Umhạr imhị lhạ phọ 1983. Idiphọ obumoọny, mị umhoon ghan agey mem dị mị amhạn ḍiniin alhạ, kuolọ mị ramạn ḍioph asiạ, bịn oomo aloor amhị emhiigh ophinhogh ghan. Iyạl asiạ reten, mị rasumạ ḍiniin aḍiroọr bịn mị u/tue mun u/telhe. Oomo idị mị akparaghạ mị u/tue upoophe ruwol amhị, r’enụm inyaạm i/lo mun ruwol amhị. Emhiigh k’aḍio phọ aḍiphẹ phọ, mị ra/telhe ghan mun. E/moon phọ amhị ikọm idị mị u/poph mun, ghalhamọ k’anyiidiphọ, bịn mị akom idiphọ obạm obumoọny.

Iphurukpu arunwanyụ reten egbi k’amem mọ mị aḍigh bọ otu, bịn iyạl anmariịr Abugbaanhaạn AZihova oru k’ayoor. Mị rabooghiạn ghan ni mem lọ aruuruen rotu k’ayoor, kuolọ ḍio phọ aḍiphẹ phọ, mị umheera ni mọ anmariịr phọ abuẹn phọ ughaaphạn imhị. Bidị ughaạph ilọ aParadaịs, kụ iitughianhạm imhị raraạr dị mị anhaghạn mem dị mị amhạn oogh asiạ. Mem mọ amuphẹ phọ, onyọ amisonarị dị oghol mọ Jethro, dị arugh ghan epẹ Suriname, kụ aru ghan emhạ ayoor mem unwanyụ phọ, kụ atughemhị ghan Baibul odẹ amhị. AJethro useenyạn ghan ni imhị. Kụ uḅeraạn ghan imhị. Ogbogh odẹ r’onhiin amhị uphạm ghan ni imhị eeni amem oghimhọm ituughạ abuọ aZihova, dị ophạm ghan siphẹ emhạ phọ ayoor. Kụ iḍighi kụ mem dị oniin siphẹ anmariịr phọ dị oghol mọ Florence, upuru imhị mughumọ kiḅeraạn imhị otuughạ obughẹ, mị uḅẹm ni mọ ii.

AFlorence aḅilhẹ ni aḅula r’olom odị Justus, kụ iyạl phọ abidị omhiigh otughemhị amhị Baibul phọ. Mem dị bidị omhiịn bọ mọ mị u/maạr aạl aḍinyạ, bidị utughemhị ni imhị ilọ aạl. Esighẹ rekị bịn mị amhiigh aạl aani. Ḍiniin aḍio bịn olom mọ r’anhịr phọ uḅenhị imhị mọ mosighẹ bidị okị epẹ Suriname. Dị eeph ni, oye o/rọl mun Orealla dị kakiọm ghisigh itughemhị aBaibul phọ amhị. Kuolọ, olhoghi amhị aḅaạl li loor esi dị, aZihova imhị u/wulha.

I/bia bịn okọy eten dị oghol mọ Floyd aru Orealla, odị odi rakaạph iiḅi iinhaghạn phọ otu atum otu kụ aru uzuan imhị. Odị rughaaphạn imhị oḅilhẹ upuruom imhị ilọ otuughạ aBaibul phọ, bịn mị ayịgh. Kụ upuru imhị mọ “Uḍighi ika kụ nạ ayịgh bọ?” Kụ mị aḅenhị nyodị mọ mị matuughạ amạn abrosọ phọ oghol bọ mọ, What Does God Require of Us? mị aḅilhẹ amiigh otuughạ Knowledge That Leads to Everlasting Life. * Mị ughaạph ni ipẹ eḍighi bọ kụ owilhẹ bọ ituughạ phọ. Floyd r’amhị utuughạ ni pakirị aḍinyạ aKnowledge phọ esugha bọ omhadạn, kuolọ uḅilhẹ ni osighẹ aani nyodị phọ oghị enhọn ekpisi. Bịn eḅilhẹ eḍighi idị mị u/moọgh mun oye dị kutughemhị imhị Baibul phọ.

Toroboiperolbọ, lhạ phọ 2004, usighẹ ni Granville r’aJoshua, iyạl abukọy eten dị ogbatanhaạn oru  Orealla. Bidị odi rokaạph iiḅi iinhaghạn phọ otu atum otu, kụ oru umhiịn imhị. Bịn upuru imhị mughumọ kiḅeraạn ni imhị otuughạ aBaibul phọ, kụ mị ayịgh. Mị uḅẹm mọ bidị oḅilhẹ omhiigh otughemhị amhị k’emhiighom aḍinyạ aKnowledge phọ. Mị uwạ ghan omhiịn mughumọ ipẹ bidị kutughemhị bọ imhị eḍighi ni iniin r’ipẹ abuḅẹl abutughemhiạ phọ utughemhị bọ imhị. AGranville uḅenhị ni imhị mọ ropạm ghan ni ituughạ epẹ emhạ phọ. Obọ remạn ni ḍioph asiạ mị ko/mite bọ erugh, kuolọ mị uwạ ni oghị. Esi iduọn phọ aGranville usighẹ imhị arolomhị agadạ iidighila, kụ uukilhemhi imhị asiemhi epẹ aKindọm Họl phọ.

Esighẹ rekị bịn aGranville uḅenhị imhị oḍigh aani Theocratic Ministry School phọ. Odị aḅẹm mọ: “Olegheri ni mọ nạ ra/telhe ghan kuolọ nạ raḅạ ghan ni. Aḍio retu ni dị nạ kangọ oghaạph ogbo. Nạ kangọ ni.” Ikpo onhụ okparamhị phọ odị ingọ ni imhị akpọ oḅio.

Mị umhiigh ni oghaạph aani iiḅi iinhaghạn phọ r’aGranville. Kuolọ ipaanhaạn irọl li, egbughagbugha eten emhạ phọ i/meera mọ ookilhemhi agadạ iidighila phọ, kụ mị aḅenhị Granville mọ usaạny ghan imhị wilbaro, kụ ipẹ phọ ilhọgh ni ḍighaạgh. Unwanyụ April 2005, bịn mị aḍiiny muụm. Moọny amem bịn abumor phọ utughemhị imhị ilọ ophogh ghan arinyạ siphẹ ookpomhoghan phọ, ḅilhẹ r’ilọ ophegh ghan asuọr r’asividio mem dị ophạm ituughạ.

Dị eeph ni iboom, lhạ phọ 2007 odẹ amhị akpelhaany bịn amheel asuma ophiịny bịn enzịn oghuugh phọ eḍighi nyodị iyaạr, iyạl ikpo asiḍughul otu reten bịn amhugh. Ipẹ phọ itir ri eghunotu phọ ayoor iboom. AGranville uuḅereghinhaạn ghan ni iyoor, aḅilhẹ uudereghiọm ghan iyoor riisi aBaibul. Iyạl asiạ reten, bịn enhọn iyaạr oḍigh aḍiigu eḅilhẹ kẹn emite, oghuugh aGranville aḅi ophiịny—bịn odị amhugh.

Bịn obạm ookpomhoghan phọ ayoor purukụ rooneghị bọ o/mhoọgh mun okumor oye ookpomhoghan, oniin odị r’aloghonhaạn ghan ḍighaạgh ikumor awe phọ bịn. Aḍuugh phọ aGranville ikạr kụ itir imhị; odị aḍighi ooḅi oyaghirị amhị. Odị akạr ri ulhoghonhaạn imhị ḍighaạgh iboom ophoph oghị aghisigh siẹn igey phọ, aḅilhẹ ghan ungọ imhị raraạr lọ ikuom imhị. Iḅẹl ituughạ phọ ophạm bọ mem mọ odị amhugh bọ, ungọ imhị aạl Otu Okoriom mọ. Mị raạl iyạl phọ iḅẹl asiikpịgh phọ bịn mị amhiigh omhoghi, dị tutụ izin amhị ephughạn, kụ usoore imhị siphẹ eegbolhom mọ.

Araraạr imhiigh ni onhighẹ mem dị abumor onhọn ookpomhoghan oru ghan Orealla ulhoghonhaạn iyoor ḍighaạgh. Ḅilhẹ kẹn r’amem dị olạ agadạ phọ osighẹ Kojo, okọy eten dị agbatanhaạn orumom ephẹn ookpomhoghan phọ ayoor. Edị ekạr ingọ imhị ibo pọ amem dị obạm umor amhị r’onhiin amhị omhiigh otuughạ aani aBaibul phọ bịn oḍiiny muụm. Unwanyụ aMarch 2015, bịn umạ imhị idiphọ odị raloghonhaạn ghan ḍighaạgh ikumor awe phọ. Esighẹ rekị bịn mị angọ oḅẹl oghaạph ogbo amhị. Ḍio phọ aḍiphẹ phọ, mị uutughiạn ni r’ibo ḅilhẹ r’izin oḅaạl olhoghi ipẹ umor phọ Granville uḅenhị bọ imhị siạ dị meten mọ: “Aḍio retu ni dị nạ kangọ oghaạph ogbo. Nạ kangọ ni.”

AJW Broadcasting^® phọ, maḍighi idị mị malhegheri mọ abunhọn Abugbaanhaạn odi ni dị osoman aani sidọl dị eghịgh ḍiẹn amhị. Kụ ghalhamọ r’iduọn bidị u/moon aani bọ ni, bidị roḍighi ni ibadị araraạr komhoọgh ekol, oḅilhẹ omoọgh oḅaạl olhoghi. Kụ mị phọ kẹn ni atue ni raḍighi iniin araraạr. Aḍiḅeraạn phọ amhị ongọ aZihova torobọ inyaạm lọ mị aḅilhẹ amhoọgh nyiidiphọ minyu imhị okọy eten oomo amem. Iinhaghạn dị mị u/seere olhoghi iru ni unwanyụ aSeptember 2019! Unwanyụ phọ opọ phọ, umạ imhị okumuan aani idiphọ oniin okumor oye siphẹ ookpomhoghan phọ ayoor, mamhoọgh bọ 40 abukaaphọm.

Mị rasẹph ni buuḅi abumor r’abumarani phọ abuphẹ utughemhị bọ imhị, oḅilhẹ ulhoghonhaạn imhị ḍighaạgh oghiọm aghisigh rukumuan phọ aZihova. Edị ekạr epelhom, mị rasẹph ni aZihova iduọn odị imhị u/wulha bọ.