Ahu tubuh bani tahun 1983. Sehat hinan do ahu. Tapi sanggah marumur sapuluh tahun, mulai ma borit-boritan ahu. Dua tahun dobkonsi ai, bani sogodni ari sanggah puho ahu, lang boi be ahu marhusor janah lang boi huangkat naheiku. Humbani ari ai, lang boi be ahu mardalan. Halani naboritku ai, songon dakdanak ma torus badanku, lang be tambah godangku.

Piga-piga bulan dobkonsi boritan anjaha lang boi be ahu kaluar hun rumah, dong ma dua naboru na roh hu rumahnami. Saksi Jahowa do sidea. Sada humbani sidea margoran si Florence. Somalni sanggah dong halak roh hu rumahnami, mintor marbuni ma ahu. Tapi sanggah ai, ra do ahu manangar sidea. Sanggah ipatugah sidea pasal Paradeiso, gabe hudingat ma ongga do hutangar pasal ai sanggah marumur lima tahun. Ijia, dong sahalak misionaris na margoran si Jethro, na tading i Suriname. Sahali sabulan roh do ia hu hutanami, janah iajari ia ma bapangku marlajar Bibel. Bujur tumang do si Jethro ai bangku. Halani ai marosuh ahu bani. Leganni ai, sahali-sahali iboan ompung do ahu hu partumpuan ni Saksi Jahowa na dong i hutanami. Jadi sanggah isungkun si Florence ai ra do ahu marlajar Bibel, mintor ra do ahu.

Dob ai, roh ma si Florence pakon si Justus, suamini, janah iajari sidea ma ahu marlajar Bibel. Sanggah ididah sidea lang hubotoh mambasa, mintor iajari sidea ma ahu mambasa. Ujungni, gabe hubotoh ma mambasa. Tapi bani sada ari, ihatahon sidea ma itugaskon do sidea hu Suriname. Jadi lang dong be na mangurupi ahu marlajar Bibel, janah gabe lungun ma huahap. Tapi martarima kasih do ahu halani totap do idingat Jahowa ahu.

Lang piga dokah hunjai, das ma si Floyd i Orealla. Sahalak perintis do ia. Sanggah marbarita ia, pajumpah ma ia pakon ahu. Sanggah ipatorang ia sonaha marlajar Bibel, tarsirom ma ahu. Nini ma, “Mase tarsirom ham?” Jadi hupatorang ma anggo sasintongni domma salosei huparlajari brosur Apa yang Allah Tuntut dari Kita? Anjaha domma sompat huparlajari buku Pengetahuan yang Membimbing kepada Kehidupan Abadi. * Hupatorang ma hu bani mase ahu maronti marlajar Bibel. Ujungni, marlajar Bibel ma ahu pakon si Floyd manggunahon buku Pengetahuan ronsi salosei. Tapi dobkonsi ai, itugaskon ma homa ia hu ianan na legan. Gabe maronti ma use ahu marlajar Bibel.

 Tapi bani tahun 2004, itugaskon ma dua perintis istimewa, ai ma si Granville pakon si Joshua hu Orealla. Marbarita ma sidea hun rumah hu rumah janah pajumpah ma pakon ahu. Sanggah isungkun sidea ra do ahu marlajar Bibel, tarsirom ma ahu. Jadi hupindo ma ase sidea mangajari ahu mamakei buku Pengetahuan. Huulakhon ma marlajar mamakei buku ai halani ahu sihol mambotoh ai dos do na iajarhon sidea pakon na dob iajarhon hubangku sadokah on. Ipatugah si Granville ma bangku dong do partumpuan ni sidea i hutanami. Hassi pe domma hira-hira sapuluh tahun lang ongga ahu kaluar hun rumah, tapi sihol do uhurhu roh hujai. Jadi ialop si Granville ma ahu, janah ibahen ia ma ahu i kursi roda anjaha isorong ma ahu das hu Balei Harajaon.

Dob ai, iojur si Granville ma ahu ase dihut bani Sekolah Pelayanan Teokratis. Ia mangkatahon, “Hassi pe cacat ham, tapi boi do ham marambilan. Pos ma uhurmu ambia, holi dapot tugas do ham padaskon ambilan i partumpuan.” Gabe tarojur do ahu dob manangar ai.

Dob ai, dihut ma ahu marbarita pakon si Granville. Tapi halani lang rata dalan i hutanami, gabe sunsah ma markursi roda. Jadi hupindo ma ase ibahen si Granville ahu i gerobak, janah isorong ia ma ahu sanggah hanami marbarita. Dear tumang do cara sisonai. Ujungni bani bulan April 2005, ididi ma ahu. Lang piga dokah hunjai, iajari ma ahu sonaha mangurus publikasi pakon peralatan tata suara i Balei Harajaon.

Bani tahun 2007, lang isangka hanami marujung goluh ma bapa halani dong kecelakaan i kapal. Pusok tumang uhurnami sakaluarga. Jadi martonggo ma si Granville rap pakon hanami anjaha ibasahon ia ma hata apoh-apoh humbani Bibel. Dua tahun dobkonsi ai, tarsonggot ma hanami manangar lonong kapal na itompangi si Granville. Dua ari dobkonsi ai baru ma dapot bangkeini.

Pusok ma uhur ni ganup sanina botou i kuria. Lang dong be sintuanami, janah pitah sada dassa siparugas. Ahu pe, pusok tumang huahap halani sadokah on si Granville do huan-kuanku. Tongtong do iurupi ia ahu ase lambin orot bani Jahowa, janah isarihon do homa haporluanku. Bani minggu ai, sanggah martumpu hanami, dapot tugas do ahu mambasahon paragrap i Menara Pengawal. Tapi ronsi paragrap dua dassa boi hubasahon. Halani dobkonsi ai pitah tangis lalab ahu. Jadi, lang boi be hutoruskon mambasa.

Gabe tarapoh do uhurhu halani dong sanina-sanina hun kuria na legan roh mangurupi hanami i Orealla. Leganni ai, ikirim kantor cabang do homa si Kojo gabe perintis istimewa i kurianami. Lambin tambah do malas ni uhurhu halani ra do inang pakon anggingku marlajar Bibel, janah ididi do sidea. Dob ai, bani bulan Maret tahun 2015, ilantik ma ahu gabe siparugas. Lang piga dokah, dapot tugas ma ahu padaskon ambilan i kuria. Bani ari ai, gabe tariluh ma ahu sanggah hudingat use na ihatahon si Granville hinan, “Pos ma uhurmu ambia, holi dapot tugas do ham padaskon ambilan i partumpuan.”

Marhitei acara JW Broadcasting^®, hubotoh ma dong do hape sanina botou na sarupa situasini pakon ahu. Hassi pe cacat, ringgas do sidea ibagas pangidangion janah martuah do goluhni. Gabe tarojur ma ahu maniru sidea. Sihol do homa uhurhu mambere na sidearan hubani Jahowa. Halani ai, gabe perintis biasa ma ahu. Anjaha lang husangka bani bulan September 2019, ilantik ma ahu gabe sintua. Sanggah ai, dong hira-hira 40 parbarita i kurianami.

Martarima kasih do ahu halani sai adong do sanina botou na mangajari ahu marlajar Bibel, janah mangurupi ahu ibagas pangidangion. Na sipontingan, martarima kasih do ahu bani Jahowa halani lang ongga ihalupahon Ia ahu.