Itiniay 1983 miheca hofocen kako. O kaemangan kaˈorip ako malecaday to romaroma a wawa, tahinito 10 ko mihecaan, satapangay masadak ko pasangaray no tireng ako, tada adadaay ko tatirengan. Ikor no tosa miheca, lomowad kako to papacem, cowato ka ngaˈay tatemik ko tireng. Misaˈicelay kako mikowad to waˈay, kawra awaay ko ˈicel. Mikitiya misatapang, cowato ka ngaˈay kako a romakat. Oniya adada micongeday takowanan a lomahad, tahanini o tireng ako kamayan malecad o wawa.

Cecay romiˈad, tatosaay Misawacayay Tamdaw ni Yihofa tayniay i lomaˈ ako, itiya pinaayto folad cowa piliyas kako to lomaˈ. Iˈayaw ano ira ko tamdaw tayni i lomaˈ milimekay kako, kawra toya romiˈad sapitengilaw kako to o manan ko hasowal noya fafahiyan. Tiya masowal nangra ko Lakoing i, maharatengay ako 5 ko mihecaan i, iraay ko mikitiniay i Solinan a milakowitay to riyar a mitosilay ci Ciselo, cecay folad kinacecayay tayni i niyaroˈ niyam, malalengo to wamaan to Fangcalay Cudad. Ngaˈayay takowanan ci Ciselo, maolahay kako cingranan. O akong ato ama ako mikeriday takowanan mirienang to saˈopo no Misawacayay Tamdaw ni Yihofa. Mihaenay, toya romiˈad tayniay i lomaˈ ako a cecay fafahiyan milicayay takowanan sakacipinangaw to adihayay hokira, makahiyay kako.

Ikor, ci Folorons mikeriday to faˈinay ci Castin miˈaraw takowanan, malacafay takowanan milengo to Fangcalay Cudad. Mahapinangay nangra cowa ka fanaˈ kako to tilid, pasifanˈay takowanan minanam to tilid. Mataˈlif ko cecay liyad, mafanaˈayto kako miˈosi to cudad. Cecay romiˈad, pasowalay takowanan koniya mararamoday, manilnilay cangra tayra i Solinan matayal. Malinah cangra i, itini Awrira awaayto ko pasifanaˈay takowanan to Fangcalay Cudad, kao ngaˈayay padotocay eca ka pawan ci Yihofa takowanan.

Caka halafin, cecay misakafahay ci Foloite tayniay i Awrira, pakalomalomaˈ a mitosil i, malitemohay kako. Milicayay cingra takowanan makalimay minanam to Fangcalay Cudad hokira, matawaay kako. Milicayay cingra takowanan: “Hano matawa kiso hani?” Sowal ako maharekyto ako minanam ko O Maanan ko Saali no Kawas Kitaanan? a cudad, hanaca misatapangay minanam to Saka Tahadaˈoc no ˈOrip a Sifanaˈ. * Mitadtadan ako cingra hano misawad a minanam. Orato malacafayay kami milengo to Sifanaˈ a cudad, kawra manilnilay cingra tayra i roma kilac a matayal. Telocto, awaay aca ko pacekiway takowanan to Fangcalay Cudad.

Kawra, itini 2004 miheca, ci Kelanwie aci Ciwsoe oniya tatosaay mikiriwiˈay a misakafahay  manilnilay tayra i Awrira matayal. Pakalomalomaˈ cangra a mitosil i malitemohay kako, milicayay takowanan makalimay minanam to Fangcalay Cudad hokira, matawaay aca kako. Ngaˈay cangra mikitini satapang no Sifanaˈ a cudad pasifanaˈ takowanan. Sapihapinangaw kako, o sapasifanaˈ nangra malecaday to sapasifanaˈ no iˈayaway a singsi hokira. Ci Kelanwie pasowalay takowanan, itini i niyaroˈ nangra iraay ko saˈopo. Soˈlin medeng 10 miheca cowa mahadak kako, kawra sapirienagaw kako. Orato mikeriday ci Kelanwie takowanan, tano cikalilengay kamaroˈan micoroh takowanan tayra i Hongti Kitakit kasaˈopoan.

Ikor, ci Kelanwie pakalalokay takowanan mirienang to Pahatatanamay Saˈopo. Sowal ningra: “Soˈlin cowa ka ngaˈay romakat kiso i, kawra ngaˈayay kiso somowal. Wa ira ko cecay romiˈad mamikimad kiso to pakapapotalay a kimad, o mamihaen kiso.” Sowal ningra pairaay to pakasoˈlin to niyah, tada pakalolokay takowanan.

Mihaenay, misatapangay kako malacafay ci Kelanwiean a mitosil. Kawra, cowa ka sadafdaf ko lalan no niyaroˈ, maroˈ i cikalilengay kamaroˈan cowa ka rihaday. Papicolohan ako ci Kelanwie patayra i roma kilac takowanan, tada ngaˈayay koni pakayaraan. Itini 2005 miheca 4 folad, micadaay kako to paputisem. Ikor cowa ka halafin, pahatatanamay ko salikaka takowanan, padama takowana i Hongti Kitakit kasaˈopan misolimet to cudad ato laepa a tayal.

2007 miheca, mafelihay ko mikalican no wama a tamina, mapatayay cingra. Pakaynien i paro no lomaˈ, tada o taˈangayay a pades konini. Malacafayay ci Kelanwie takowanan a mitolon, tano sinael a mihinom tamiyanan. Ikor no tosa miheca, miliyaway ko kasomadan a demak mifekad, itini latiih no tamina mapatayay ci Kelanwie, tada taˈangayay ko kararom no falocoˈ niyam.

Masomaday maemin ko salikaka, oniya mimingay kasakopang niyam awaayto ko cecacecay aca malohemay malitengay, cecayayto ko padamaay sikawdan. Ci Kelanwie o ngaˈayay a widang ako, o patay ningra taˈangayay ko pisetiˈ takowanan. Ano itinito kaˈorip anca midokoay a tayal, midimokosay cingra takowanan, midama takowanan. Ikor no mapatay cingra a saˈopo, citatodongay kako miasip to Mikecolay lalakaw. Tosa fatac ko miasipan ako tomangicayto, cowa paselaˈ masadak ko losaˈ, hato liyas sanay to pikimadan.

Ikor, o roma kasakopang a salikaka tayniay i Awrira padama, rihadayayto ko falocoˈ ako. Minilnilayho ko Fanpo to cecay mikiriwiˈay misakafahay ci Keyo tayniay kasakopang niyam. Kalipahakan ako i, o wina ato safa ako misatapangay minanam to Fangcalay Cudad, ikor micadaay to paputisem. Itini 2015 miheca 3 folad, manilnilay kako malo padamaay sikawdan. Ikor caka halafin, mikimaday kako to sakinacecay a pakapapotalay a kimad. Toniya romiˈad, matawaay kako ato masadak ko miakoˈiday a losaˈ, maharatengay ko nano sowal ni Kelanwie iˈayaw pina miheca takowanan: “Wa ira ko cecay romiˈad mamikimad kiso to pakapapotalay a kimad, o mamihaen kiso.”

Mikitini JW tilifi a kamok mafanaˈ kako, o pakyaraan no roma salikaka malecaday takowanan. Soˈlin masamoˈ ko tireng nangra, kawra ciepocay ko kaˈorip, lipahakay. Wa ngaˈay mitongal to tayal ko niyah saan kako miharateng. Makalimay kako tano edengan a mimingay ˈicel matayal saki Yihofaan, mansa misetek to falocoˈ malo misakafahay. Itini 2019 miheca 9 folad, micadaay ako ko cecay a lihaf, tada macekiday kako mahemek! Mikitini toniya folad misatapang, manilnilay kako malo malohemay malitengay, itini medeng 40 ko mitosilay a kasakopang matayal.

Tada miakoˈiday kako toniya kanonoˈan a salikaka, pasifanaˈay cangra takowanan to Fangcalay Cudad, padadotocay padama takowanan. Kawra, sakakaay mitemeray takowanan i, padotocay eca ka pawan ci Yihofa takowanan.