1-2. Leemiso 4:25n deˈiya zoriyaa waati kaallana danddayiyoo? Leemisuwaa yoota.

KAALLIDI deˈiya heezzu leemisota qoppa. Issi cima michchiyaa yelagatettan deˈido ufayssiya wodiyaabaa qoppawusu. Iyyo deˈoy haˈˈi keehi baaxeyiyaaba gidikkonne, A Yihoowawu bawu danddayettida ubbabaa oottawusu. (1 Qor. 15:58) A bantta so asaaranne ba laggetuura Gannatiyan issippe deˈiyaabadan ubba galla qoppawusu. Hara michchiyaa gubaaˈiyan deˈiya issi uri bana keehi qohidoogaa hassayawusu. SHin hegaabaa qoppiyoogaa agganawu kuuyaasu. (Qol. 3:13) Issi ishay ba mooruwaa hassayikkonne, haˈˈi Yihoowawu ammanettidi deˈanawu bawu danddayettida ubbabaa oottiyoogan xeelaa wottees.—Maz. 51:10.

² Ha heezzu Kiristtaaneta issuwaa oottiyaabay aybee? Eti ubbay hanidabaa hassayikkonne, eti hegaabaa ubba wode qoppokkona. SHin, eti ‘sitti giidi sinttawu xeelloosona.’—Leemiso 4:25 nabbaba.

3. Nuuni ‘sitti giidi sinttawu xeellana’ bessiyoy aybissee?

³ ‘Sitti giidi sinttawu xeelliyoogee’ keehi koshshiyoy aybissee? Issi uri ubbatoo guyye xeellikko, sinttawu baana danddayennaagaadan, nuunikka kasebaa ubbatoo qoppikko, Yihoowawu haggaaziyoogan sinttawu baana danddayokko.—Luq. 9:62.

4. Nuuni ha huuphe yohuwan ay pilgganee?

⁴ Ha huuphe yohuwan, nuuni ubbatoo kasebaa qoppanaadan oottana danddayiya heezzubata beˈana. Hegeetikka: (1) aggidobaa yeemottiyoogaa, (2) uluwan lancciyaa oyqqiyoogaa, qassi (3) ba mooridobawu bessiyaagaappe aaruwan zilˈˈettiyoogaa. Ha qofata pilggiyo wode, nuuni “guyyeera de7iyaagaa” aggidi “sinttan de7iyaagaa” xallaa qoppanaadan maaddiya Geeshsha Maxaafay yootiyo maarata beˈana.—Pili. 3:13.

5. Eranchchaa 7:10y nuuni ay oottana bessennaagaa yootii?

⁵ Eranchchaa 7:10 nabbaba. Ha xiqisee, “Haˈˈi wodiyaappe kase aadhdhida wodee ayssi Loˈˈo gididee?” gaada oychchiyoogee bala geennaagaa hassaya. Loˈˈobaa hassayiyoogee Yihoowa imota. SHin xiqisee, “‘Ha77i wodiyaappe kase aadhdhida wodee aissi keha gididee?’ gaada oichchoppa” gees. Hegaa gishshawu, nuuni kase deˈuwaa haˈˈiigaara geeddarissidi haˈˈi ubbabay iita gi qoppennaadan naagettana koshshees.

6. Kase deˈoy keha giidi ubbatoo qoppiyoogee eratetta gidenna giyoy aybissee? Leemisuwaa yoota.

⁶ Kase deˈoy keha giidi ubbatoo qoppiyoogee eratetta gidenna giyoy aybissee? Aggidobaa yeemottiyoogee iitabaa dogidi loˈˈobaa xallaa hassayanaadan oottana danddayiyo gishshataassa. Leemisuwawu, Israaˈeelatu hanotaa qoppa. Eti Gibxxeppe kiyi simmidi, yan keehi tuggatido tuggaa sohuwaara dogidosona. Eti kase miido loˈˈo qumaa xallaa qoppidosona. Israaˈeelati hagaadan giidosona: “Nuuni Gibxxe biittan miishsha qanxxennan coo miyo moliyaa hassayeettees; qassi qayye miyo paranjja leehiyaa, zolddo leehe milatiya mal77iya haattai kumido meelooniyaa, adussa paranjja sunkkuruutuwaanne tuummuwaa hassayeettees.” (Qoo. 11:5) SHin eti tumu miishsha qanxxennan coo miidonaa? CHii. Israaˈeelati keehi tuggatidosona; qassi Gibxxen aylle gididi deˈiyo wode naaqoy eta gakkiis. (Kes. 1:13, 14; 3:6-9) SHin eti guyyeppe he tuggaa dogidi kasebaa yeemottiyoogaa doommidosona. SHin eti Yihooway etawu oottido ufayssiyaabaa aggidi eti kase deˈido ufayssiya wodiyaa xallaa qoppidosona. Hegan Yihooway ufayttibeenna.—Qoo. 11:10.

7. Aggidobaa yeemottennaadan naagettanawu issi michchiyo maaddidabay aybee?

⁷ Aggidobaa yeemottennaadan waani naagettana danddayiyoo? Birukiliine Beeteelen oottiyoogaa 1945n doommida issi michchee hanotaa beˈa. Amarida layttappe guyyiyan, iigaadan Beeteelen oottiya issi ishaa gelaasu; qassi eti issippe daro layttawu yan haggaazidosona. SHin, 1976n I azinay keehi sahettiis.  Hayqqanawu matidoogaa I erido wode, I hayqqi simmin deˈiyo wodiyawu O maaddiyaabaa zoriis. Iyyo hagaadan giis: “Nuuni nu aqo deˈuwan ufayttida. Daro asay nuugaadan mule ufayttibeenna.” Qassi I hagaadan giidi mintti yootiis: “Nuuni issippe oottido ufayssiyaabata dogakka; shin he wodiyaa xallaa qoppoppa. Takki takki biyo wode darin azzanakka. Nena gakkidaban keehi unˈˈettoppa; qassi azzanoppa. Issippe Yihoowawu haggaaziyoogan aattido loˈˈo wodiyan ufaytta. . . . Hassayiyoogee Xoossay nuussi immido imota.” Hagee keehi loˈˈo zore!

8. Nu michchiyaa ba azinay zoridoban waana goˈettadee?

⁸ Nu michchiyaa ba azinay zoridobaa oosuwan peeshshaasu. Iyyo layttay 92 gidin hayqqana gakkanaashin Yihoowawu ammanettada haggaazaasu. A hayqqanaappe amarida layttatuppe kase, “Ubba wode haggaazuwan Yihoowawu oottido 63 layttaa qoppiyo wode keehi ufayssiya wodiyaa aattaas gaana danddayays” yaagaasu. Aybissi? A hagaadan gaasu: “Ufayssiya so asa gidida ishanttinne michchontti nuussi deˈiyo gishshawunne nuna Medhdhida, tumu Xoossay A xaalaala gidida Yihoowawu, meri merinawu haggaaziiddi gannate saˈan etaara deˈiyo hidootay nuussi deˈiyo gishshawu nuuni keehi ufayttana danddayoos.” * Yihooway qaalaa gelidobata sitti gaada sinttawu xeellida he michcheeppe nuuni darobaa tamaarana danddayoos!

9. Wogaabaa 19:18y yootiyoogaadan, nuna yiilloyida ura atto giyoogee keehi metana danddayiyoy awudee?

⁹ Wogaabaa 19:18 nabbaba. Nuna yiilloyida gubaaˈiyan deˈiya ura, nu mata laggiyaa, woy nu dabbuwaa atto giyoogee issi issitoo metana danddayees. Leemisuwawu, issi michchiyaa gubaaˈiyan deˈiya hara michchiyo taappe miishshaa wuuqqadasa gaada mootaasu; shin guyyeppe, ba balaa akeekada atto gaanaadan  oychchaasu. Gidikkonne, mootido michchiyaa keehi yiillotaasu; qassi ba bolli gakkidabaa qoppiyoogaa aggana danddayabeykku. Neeyyo hegaadan siyetti erii? Hegaa mala hanotay nuna gakki erennaba gidikkonne, nuuppe daroti nuna yiilloyida ura mule atto gaana danddayikke giidi qoppana danddayoos.

10. Nuuni uluwan lancciyaa oyqqiyo wode nuna aybi maaddana danddayii?

¹⁰ Nuuni uluwan lancciyaa oyqqiyo wode nuna aybi maaddana danddayii? Yihooway ubbabaa beˈiyoogaa hassayana koshshees. Yihooway nuna gakkiya ubbabaa, leemisuwawu, harati nuna naaqqiyo wode gakkiyaabaa erees. (Ibr. 4:13) Nuuni waayettiyo wode I azzanees. (Isi. 63:9) Qassi nu bolli gakkida naaquwaappe denddidaagan nuuni tuggatido tuggaa ubbaa wurssettan xayssanawu I qaalaa geliis.—Ajj. 21:3, 4.

11. Nuuni haratuyyo atto giyoogee nuna waati maaddii?

¹¹ Nuuni haratuyyo atto giyoogee nu ufayttanaadan oottiyoogaakka hassayana koshshees. Wordduwan mootido michchiyaa hegaa akeekaasu. Guyyeppe, wuuqqadasa gaada mootida michcheeyyo atto gaasu; qassi uluwan lancciyaa oyqqiyoogaa aggaasu. Nuuni haratuyyo atto giyo wode Yihooway nuuyyo atto giyoogaa A akeekaasu. (Maa. 6:14) Hara michchiyaa I bolli oottidobay bala gidiyoogaa A erikkonne, atto gaasu. Hegaappe denddidaagan haˈˈi nu michchiyaa ufayttawusu; qassi Yihoowawu haggaaziyoogaa xallaa qoppawusu.

12. Koyro Yohaannisa 3:19, 20⁠ppe nuuni ay tamaariyoo?

¹² Koyro Yohaannisa 3:19, 20 nabbaba. Mooridobawu nuuni ubbay issi issitoo zilˈˈettoos. Leemisuwawu, issoti issoti tumaa eranaappe kase oottidoban zilˈˈettoosona. Harati qassi xammaqetti simmidi oottido mooruwawu zilˈˈettoosona. (Roo. 3:23) Nuuni suure gididabaa oottanawu koyiyoogee qoncce. SHin, “nuuni ubbaikka daroban baleettees.” (Yaaq. 3:2; Roo. 7:21-23) Zilˈˈettiyoogee ufayssiyaaba gidana xayikkonne, hegee guuttaa maaddana danddayees. Aybissi? Zilˈˈettiyoogee nuuni nu balaa suurissanaadaaninne zaarettidi he balaa oottennan agganawu murttanaadan nuna denttettana danddayiyo gishshataassa.—Ibr. 12:12, 13.

13. Nuuni mooridobawu ubbatoo bessiyaagaappe aaruwan zilˈˈettana koshshennay aybissee?

¹³ SHin nuuni nu nagaraappe simmin, Yihooway nuussi atto giikkokka nuuni mooridobawu zilˈˈettana danddayoos. Hegaadan zilˈˈettiyoogee qohees. (Maz. 31:10; 38:3, 4) Waatidi? Kase oottido nagaraa gaasuwan zilˈˈettiyoogaa aggabeenna issi michchee hanotaa beˈa. A, “Taani deˈuwaa demmennan aggana danddayiyo gishshawu, minnada Yihoowawu haggaaziyoogee aynne maaddennabadan tawu siyettees” yaagaasu. Nuuppe darotussi iigaadan siyettana danddayees. Hegaa gishshawu, nuuni mooridobawu ubbatoo bessiyaagaappe aaruwan zilˈˈettennaadan naagettana koshshees. Aybissi? Yihooway nuna atto giikkonne, nuuni awu haggaaziyoogaa aggikko Seexaanay ufayttana danddayiyo gishshataassa!—2 Qoronttoosa 2:5-7, 11⁠ra gatta xeella.

14. Yihooway nuna aggibeennaagaa waati erana danddayiyoo?

¹⁴ SHin, ‘Yihooway tana aggibeennaagaa waata erana danddayiyaanaa?’ giidi qoppana danddayoos. Neeni he oyshaa oychchikko, hegee Yihooway neeyyo atto gaana danddayiyoogaa bessees. Daro layttaappe kase, Wochiyo Keelay hagaadan giis: “Nuuni bala gidida issibaa zaari zaaridi oottana danddayoos. Hegee nuuni Xoossawu haggaaziyoogaa doommanaappe kasekka oottiyo xoonanawu nuna metidaba gidana danddayees. . . . Hidootaa qanxxoppa. Ta oottido nagaraa Yihooway  mule atto gaana danddayenna gaada qoppoppa. Seexaanay neeni hegaadan qoppanaadan koyees. Neeni he balaa oottiyo wode azzanaasanne unˈˈettaasa. Hegee neeni iita asa gidennaagaanne Yihooway neeyyo atto gaana danddayiyoogaa bessees. Ubbatoo nena ziqqi ootta; qassi Xoossay neeyyo atto gaanaadan, zaarettada geeshsha kahaa demmanaadaaninne he balaa zaarettada oottennan agganawu I nena maaddana mala ubbatoo woossa. Guutta naˈi issibaa darotoo moorikkonne, bana ba aaway maaddanaadan ubbatoo oychchees. Hegaa gishshawu, Yihooway nena maaddanaadan ubbatoo oychcha; qassi I nena maaddana.”

15-16. Amaridaageeti Yihooway etan hidootaa qanxxibeennaagaa waati akeekidonaa?

¹⁵ Yihoowa asaappe daroti I etan hidootaa qanxxibeennaagaa akeekidi minettidosona. Leemisuwawu, amarida layttappe kase, issi ishay “Geeshsha Maxaafay Asay Laamettanaadan Oottees” giya huuphe yohuwan kiyidaagaappe issuwaa nabbabidi minettiis. He huuphe yohuwan, issi michchiyaa ba deˈuwan bana gakkida iitabaa gaasuwan Yihooway bana siiqana danddayiyoogaa ammananawu keehi metootidoogaa yootaasu. Qassi A xammaqetta simminkka daro layttawu iyyo hegaadan siyettiis. SHin A wozuwaabaa wotta dentta qoppidoogee, Yihooway O siiqiyoogaa A ammananaadan maaddiis. *

¹⁶ He michchee deˈuwan hanidabay he ishaa waati maaddidee? I hagaadan giis: “Taani yelagatettan deˈiyo wode, pornograafiyaa beˈiyoogee tawu amale gidiis. Mata wode, zaarettada hegaa beˈaas. Cimati tana maaddanaadan oychchaas; qassi taani loddan loddan ta metuwaa xoonaas. Cimati Xoossay tana siiqiyoogaanne tawu atto gaana koyiyoogaa ammananaadan tana maaddidosona. Gidikkonne, issi issitoo haˈˈikka pattennabadaaninne Yihooway atto gibeennabandan tawu siyettees. [He michchee] deˈuwan hanidabaa nabbabidoogee tana keehi maaddiis. Taani Xoossay tawu atto geenna giyoogee, A Naˈaa yarshshoy ta nagaraa kammana danddayenna gaada ammaniyoogaa mala gidiyoogaa akeekaas. Yihooway tana siiqennaabadan tawu siyettiyo wode ubban I deˈuwan hanidabaa nabbabada wotta dentta qoppanaadan  he huuphe yohuwaa qanxxada matan wottaas.”

17. Kiitettida PHawuloosi I mooridobawu bessiyaagaappe aaruwan zilˈˈettennaadan waani naagettidee?

¹⁷ Deˈuwan hanida hegaa malabati nuuni kiitettida PHawuloosa hassayanaadan oottoosona. I Kiristtaane gidanaappe kase, keehi iitabata oottiis. PHawuloosi ba oottidobaa hassayikkonne, hegaa ubbatoo qoppibeenna. (1 Xim. 1:12-15) Wozoy ayyo buzo imettidabadan qoppiis. (Gal. 2:20) Hegaa gishshawu, PHawuloosi I mooridobawu ubbatoo zilˈˈettiyoogaappe Yihoowawu haggaazanawu bawu danddayettida ubbaa oottiyoogan xeelaa wottiis.

18. Ha huuphe yohuwan ay tamaaridoo?

¹⁸ Ha huuphe yohuwan pilggidobatuppe nuuni ay tamaariyoo? (1) Loˈˈobaa hassayiyoogee Yihoowa imota; shin kase deˈoy ay keenaa loˈˈo gidikkonne, ooratta alamiyan nuuni demmana deˈoy hegaappe keehi aadhdhana. (2) Harati nuna qohana danddayoosona; shin nuuni atto giikko, Yihoowawu haggaaziyoogan xeelaa wottana danddayoos. (3) Nu mooridobawu bessiyaagaappe aaruwan zilˈˈettiyoogee nuuni Yihoowawu ufayssan haggaazennaadan diggana danddayees. Hegaa gishshawu, PHawuloosaagaadan, nuunikka Yihooway nuuyyo atto giidoogaa ammanana koshshees.

19. Nuuni ooratta alamiyan deˈiyo wode azzananaadan oottiyaabay deˈennaagaa waati eriyoo?

¹⁹ Nuuyyo merinawu deˈiyo hidootay deˈees. Nuuni ooratta alamiyan deˈiyo wode, nu azzananaadan oottiya aybanne hassayokko. He wodiyaa xeelliyaagan Geeshsha Maxaafay, “Kasebai ubbai hassayettennanne qofettenna” yaagees. (Isi. 65:17) Hagaa qoppa: Nuuppe amaridaageeti Yihoowawu haggaaziiddi cimikkonne, ooratta alamiyan nuuni zaarettidi yelaga gidana. (Iyy. 33:25) Hegaa gishshawu, kase gakkida iitabaa qoppennan agganawu murttidaageeta gidoos. Nuuni ooratta alamiyan xeelaa wottanawunne yan deˈanawu haˈˈi nuussi danddayettida ubbabaa oottanawu koyoos!