1, 2. მუჭო შემლებნა მივაჸუნათ იგავეფიშ 4:25-ის ინოჭარილ რჩევას? ქიმიჸონით მაგალით.

დეფიქრით მოჩამილ მაგალითეფშე. ართ ხანშამიშულირ და იშინანს ბედნერ დროს, ნამუთ ულირს უღუდ. თიშ უმკუჯინუო, ნამდა ასე უმოს სირთულეეფს შეხვადუ ცხოვრებას, თინა აგრძელენს იეჰოვაშო თი ირფელიშ კეთებას, მუთ შეულებ (1 კორ. 15:58). ირდღას წერმიდგინენს, მუჭო ცხოვრენს მუშ საჸოროფო ხალხწკუმა ართო ახალ ქვეყნიერებას. ხოლო ართ დას გაშინე, მუჭო ელაჭუ გურ თანამორწმუნექ, მარა თინა გინოჭყვიდუნს, ნამდა მეტო ვეფიქრას თეშ გურშენ (კოლ. 3:13). ჯიმას უჩქჷ, ნამდა ულირს დაშუ, მარა ყურადღება თიშა გინუღ, მუდგაშ კეთება ამდღა შეულებ იეჰოვაშ ართგურქ ქუდოსქიდასინ (ფსალმ. 51:10).

² მუ საერთო უღჷ თე სუმ ქრისტიანს? სუმხოლოს შუ, მუდგაქ ულირს მოხვად, მარა ირო თიშე ვა ფიქრენა. პირიქით, თინეფ წიმი იჯინენა მომავალშა (წეკითხით იგავეფიშ 4:25).

3. მუშენ რე მნიშვნელოვან წიმი იბჯინათ მომავალშა?

³ მუშენ რე მნიშვნელოვან წიმი იბჯინათ მომავალშა? მუჭოთ ირიათო უკახლე იჯინენ ფერ პიროვნებას, მანგას ვალნე, თეშ ჩქი ხოლო იეჰოვაშ მსახურებას წიმი ვა მალნენა, ირიათო ულირშე ქოფიფქრენთ-და (ლუკ. 9:62).

4. მუს გუვარჩიენთ თე სტატიას?

⁴ თე სტატიას გუვარჩიენთ სუმ მახეს, ნამუთ ულირშა გინმოღალაფუანა ყურადღებას. თენეფ რე: 1) ნოსტალგია, 2) გურიშმოულა დო 3) დაშებულშე ნაბეტან წუხება. თითოულ მხარეშ გარჩიებაშ დროს ქობძირუნთ, მუჭო შეულებ ბიბლიურ პრინციპეფს მიმეხვარან, ყურადღება ვეგნიბღათ თიშა, „მუდგაქ ულირს დოსქიდ“, დო ქიფიფქრათ თიშე, „მუთ წოხოლე რე“ (ფილ. 3:13).

5. მუშ გურშენ მაფრთხილენა ეკლესიასტეშ 7:10?

⁵ წეკითხით ეკლესიასტეშ 7:10. ქიდეკვირით, თე მუხლ ვეჩიებ, ნამდა არასწორ რე ფთქუათ: „ულირ დღალეფ ჯგირ რდუ“. ჯგირ მოგონებეფ საჩუქარ რე იეჰოვაშე. თე მუხლის ჭარჷ: „ვათქუა, ულირ დღალეფ ამდღანერს უჯგუდუა“. შხვანერო ქოფთქუათინ, ფრთხილას ოკო ვორდათ, ნამდა ჩქინ ულირ ველუჸუნუათ ასეიან მდგომარეობას დო ვეფიფქრათ, ნამდა ასე ირფელ უფრაშო რე. ბიბლიაშ შხვა თარგმანს თე მუხლ ათაშ რე თარგმნილ: „დღას ვეკითხა, მუშენ რდუ ჯვეშო მუდგარენეფ ბრელით უჯგუშო? თენა ვა რე ჭკვერულ კითხვა“.

6. მუშენ ვა რე ჭკვერულ, იფიფქრათ, ნამდა ჩქინ ცხოვრება ულირს უმოს უჯგუშ რდუ? ქიმიჸონით მაგალით.

⁶ მუშენ ვა რე ჭკვერულ, იფიფქრათ, ნამდა ჩქინ ცხოვრება ულირს უმოს უჯგუშ რდუ? ნოსტალგიას შეულებ ხვალე ჯგირ მუდგარენეფ გუმოშინან ულირშე, მარა გუმოჭყოლიდუან, მუ გაჭირებას შეფხვადით. დეფიფქრათ ისრაელეფიშ მაგალითშე. ეგვიპტეშე გიშულაშ უკულ თინეფქ ხეთეშე გიჭყოლიდეს, მუნერ რთულ ცხოვრება უღდეს თექ. თინეფ ფიქრენდეს ჯგირ ოჭკუმალშე, ნამუთ ეგვიპტეს უღდეს. ისრაელეფქ თქუეს: „მუ ჯგირ რდუ ეგვიპტეს ჩხომს, კინტირს, ხაბურზაკის, პურასკიას, ხვარხვის დო ნიორს უფასოთ ბჭკუმუნდითინ!“ (რიცხ. 11:5). მართალო უფასოთ უღდესო თინეფს თე ოჭკუმალეფ? ისრაელეფ ტანჯებულ მუშობათ გაფულენდეს ოჭკუმალიშ ფასის; ეგვიპტეს თინეფ მონეფ რდეს, ათეშენ თექიანეფ აჩაგრენდეს (გამ. 1:13, 14; 3:6—9). მარა უმოს გვიანო თინეფქ გიჭყოლიდეს თე გაჭირება დო მიანატრუდეს ულირს. ისრაელეფქ ისხუნუეს, იფიქრესკო ჯვეშო უღდესინ თი ჯგირ დღალეფშე, თიშ მანგიორო, ნამდა ყურადღება თი ჯგირ მუდგარენეფშა გეგნიღესკო, მუთ იეჰოვაქ თინეფშო აკეთ. იეჰოვას ვა მოწონდჷ თინეფიშ დამოკიდებულება (რიცხ. 11:10).

7. მუქ მეხვარ ართ დას ეიჩილითუკო ნოსტალგიაშ მახე?

⁷ მუჭო შემლებნა ეიფჩილითუათ ნოსტალგიაშ მახე? გუვარჩუათ ართ დაშ შემთხვევა, ნამდგაქ 1945 წანას ბრუკლინიშ ბეთელს დიჭყჷ მსახურება. მუსხირენ წანაშ  უკულ თიქ დექორწინ თანაბეთელელშა დო თინეფ თექ ბრელ წანას მსახურენდეს ართო. მარა 1976 წანას თიშ ქომონჯიქ დელახ. თე დაქ თქუ, ნამდა, მუჟამსით მუშ მეუღლექ ქუგოხვად, მალას ღურუდუნ, თიქ მუსხირენ ჯგირ რჩევა მეჩჷ, ნამუთ მუშ ღურაშ უკულ მეხვარებუდ. თიქ უწუ: „ჩქი ბედნერ ქორწინება მიღდეს. ბრელს ვა უჩქჷ, თენა მუ რენ“. თეწკუმა ართო თიქ ელუჩ მუშ ოსურს: „სი ვა გიჭყოლიდუანქ თი ჯგირ მუდგარენეფს, მუთ ართო მიკეთებნა, მარა მთელ ყურადღება ულირშა ვეგნიღა. დროშ მიკულაწკუმა ართო დუდის უჯგუშო ქიგინანქ. დუდ ვეშიცოდილუა მოხვალამირიშ გურშენ. ბედნერ რდა თი ხიოლ დო კურთხევეფშენ, ნამუთ ართო მსახურებაშ დროს მიბღით . . . მოგონებეფ საჩუქარ რე იეჰოვაშე“. თენა მართალო ჯგირ რჩევა რდუ!

8. მუ ჯგირობუა მოუღ ჩქინ დას, ულირშე ბრელს ვა ფიქრენდუნ თიქ?

⁸ თე დაქ გურშა მიღ ქომონჯიშ სიტყვეფ. თინა 92 წანერ რდუ, ღურუნ დო ბოლოშა ართგურო ომსახურუდ იეჰოვას. ღურაშახ მუსხირენ წანათ ადრე თიქ თქუ: „ჩქიმ 63 წანიან სრულ დროთ მსახურებას გინვოჯინექინ, შემლებ ფთქუე, ნამდა მართალო ბედნერ ცხოვრება მიღუდ“. მუშენ იჩიებუდ თეს? თინა ენწყუნდჷ: „მუთ არძაშ უმოს ბედნერო გინმოშქვანან, თენა რე ჩქინ შესანიშნავ საჯიმალო, თიწკუმა ართო დედამიწას სამოთხეს ცხოვრებაშ იმენდ დო ჩქინ დიდებულ გუმაჭყაფალიშ, ხვალე ართ ჭეშმარიტ ღორონთ იეჰოვაშ, მსახურება მარადიულო“. * ბრელ მუდგარენიშ გურაფა შემლებნა თე დაშე, ნამდგას მთელ ყურადღება იეჰოვაშ დუნაპირებუეფშა აფუდ გინოღალირ!

9. მუჭოთ ლევიანეფიშ 19:18-შე იძირე, განსაკუთრებულო მუჟამ შილებე გამჭირდან პატიებაქ?

⁹ წეკითხით ლევიანეფიშ 19:18. მინშა ადვილ ვა რე ქაპატუე, განსაკუთრებულო თიმწკუმა, მუჟამსით პიროვნება, მიდგა მოწყინებაფუანა თანამორწმუნე, ხოლოშიან  მეგობარ ვარდა ნათესე რე. მაგალთო, ართ დას თანამორწმუნექ უსამართლოთ ქეკაბრალ ფარაშ ხირუა. უმოს გვიანო თე თანამორწმუნექ ქიმეხვად, ნამდა მეჩირთჷ დო პატიება ქოთხუ, მარა თე დაქ გაგრძელ თიშე ფიქრ, მუდგაქ მოხვად. დღას ქოიგინაფნანო თაშ დუდ? თეცალ სიტუაცია ვამღუდესკონ ხოლო, ჩქინდე უმენტაშ ჸოფე განაწყენებულ დო მიფიქრებნა, ნამდა დღას ვა მაპატიებედეს.

10. მუქ შილებე მიმეხვარან, მუჟამსით გურ მაფნა მოულირ?

¹⁰ მუქ შილებე მიმეხვარან, მუჟამსით გურ მაფნა მოულირ? ართ-ართ მხარე რე, ფშუდან, ნამდა იეჰოვა ირფელს ორწყე. თის უჩქჷ ირფელ, მუთ ჩქინ ცხოვრებას ხვადუ, თინეფ შქას ნებისმიერ უსამართლობა, ნამდგას შეფხვადუთ (ებრ. 4:13). თინა წუხენს, მუჟამსით ჩქი იბტანჯებუთ (ეს. 63:9). იეჰოვა მოპირნა, ნამდა საბოლათ ჩამთხინუანა არძა ოწუხებელს, ნამდგაქ უსამართლობას მაჸუნ (გამოცხ. 21:3, 4).

11. მუშენ რე ჩქინო ჯგირ, ნამდა ვაპატუათ შხვეფს?

¹¹ თინა ხოლო მოკონა, ფშუდან, ნამდა, მუჟამსით შხვეფს ვაპატიენთ, თენა დუდის უჯგუშო მოგინებაფუანა. ზუსტას თეს მეხვად თი დაქ, მიდგას ფარაშ ხირუა ეკაბრალეს. თის შეიალებუ ქაპატუკო თანამორწმუნეს. თე დაქ ქიმეხვად, ნამდა, მუჟამსით ჩქი ვაპატიენთ შხვეფს, თიმწკუმა იეჰოვა ხოლო მაპატიენა ჩქი (მათ. 6:14). თინა ვა ფიქრენდჷ, ნამდა მუთ თანამორწმუნექ უკეთ, უმნიშვნელო რდუ, მარა იშენ პატიება ისხუნუ. შედეგო უმოს ბედნერ რდუ დო შეულებუდ მთელ ყურადღება ღორონთიშ მსახურებაშა გეგნუღალუდკო.

12. მუს ბგებულენთ პირველ იოანეშ 3:19, 20-შე?

¹² წეკითხით 1 იოანეშ 3:19, 20. დაშებულშე წუხება გასაკვირ ვა რე. მაგალთო, ნამთინეს დანაშაულიშ გრძნობა ჭეშმარიტებაშ გაგებაშახ კეთებულ საქმეეფიშ გურშენ აწუხენს. შხვეფს — ნათუაშ უკულ დაშებულ შეცდომეფიშ გურშენ. თენა ჩვეულებრივ მუდგარენ რე (რომ. 3:23). მუშო ოკო რაგად, თიშ კეთება მოკონა, მუთ სწორ რე. მარა „ჩქი, არძა, ხშირას ფჩირთუთ“ (იაკ. 3:2; რომ. 7:21—23). მართალ რე, თე გრძნობა სასიამოვნო ვა რე, მარა თის მუდგარენ ჯგირობუა მოუღ ჩქინდა. მუშენ იფჩიებუთ თეს? დანაშაულიშ გრძნობას შეულებ აღბძრან, დოფთირუათ ჩქინ საქციელ დო ვეგემეობრათ შეცდომეფ (ებრ. 12:12, 13)

13. მუშენ ოკო ვეწინააღმდეგათ დაშებულშე ნაბეტან წუხებას?

¹³ შილებე დაშებულშე წუხება ნაბეტან ხოლო რდას, მუჟამსით დუდის დამნაშავეთ თიშ უკულ ხოლო ბგინაფლენთ, მუთ იბნარღით დო იეჰოვაქ ხოლო ქუმოძირეს, ნამდა მაპატუეს. თეცალ დანაშაულიშ გრძნობა შილებე საზიანო რდას (ფსალმ. 31:10; 38:3, 4). მუშენ იფჩიებუთ თეს? გუვარჩუათ ართ დაშ მაგალით, მით დუდის დამნაშავეთ ულირს დაშებულიშ გურშენ გინაფლენდჷ. თინა იჩიებუდ: „ფიფქრენდჷ, ნამდა იეჰოვაშ მსახურებას მუდგა ვამკეთებუდკონ, ალბათ იშენ ვეგნოფსქიდუდ“. ჩქინდე ბრელს უჩქჷ, მუს გინაფლენდჷ თე და. სასიცოცხლოთ მნიშვნელოვან რე, ქივეწინააღმდეგათ დაშებულშე ნაბეტან წუხებას. თე ირფელიშ უკულ დეფიქრით, მუ ბედნერ იჸუაფუდ სატანა, თეშ გურშენ ღორონთიშ მსახურებას მივოტენდით-და, თიშ უმკუჯინუო, ნამდა იეჰოვაქ მაპატუეს! (ქეშუდარით 2 კორინთელეფიშ 2:5—7, 11).

14. სოვრეშე მიჩქნა, ნამდა იეჰოვა ვემმოტენა?

¹⁴ შილებე ფიქრენდათ: „სოვრეშე მიჩქჷ, ნამდა იეჰოვა ვემმოტენს?“. თეშ პასუხ გოინტერესნან, თავრეშე იძირე, ნამდა იეჰოვას შეულებ თქვან პატიება. წანეფიშ წოხოლე „გინაჯინალ კოშკის“ ჭარუდ: „შილებე მუდგარენ არასწორიშ კეთებაქ, მუდგას იეჰოვაშ მსახურებაშ დოჭყაფაშახ ორთუდით, კინ ჩვევათ გინგართეს დო ვამგარიებეს თიშა . . . მარა იმენდ ვადინუათ.  ვეფიქრათ, ნამდა თქვან ცოდვა უპატიებელ რე. სატანას ხოლო თინა ოკო, ნამდა თაშ იფიქრათ. თქვა შეწუხებულ რეთ დო დუდის გლახათ გინაფლენთინ თინა, ოძირანს, ნამდა გლახა პიროვნება ვა რეთ. ვადინუათ თანდაბლობა დო ირიათო ილოცით, ნამდა ღორონთიქ გაპატუან, თეწკუმა ართო, მიგეხვარან სუფთა სინდისიშ დორთინაფას დო თე გლახა ჩვევაშ ჩათხინაფას. მუჭოთ ჭიჭე ბაღანა ართდოიგივე პრობლემაშენ ბრელშა თხინს მუმას მოხვარას, თეშ თხით თქვა ხოლო თქვან ზეციერ მუმას დო მოჭყოლოფე ღორონთ ქიმგეხვარებნა“. *

15, 16. მუჭო იგინ დუდ ნამთინექ, მუჟამსით ქინანჭჷ, ნამდა იეჰოვას ვემუტებ თინა?

¹⁵ ბრელ იეჰოვაშ მსახურს გურშა ელუკინ თიშ ინონჭაფაქ, ნამდა იეჰოვას ვემუტებ თინა. მაგალთო, მუსხირენ წანაშ წოხოლე სტატიეფიშ სერიას, „ბიბლია ხალხიშ ცხოვრებას თირანს“, მოჩამილ რდუ ართ დაშ შემთხვევა. თინა იჩიებუდ, ნამდა მუშ ულირ ცხოვრებაშ წესიშ გურშენ, უჭირდჷ თიშ დაჯერება, ნამდა ღორონთ ქიჸოროფუანდ თიცალ ადამიანს, მუნერით მუ რდუ. თის ნათუაშ უკულ, მუსხირენ წანას, ხოლო უღუდ თეცალ გრძნობეფ. მარა გიშაჸიდირალიშ გურშენ ჯგირო დაფიქრებაქ მეხვარ, აზროვნება დითირუკო. *

¹⁶ მუჭო მეხვარ თიშ მაგალითიქ ართ ჯიმას? თინა ჭარუნს: „ახალგაზრდობას პორნოგრაფიას ვუჯინედ დო ჩქიმო მანგარ ძნელ რდუ თიშ მეტება. ამარდე კინ ქოვუჯინ თის. უხუცესეფს ქოფთხი მოხვარა დო პრობლემაშ მოგვარებაშ შარას ქიგებდირთჷ. თინეფქ დუმარწმუნეს, ნამდა ღორონთის ვუჸორქ დო ჩქიმ პატიება ოკო. მინშა კინ უღირსობაშ გრძნობა მირჩქინდუ დო ფიფქრენქ, ნამდა იეჰოვას ვეშულებ ვუჸორდე. თე დაშ შემთხვევაშ კითხირქ მანგარო მიმეხვარ. ასე მარჩქილე, ნამდა, მუჟამსით ფიფქრენქ, ღორონთ ვა მაპატიენს, თეთ თიშ რაგად გიშმალე, ნამდა თიშ სქუაშ მსხვერპლ ვა რე დასაბაღ ჩქიმ ცოდვეფშო. თე სტატია გეშაბჭკირ, ნამდა შემალებუას წებკითხე დო თიშე იფიფქრე, მუჟამსით უღირსობაშ გრძნობა მირჩქინდუ“.

17. მუჭო გიორჯგინ პავლე მოციქულქ დაშებულშე ნაბეტან წუხებაშ მახეს?

 ¹⁷ თეცალ მაგალითეფ გუმოშინანა მოციქულ პავლეს. ქრისტიანო გინორთაშახ თინა გლახა მუდგარენეფს ორთუდ. პავლეს შუდჷ, მუ აფუდ ნაკეთებ, მარა ირო თეშე ვა ფიქრენდჷ (1 ტიმ. 1:12—15). თინა გიშაჸიდირალს თეშ უჯინედ, მუჭოთ პირად საჩუქარს ღორონთშე (გალ. 2:20). თიქ გიორჯგინ დაშებულშე ნაბეტან წუხებაშ მახეს დო მთელ ყურადღება იეჰოვაშო მუდგაშ კეთება შეულებუდუნ, თიშა გეგნიღ.

18. მუ დიბგურეთ თე სტატიაშე?

¹⁸ მუ დიბგურეთ თე მახეეფიშ გარჩიებაშე? 1) ჯგირ მოგონებეფ საჩუქარ რე იეჰოვაშე; ვა უღჷ მნიშვნელობა, მუსხით ჯგირ რდუ ჩქინ ულირ ცხოვრება, ჩქინ მომავალ ახალ ქვეყნიერებას უჯგუშ იჸი. 2) შილებე მიდგარენქ გურ ქელმოჭუან, მარა თეცალ დროს პატიებას იფსხუნუანთ-და, შემალებენა მთელ ყურადღება ღორონთიშ მსახურებაშა გეგნიბღათ. 3) დაშებულშე ნაბეტან წუხებაქ შილებე მეცილან, ხიოლით ვემსახურათ იეჰოვას. ათეშენ პავლეცალო დარწმუნებულ ოკო ვორდათ, ნამდა იეჰოვაქ მაპატუეს.

19. სოვრეშე მიჩქნა, ნამდა ახალ ქვეყნიერებას ვეგიფშინანთ მუთუნს ულირშე, მუთ გურს ალმოჭუანა?

¹⁹ ჩქი შემლებნა იფცხოვრათ მარადიულო. ღორონთიშ ახალ ქვეყნიერებას ვეგიფშინანთ მუთუნს ულირშე, მუთ გურს ალმოჭუანა. თე დროშ გურშენ ბიბლია იჩიებ: „ულირს მოხვალამირ მითინს ვა გაშინე დო ვართ გურს შეუწუხენს“ (ეს. 65:17). დეფიქრით, ჩქინდე ნამთინე წანეფ რე, მუთ იეჰოვას ვომსახურუთ დო უკვე ასაკშა ვორეთ მიშულირ, მარა ახალ ქვეყნიერებას კინ ახალგაზრდეფ იპჸით (იობ. 33:25). თაშ ნამდა, მორთ გინოჭყვიდილ მაფდან, ბრელ ვეფიფქრათ ულირშენ. თეშ მანგიორო, მოკონა, მთელ ყურადღებათ წიმი იბჯინათ მომავალშა!