Lidan meha irumu 1983 nagüriahóua. Buiti meha nátuadi dan meha le irahügidina, gama lumoun dan le diisi lubéi irumu nau aban nagumeserun asandira aban lanarime gáriti lidan sun núgubu. Kei burí bián irumu lárigiñe, aban weyu, dan le nagagudunbei binaafin siñá meha nánhingichuni núgubu. Lau sun áfaagua nan saragu lun nánhingichuni nugudi, siñá numuti ánhingicha. Lúmagiñe weyu ligía siñá meha néibugun. Adügati giñe nisandi lun maweiridun nan. Uguñe weyu ítaramemegili núgubu kei lúgubu aban irahü.

Fiu hati lárigiñe nasandirun ani siñaali meha náfuridun, aba habisidahaniwa bián gefentiña luagu Heowá. Súnwandan dan le lan habisidahaniwa gürigia aba burí naramudagun, gama lumoun weyu ligía aba naganbuniña bián gürigia hagía. Dan le hagumeserunbei ayanuha nun luagu paraísu aba naritaguni le meha naganbubei dan le meha seingü lubéi irumu nau. Lidan meha dan ligía sagü hati lachülühan aban misioneru le gíribei Jethro, le meha awinwandubei Surinamu abisidahei aüdü le ñein lubéi nawinwanda ani aturiaha lumutu meha Bíbülia luma núguchi. Buiti meha lóuserunina Jethro ani wéiriti meha línsiñe nun. Barǘ hamutina meha giñe nárugutinu lidoun adamuridaguni le meha hadügübei gefentiña luagu Heowá lidan aüdü le ñein lubéi wawinwanda. Ligíati dan le tálügüdübadina Florence, aban hádangiñe würiña ha agumeserubaña ayanuha numa weyu ligía anhein busén nubéi nafurendeirun tuagu Bíbülia, aba nóunabun, anha lan.

Aba tagiribudun Florence, úara luma tani weiriei le gíribei Justus, aba hagumeserun aturiahoun Bíbülia numa. Dan le híchugubei fe maliiradi nan aba híderagunina lun nafurendeirun aliiha. Murusun dan lárigiñe aba gayaraali lan naliihan nábugua. Aban weyu aba hariñagun nun hóunahoua lan apurichiha uburugu Surinamu. Híruti úaaña lan meha ni aban gefentiña lidan aüdü Orealla lun hasigirun aturiahoun Bíbülia numa. Gama lumoun, gúndaati meha nasandiragun nungua dan le narihin mabulieidagunti lan Heowá nuéi.

Murusun dan lárigiñe aba lachülürün aban prekursoru lidoun aüdü Orealla gíriti Floyd. Aban weyu, aba ladurangun numa dan le lapurichihaña lubéi tidan burí muna. Dan le lálügüdübadina anhein busén nubéi naturiahanu Bíbülia, aba náhayachun. Aba lálügüdünina: “Ka uagu báhayacha?”, aba nariñagun lun aturiahanarun lan garüdia ¿Qué exige Dios de nosotros?, ani gumeseedina lan giñe aturiahoun líburu El conocimiento que lleva a vida eterna. * Aba giñe nafuranguagüdüni lun ka lan uéigiñe maturiahaadina lubéi. Gumú lumutu Floyd líburu Conocimiento aturiaha numa, gama lumoun aba giñe  lóunahoun eseriwida lidoun amu fulasu. Ábaya nerederun mamaisturunga.

Lidan irumu 2004, aba hayabin bián prekursoru espechalitiña eseriwida lidan aüdü Orealla, Granville luma Joshua híribei. Darí hamutina dan le hapurichihabei tidan burí muna. Dan le hálügüdübadina anhein busén nubéi naturiahanu Bíbülia aba náhayachun. Ábati namuriahan hama lunya wagumeserun aturiahoun líburu Conocimiento. Busentina meha narihini anhein harufudahabei lubéi ligiaméme katei le harufudahabei numaisturungu nun. Aba lariñagun Granville nun adügǘwa lan adamuridaguni lidan aüdü le ñein lubéi nawinwanda. Íbini lóugiñe lan diisi irumu lúmagiñe máfuridun nan wábiñegiñe, busentina meha nidin adamuridagua. Aba liabin Granville anügana ábati ládaha nau lidan aban haláü gabalabalati dagá tidoun Luban Adamuridaguni.

Lau lásügürün dan aba línchahanina Granville lun nabürüdǘn tidan Leskuela Kristiánu lánina Apurichihani. Aba lariñagun nun: “Inarüni danimabá gama lumoun, gayaraati badimureha. Lachülürüba aban dan lun bíchuguba lan yanu houn sun gürigia. Barihibei”. Adügati dimurei le lariñagubei nun lun chouru lan nasandiragun nungua ani ruti giñe dǘgüdaguaü nun.

Aba nagumeserun apurichiha úara luma Granville. Gama lumoun, wuribati meha üma lun ládahoun nau lidan haláü gabalabalati. Ligíati namuriahabei luma Granville lúngubei lanügünina tidan aban giadi ani buiti meha lidin woun. Aba nabadiseirun lidan gádürü-hati irumu 2005. Murusun dan lárigiñe lira aba harufudahan íbirigu nun ida luba lan narihin tau agumeiraguagüdüni lidan damuriguaü luma luagu amuri.

Lidan irumu 2007, híruti aba lan lounwen núguchi lidan aban danaguaü tidan guríara. Bulesei lumutu óunweni ligía hanigi niduheñu. Aba meha lafurieidun Granville wama aliiha ligía bérusu tídangiñeti Bíbülia le íchugubei gurasu woun. Bián irumu lárigiñe ábaya lasuseredun aban katei le magurabun wamuti aba giñe lounwen Granville lidan aban danaguaü tidan guríara.

Wéiriti meha igarigu le lasandirubei liraüraü wani damuriguaü, úaaña meha wéiyaaña lidan afiñeni ani ábanrügaali meha ídehati lidan damuriguaü ñein. Gáriti meha lounwen Granville nun ladüga buiti meha wamadagua. Ani súnwandan meha líderagunina lun buidu lan numadagua luma Heowá luma lidan katei le nemegeirubei. Furumiñeti adamuridaguni lárigiñe lounwen Granville, au meha aliihabalin párafu lidan Taturiahoun Garüdia Awisahatu weyu ligía. Biánrügüñein párafu naliihan aba nagumeserun ayahuaha. Mosu meha nararirun lídangiñe plataforma ladüga meredeti nayahuahan.

Aba meha nagumeserun asandiragua nungua buidu dan le hayabinbei fiu íbirigu lídangiñe amu damuriguaü íderaguawa. Ani óunahatu giñe sukursáli aban prekursoru espechaliti le gíribei Kojo. Ma nugundan dan le tagumeserunbei núguchu luma namulen aturiahoun Bíbülia ani aba giñe habadiseirun. Lárigiñe, lidan ǘrüwa-hati irumu 2015 aba niridún kei ídehati lidan damuriguaü. Dan lárigiñe aba níchugun aban yanu houn sun gürigia. Aba náhayachun aba láfuridun náguira dan le nasaminarun luagu le meha lariñagubei Granville nun fiu irumu lubaragiñe: “Lachülürüba aban dan lun bíchuguba lan yanu houn sun gürigia. Barihibei”.

Seremei lun Programa JW Broadcasting^®, subudihadina hawagun íbirigu ha asufurirunbalin libe le nasufurirubei. Lau sun sándiñanu lan adügatiña saragu katei ani gúndaatiña. Au giñe gayaraati giñe nadügün saragu katei. Ladüga busén nan níchuguni sun nere lun Heowá, aba nagumeserun eseriwida lun kei prekursoru. Lidan nefu-hati irumu 2019 aba neresibirun aban lubuidun ñunsu le meha magurabun numuti, aba niridún kei wéiyaali lidan afiñeni lidan damuriguaü le ñein nubéi, le ñein habéi 40 apurichihatiña.

Rútina seremei hawagu íbirigu ha meha arufudahabalin inarüni nun ani íderagua hamutina giñe eseriwida lun Heowá. Gama lumoun, lóugiñe sun katei rútina óunwenbu seremei ladüga mabulieidagun lan Heowá nuéi.