Aku lahir bas tahun 1983. Sanga kitik denga, aku sehat-sehat saja, tapi sanga umurku sepuluh tahun, rusur kuakap mesui kerina dagingku. Kira-kira dua tahun kenca si e, sanga medak aku erpagi-pagi, sitik pe lanai banci kemuit dagingku. Kuusahaken asa ngasupku gelah banci kemuit naheku tapi la banci. Mulai wari e, lanai banci aku erdalan. Pinakit e erbanca lanai banci aku reh galangna. Seh ngasa gundari, dagingku bagi anak-anak lalap.

Kenca aku sakit, la aku banci ndarat rumah nari. Piga-piga bulan kenca si e, dua kalak Saksi Jahwe reh ku rumah kami. Biasana cebuni aku adi lit kalak si reh, tapi bas wari e nggit aku megiken duana diberu e. Ibahasna kerna Pardis, teringet aku kerna kai si pernah kubegi sanga umurku lima tahun. Paksa si e, sekalak utusen injil si gelarna Jethro, si tading i Suriname, reh sebulan sekali ku kuta kami janah sampatina bapakku erlajar Pustaka. Mehuli kel ia man bangku. Meriah kuakap erteman ras ia. Selain si e, lit piga-piga kali ibaba bulang ras niniku aku ku perpulungen si iban i kuta kami. Salah sada arah diberu si reh e si gelarna Florence nungkun man bangku nggit nge aku erlajar Pustaka ntah lang. Perban enggo erteman aku ras Saksi Jahwe, nggit aku erlajar.

Reh ka mulihi Florence ras perbulangenna si gelarna Justus, janah mulai me isampati kalak e aku erlajar Pustaka. Sanga kalak e reh, itehna maka la aku beluh mbaca. Emaka isampati kalak e aku erlajar mbaca. Dungna banci aku lancar mbaca. Bas sada wari, ikataken Justus ras Florence maka itugasken kalak e ngelayani i Suriname. Sedih kel kuakap perban lanai lit si banci nampati aku erlajar Pustaka bas Orealla. Tapi, bujur kukataken man Jahwe la pernah aku ilupakenNa.

La ndekah kenca si e, sekalak perintis si gelarna Floyd itugasken ku Orealla. Sanga erberita ia arah rumah ku rumah jumpa ia ras aku. Itawarkenna erlajar Pustaka janah cirem me aku. Nungkun ia, “Engkai kam cirem?” Kukataken man bana enggo pernah aku erlajar alu nggunaken brosur Apa yang Allah Tuntut dari Kita? janah enggo ka erlajar alu nggunaken buku Pengetahuan yang Membimbing kepada Kehidupan Abadi. * Kuceritaken engkai maka lanai aku erlajar. Emaka isampatina aku erlajar Pustaka seh ngasa dung buku Pengetahuan, tapi kenca si e  itugasken ka ia ku ingan si deban. Mulihi ka la lit si nampati aku erlajar Pustaka.

Bas tahun 2004, dua kalak perintis istimewa si gelarna Granville ras Joshua itugasken ku Orealla. Jumpa ka kalak e ras aku sanga erberita arah rumah ku rumah. Itawarken kalak e erlajar Pustaka man bangku, cirem aku. Kupindo erlajar alu nggunaken buku Pengetahuan tapi ibahas kami mulai arah pasal sada nari. Kupastiken ateku seri nge si iajarken kalak e ras kai si iajarken kalak si ngajari aku sebelumna. Ikataken Granville man bangku maka bas Orealla lit perpulungen. Ikut ateku ku perpulungen e aminna pe enggo lit sepuluh tahun aku la ndarat arah rumah nari. Emaka, ilegi Granville aku janah isampatina aku naik ku kursi roda. Kenca si e, itaruhkenna aku ku Bale Kerajan.

Bas pudi wari, iiahken Granville aku ikut Sekolah Erberita si Meriah. Nina, “Memang kam la banci erdalan, tapi kam banci ngerana. Bas sada wari pagi, pasti banci ipesehndu khotbah.” Kata-kata Granville e erban aku percaya diri.

Mulai aku ikut erberita ras Granville. Tapi buen dalan bas Orealla la rata janah mesera mbentasisa alu kursi roda. Emaka, kusuruh gelah itama Granville aku ku das sorong. Alu bage reh nukahna akap kami lawes ku japa pe. Bas bulan April 2005, iperidiken aku. La ndekah kenca si e, ilatih aku ngurus publikasi ras sound system i Bale Kerajan.

Bas tahun 2007, mate bapakku perban kecelakan perahu. Ceda kel ate keluarga kami. Ertoto Granville ras kami janah ibacakenna piga-piga ayat si banci ngapuli. Tapi dua tahun kenca si e, terjadi ka situasi si erbanca ceda kel ateku. Granville pe mate perban kecelakan perahu.

Ceda kel ate runggun kami si kitik. Paksa si e, lanai lit pertua bas runggun kami janah sada ngenca sinampati runggun. Ceda kel ateku perban lanai lit teman si seh kel ateku kelengna. Sedekah enda, lalap aku sampatina secara rohani ras jasmani. Bas perpulungen pertama kenca ia mate, kudat tugas mbaca Sora Ermomo. Dua paragrap ngenca aku ngasup mbacasa, perban kenca si e mulai aku ngandung janah lanai terngadiken aku. Arus aku mulihken ku ingan kundulku.

Mulai terapuli pusuhku sanga reh turang senina si deban ku Orealla guna nampati runggun kami. Itugasken kantor cabang ka sekalak perintis istimewa si gelarna Kojo ku runggun kami. Bas pudi wari, mamak ras agiku pe erlajar Pustaka janah dungna iperidiken. Meriah kel ukurku. Bas bulan Maret 2015, ilantik aku jadi sinampati runggun. La ndekah kenca si e, kudat tugas mpeseh khotbah. Teringet me aku kata-kata Granville piga-piga tahun si lewat, “I bas sada wari pagi, pasti banci ipesehndu khotbah.” Sanga kuinget kata-katana e, cirem aku janah naktak iluhku.

Bas acara JW Broadcasting^®, kuidah pengalamen turang senina si mirip keadanna bagi aku. Aminna pe terbatas keadan kalak e, tetap kalak e ermeriah ukur janah melala si banci ilakokenna. Aku pe lit ka piga-piga si banci kulakoken. Kubereken ateku si mehulina man Jahwe, emaka jadi perintis biasa me aku. Kenca si e, bas bulan September 2019, kudat tugas si la kusangka-sangka. Ilantik aku jadi pertua bas runggun kami si lit 40 perberita i je.

Ngata bujur kel aku man turang senina si enggo nampati aku erlajar Pustaka ras erberita. Janah si pentingna, ngata bujur kel aku perban la pernah ilupaken Jahwe aku.