Junyola i oro 1983. Anyolara ma ber m’ambe ku goru, ento kinde m’adoko ku oro apar, acaku winjo remo i wath kuma zoo. Oro ario i ng’eye, ceng’ acel ku gweno, acew ma tego mi woth umbe i kuma. Atimo kero nia akecungi wi tienda, e anwang’u nia tego mbe i conga. Niai cing’ nica nitundo tin, fodi awotho ngo wi tienda. Remone utwila, uketho tin de asu atie ve nyathin.

Dwi moko nyanok i ng’eye kinde ma twoyone maka, abedo i pacu ma niwirara kaka mange de ubino tek. Saa maeno Jumulembe pa Yehova moko ario ma mon uwok unwang’a i pacu. Wang’ ma pol ka welo utundo i bang’wa, abed apondo aponda. Ento cing’ nica, aweko nia nyimegone gikegiwec i bang’a. Kinde ma gibino weco iwi paradiso, wiya poi wang’ acel i kum gin m’awinjo kinde ma nwang’u fodi atie ku oro abic. Saa maeca, ku bang’ dwi, jamisioner moko ma nyinge Jethro ubed uliewo dhanu mi pacu mwa, ebed eai kud i Suriname man gibed giponjo Biblia ku baba. Ebino dhanu ma ber, uketho amare lee. Bende, saa maeca kwarumira gibed giting’a wacidho kugi i coko mi Jumulembe pa Yehova, ma jubed jutimo i kiaru mwa. Pieno, kinde ma nyamego Florence m’utie acel m’ikind nyimego ma wabino weco kugi cing’nica, upenja nia nyo acopo maru ngo niponjo Biblia? E adwoko ire nia amaru.

Florence udok udwogo karacelo ku Justus ma won ot pare, man wacaku ponjo kugi Biblia. Kinde ma ginwang’u nia ang’eyo somo piny ungo, e gicaku ponja ku somo piny bende. I ng’ei kare moko, an de acaku somo piny. Nindo moko umegone ku min ot pare gibin ginyutho ira nia juorogi gidok gitim tic i Suriname. Lembe ma rac utie nia i Orealla, ng’atu mange bino mbe maromo medo ku ponji para mi Biblia. Ento Yehova uwil ungo kuda.

I ng’eye, jayab yo ma nyinge Floyd utundo i Orealla, man ewok enwang’a saa m’ebino rweyo lembanyong’a ot ku bang’ ot. Kinde m’epenja pi caku ponjo Biblia, e ang’iero nyanok. Epenja nia “ing’ier’ang’o?” Adwoko ire nia adaru ponjo nyathibuku Ce que Dieu attend de nous man nwang’u dong’ wacaku buku La connaissance qui mène à la vie éternelle. * Akoro ire gin m’uketho ponjine jik. Wadok wadaru ponji mi buku La connaissance kud umego Floyd,  ento i ng’eye, en de judok juore kaka mange. E adong’ kendo kenda ma ng’atu m’uponjo kuda Biblia mbe.

Ento, i oro 2004, juoro Granville man Joshua ni juyab yo ma segi i Orealla. Ginwang’a kinde ma gibino rweyo lembanyong’a ot ku bang’ ot. Saa ma giwacu nia wacak ponjo kugi Biblia, e ang’iero. Akwayugi nia wacak ponjo kugi buku La connaissance kendo niai i there. Amito ang’ei ka nyo gin de gibiponja andha ku lembe ma rom ku ju m’ular uponja i wang’e. Granville uwacu ira nia gibed gitimo coko i kiaru mwa keca. Kadok nwang’u oro apar udaru kadhu ma fodi aai ungo kud i pacu de, re amito akecidh i cokone kokoro. Cing’ ma nindone romo, Granville ubin uting’a, eketha iwi gari mi weg abala man ecwala nitundo i Ot Ker.

I ng’ei kare, Granville uketho cwinya nia akiew nyinga i École du ministère théocratique. Ewacu kumae: “Kadok itie goru, re dhogi ubeweco. Nindo moko in de ibimio korolembe mi dhanu ceke. Cwinyi bed tek, ibicopo.” Wec parene utego cwinya.

Wacaku rweyo lembanyong’a waku Granville. Re yo ubino rac i kiaru mwa, yoje bino klikli pi wotho ku gari mi weg abala, uketho akwayu Granville nia dong’ ebed ecwala ku burweti. Eno ubed ukonya ma ber. E i dwi mir 4, 2005, alimo batizo. I ng’eye ndhu ndhu, umego giponja kara abed anen wi girasoma mi cokiri, man nitimo ku jamtic mi koko dwal i Ot Ker.

Lembe mi can utie nia, i oro 2007 baba unwang’u ret kinde ma gibino wotho ku yei i wi pii, e nindo moko i ng’eye, etho. Lembene umio can ma lee i juruot fwa. Granville ubed urwo kudwa man ebed ejuko cwinywa ku giragora mi Biblia. Oro ario i ng’eye, can mange ma pek upodho i wiwa​—Granville de gioi i pii man etho.

Cokiri mwa udong’ ku jakony tic acel kende, ma jadit cokiri acel de mbe i ie. Tho pa Granville unyayu can ma dit i ia, kum ebino jarimba mi tuko ngo. Ebed ekonya i thenge mi tipo ku mi kum ceke. I coko moko ma watimo i ng’ei tho pare, abino ku program mi somo udukuwec i saa mi ponji mi Otkur ma Wiw. Kinde m’asomo udukuwec mi kwong’o ku mir ario ci, e pii wang’a ng’oi, acaku wak. E ukwayere nia aai ku wi bop.

Acaku winjara ma ber kinde m’umego mi cokiri mange gidwogo i Orealla pi nikonyowa. Bende, Bethel uoro iwa jayab ma segi ma nyinge Kojo. Lembe m’unyang’a ubino nia, mama kud umira ma nok gicaku ponjo Biblia man i ng’eye gilimo batizo. I dwi mir 3, 2015, adoko jakony tic i cokiri. I ng’ei kare moko ke, amio korolembe para ma kwong’a mi dhanu ceke. Cing’ nica, anyong’a nega man can de maka kinde m’apoi pi lembe ma Granville ugam uyero ira oro moko i wang’e nia: “Nindo moko in de ibimio korolembe mi dhanu ceke. Cwinyi bed tek, ibicopo.”

Nikadhu kud i program mi Televizio JW^®, anwang’u nia karaman umego ku nyimego mange de dupa gibenwang’iri ku peko ma rom ku para. Ento kadok gitie goru de, re gibetimo lembe dupa man gitie kud anyong’a. An de karaman acopo timo lembe moko. Amito atim ni Yehova ku copo para ceke, uketho acaku tic pa jayab yo ma nja. Man i ng’eye, apoi mbwang’ ku lembe moko mir anyong’a. I dwi mir 9, 2019, junyutho ira nia adoko jadit cokiri, i cokiri m’utie ku jurwei lembanyong’a ma romo 40.

Abedwoko foyofoc ni umego ku nyimego ma giponjo kuda Biblia man ma gikonya nitimo ni Yehova. M’usagu zoo, abedwoko foyofoc ni Yehova kum ewil ungo kuda.