Me nga bialé mbu 1983. Me nga kôme kaa ényiñe jame nya mvo’é. Ve éyoñ me nga bi mimbu awôm, me nga taté na ma wô’ô nyul angôndô ya mintaé. Mvuse mimbu mibaé, me nga kôlô si mame tyé méziñ teke ngule ya beta wulu. Me nga jaé jeñe na me telé mebo si, ve teke ndoñ. Ataté môs ôte me ne mbômbôk. Éto ébô’ô é nga bo fe na me bo te beta yaé. Nge mi yene ma, mi ne taté buni ve na mone mongô.

Éyoñe Bengaa be Yéhôva bebaé be nga zu kute mbé wongan, me mbe me boya bengon me fete ve nda été. Me mbe me sobô’ô éyoñ ése bôte ba zu nda, ve môs ôte me nga jô’é fo’o na binga bete be laan a ma. Nté be mbe be kobô’ô ajô Paradis, me nga simesane jam éziñe me nga wôk valé me bili ve mimbu mitan. Éyoñ éte, Jethro a mbe missionnaire Suriname. A mbe a za’a kañete jal éyoñe jia ngon, a bo’o fe pepa ayé’é. Jethro a mbe a nye’e ma angôndô. Ma fe me mbe me nye’e nye. Bimvame biame fe bi mbe bi kele’e ma bisulane Bengaa be Yéhôva ya jale dam. Ajô te, éyoñe Florence, minga wua ya ba be nga kañete ma môs ôte, a nga sili ma nge be ne bo be za’a jome ma, me nga kañese été été.

Florence a nga beta so ba nnôme wé Justus, ane ba nye be nga taté na ba bo ma ayé’é. Éyoñe be nga yene na ma yeme ki lañ, be nga volô ma. E nji sili abui éyoñ asu na ma fe me taté na ma lañ. Ve amôs ava, me nga teme na, be lômeya be Suriname. Me nga wô’ô nleme mintaé éyoñ be nga kate ma de, amu teke môt a mbe ve kee ma ayé’é ôsu jal. Ve Yéhôva a nji vuane ma.

Mvuse mon éyoñ, nkpwa’a mefane mfe a nga zu nyiñ Orealla. Môs éziñ a nga zu kut ébeme jam. Me nga muñ éyoñ a nga sili ma nge ma kômbô yé’é Bible. Nde a nga sili ma na: “Wo muñ amu jé?” Ane me nga kate nye na me yé’éya nsoé kalate Ce que Dieu attend de nous, a na me tatéya taté fe kalate La connaissance qui mène à la vie éternelle. * Me mane fe kate nye amu jé ayé’é é nga tebe. Bia nye ve kee ayé’é ôsu akekui bi nga sondô kalate. Ve éyoñ éte ébien, be nga lôme nye vôme mfe. Ma ma beta li’i teke ñye’ele nyi.

Ve mbu 2004, be nga lôme bekpwa’a mefane be ne ngum avale bebaé Orealla, Granville ba Joshua. Bia be be bi nga yenan éyoñe  be nga zu ba kañete bibeme ya jal. Me nga beta muñ éyoñ be nga sili ma nge ma kômbô yé’é Bible. Me nga jô be na bi beta taté ayé’é kalate La connaissance qui mène à la vie éternelle. Me mbe me kômbô’ô yem nge be’e fe ba ye’ele ane beye’ele bam bevok. Granville a nga kobô ma ajô bisulan. Valé me boya mimbu awôm teke telé abo nseñ. Ve me mbe me kômbô’ô ke ésulan. Ane Granville a nga be’e ma a toé ma chaise roulante. Bia ñhe bia ke Aba Ejôé ba.

Mvuse mon éyoñ, Granville a nga lebe ma na me tilibane École du ministère théocratique. A nga jô me na: “To’o ô ne mbômbôk, ye anyu dôé é ne mfetan? Te tyelé nleme yôp, wé bo nkañete ya mengana bôte môs éziñ. Môs ôte wé kui fe.” Mejô mete me nga ve ma ngule nyul.

Me nga kaa na ma kañete a Granville. Ve ésaé nkañete é mbe ma njuk, amu minjoñe ya jal mi ne angôndô ya abé, mi mbe ve ndamane minka ya minsini wom. Nde me nga jô Granville na a jibi tindi ma brouette. Nkañete ve taté na wo wulu ma nya mvo’é. Me nga dubane Ngone nyini ya mbu 2005. Mvuse ya valé, bobejañe be nga yañele ma asu na me saé ata’a bekalate ya akônda, a na me yeme belan éko mezi’i ya Aba Éjôé.

Angônda jam a nga kui bia mbu 2007. Ésaa wom a nga wu accident, a bete sitima. Minlem mi mbe bia ntya’an. Nde Granville a nga zu ye’elan a nda bôte jam, a lañe fe bia bifuse ya Bible bi nga ve bia ngule nyul. Ve mvuse mimbu mibaé, Granville fe a viane beta wu mañ été, ane pepa.

Mon akônda wongan a nga li’i éngôngol; susu’a mvendé jañe le é nga wu, bi nga li’i ve a diakon. Awu Granville e nga taé ma nlem angôndô amu bia nye bi mbe beta bemvôé. A mbe a volô’ô ma abui, mfa’a ya nsisim a mfa’a ya minsôn. Ma me mbe me yiane’e lañe mebeñ ayé’é ya Nkume mmombô a bete ésulan é nga tôé valé. Me nga kui ve na me lañe mebeñe mebaé, me bôé ke ñyôn. Ane me nga jiba kôlô pôspôden.

Me nga taté na ma bi mone ngule nyul éyoñe bobejañe be nga so bevôme befe na ba zu su’u akônda dangan. Béthel a nga beta lôme bia nkpwa’a mefan a ne ngum aval. A mbe jôé na Kojo. Yéhôva a nga volô na mema ba mone monyañe wom be taté na ba yé’é a su’ulane duban. Wônaa Ngone lale ya mbu 2015, be nga telé ma diakon. Mvuse mon éyoñ, me nga kui na me bo nkañete ya mengana bôt. Mili’i me nga kui ma mis môs ôte, amu me nga simesane jame Granville a nga jô ma ôbe mimbu mvus: “Te tyelé nleme yôp, wé bo nkañete ya mengana bôte môs éziñ. Môs ôte wé kui fe.”

Minkañete ba liti télé wongan mi nga volô ma na me yeme na sa ke ma étam ma wu éngôngol, abui bobejañe ya si se meku’u menyin be tele aval été dam. Ve ba ke ôsu a vak nté ba bo Yéhôva ésaé. Minkañete miap mia ve ma ngule ya ke ôsu. Me mbe me kômbô’ô belane mone ngule Yéhôva a ve ma asu na me kôme bo nye ésaé, jôm ete nje me nga nyoñ ésaé nkpwa’a mefan. Nde a zu bo na, Ngon ébulu ya mbu 2019, me too too ana, me nga teme na ma zu be’e mbe’e mvendé! Akônda dangan é mbe é mbili bekañete mbamba foé bebé 40.

Ma ve bobejañ a besita bese be nga volô ma na me kañe Yéhôva nya nya abui akiba. Ve Yéhôva Zambe wom nnye ma dañe ve akiba, amu a nji vuane ma môs éziñ!