1, 2. Кызьы уже кутоно визь-кенешез, кудӥз гожтэмын Мадёнъёсын 4:25? Вералэ пример.

 МАЛПАСЬКОМЫ куд-ог учыръёс сярысь. Арлыдо сузэр тодаз вае улонысьтыз шумпотон дыръёссэ. Али солы секытгес ке но, со азьло сямен ик тырше Иегова понна лэсьтыны ваньзэ, мае быгатэ (1 Кор. 15:58). Котькуд нунал со син азяз пуктэ, кызьы выль дуннеын матысь адямиосыныз ӵош улоз. Мукет сузэрез куке но кенешын вӧсь каризы, но со ужпум кутӥз со адямиез простить карыны (Кол. 3:13). Нош одӥг агай тодэ ке но, азьвыл янгышаз шуыса, со сярысь мултэс малпаськыса уг улы. Со интые, вань кужымзэ поныса, со Иеговалы оскымон луыны тырше (Пс. 50:12).

² Мар огкадез вань та куинь христиан муртъёслэн? Ваньзы соос ортчемзэ уг вунэто но солы мултэс трос саклыксэс уг висъяло. Соослэн синъёссы шонерак учко вуоноез шоры. (Лыдӟе Мадёнъёсты 4:25.)

3. Малы милемлы азьпала учконо?

³ Малы милемлы азьпала учконо? Адями, кудӥз ялан берлань учке, шонер мыныны уг быгаты. Озьы ик ми но ум быгатэ Иегова понна лэсьтыны ваньзэ, мае быгатӥськомы, ортчемез сярысь ялан малпаськыса улӥмы ке (Лука 9:62).

4. Мае ми эскеромы та статьяын?

⁴ Та статьяын ми эскеромы куинь мугъёсты, кудъёсыз сэрен ортчемез сярысь ялан малпаськыса уломы. Соос пӧлы пыро: 1) ортчемезлэсь мӧзмон, 2) кӧтӝож но 3) астэ мултэс янгыше уськытон. Та мугъёсты эскерыкумы, ми адӟомы, кызьы Библиысь возетъёс юртто милемлы, ортчемезлы укыр трос саклыкмес висъям интые, вуоноез шоры учкыса улыны (Флп. 3:13).

5. Кыӵе кышкытлык сярысь гожтэмын Екклесиастын 7:10?

⁵ Лыдӟе Екклесиастэз 7:10. Учке, та кылбурын уг вераськы, шонертэм ӧвӧл шуыса юаны: «Малы меда азьвыл нуналъёс сокем ӟеч вал?» Малы ке шуоно шумпоттӥсь тодэ ваёнъёс — Иеговалэн кузьымез. Кылбурын гожтэмын: «Эн шуы: „Малы меда азьвыл нуналъёс туала нуналъёслэсь ӟечгес вал?“» Мукет кылъёсын вераса, куке ми ортчемзэ ӵошатӥськомы али нуналъёсын но адӟиськомы, ваньмыз уродгес луиз шуыса, соку кышкытлык кылдыны быгатэ.

6. Малы визьмо ӧвӧл ялан малпаны, азьвыл улон умойгес вал шуыса? Вералэ пример.

⁶ Малы визьмо ӧвӧл ялан малпаны, азьвыл улон умойгес вал шуыса? Ортчемезлэсь мӧзмыкумы, ми умоез сярысь гинэ малпаськомы, нош уродэз ӧй но вал, кадь. Тодамы ваёмы, мар луиз израиль калыклэн Египетысь потэмез бере. Соос ӝог вунэтӥзы, макем секыт вал соослы отын, но тодазы возизы одӥгзэ гинэ — макем ческыт сиёнзы вал соослэн. Соос веразы: «Ми тодамы вайиськомы на, кызьы ми Египетын дунтэк чорыг сиимы, тодамы вайиськомы кияръёс, дыняос, порей сугон, сугон, чеснок сиеммес» (Лыд. 11:5). Зэм ик-а соос ваньзэ тае «дунтэк» сиизы? Ӧз. Израиль калык та понна бадӟым дун тыриз — соос ляльчиос вал, египет калык соосты туж ултӥяса возиз (Пот. 1:13, 14; 3:6—9). Озьы ке но соос курадӟемзэс вунэтӥзы, ортчемез сярысь мӧзмыны кутскизы но ӧз адӟе, кызьы Иегова соос сярысь сюлмаськиз. Таин сэрен Инмарлэн соослы туж вожез потӥз (Лыд. 11:10).

7. Мар юрттӥз одӥг сузэрлы ортчемез сярысь мӧзмытэк улыны?

⁷ Мар кароно, ортчемезлэсь мӧзмонлы медам сётске шуыса? Эскеромы одӥг сузэрлэсь учырзэ. Со ужаны-тыршыны кутскиз Бруклинысь Вефильын 1945-тӥ арын, нош, кӧня ке ар ортчыса, бызиз агайлы, кудӥз отын ик тырше вал. Соос трос аръёс ӵоже Вефильын ужазы-тыршизы. Нош 1976-тӥ арын картэз секыт висьыны кутскиз. Со  валаз, ӝоген кулоз шуыса. Соин ик кышноезлы сётӥз куд-ог умой визь-кенешъёс, кудъёсыз юрттысалзы солы огназ кылемез бере. Со вераз: «Ми шудо улӥмы. Ӧжытэз озьы уло». Собере со ватсаз: «Тон уд вунэты ваньзэ умойзэ, мае асьмеос ӵош лэсьтӥмы. Но ортчемез сярысь ялан малпаськыса эн улы. Дыр ортчемъя сюлмыд буйгалоз. Вождэ поттыса но астэ жаляса эн улы. Шумпот, тынад сыӵе шудо нуналъёсыд вал шуыса. [...] Тодэ ваёнъёс — со Инмарлэн кузьымез». Туж умой визь-кенеш, озьы-а?

8. Малы саклыксэ висъяз сузэрмы, картэзлэн визь-кенешезлэсь кылзӥськыса?

⁸ Сузэр картэзлэн визьмо визь-кенешезлэсь кылзӥськиз. Со кулытозяз Иеговалы оскымон ужаз-тыршиз но 92 арес дыръяз кулӥз. Кӧня ке аръёс солэсь азьлогес со вераз: «Куке мон малпаськисько, кызьы 63 арлэсь но кемагес Иеговалы вань дырме сётыса ужай-тырши, мон валасько, мынам улонэ туж шудо вал шуыса». Малы? Со валэктэ: «Ми шудо луыны быгатӥськомы, малы ке шуоно милям вань паймымон вынлыкмы. Озьы ик милям вань осконмы агайёсын но сузэръёсын ӵош рай музъем вылын улыны но пырак дауръёс ӵоже ужаны-тыршыны Быдӟым Кылдытӥсьмылы, одӥг гинэ зэм Инмарлы, Иеговалы» b. Та сузэр Иеговалэн кылсётонъёсызлы саклыксэ висъяз. Ми солэсь тросэзлы дышетскыны быгатӥськомы.

9. Ку простить карыны тужгес но секыт? (Левит 19:18).

⁹ Лыдӟе Левитэз 19:18. Ӵем дыръя секыт простить карыны, куке милемыз вӧсь кариз матысь адямимы, ӵыжы-выжымы, кенешысь вын-агаймы яке сузэр-апаймы. Тани мар луиз одӥг сузэрен. Огпол кенешысь сузэр сое янгыше уськытӥз, со солэсь коньдонзэ лушказ шуыса. Берлогес со сузэр валаз,  шонертэм малпаз шуыса, но куриз сое простить карыны. Нош сузэрлэн, кудзэ шонертэм янгыше уськытӥзы, кӧтыз туж ӝож вал. Со та учыр сярысь нокызьы вунэтыны ӧз быгаты. Вал-а тӥляд но сыӵе ик шӧдонъёсты? Тӥ ӵапак таӵе ик учырен ӧд пумиськылэ ке но, куке но кӧтты ӝож луылӥз, дыр. Оло нош, соку тӥ малпады, тӥледыз вӧсь карись муртэ ноку простить карыны уд быгатэ шуыса.

10. Мар милемлы кароно, кин ке милемыз ӝоже уськытӥз ке?

¹⁰ Мар милемлы кароно, кин ке милемыз ӝоже уськытӥз ке? Эн вунэтэ, Иегова ваньзэ адӟе шуыса. Со тодэ ваньзэ, маин ми пумиськоно луиськомы, озьы ик милемлы пумит лэсьтэм шонертэм ужъёс сярысь но (Евр. 4:13). Куректыса улыкумы инмысь Атаймы милемыз вала (Ис. 63:9). Со сяна, со кылзэ сётэ вуонояз быдтыны вӧсь луонэз, кудзэ ваё шонерлыктэм ужъёс (Усьт. 21:3, 4).

11. Кыӵе пайда вае простить карон?

¹¹ Озьы ик тодамы возёно: простить карон милемлы асьмелы пайда вае. Тае валаз сузэр но, кудзэ шонертэм янгыше уськытӥзы, со коньдон лушказ шуыса. Дыр ортчыса, со быгатӥз простить карыны сое янгыше уськытӥсь сузэрез. Мар солы юрттӥз? Со валаз: куке ми мукетъёссэ простить кариськомы, соку Иегова но милемыз простить каре (Матф. 6:14). Со тодӥз, соиз сузэр шонертэм уж лэсьтӥз шуыса, озьы ке но сое простить кариз. Талы луыса со шумпотӥз но ужан-тыршонлы саклыксэ висъяны быгатӥз.

12. Малы дышето милемыз 1 Иоаннлэн 3:19, 20 гожтэм кылъёс?

¹² Лыдӟе 1 Иоаннлэсь 3:19, 20. Куддыръя ми ваньмы асьмеды янгыше уськытӥськомы. Кылсярысь, кин ке но ассэ янгыше уськытэ зэмлыкез тодэмезлэсь азьло лэсьтэм ужъёсыныз сэрен. Мукетъёсыз асьсэды янгыше уськыто пылатӥськемзы бере лэсьтэм ужъёсынызы сэрен (Рим. 3:23). Зэм но, милям янгышаммы уг поты. Озьы ке но ми «ваньмы... трос сьӧлыкаськомы» (Иак. 3:2; Рим. 7:21—23). Янгышам бере сюлэм шуг ке но, со пайда вайыны быгатэ. Астэ янгышен шӧдон мылкыдэз ӝутыны быгатэ тупатскыны но тыршыны азьланяз та янгышез лэсьтытэк улыны (Евр. 12:12, 13).

13. Малы милемлы чакласьконо, ми асьмеды мултэс янгыше медам уськытэ шуыса?

¹³ Нош куддыръя ми асьмеды мултэс янгыше уськытӥськомы. Куке ми ӧпкелимы но Иегова милемыз простить кариз, нош ми куректыса улӥськомы на, астэ янгышен шӧдон изъян вайыны быгатэ (Пс. 30:11; 37:4, 5). Малы? Эскеромы одӥг сузэрлэсь учырзэ, кудӥз азьвыл лэсьтэм сьӧлыкъёсыныз сэрен ассэ янгышен шӧдӥз. Со вера: «Мон малпай, вань кужымез понытэк но, Иеговалы ужаны-тыршыны луоз шуыса, малы ке шуоно утиськыны уг быгаты, дыр, ини». Ми пӧлысь тросэзлэн таӵе ик шӧдонъёссы вал, вылды. Но милемлы чакласьконо, ми асьмеды мултэс янгыше медам уськытэ шуыса. Иегова милемыз простить кариз ке, нош ми солы ужамысь-тыршемысь дугдӥмы ке, Шайтан туж шумпотоз! (Ӵошатэ 2 Коринфъёслы 2:5—7, 11.)

14. Кызьы валано, Иегова милемыз простить кариз шуыса?

¹⁴ Озьы ке но милям юанмы кылдыны быгатэ: «Кызьы валано, Иегова монэ простить кариз шуыса?» Милям таӵе юанмы кылдэ ке, вераны луоз, ми солы валэктонэз тодӥськомы ини шуыса. 20 арлэсь но тросгес талэсь азьло «Возьмаськон башняын» гожтэмын вал: «[Оло нош], ми канжаськиськомы но  трос пол сётскиськомы урод сямлы, кудӥз малпаммылэсь но мур милемлы пыӵамын... Киостэс эн лэзе. Эн малпалэ, сьӧлыкез, кудзэ тӥ лэсьтӥды, простить карыны уг луы ни шуыса. Шайтанлэн потэ, тӥ ӵапак озьы мед малпалоды шуыса. Секыт мылкыдын улэмды возьматэ, тӥ урод адями ӧвӧл но Иегова тӥледыз простить кароз шуыса. Ноку но эн жаде зӥбыт-востэмен но вань сюлмысьтыды Иеговалы вӧсяськыны но курыны, со тӥледыз простить мед кароз но тӥледлы мед юрттоз шуыса. Кӧня пол гинэ тӥ одӥг янгыштэс медад лэсьтэ, мынэ со доры озьы ик, кызьы ӝоже усем нылпи атаез доры мынэ. Азьланяз но Иеговалэсь юрттэтсэ куре но, со тӥледлы юрттоз» c.

15, 16. Мар шӧдӥзы куд-ог христианъёс, куке валазы, Иегова соослэсь ӧз берыктӥськы шуыса?

¹⁵ Иеговалэн тросэзлы ужась-тыршисьёсызлы капчигес луиз, куке соос валазы, Иегова соослэсь ӧз берыктӥськы шуыса. Кылсярысь, кӧня ке ар талэсь азьло одӥг агайлэн сюлмаз пыриз статья, кудӥз печатламын вал «Библия улонэз воштэ» рубрикаын (ӟуч). Со статьяын сузэр вераз, кызьы азьвыл секыт улэмез люкетэ солы оскыны, Иегова сое яратыны быгатэ шуыса. Пылатӥськемез бере но со озьы ик малпаз — трос аръёс ӵоже со сыӵе малпанъёсыныз нюръяськиз. Но собере сузэр малпаськиз мозмытӥсь курбон сярысь. Талы луыса со оскыны быгатӥз, Иегова сое яратэ шуыса d.

¹⁶ Кызьы та сузэрлэн учырез агайлы юрттӥз? Со гожтӥз: «Егит дыръям мон нюръяськи порнографиез учкон мылкыдын. Алигес мон нош ик ӧй чида но сое учки. Юрттэт курыса, мон христиан тӧроослы вазиськи но али быгатӥсько асме киям кутыны. Тӧроос монэ оскытӥзы, Иегова монэ яратэ но простить каремез потэ шуыса. Озьы ке но куддыръя мон асме номырлы ярасьтэмен шӧдӥсько но малпасько, Иегова монэ яратыны уг быгаты шуыса. Мыным туж юрттӥз... [та сузэрлэн] учырез. Табере мон валасько: куке мон малпасько, Иегова монэ простить карыны уг быгаты шуыса, вераны луоз, мон  уг оскиськы, Пиезлэн курбонэз монэ сьӧлыкъёсылэсь мозмытыны быгатоз шуыса. Мон та статьяез журналысь вандыса басьтӥ, котьку асме ярасьтэмен шӧдыкум, сое выльысь лыдӟыны но малпаськыны мед быгатом шуыса».

17. Мар юрттӥз апостол Павеллы ассэ мултэс янгыше уськытытэк улыны?

¹⁷ Христиан мурт луэмезлэсь азьло апостол Павел но секыт сьӧлыказ. Со тодӥз ке но янгышаз шуыса, солы укыр трос саклыксэ висъяса ӧз улы (1 Тим. 1:12—15). Мозмытӥсь курбон шоры Павел учкиз кузьым шоры кадь, кудзэ Инмар солы кузьмаз (Гал. 2:20). Соин ик со ассэ мултэс янгыше ӧз уськыты но, вань кужымзэ поныса, Иеговалы ужаз-тыршиз.

18. Малы дышетӥз милемыз та статья?

¹⁸ Малы дышетӥз милемыз та статья? 1) Умой тодэ ваёнъёс — Иеговалэн кузьымез, но макем умой ми азьвыл медам улэ, выль дуннеын улон эшшо но умойгес луоз. 2) Мукет адямиос милемыз вӧсь карыны быгато, но милемлы соос вылэ кӧт ӝожен улоно ӧвӧл — соку ми быгатомы, вань кужыммес поныса, Иеговалы ужаны-тыршыны. 3) Асьмеды мултэс янгыше уськытӥмы ке, Иеговалы ужан-тыршон милемлы шумпотон уз вайы ни. Соин ик ми, Павел сямен, оскыны кулэ, Иегова янгышъёсмес простить кариз шуыса.

19. Малы ми оскиськомы, выль дуннеын азьвылэз сярысь тодэ ваёнъёс сюлэммес вӧсь уз каре ни шуыса?

¹⁹ Иегова кылзэ сётэ, выль дуннеын ми пырак уломы но азьвылэз сярысь тодэ ваёнъёс сюлэммес вӧсь уз каре ни шуыса. Библиын со сярысь тазьы гожтэмын: «Азьвылъёссэ-вужъёссэ буре уз ни вае» (Ис. 65:17). Малпалэ гинэ: арлыдо вын-агайёс но сузэр-апайёс, кудъёсыз быдэс улонзэс Иеговалы ужазы-тыршизы, нош ик егитэсь луозы (Иов 33:25). Соин ик ортчемез сярысь ялан малпаськыса ум улэ. Ойдолэ малпаськомы паймымон выль дунне сярысь но лэсьтомы ваньзэ, мае быгатӥськомы, отын улон понна!