Xinaläx pa junaʼ 1983. Rïn majun ta wä nyabʼil, ye kʼa taq xuʼän 10 njunaʼ, xinnaʼ chë ronojel nchʼakul kowan wä yetiʼon. Jun kaʼiʼ junaʼ chrij riʼ, taq jun nmaqʼaʼ xnaʼ riʼ nwäch, kan ma yikowin ta wä chik yislon. Tapeʼ xintäj nqʼij rchë xensloj ri waqän, ma xikowin ta xinbʼän riʼ rma majun ta wä kichqʼaʼ. Kan chpan ri qʼij riʼ, majun bʼëy chik xikowin xibʼiyïn. Ri yabʼil ri xyaʼ chwä xuʼän chqä chë ma xikʼïy ta chik. Rma riʼ xa koʼöl waqän xinel, kan achiʼel raqän jun akʼal.

Taq jun kayoxiʼ ikʼ ma yïn alenäq ta wä chwachoch, xeʼapon kaʼiʼ ixoqiʼ ri ye testigos de Jehová. Kan ronojel bʼaʼ mul ma nkʼüt ta wiʼ chkiwäch ri winäq ri yeʼapon chwachoch, ye kʼa ri qʼij riʼ xinyaʼ qʼij chë ri Testigos xetzjon wkʼë. Taq najin wä nkitzjoj chwä chrij ri Kotzʼijaläj Ulew, xnatäj pä chwä chë taq kʼo wä jun woʼoʼ njunaʼ, jun misionero ri rubʼiniʼan Jethro, npë wä chwachoch rchë nutjoj ri ntataʼ chrij le Biblia. Ri misionero riʼ chpan ri tinamït Surinam ttel wä, y napon wä pa qatinamit jmul pa jun ikʼ. Jethro kan ütz wä runaʼoj xuʼän wkʼë, rma riʼ ma nxiʼij ta wä wiʼ chwäch taq napon wä chwachoch. Kʼo mul ri watiʼt chqä ri nmamaʼ yinkikʼwaj wä chkipan ri moloj ri nkiʼän wä ri Testigos chpan ri qatinamit. Rma riʼ, taq ya Florence, jun chkë ri ixoqiʼ ri xeʼapon chwachoch, xkʼutuj chwä we nwajoʼ ntamaj más chrij le Biblia, rïn xinbʼij che rä chë nwajoʼ.

Taq ya Florence chqä Justus, ri rachjil, xetzolin pä, xkichäp ntjoxik chrij le Biblia. Taq xkitzʼët chë ma yikowin ta wä nskʼij ruwäch wuj, xinkitjoj rchë nbʼän riʼ. Jun tiempo chrij riʼ, xikowin xinskʼij ruwäch wuj. Kʼo jun qʼij, ryeʼ xkiʼij chwä chë xetaq Surinam rchë nkibʼetzjoj le Biblia chlaʼ. Taq ryeʼ xebʼä äl, majun ta chik jun xkanaj aweʼ pan Orealla ri xirutjoj chrij le Biblia. Ye kʼa kan jaʼäl xnaʼ wan rma xintzʼët chë Jehová ma xirumestaj ta qa.

Jbʼaʼ chrij riʼ, xapon pa ntinamit jun precursor ri rubʼiniʼan Floyd. Kʼo jun qʼij, xapon chwachoch taq najin wä nutzjoj le Biblia chiʼ taq jay. Taq xkʼutuj chwä we nwajoʼ ntjoj wiʼ chrij le Biblia rkʼë, rïn kan xel nkʼuʼx. Rma riʼ, ryä xkʼutuj chwä: «¿Achkë rma xel akʼuʼx?». Ya riʼ taq xinbʼij che rä chë ya xkiyaʼ yän ntjonik rkʼë ri folleto ¿Qué exige Dios de nosotros? chqä chë ya nchapon wä chik ri libro El conocimiento que lleva a vida eterna. * Chqä xintzjoj che rä achkë rma ma najin ta wä chik nkʼül ntjonik chrij le Biblia. Xinkʼïs rutzʼetik ri libro Conocimiento rkʼë Floyd, ye kʼa ryä chqä xtaq jukʼan chik tinamït rchë xbʼerutzjoj le Biblia. Jmul chik majun achkë xitoʼö chrij le Biblia.

 Ye kʼa pa junaʼ 2004, Granville y Joshua, ri ye precursores especiales wä, xeʼapon pan Orealla, ri ntinamit. Xinkïl taq najin wä nkitzjoj le Biblia chiʼ taq jay. Kan xel nkʼuʼx taq xkikʼutuj chwä we nwajoʼ ntjoj wiʼ chrij le Biblia kikʼë. Xinbʼij chkë chë nwajoʼ wä nchap ntjonik rkʼë ri libro Conocimiento. Xinwajoʼ xintzʼët we ryeʼ kan junan wä ri naʼoj xtkikʼüt chi nwäch achiʼel ri xkikʼüt chi nwäch ri xeʼok ntijonelaʼ. Granville xuʼij chwä chë chpan ntinamit najin wä yebʼan moloj. Tapeʼ ma yïn alenäq ta wä chwachoch jun 10 junaʼ, xinwajoʼ xibʼä. Rma riʼ, Granville xapon chnkʼamarik chqä xirukʼwaj kʼa pa Salón del Reino chpan jun silla de ruedas.

Xqʼax jun tiempo, Granville xkʼutuj chwä we nwajoʼ ntzʼibʼaj nbʼiʼ chpan ri Escuela del Ministerio Teocrático. Ryä xuʼij chwä: «Tapeʼ ma yakowin ta yabʼiyïn, rït yakowin yatzjon. Jun qʼij rït xtayaʼ na jun tzijonem. Tatzʼetaʼ na peʼ chë xtaʼän riʼ». Ri xuʼij chwä kan xkʼuqbʼaʼ nkʼuʼx chqä xuʼän chë más xintäj nqʼij.

Ri naʼäy taq mul ri xinel chutzjoxik le Biblia, rkʼë Granville xinel wä. Ye kʼa kʼïy chkë ri bʼey ri ye kʼo pa ntinamit ma kan ta ütz kibʼanon, rma riʼ kan kʼayewal wä nuʼän we naksaj silla de ruedas. Rma riʼ, xinbʼij che rä chë más ütz kirukʼwaj chpan jun carreta, y kan ütz wä xuʼän riʼ chqawäch. Pan abril rchë ri junaʼ 2005, xiqasäx pa yaʼ. Jbʼaʼ chrij riʼ, ri qachʼalal xkikʼüt chi nwäch achkë rubʼanik yentoʼ rkʼë kitzʼetik ri publicaciones chpan ri congregación chqä rkʼë ri rubʼanik yenyaʼ ri bʼix chqä kichqʼaʼ ri micrófonos pa Salón del Reino.

Pa junaʼ 2007, taq ntataʼ bʼenäq wä pa barco, xtzaq qa chqä xsök riʼ rkʼë ri hélice. Kaʼiʼ qʼij chrij riʼ xkäm, rma kan nüm ri sokotajïk xuʼän. Ri n-familia kan xekanaj qa pa jun nimaläj bʼis. Granville kʼo wä qkʼë taq nchʼö wä qʼanäj rkʼë Jehová pa qawiʼ chqä nukʼuqbʼaʼ wä qakʼuʼx rkʼë le Biblia. Kaʼiʼ junaʼ chrij riʼ, xpë chik jun kʼayewal chqawäch: Granville xkäm taq ri barco akuchï bʼenäq wä xbʼä äl chuxeʼ yaʼ.

Jontir wä ri yoj kʼo chpan ri congregación kan xqkanaj pa bʼis. Chpan ri congregación majun chik ukʼwäy bʼey xkanaj, xa xuʼ jun toʼonel. Rïn kan xikanaj pa bʼis rma Granville xkäm. Ri wachiʼil riʼ kan kowan xinwajoʼ, rma ronojel mul xirutoʼ rchë junan nuʼän nwäch rkʼë Jehová chqä xirutoʼ rkʼë ri nkʼaj chik ri yekʼatzin chwä. Chpan ri naʼäy moloj ri xqaʼän taq ma kʼo ta wä chik ryä, rïn wä yinok rchë nskʼij kiwäch ri peraj chpan ri Tjonïk chrij ri wuj Ri Chajinel. Xa xuʼ xikowin xinskʼij kiwäch ri kaʼiʼ naʼäy peraj, rma chrij riʼ xinchäp oqʼej. Riʼ xuʼän chë kʼo chë xiqä pä pa plataforma rma ma yitaneʼ ta wä chik chë oqʼej.  

Xqʼax jbʼaʼ ri bʼis chwä taq jojun qachʼalal rchë jun chik congregación xepë chqatoʼik aweʼ pan Orealla. Chqä ri sucursal xtäq pä jun precursor especial ri rubʼiniʼan Kojo. Kan janina kiʼkʼuxlal xinnaʼ taq ri nteʼ chqä ri nchaqʼ xkitjoj kiʼ chrij le Biblia chqä xeqasäx pa yaʼ. Pa marzo rchë ri junaʼ 2015, xinok toʼonel. Jbʼaʼ chrij riʼ, xinqʼaxaj ri naʼäy ntzijonem. Ri qʼij riʼ kan xnatäj pä chwä ri xuʼij Granville chwä jun kayoxiʼ junaʼ qa: «Jun qʼij rït xtayaʼ na jun tzijonem. Tatzʼetaʼ na peʼ chë xtaʼän riʼ». Xinoqʼ rma kan jaʼäl xnaʼ wan xnatäj pä riʼ chwä.

Kimä ri videos ri yeʼel chpan JW Broadcasting^®, rïn ntzʼeton chë ye kʼo chik nkʼaj qachʼalal ri junan bʼaʼ qatqelbʼen kikʼë. Tapeʼ ryeʼ ye yawaʼ, kan kʼïy najin nkiʼän chpan rutinamit Jehová, y kan nqʼalajin chë kiʼ kikʼuʼx. Rïn chqä kʼo jojun ri yikowin nbʼän. Rma kan nrayij nyaʼ che rä Jehová jontir ri yikowin nbʼän, riʼ xuʼän chë xikowin xinok precursor regular. Y kan xel nkʼuʼx taq pa septiembre rchë ri junaʼ 2019, xinok ukʼwäy bʼey pa n-congregación, ri ye kʼo jun 40 publicadores chpan.

Kan janina yityoxin chkë ri qachʼalal ri xkikʼüt ri kantzij chi nwäch chqä yinkitoʼon pä rchë nyaʼ ruqʼij Jehová. Ye kʼa kan más yityoxin rma Jehová majun bʼëy yirumestan ta qa.