Nafyelwe mu 1983. Imyaka ya kubalilapo ilyo nali umwaice nalekula fye bwino, lelo ilyo nali ne myaka 10 umubili onse watendeke ukulakalipa. Ilyo papitile imyaka nalimo ibili ukutula apo umubili watendekele ukukalipa, ulucelo lumo ilyo nabuukile nalifililwe ukusesha amolu. Nalyeseshe na maka yonse ukuti nseshe amolu, lelo nalifililwe. Ukufuma bulya bwine ubushiku nshabala nyendapo na kabili. Ubu ubulwele bwalilengele naleka ukukula, kabili ukufika na lelo imoneka fye ngo mwana umunono.

Nshaleya nangu kumo, naleikala fye pa ng’anda. Lyena ilyo papitile fye imyeshi iinono, ba Nte babili balitutandalile. Ilingi line pa ng’anda nga paisa abantu nalefisama, lelo ilyo aba ba Nte abanakashi baishile nshabeleme. Ilyo balelanda na ine pali Paradaise, nalibukishe ifyo naumfwile ninshi ndi fye ne myaka nalimo 5. Pali ilya inshita, ba Jethro bamishonari abaleikala mu calo ca Suriname, baleisa mu kubila imbila nsuma mu mushi mu mwesu umuku umo mu mweshi, kabili baleisa na mu kusambilisha batata Baibolo. Ba Jethro bali ne cikuuku sana kuli ine. Nalibatemenwe icine cine. Kabili bashikulu na bamama nabo inshita shimo balensendako ku kulongana kwa Nte sha kwa Yehova ukwalebela mu mushi mu mwesu. Kanshi ilyo ba Florence abali pali balya abanakashi abaishile banjipwishe nga kuti natemwa ukwishibilapo na fimbi, nalisumine.

Ba Florence balibwelele ubushiku bumbi na bena mwabo ba Justus, kabili balitendeke ukunsambilisha Baibolo. Ilyo baishibe ukuti nshaishibe ukubelenga, balitendeke ukunsambilisha ukubelenga. Kabili ilyo papitile inshita nalishibe ukubelenga. Bushiku bumo balya abaupana banjebele ukuti nababatuma ukuya mu kubombela ku Suriname. Icabipile sana ca kuti takwali nangu umo mu Orealla uwali no kutwalilila ukunsambilisha Baibolo. Lelo icawemeko ca kuti Yehova tandabileko.

Tapakokwele, ba Floyd bapainiya balishile mu Orealla, kabili balinsangile ilyo balebila imbila nsuma ku ng’anda ku ng’anda. Ilyo banjipwishe nga kuti natemwa ukusambilila Baibolo, nalimwentwile. Lyena banjipwishe ukuti: “Cinshi wamwentwila?” Nabebele ukuti nalipwisha ukusambilila broshuwa itila Cinshi Cintu Lesa Afwaya Kuli Ifwe? kabili nalitendeke no kusambilila icitabo citila Ukwishiba Uko Kutungulula ku Mweo wa Muyayaya. * Nalibalondolwelele icalengele ndeke ukusambilila. Twalipwishishe ukusambilila icitabo ca Ukwishiba na ba Floyd, lelo nabo bene balibatumine ukuya mu kubombela ku cifulo cimbi. Na kabili nashele fye ukwabula uwa kulansambilisha Baibolo.

 Na lyo line mu 2004, bapainiya baibela babili, ba Granville na ba Joshua balishile mu kubombela ku Orealla. Balinsangile ilyo balebila imbila nsuma ku ng’anda ne ng’anda. Ilyo banjipwishe nga kuti natemwa ukusambilila Baibolo, nalimwentwile. Lyena nabebele ukuti tutendeke ukusambilila mu citabo ca Ukwishiba ukutendekela fye mu cipandwa 1. Nalefwaya ukumona nga ca kuti bakulansambilisha filya fine ababalilepo balensambilisha. Ba Granville balinjipwishe nga kuti natemwa ukuyasangwa ku kulongana ukwalebela mu mushi. Nangu ca kuti nshabalile mfumapo pa ng’anda pa myaka mupepi na 10, nalefwaisha ukuya. E ico ba Granville balinjimishe no kumbika pa ncinga ya kwendelapo abalemana, kabili baile balenkunkulusha mpaka twafika ku Ng’anda ya Bufumu.

Ilyo papitile inshita, ba Granville balinkoseleshe ukulembesha mwi Isukulu lya Butumikishi Ilya Bulesa. Batile: “Nangu ca kuti walilemana, ukulanda kwena kuti walanda. Bushiku bumo ukulandapo ne lyashi lya ku cintubwingi. Ifi ndekweba te bufi, fikacitika.” Ifi bankoseleshe fyalengele nalembesha mwi sukulu.

Nalitendeke ukuya mu kubila imbila nsuma na ba Granville. Lelo imisebo iingi iyaba mu mushi wesu mwaliba ifilindi, ica kuti incinga ya kwendelapo abalemana te kuti yendemo. E ico naebele ba Granville ukulankunkulusha ukubomfya icibaala. Ifi fyalibombele bwino. Mu April mu 2005, nalibatishiwe. Tapakokwele, bamunyinefwe balinsambilishe ifya kubombela ku fitabo, e lyo na ku fisoselo fya mu Ng’anda ya Bufumu.

Nomba icabipile ca kuti mu 2007 batata balifwile mu busanso ubwacitike ilyo baleshinguluka pa mumana no bwato. Ici calengele ulupwa lwesu lube sana no bulanda. Ba Granville balitupepeleko, kabili balibomfeshe Amalembo pa kutukoselesha. Pa numa fye ya myaka ibili, kwali na cimbi icacitike icatuputwile imisana. Ba Granville balifwile mu busanso ubwacitike ilyo baleshinguluka pa mumana no bwato.

Icilonganino cesu icinono cashele fye ukwabula eluda nangu umo, kabili mwashele fye umubomfi utumikila umo. Imfwa ya ba Granville yalimputula umusana, bali cibusa candi ica pa mutima. Lyonse balengafwa ukupalama kuli Yehova, kabili balengafwa na mu fintu ifyo nalekabila. Pa kulongana kwakonkeleko ukutula apo ba Granville bafwiliile, nine nalebelenga amaparagrafu pe Sambililo lya Ulupungu lwa kwa Kalinda. Nalibelengele fye bwino amaparagrafu ya kubalilapo yabili, lelo nalitendeke ukulila ica kuti ifilamba tafyalekele ukufuma. Baishilemfumya fye pa cisebele.

Natendeke fye ukumfwako bwino ilyo bamunyinefwe ukufuma ku cilonganino cimbi baishile ku Orealla mu kwafwilishako. Kabili iofeshi lya musambo lyalitutumiine ba Kojo, bapainiya baibela. Nalitemenwe sana ilyo bamayo no mwaice wandi umwaume batendeke ukusambilila Baibolo ica kuti no kubatishiwa babatishiwa. Lyena mu March mu 2015, balinsontele ukuba umubomfi utumikila. Ilyo papitile inshita nalilandile ilyashi lya ku cintubwingi ilya kubalilapo. Bulya bushiku nalibukishe ifyo ba Granville banjebele, kabili nalimwentwile na lukusha ne filamba. Batile: “Bushiku bumo ukulandapo ne lyashi lya ku cintubwingi. Ifi ndekweba te bufi, fikacitika.”

Amaprogramu ya pa JW Broadcasting^® yalilenga naishiba ukuti kwaliba ba Nte na bambi ababa na mafya ayapalana na yo nakwatako. Nangu ca kuti balilemana, balacita ifilenga baleba ne nsansa. Na ine wine kwaliba ifyo ningacita. Apo nalefwaisha ukulabombela Yehova apo ningapesha, nalitendeke bupainiya bwa nshita yonse. Kabili mu September mu 2019, balimpeele umulimo uo nshale-enekela! Balinsontele ukuba eluda mu cilonganino cesu umwaba bakasabankanya nalimo 40.

Ndatasha sana pali bamunyinefwe na bankashi abalensambilisha Baibolo, no kungafwa ukulabombela Yehova. Ne cacilapo ukucindama ca kuti Yehova tandabako.