalutilira kuteŵetera Yehova mwakugomezgeka m’paka apo wakafwira. Wakafwa wali na vyaka 92. Pambere wandafwe wakayowoya kuti: “Para nkhulaŵiska kumanyuma, vyaka 63 ivyo nateŵetera Yehova mu uteŵeti wapadera, naŵa wakukondwa chomene.” Chifukwa wuli? Iyo wakalongosora kuti: “Icho chikupangiska kuti tikondwenge chomene ni ubali withu wa pa charu chose, kweniso chilindizga cha kuzakakhala na ŵabali na ŵadumbu ŵithu mu paradiso pa charu chapasi, uku tikuteŵetera Mlengi withu, Chiuta waunenesko Yehova, kwamuyirayira.” * Tingasambirako vinandi kwa mudumbu uyu. Iyo wakalaŵiska kunthazi chifukwa wakaghanaghaniranga malayizgo gha Yehova.
KUKHUŴARA
9. Nga umo pakulongolera pa Levitiko 19:18, kasi mphawuli apo chingaŵa chakusuzga chomene kugowokera ŵanyithu?
9 Ŵazgani Levitiko 19:18. Kanandi vikutisuzga kuti tigowoke, chomene para uyo watikhuŵazga ni musopi munyithu, mubwezi withu, panji mubali withu. Mwachiyelezgero, mudumbu wakatetezgera mudumbu munyake mu mpingo kuti wakamwibira ndalama. Pamanyuma mudumbu uyu wakawamo kuti wakamunangira munyake pakumutetezgera, ndipo wakaphepiska. Kweni mudumbu uyo ŵakamutetezgera wakakhuŵara chomene ndipo chikaŵa chakusuzga kuti waleke kughanaghanira ivi. Kasi muli kujipulikapo nthena? Nangauli vyanthena vingaŵa kuti vindatichitikirepo, kweni taŵanandi tili kukhuŵarapo na kughanaghana kuti tingamugowokera yayi uyo watikhuŵazga.
10. Kasi ntchivichi chingatovwira para takhuŵara?
10 Kasi chingatovwira ntchivichi para takhuŵara? Tikwenera kukumbuka kuti Yehova wakuwona vyose. Wakumanya ivyo vikutichitikira kusazgapo na vinthu vyambura urunji wuwo ivyo ŵanyithu ŵangatichitira. (Heb. 4:13) Wakukwenyelera para tikusuzgika. (Yes. 63:9) Ndipo wali kulayizga kuti wazamuwuskapo vyakuŵinya vyose ivyo vili kwamba chifukwa cha vinthu vyambura urunji ivyo vikutichitikira.—Chivu. 21:3, 4.
11. Kasi pakuŵa uwemi wuli para tikugowokera ŵanji?
11 Tikweneraso kukumbuka kuti nase tikujipulika makora para tikugowokera ŵanji. Ivi ndivyo vikachitika kwa mudumbu yura ŵakamutetezgera. Nyengo yikati yajumphapo wakamugowokera mudumbu uyo wakamutetezgera. Wakamanya kuti para tikugowokera ŵanji, Yehova nayo wakutigowokera. (Mat. 6:14) Nangauli wakamanya kuti ivyo mudumbu yura wakachita vikaŵa viheni chomene, kweni wakasankha kumugowokera waka. Ivi vikawovwira kuti mudumbu withu uyu waŵeso wakukondwa na kulutilira kuŵika maghanoghano ghake pakuteŵetera Yehova.
KUKHALIRA KUJIYIMBA MULANDU
12. Kasi tikusambirapo vichi pa lemba la 1 Yoh. 3:19, 20?
12 Ŵazgani 1 Yohane 3:19, 20. Tose nyengo zinyake tikujiyimba mulandu. Mwachiyelezgero, ŵanyake ŵakujiyimba mulandu chifukwa cha vinthu ivyo ŵakachita pambere ŵandasambire unenesko. Apo ŵanyake chifukwa cha ivyo ŵakanangiska ŵati ŵabatizika. Ntchakawiro kujipulika nthena. (Rom. 3:23) Mbunenesko kuti nyengo zose tikukhumba kuchita icho ntchiwemi. Kweni “tose tikukhuŵara nyengo zinandi.” (Yak. 3:2; Rom. 7:21-23) Nangauli tikukondwa yayi para tikujiyimba mulandu, kweni vili na uwemi wake. Chifukwa wuli? Chifukwa para tikujiyimba mulandu vingatovwira kuti tisinthe na kuŵikapo mtima kuti tileke kuwerezgaso ivyo tikabudiska.—Heb. 12:12, 13.
13. Chifukwa wuli tikwenera yayi kulutilira kujiyimba mulandu?
13 Ndipouli, ntchamachitiko kulutilira kujiyimba mulandu nanga tingaŵa kuti talapa ndipo Yehova watigowokera. Kweni kuchita nthena nkhwakofya. (Sal. 31:10; 38:3, 4) Chifukwa wuli? Wonani chiyelezgero cha mudumbu munyake uyo wakalutilira kujiyimba mulandu chifukwa cha zakwananga izo wakachita kumasinda. Iyo wakuti: “Nkhawonanga kuti palije chifukwa chakulimbikira kuteŵetera Yehova chifukwa nkhatenge nizamupona kale yayi.” Panji ndimoso taŵanandi tingajipulikira. Kweni tikwenera kuŵa maso kuti tileke kukhalira waka kujiyimba mulandu. Chifukwa wuli? Chifukwa Satana wakondwenge chomene kuwona kuti taleka kuteŵetera Yehova nangauli Yehova mweneko wali kutigowokera kale.—Yaniskani na 2 Ŵakorinte 2:5-7, 11.
14. Kasi tingagomezga wuli kuti Yehova wangatigowokera?
14 Ndipouli, nyengo zinyake tingajifumba kuti, ‘Kasi ningamanya wuli kuti Yehova wachali kunitemwa nadi?’ Kuti munthu wafumbe fumbo ili ntchilongolero chakuti Yehova wangamugowokera. Vyaka vinandi ivyo vyajumpha, Gongwe la Mulinda linyake likayowoya kuti: “Nyengo zinyake tingaŵa kuti tikubudiska mwakuwerezgawerezga, chifukwa chakuti panji tindamazgirethu suzgo ilo tikaŵa nalo apo tikaŵa kuti tindambe kuteŵetera Yehova. . . . Kweni kugongowa yayi. Lekani kughanaghana kuti ivyo muli kunanga ni vyakuti Yehova wangamugowokerani yayi. Satana wakukhumba kuti ndimo mughanaghanirenge. Kuchita chitima para mwananga, ntchilongolera chakuti ndimwe munthu muwemi ndipo Yehova wangamugowokerani. Lutilirani kuŵa ŵakujiyuyura na kulomba kwa Chiuta kuti wamugowokerani, na kumovwirani kuti muŵeso na njuŵi yituŵa kweniso kuti muleke kuwerezgaso ivyo mukabudiska. Muŵe nga ni mwana muchoko uyo nanga wangabudiska kanandi waka, kweni wakuluta kwa adada ŵake kuti ŵakamovwire. Ntheura namwe lutilirani kupempha Yehova kuti wamovwirani, ndipo wamovwiraninge nadi chifukwa cha lusungu lwake lukuru.” *
15-16. Kasi ŵanyake ŵakujipulika wuli chifukwa cha kumanya kuti Yehova wachali kuŵatemwa?
15 Ŵateŵeti ŵanandi ŵa Yehova ŵapembuzgika chifukwa chakumanya kuti Yehova wachali kuŵatemwa. Mwachiyelezgero, vyaka ivyo vyajumpha, mubali munyake wakakhozgeka chomene na ivyo wakaŵazga mu nkhani izo zikuŵa pa chigaŵa chakuti, “Baibolo Likusintha Umoyo wa Ŵanthu.” Mu nkhani iyi, mudumbu munyake wakati, chifukwa cha vinthu viheni ivyo vikachitika pa umoyo wake, vikamusuzganga kugomezga kuti Yehova wangamutemwa. Ndipo wakasuzgika na maghanoghano agha kwa vyaka vinandi nanga mphamanyuma pakuti wabatizika. Kweni wati wamba kughanaghanira chomene za sembe yakuwombora, wakamba kugomezga kuti Yehova wakumutemwa. *
16 Kasi nkhani ya mudumbu uyu yikamukhozga wuli mubali? Mubali wakalemba kuti: “Apo nkhaŵa muchoko, nkhaŵa na chizgoŵi chakuwonelera vithuzi vyamuziro, ndipo chikaŵa chakusuzga kuti nileke. Mwasonosono apa mbwe nkhaviwonaso. Nkhapempha ŵalara kuti ŵanovwire, ndipo sono nkhutonda suzgo lane ili. Ŵalara ŵanovwira kugomezga kuti Chiuta wakunitemwa ndipo ngwakukhumbisiska kunovwira. Ndipouli, nyengo zinyake nkhujiwona kuti ndine wawakawaka mwakuti Yehova wanganitemwaso yayi. Kweni nkhani ya mudumbu iyo nkhaŵazga yanovwira chomene. Sono nkhumanya kuti para nkhuyowoya kuti Chiuta wanganigowokera yayi, ndikuti nkhuwona kuti sembe ya Mwana wake njakukwana yayi kuti zakwananga zane zigowokereke. Nili kusunga nkhani iyi mwakuti niŵazgengepo nyengo yiliyose para nambaso kujiwona kuti ndine wawakawaka.”
17. Kasi mpositole Paulosi wakachita wuli kuti waleke kukhalira waka kujiyimba mulandu?
17 Vyakuchitika vyanthena ivi vikutikumbuska mpositole Paulosi. Pambere wandaŵe Mkhristu, wakachitanga vinthu viheni chomene. Kweni Paulosi wakakhaliranga waka kughanaghanira vinthu ivi yayi. (1 Tim. 1:12-15) Iyo wakawonanga sembe yakuwombora kuŵa chawanangwa chapadera kwa iyo, ndipo wakagomezganga kuti Yehova wali kumugowokera. (Gal. 2:20) Ntheura Paulosi wakalutilira yayi kujiyimba mulandu ndipo wakaŵikapo mtima kumupa Yehova viwemi chomene.
MUGHANAGHANIRENGE CHOMENE VYA CHARU CHIPHYA
Tiyeni tiŵikepo mtima kughanaghanira vinthu vyamunthazi (Wonani ndime 18-19) *
18. Kasi tasambira vichi mu nkhani iyi?
18 Kasi tasambira vichi mu nkhani iyi? Tasambira kuti (1) kughanaghanira viwemi ivyo tikachitanga kumanyuma, ntchawanangwa chakufuma kwa Yehova. Kweni nanga vingaŵa kuti kale tikaŵa na umoyo uwemi, umoyo withu uzamuŵa uwemi chomene mu charu chiphya. (2) Ŵanji ŵangatikhuŵazga, kweni para tasankha kuŵagowokera, tiŵikenge maghanoghano pakuteŵetera Yehova. (3) Kukhalira waka kujiyimba mulandu kungatitondeska kuteŵetera Yehova mwakukondwa. Ntheura nga ni Paulosi, nase tikwenera kugomezga kuti Yehova wali kutigowokera.
19. Kasi tikumanya wuli kuti mu charu chiphya tizamukumbukiraso yayi vinthu vyakale?
19 Tili na chigomezgo chakuzakakhala kwamuyirayira. Ndipo mu charu chiphya cha Chiuta, tizamukumbukiraso yayi vinthu vyakale ivyo vingatipangiska kuŵa na chitima. Pakuyowoya za nyengo iyo, Baibolo likuti: “Vinthu vyakale vikumbukikengeso chara.” (Yes. 65:17) Ghanaghanirani waka, taŵanyake tateŵetera Yehova m’paka kuchekura, kweni mu charu chiphya, tizamuŵaso ŵawukirano. (Yobu 33:25) Ntheura tiyeni tiŵikepo mtima kuti tileke kughanaghanira chomene vyakumasinda. M’malo mwake, tiyeni tighanaghanirenge vya charu chiphya na kuchita vyose ivyo tingafiska kuti tizakanjiremo.
SUMU 142 Kukoleska Chigomezgo Chithu
^ ndime 5 Ntchiheni yayi kughanaghana ivyo vikatichitikira kumanyuma. Kweni para tikughanaghanira chomene ivyo tikatondeka kumanyuma, vititimbanizgenge kuteŵetera makora Yehova na kuluwa ivyo watilayizga munthazi. Mu nkhani iyi tiwonenge vinthu vitatu ivyo tikwenera kugega, chifukwa vingatitimbanizga na kwamba kughanaghanira chomene ivyo vikatichitikira. Tiwonengeso umo Baibolo kweniso viyelezgero vya ŵabali na ŵadumbu ŵithu mazuŵa ghano vingatovwilira.
^ ndime 4 MAZGU GHALONGOSOREKA: Mu nkhani iyi mazgu ghakuti, “kughanaghanira chomene vyakumanyuma” ghakung’anamura kukhalira waka kughanaghanira ivyo vikatichitikirapo kumasinda, panji nyengo zose kuviyowoyanga, panjiso nyengo zose kughanaghaniranga waka kuti kale ndipo umoyo withu ukaŵa wakukondweska.
^ ndime 14 Wonani Gongwe la Mulinda la Chingelezi la, Febuluwale 15, 1954, p. 123.
^ ndime 59 MAZGU GHAKULONGOSORA CHITHUZI: Para tikukhalira waka kughanaghanira vinthu ivyo tikakondwanga navyo kumasinda, kukhuŵara, kweniso para tikukhalira waka kujiyimba mulandu, tiŵenge nga tikuguguza katundu muzito, ndipo watitimbanizgenge apo tikwenda pa nthowa yakuluta ku umoyo.
^ ndime 66 MAZGU GHAKULONGOSORA CHITHUZI: Para taleka kughanaghanira vinthu ivi, tikupepuskika ndipo tikukondwa na kusanga nkhongono. Para tachita nthena tilaŵiskenge kunthazi.
