1-2. Ninrowa otthara sai malakiheryo ari Miruku 4:25? Nvahe ntakiheryo.

NKAHAYA muupuwele matakiheryo ala mararu. Murokora oowuuluvala onuupuwela itthu sooloka saamwiiranenle khalai. Nnaamwi okumi awe ori ene wooxankiha, owo onniimananiha opaka itthu mmutthenkesoni mwa Yehova mpakha vaniwerya awe. (1 aKor. 15:58) Khula nihiku, owo onnuupuwela ori ene mparayiisu ni amusi awe vamosa ni apatthani awe. Murokora mukina onnuupuwela moota mutthu mmosa a mmulokoni aamunyoonyinhe awe. Masi owo onnithanla ohipweha mathowa vamurimani. (aKol. 3:13) Vano munna mmosa onnuupuwela itthu soohiloka aapanke awe khalai. Masi owo onnipaka sotheene oniwerya awe wira ohihiye ororomeleya wa Yehova.—Esal. 51:12.

² Itthu xeeni sinlikana anna ala araru arina aya? Otheene aya annuupuwelela itthu saawiiranenle khalai. Masi awo khanimakela wuupuwela itthu iyo sivinre. Masi ‘maitho aya anniweha oholo itthu soloka’.—Musome Miruku 4:25.

3. Xeeni vari aya vooloka maitho ahu owehaka itthu sooloka sa ohoolo?

³ Xeeni vari aya vooloka maitho ahu owehaka itthu sooloka sa ohoolo? Mutthu onimakela oweha ottuli eettaka, owo khoniwerya weetta oratteene ni okela ohoolo. Mwa enamuna emosaru khaninwerya omurumeela Yehova moomalela akhala wira nimmakela wuupuwela itthu sa khalai.—Luka 9:62.

4. Mwaha ola, ninrowa othokorerya exeeni?

⁴ Mwaha ola, ninrowa othokorerya miraakho miraru sikhanle ooniiriha omakela wuupuwela itthu sa khalai. Miraakho sene tiiya: (1) wuupuwelaka wira itthu saakhanle ntoko saari aya khalai, (2) onyoonyiheya ni (3) otepa wiivaha nthowa. Vaavo ninrowa ahu othokoreryaka itthu iyo, nnooweha moota malakiheryo a mBiibiliyani akhanle aya oonikhaliherya ‘oliyala itthu sihanle ottuli’ wira ‘nimananiheke ophwanya itthu siri oholo’.—aFil. 3:13.

5. Muraakho xeeni ori Musuweli 7:10?

⁵ Mmusome Musuweli 7:10. Moone wira eversiikulu ela khenihimya wira ti vootakhala ohimya wira: “Itthu sothene khalai santepa orera”. Masi enihimya so: “Muhihimyeké wira: ‘Khalayi itthu sothene sanitepa orera ovikana itthu sa vano’”. Ela enooniherya wira wuupuwelela, yoovaha enikhuma wa Yehova. Masi ti voohiloka omakela olikanyiha makhalelo ahu a vano ni makhalelo ahu a khalai, nnaahimya wira vano makhalelo ahu tootepa otakhala. Eversiikulu ela, Biibiliya mukina etaphuleliwe so: “Muhikhala-khale mwiikohaka wira: ‘Xeeni mahiku a khalai yaari aya ootepa oreera?’ Nna khahiyo nikoho na ankhili”.

6. Xeeni vari aya voohiloka omakela wuupuwela itthu sa khalai? Nvahe ntakiheryo.

⁶ Xeeni vari aya voohiloka omakela wuupuwela wira khalai makhalelo ahu yaari ooloka? Omakela wuupuwela itthu sa khalai, eyo pooti oniiriha wuupuwelaka paahi itthu sooloka naarina ahu ni oliyala mixankiho naarina ahu khalai. Nkahaya muupuwele ntakiheryo na aIsarayeli. Nuumala okhuma wExiitu, moohipisa awo yaahiliyala wira yaari ipottha elapo ele. Maana yaamakela wuupuwela paahi yoolya yooloka yaalya aya wExiitu. Awo yaahimya so: “Woninkhela wEjitu, weiwo wakhurahu ehopa yavahiwahu mahala: ninnupuwela muxiri ni mawuryo ni mattuvi n’isapola n’alyo”. (Moth. 11:5) Masi niireke tthiri itthu iyo yaalya “mahala” ntoko yaahimya aya? Nnaari. Awo yaaniliverya itthu sotheene yaalya aya. Okathi mukina aIsarayeli yaanihasuliwa vanceene, maana awo yaari ipottha wExiitu. (Okhum. 1:13, 14; 3:6-9) Masi, hata vaari siiso, awo yaahiliyala mixankiho iyo sotheene yaarina aya. Maana yaamakela wuupuwela “itthu sooloka sa khalai” ohiya owehexexa itthu sooloka Yehova aavaha awe. Nto Yehova aahiriipiwa murima mwaha wa mweettelo woohiloka wa aIsarayeli.—Moth. 11:10.

7. Etthu xeeni yaamukhalihenrye murokora mmosa osyaka omakela wuupuwela itthu sa khalai?

⁷ Ninrowa osyaka sai omakela wuupuwela itthu sa khalai? Nkahaya nwehe ntakiheryo na murokora mmosa, yoowo aarumeela eBetheli ya Brooklyn okhuma mwaakha wa 1945. Nuuvira iyaakha vakhaani muhoolo mwaya owo aahitheliwa ni munna mukina aarumeela oBetheli. Awo yaahirumeela vamosa iyaakha sinceene. Masi mwaakha  wa 1976 iyawe aahipacerya owereiwa. Murokora ole ohimmye wira nuumala iyawe osuwela wira aamookhwa, owo aahinvaha malakiheryo ooloka yaarowa omukhaliherya mwaarawe nuumala yena okhwa. Munna ole aahimuleela mwaarawe wira: “Ekasamento ahu yaari yoohakalaliha. Tthiri atthu anceene khatonko okhalana ekasamento yoohakalaliha ntoko yawihu”. Nuumala-vo aahimutumererya mwaarawe ohimyaka wira: “Nyuwo khamunrowa oliyala okathi woohakalaliha naari ahu vamosa. Masi muhimakeleke wuupuwela okathi owo, maana vaavo okathi onrowa aya oviraka oriipiwa wanyu murima onoovukuwaka. Nave muhikhulumuwe ni muhimakeleke wiikhuraana ni wiikhupanyerya muriipiwe ene murima muupuwelaka itthu sookhumelenleni. Muhakalaleke mwaha wa okathi nivirinhe ahu vamosa nimurumeelaka Yehova. Nave muhiliyale wira wuupuwela yoovaha enikhuma wa Muluku”. Niireke nyuwo khamunikupali wira iya saari miruku sooloka?

8. Murokora mmosa aattottenle sai mureerelo ohimakela wuupuwela itthu sa khalai?

⁸ Murokora ole aahitthara miruku aavahiwe awe ni iyawe. Owo oomurumeela Yehova moororomeleya, mpakha okhwa orina ene iyaakha 92. Iyaakha vakhaani ohalaka okhwa murokora ole aahimmye so: “Kuupuwelaka iyaakha 63 kivirinhe aka kivaraka muteko wa okathi wotheene wa Yehova, kinnihimya ni murima wotheene wira okumi aka waari woohakalaliha”. Mwaha wa xeeni? Owo onitthokiherya so: “Nnoowerya okhalana okumi woohakalaliha mwaha woowi nniirela mpantta emusi ya olumwenku wotheene ya anna ni arokora, yaawo arina nlipelelo na okhala mparayiisu valaponi nimurumeelaka mahiku otheene Mpattuxa ahu Muulupale ni Muluku ekeekhai, Yehova”. * Tthiri murokora ola onniniixuttiha etthu yuulupale wira nihaana owehexexa sooleiherya sa Yehova sa muhoolo!

9. Moovarihana ni Onamukuttho 19:18, okathi xeeni vanitepa aya onixankiha omulevelela mutthu onyoonyihale?

⁹ Mmusome Onamukuttho 19:18. Okathi mukina vannivila ohipweha mathowa vamurimani ni omulevelela munna a mmulokoni, mpatthani ahu wala mmusi ahu onyoonyihale. Mwa ntakiheryo,  murokora mmosa aahinyoonyiheya ni murokora mukina, yoowo aamoothenrye wira aahimwiiyerya musurukhu awe. Masi muhoolo mwaya, murokora ole aahoona wira khaiyeriwe. Nto aahirowa onvekela musammaha murokora ole aamothenrye awe. Masi murokora ole ootheriwe wiiya musurukhu aahinanariwa vanceene ni vaaninvila oliyala etthu ele yiiraneyale. Niireke nyuwo yootoko owiiraneelani etthu ntoko eyo? Hata ehitonko owiiraneelani etthu ntoko eyo, pooti wira nyuwo moona wira khimwaarowa owerya omulevelela mutthu onyoonyinheni.

10. Etthu xeeni enrowa onikhaliherya okathi ninnyoonyiheya ahu?

¹⁰ Etthu xeeni enrowa onikhaliherya okathi ninnyoonyiheya ahu? Etthu emosa ori wuupuwela wira Yehova onniweha itthu sotheene. Owo onniweha itthu siniwiiraneelani ohela muhina ohixariya muniireliwa anyu. Nto muhiliyale eyo. (aHéb. 4:13) Nave owo onniriipiwa murima vaavo ninhaawa ahu. (Yes. 63:9) Ohiya-vo, owo ooleiherya wira onoomaliha mixankiho sotheene sinnikumelela ohela muhina ohixariya.—Wis. 21:3, 4.

11. Mureerelo xeeni nimphwanya ahu vaavo nnaalevelela ahu atthu akina?

¹¹ Musuweleke wira waalevelela atthu akina, onniniphwanyiha mireerelo sinceene. Murokora ole ootheriwe wira aahiiya musurukhu aahoona wira eyo ekeekhai. Nuuvira okathi murokora ole aahiwerya omulevelela murokora aamoothenrye. Nto onyoonyiheya wawe waahimala. Nave aahuupuwela wira vaavo nnaalevelela ahu atthu akina Yehova ononlevelela. (Math. 6:14) Murokora ole aahisuwela wira etthu iireliwe awe yaari yoohiloka, masi hata vaari siiso, khaapwenhe mathowa vamurimani vawe. Nto mwaha woopaka eyo, murokora ole aanihakalala vanceene ni aanivara oratteene muteko wa Yehova.

12. 1 Yohani 3:19, 20, onniixuttiha exeeni?

¹² Mmusome 1 Yohani 3:19, 20. Okathi mukina otheene ahu ninniivaha nthowa. Mwa ntakiheryo, mutthu pooti wiivaha nthowa mwaha wa itthu soohiloka aapanke awe ohinatthi wiixutta ekeekhai. Atthu akina anniivaha nthowa mwaha wa itthu soohiloka apanke aya nuumala opatisiwa. Tthiri eyo, pooti wiiraneya. (aRom. 3:23) Maana otheene ahu okathi wotheene nimphavela wira nipakeke itthu sooloka. Masi musuweleke wira “othene ahu ninnittheka n’inamuna sinjene”. (Yak. 3:2; aRom. 7:21-23) Nnaamwi vari ene voohiloka wiivaha nthowa, okathi mukina onninikhaliherya vanceene. Mwaha wa xeeni? Mwaha woowi, vaavo nniivaha ahu nthowa mwaha wa etthu yoohiloka naapanke ahu, eyo enninikhaliherya ottharuwa ni ohitthikela opaka etthu emosaru.—aHéb. 12:12, 13.

13. Xeeni vari aya voohiloka otepexa wiivaha nthowa?

¹³ Musuweleke wira ti voohiloka otepexa wiivaha nthowa, eyo piiyo, ohihiya wiivaha nthowa hata nittharunwe ene ni murima wotheene ni Yehova onlevelenle ene. Wiivaha nthowa mwa enamuna eyo pooti onikumiherya mixankiho. (Esal. 31:11; 38:4, 5) Mwaha wa xeeni? Nkahaya nwehe ntakiheryo na murokora mmosa yoowo aamakela wiivaha nthowa mwaha wa itampi aapanke awe khalai. Owo ohimmye so: “Khivanreerela miyo wiimananiha ovara muteko wa Yehova. Mwaha woowi, woonasa wene miyo nkinrowa woopowa”. Anamunceene a hiyo pooti okhalana moonelo mmosaru ntoko wa murokora ola, masi nihaana okhalana ephoole wira nihitepeke wiivaha nthowa. Mwaha wa xeeni? Nkahaya muupuwele moota Satana aarowa awe ohakalala akhala wira naamuhiya omurumeela Yehova, nnaamwi Yehova onilevelenle ene ni oniphentaka vanceene!—Mulikanyihe ni 2 aKorinto 2:5-7, 11.

14. Exeeni enikupaliha wira Yehova onoonilevelela?

¹⁴ Woonasa wene, nyuwo munniikoha so: “Kinrowa osuwela sai wira Yehova ookilevelela?” Akhala wira nyuwo muniikoha siiso, eyo enooniherya wira muhaakhula nikoho nanyu. Iyaakha sinceene sivinre, erevista A Sentinela yaahimmye so: “Pooti wira hiyo naamakela opaka itthu soohiloka, nto nnuupuwela wira khinaarowa owerya ohiya  opaka itthu iyo soohiloka. . . . Akhala wira ti siiso muhikhulumuwe. Nave muhuupuweleke wira mpanke itampi Yehova ohinwerya awe woolevelelani. Maana Satana oniphavela wira muupuweleke wira Yehova khonrowa woolevelelani. Akhala wira nyuwo munnixanka ni munniriipiwa murima mwaha wa itthu iyo soohiloka mwaapanke anyu, eyo enooniherya wira nyuwo khahiyo mwa mutthu ootakhala ni Yehova onimoolevelelani. Nto mwiiyeviheke ni muhihiye onvekela Yehova wira ooleveleleni ni wookhaliheryani okhalana murima wooloka ni ohiya opaka itthu iyo soohiloka. Mukhaleke ntoko mwaana yoowo ikwaha sinceene onrowa omuleela tiithi awe mixankiho sawe. Nyuwo nave muhaana omuleela mixankiho sanyu Yehova hata ekhalaka etthu emosaru wira ookhaliheryeni. Mwiira siiso, owo onimookhaliheryani mwaha wa oreera wawe murima”. *

15-16. Atthu akina anoonela sai vaavo ansuwela aya wira Yehova khaanyanyanle?

¹⁵ Arumeyi anceene a Yehova annilipa vanceene osuwela wira Yehova khaanyanyanle. Mwa ntakiheryo, munna mmosa aahilipa vanceene vaavo aasomme awe yowiiraneya emosa erevista Owehaweha mpantta oni: “Biibiliya Onnirukunuxa Mirima sa Atthu”. Mwaha ole, waalavula yowiiraneya ya murokora mmosa, yoowo wanvila okupali wira Yehova aanimphenta mwaha wa itthu soohiloka saamwiiranenle khalai. Owo aahiwanana muupuwelo owo woohiloka mwa iyaakha sinceene, hata nuumala opatisiwa. Masi nuumala wuupuwelela mukuttho Yesu ovanhe awe wira onoopole, owo aahipacerya woona wira Yehova aanimphenta vanceene. *

¹⁶ Yowiiraneya ele yaamukhaliherye sai munna ole? Owo olempe so: “Okathi kaari aka mmiravo kaamakela oweha epornografia ni waanikivila ohiya, masi muhoolo mwaya kaahihiya. Mooriipiha murima okathi vakhaani ovinre, kaahitthikela oweha epornografia. Nto kaahaavekela axitokweene wira akikhaliherye ohiya. Axitokweene ale yaahikikhaliherya woona wira Muluku onnikiphenta ni onniphavela okilevelela. Okathi mukina kinoona wira nkirina efaita ni wira khivaniweryaneya Yehova okiphenta. Masi osoma yowiiraneya ya murokora ole, wookikhaliherya vanceene. Vano kihoona wira vaavo kinuupuwela aka wira Muluku khoniwerya okilevelela vanikhala ntoko wira kinihimya wira mukuttho Mwanawe ovanhe awe khonwerya ottipiha  itampi saka. Nto koosuka erevista ele wira kisomeke ni wuupuwelela okathi wotheene onkirweela awe muupuwelo woowi Yehova khonikiphenta”.

17. Murummwa Paulo aasyanke sai wiivaha nthowa mootepana?

¹⁷ Sowiiraneya ntoko iya sinnuupuxerya murummwa Paulo. Ohinatthi okhala muKristau, Paulo aahipaka itampi sinceene suulupale. Owo aahisuwela wira aahipaka itthu soohiloka, masi hata vaari siiso, owo khaamakela wuupuwelela itthu iyo soohiloka. (1 Tim. 1:12-15) Ohiya-vo, owo aanikupali ni murima wotheene wira aamuleveleliwa mwaha wa mukuttho wa Yesu, maana Yesu aahivaha okumi awe wira omoopole Paulo. (aGal. 2:20) Vannooneya wira Paulo khaamakela wiivaha nthowa. Masi aaniimananiha ovara muteko wa Yehova.

18. Mwaha ola, itthu xeeni niixuntte ahu?

¹⁸ Itthu xeeni niixuntte ahu nuumala othokorerya miraakho silavuliwe mwaha ola? (1) Wuupuwela, yoovaha enikhuma wa Yehova. Masi moohicikha moota okumi ahu waari aya wooloka khalai, itthu ninlipelela ahu muhoolo elapo esya ti sootepexa oloka. (2) Atthu akina pooti oninyoonyiha, masi vaavo nnaalevelela ahu, hiyo ninniwerya omurumeela Yehova moomalela. (3) Ohitepexa wiivaha nthowa onninikhaliherya omurumeela Yehova moohakalala. Nimutakihaka Paulo, nihaana okupali ni murima wotheene wira Yehova onninlevelela.

19. Ninsuwela sai wira elapo esya khaninrowa wuupuwelaka itthu sooriipiha murima siniiraneya olelo-va?

¹⁹ Nookhalana nlipelelo na okhala moohimala. Nto elapo esya ya Muluku, hiyo khaninrowa wuupuwela itthu soohiloka sinniriipiha murima olelo-va. Olavulaka sa okathi owo Biibiliya onihimya so: “Itthu sa khalayi khasinupuweliwa-tho, itthu sivinre sinoliyaliwa khuluwi”. (Yes. 65:17) Nkahaya muupuwele ela: Akina a hiyo nuuluvanle nivaraka muteko wa Yehova, nto elapo esya ninrowa otthikela okhala amiravo. (Yobi 33:25) Otheene ahu niimananiheke ohuupuwela itthu sa khalai. Ohiya-vo, niimananiheke oweha itthu sooloka muhoolo nri ene elapo esya ya murettele!