1-2. Tu kapako ndati elungulo li sangiwa Kolosapo 4:25? Tukula ulandu umue.

SOKOLOLA kovolandu akuãimo. Manji umue ukãi wa kuka o sokolola kotembo eci a kala umalẽhe. Ndaño okuti cilo omuenyo waye wa pongoloka, eye o kasi oku amamako oku likolisilako kupange wa Yehova. (1 Va Kor. 15:58) Oloneke viosi o sokolola okuti o kasi voluali luokaliye kumue lepata kuenda lakamba. Manji ukuavo ukãi o sokolola kovina manji umue vekongelo o linga okuti co sumuisile calua, pole eye o nõlapo oku yuvula oku soleka ocikumbiti. (Va Kol. 3:13) Manji umue ulume ivaluka ovina vĩvi a linga pole, o tiamisila utima koku likolisilako oku kala ukuekolelo ku Yehova.—Osa. 51:10.

² Ovitangi vipi vimuamue Akristão ava vatatu va lipita lavio? Vosi yavo va ivaluka ovina va pita lavio kosimbu, pole, ka va tiamisilile utima kovina viaco. Ovo, va tiamisila ‘ovaso avo’ kovina viya kovaso yoloneke.—Tanga Olosap. 4:25.

3. Momo lie tu sukilila oku tiamisila ‘ovaso’ kovina vio kovaso yoloneke?

³ Momo lie ci kuetele esilivilo oku tiamisila ‘ovaso’ kovina vio kovaso yoloneke? Ndeci omunu umue ka pondola oku suñamisa onjila yaye nda o vanja enene konyima, cimuamue haico okuti ka tu pondola oku linga upange wa Yehova nda olonjanja viosi tu sokolola kovina tua pita lavio kosimbu.—Luka 9:62.

4. Nye tu konomuisa vocipama cilo?

⁴ Vocipama cilo, tu ka konomuisa ovina vitatu vi tu kokela oku sokolola calua kovina via pita. * Ovio vievi: (1) oku sokisa  ekalo liosimbu, (2) ocikumbiti, kuenda (3) oku livetela evelo. Kocitangi locitangi, tu ka mola ndomo olonumbi Viembimbiliya vi tu kuatisa oku yuvula oku tiamisila utima “kovina vio konyima” pole, tu sukila oku tiamisila utima ‘kovina vio kovaso.’—Va Fil. 3:13.

5. Elivulu Li Ukundi 7:10, li tu vetiya oku yuvula nye?

⁵ Tanga Ukundi 7:10. Kũlĩhĩsa okuti ocinimbu ka ci kasi oku popia okuti cĩvi oku lipula hati: “Ci kasi ndati okuti oloneke viosiahũlu via velapo?” Oku sokolola ovina viwa vio kosimbu ombanjaile yimue ya tunda ku Yehova. Pole ocinimbu ci popia hati: “Ku ka pule huti, ‘Ci kasi ndati okuti oloneke viosiahũlu via velapo okuti oloneke vilo vi sule?’” Volondaka vikuavo, ci kapa kohele oku sokisa ekalo liosimbu lekalo tu kasi cilo, loku sima okuti ovina viosi cilo ka vi kasi ciwa. Vambimbiliya akuavo ocinimbu eci ci popia hati: “Lalimue eteke ku ka pule huti, ‘Ci kasi ndati okuti ovina violoneke viosiahũlu via velapo?’ Momo halondungeko oku ci pula.”

6. Momo lie ka ci lekisila olondunge oku sokolola okuti omuenyo wetu wa kala ciwa kosimbu? Tukula ulandu umue.

⁶ Momo lie ka ci lekisila olondunge oku sokolola okuti omuenyo wetu wa kala ciwa kosimbu? Momo oku sokisa ekalo liosimbu ci pondola oku tu ivaluisa lika ovina viwa tua pita lavio okuti tu ivalako ovina vĩvi. Kũlĩhĩsa ulandu wa va Isareli. Noke lioku tunda Kegito, ovo va ivalako ndomo omuenyo wavo wa kala. Ovo va tiamisilile lika utima kokulia kuwa va kuata. Ovo va popia hati: “Tua ivaluka olosi tua lialia ño ocali ve Egito, lovitende, lolomelãu, layupolu, losapola, lovayu!” (Ate. 11:5) Anga hẽ va “lialia ño ocali” okulia valialia? Sio. Ovo va tala ohali; otembo va kala oku fũkĩlisiwa Kegito ndapika. (Etu. 1:13, 14; 3:6-9) Ovo va ivalako upange walua va enda oku linga vokuenda kuanyamo alua. Va nõlapo oku tiamisila lika utima ‘koloneke viosiahũlu via velapo’ okuti ka va tiamisila utima kovina viwa Yehova a va lingila. Yehova ka sanjukilile elinga liavo.—Ate. 11:10.

7. Nye ca kuatisa manji umue ukãi oku yuvula onjanjo yoku sokisa ekalo liosimbu?

 ⁷ Tu yuvula ndati onjanjo yoku sokisa ekalo liosimbu? Kũlĩhĩsa ulandu wa manji umue ukãi wa talavaya ko Betele yo Brooklyn kunyamo 1945. Noke lianyamo amue, wa kuela la manji wa kalavo ko Betele kuenje va vumbila kumosi vokuenda kuanyamo alua. Kunyamo 1976 ulume waye wa fetika oku vela. Manji wa popia hati, eci eye a limbuka okuti wa laikele oku fa, wa nyiha elungulo liwa lia ponduile oku ñuatisa vokuenda kumbumba wange. Eye wa ndi sapuila ndoco: “Tua kuata esanju volohuela. Omanu valua ka va kũlĩhĩle elomboloko liaco. Pole, wo sapuilavo okuti: Ove ku ka ivalako ovina viwa tua lingila kumosi pole, kuka tiamisile utima kokuavio otembo yosi. Noke liotembo yimue, esumuo liove lika tepuluka. Ku ka sumue omo liovina via pita love. Sanjukila otembo tua kalela kumosi oku vumba Yehova. Ovio ombanjaile Suku a tu ĩha.” Ku tava hẽ okuti lia kala elungulo liwa?

8. Manjetu ukãi wa kuatisiwa ndati lelungulo liwa liulume waye?

⁸ Manjetu ukãi wa kapako elungulo liulume waye. Eye wa vumba Yehova lekolelo toke kolofa viaye eci a kuata 92 kanyamo. Osimbu handi ka file wa popia hati: “Papita ale 63 kanyamo kupange wa Yehova wotembo yosi, ndi pondola oku popia okuti nda kuata esanju lialua komuenyo.” Momo lie? Eye wamisako hati: “Ocina ci tu kokela esanju lialua komuenyo, ongongela yetu ya vamanji kuenda elavoko lioku kala kumosi lavo vocumbo celau palo posi loku vumba Ululiki wetu okuti o Suku yocili Yehova otembo ka yi pui.” * Tu pondola oku lilongisila calua kulandu wa manji u-u wa tiamisila utima waye kolohuminyo via Yehova!

9. Ndomo ca tangiwa Ovisila 19:18, vepuluvi lipi ka ci leluka kokuetu oku ecela umue wa tu sumuisa?

⁹ Tanga Ovisila 19:18. Olonjanja vimue ka ci leluka oku ecela omunu umue vekongelo, ekamba limue liwa, ale ngandietu wa tu sumuisa. Ndeci, manji umue ukãi wa lundiliwa lamanji ukuavo okuti wa nyana olombongo viaye, noke manji yaco wa limbuka okuti haciliko kuenda wa pinga ongecelo. Pole, manji wa lundiliwa ka tavele omo wa tiamisilile calua utima kelundi liaco. Anga hẽ wa pitile ale locitangi cimuamue? Ndaño ka tua lapita locitangi caco, tu liyeva okuti nda lalimue eteke tu ecela omunu umue o tu sumuisa.

10. Nye ci pondola oku tu kuatisa nda tu kasi locikumbiti?

¹⁰ Nye ci pondola oku tu kuatisa nda tu kasi locikumbiti? Tu sukila oku ivaluka okuti Yehova o lete cosi. Eye wa kũlĩha cosi tu pita laco, oku kongelamo ekambo liesunga liosi tu pita lalio. (Va Hev. 4:13) Eye o sumua eci tu tala ohali. (Isa. 63:9) Kuenda wa likuminya okuti o ka malako ovina viosi vi tu kokela esumuo.—Esit. 21:3, 4.

11. Tu kuatisiwa ndati eci tu yuvula ocikumbiti?

¹¹ Tu sukilavo oku ivaluka okuti eci tu yuvula ocikumbiti tu likuatisa etu muẽle. Eci oco manji wa lundiliwa a limbuka. Vokuenda kuotembo eye wa ecela manji wo lundila kuenda wa liwekapo oku u kuatela ocikumbiti. Eye wa limbuka okuti eci tu ecela vakuetu Yehova o tu ecelavo. (Mat. 6:14) Eye wa kũlĩhĩle okuti eci manji ukuavo o lingila ka ca sungulukile, pole wa nõlapo oku ecela. Kuenje manjetu o kuete esanju kuenda wa tiamisila utima kupange wa Yehova.

12. Nye tu lilongisila kukanda 1 Yoano 3:19, 20?

¹² Tanga 1 Yoano 3:19, 20. Vosi yetu tua siata oku livetela evelo. Ndeci, vamue va livetela evelo omo liovina va linga osimbu handi ka va kũlĩhĩle ocili. Vakuavo va livetela evelo omo liovina va linga noke lioku papatisiwa. Ovisimĩlo viaco via siata calua. (Va Rom. 3:23) Ocili okuti, tu yongola oku linga eci ca sunguluka. Pole, “vosi yetu tuakuakulueya olonjanja vialua.” (Tia. 3:2; Va Rom. 7:21-23) Ndaño okuti ka tu sole oku livetela evelo, olonjanja vimue ci tu linga ciwa. Momo lie? Momo ovisimĩlo vioku livetela evelo vi tu vetiya oku linga apongoloko komuenyo kuenda oku yuvula oku pitulula akulueya aco.—Va Hev. 12:12, 13.

13. Momo lie tu sukilila oku kuata utate walua oco ka tu ka amameko oku livetela evelo?

¹³ Handi vali, pamue tu livetela evelo, ale tuamamako oku liyeva ndoco, ndaño ceci tu likekembela kuenda eci Yehova a lekisa okuti wa tu ecela. Ovisimĩlo viaco onjanjo yimue. (Osa. 31:10; 38:3, 4) Momo lie? Kũlĩhĩsa ulandu wa manji umue ukãi wa liyaka locitangi coku livetela evelo omo liakandu o kosimbu. Eye wa popia hati: “Hĩse si ka likolisileko vali kupange wa Yehova momo si ka popeliwa ale.” Citava okuti valua pokati ketu tua liyevele ale ndoco. Omo liaco, tu sukila oku kuata utate walua oco ka tu ka amameko oku livetela evelo. Momo lie? Momo Satana o sanjuka calua nda tua liwekapo oku vumba Yehova, ndaño okuti Yehova wa tu ecela ale!—Sokisa 2 Va Korindo 2:5-7, 11.

14. Tua kũlĩha ndati okuti Yehova ka tu yandulukile?

¹⁴ Pamue tu lipula ndoco: ‘Nda kũlĩha ndati okuti Yehova ka njandulukile?’ Oku linga epulilo liaco ci lekisa okuti Yehova o pondola oku ku ecela. Kanyamo apita Utala Wondavululi wa popele okuti: “Pamue tu amamako oku linga ovina vimuamue olonjanja viosi. Eci ci lekisa okuti ka tu pondola oku yula ahonguo  tua kuatele osimbu ka tua fetikile oku vumba Suku. . . . Pole, ko ka liwekepo. Ku ka sime okuti wa linga ekandu limue okuti Yehova lalimue eteke a ka liecela. Eci oco Satana a yongola. Eci o yeva esumuo omo lioku linga cimue cĩvi, ci lekisa okuti kumunuko ũvi kuenda Yehova o pondola oku ku ecela. Lekisa umbombe kuenda amamako oku likutilila ku Suku oku pinga ongecelo, oco a ku kuatise oku kuata utima wa yela. Lupukila kokuaye ndeci omõla umue a lupukila ku isiaye ndaño ocitangi caco citito ale cinene o pinga ekuatiso kokuaye. Kuenje nda wa pinga ekuatiso ku Yehova eye o ka ku kuatisa.” *

15-16. Vamue va liyeva ndati eci va limbuka okuti Yehova ka va yandulukile?

¹⁵ Afendeli valua va Yehova va siata oku sanga elembeleko poku limbuka okuti Yehova lalimue eteke a va yanduluka. Ndeci, kanyamo a pita, manji umue ulume wa kuatisiwa poku tanga ocipama losapi hati, “Embimbiliya Li Pongolola Omuenyo Womanu.” Vocipama caco, manji umue ukãi wa kũlĩhĩle okuti omo liulandu waye wokosimbu, ca tĩlile calua kokuaye oku tava okuti Yehova o pondola oku u sola. Eye wa kuata ovisimĩlo viaco vokuenda kuanyamo alua noke wa papatisiwa. Pole, poku sokolola kocisembi cokuatisa oku tenda ovina lonjila yikuavo. *

¹⁶ Ulandu waye wa kuatisa ndati manji ulume? Eye wa soneha ndoco: “Eci nda kala umãlehe ndaenda oku tala alitalatu umbondo. Noke liotembo yimue nda ci linga vali. Yu nda pinga ekuatiso kakulu vekongelo, kuenje nda likolisilako oku yula ocitangi caco. Akulu vekongelo va ñuatisa oku tava okuti Suku o ndi sole kuenda o yongola oku ngecela. Ocili, nda enda oku liyeva okuti si kuete esilivilo kuenda Yehova ka pondola oku ndi sola. Poku tanga ulandu wa [manji ukãi] ca ñuatisa calua. Cilo nda limbuka okuti eci ndi popia okuti Suku ka pondola oku ngecela, eci ci lomboloka okuti ocilumba Comõlaye ka ci pondola oku yula akandu ange. Oku tanga ocipama caco loku sokolola kulandu nda tanga, ca ñuatisa oku kuata elomboloko liokuti Yehova o ndi sole.”

17. Upostolo Paulu wa yuvula ndati onjanjo yoku livetela evelo?

 ¹⁷ Ovolandu a soka ndava a tu ivaluisa ulandu wupostolo Paulu. Osimbu handi ka lingile Ukristão, eye wa lingaile ovina vialua vĩvi. Paulu wa enda oku ivaluka ovina a lingaile pole, ka vi sokoluile otembo yosi. (1 Tim. 1:12-15) Eye wa kolelele okuti o pondola oku eceliwa omo liocilumba cocisembi kuenda ocisembi ombanjaile Suku o wĩha. (Va Gal. 2:20) Paulu wa yuvula onjanjo yoku livetela evelo kuenda wa tiamisilile utima koku likolisilako kupange wa Yehova.

18. Nye tua lilongisa vocipama cilo?

¹⁸ Nye tua lilongisa poku konomuisa olonjanjo via lomboluiwa vocipama eci? (1) Ndaño okuti oku sokolola kovina viwa viokosimbu ombanjaile yimue yi tunda ku Yehova; pole, omuenyo wa velapo tu ka u kuata lika voluali luokaliye. (2) Vakuetu pamue va tu sumuisa, pole eci tu nõlapo oku ecela, tu ka tiamisila utima koku vumba Yehova. (3) Oku li vetela evelo ci pondola oku tu tateka oku vumba Yehova lesanju. Ndeci ca pita la Paulu, tu sukila oku kolela okuti Yehova o tu ecela.

19. Tua kũlĩha ndati okuti voluali luokaliye ka tu ka ivaluka vali ovina viale?

¹⁹ Etu tu kuete elavoko lioku kala otembo ka yi pui. Eci tu ka kala voluali luokaliye, ka tu ka ivaluka vali ovina vi sumuisa. Kotembo yaco Embimbiliya liti: “Ovina viale ka vi ivalukiwa.” (Isa. 65:17) Sokolola ndoco: Vamue pokati ketu va kukila vupange wa Yehova, pole, voluali luokaliye, tu ka kala vali amalẽhe. (Yovi 33:25) Omo liaco, tu sukila oku yuvula oku sokolola ekalo tua kuata kosimbu. Kuenje tu tiamisili utima kelavoko lioluali luokaliye loku likolisilako oku linga cosi citava oco tu ka kalemo!