Ni velekilwe ngu 1983. Mbimo yi ni nga velekwa ni sa lemala, kambe mbimo yi ni nga ti ni 10 wa malembe mmdi wangu wotshe wu khatile kupanda. Ku di pindile malembe mambidi ditshiku dimwani ni wukile nimixo ni si koti ku maha txilo. Hambi ni txi zama ku khukha ni si tikoti minenge yangu yi txi ñola ni si nga ni mtamo. Ku khukhela ditshiku donedo kha na nga kota ku tsimbila kambe. Malwati oneyo ma ni mahile ni si kule. Kala nyamsi ni ngadi ni txo nga fanyana.

Ku di pindile mitxima yimbidi ni txi lwalwa Tifakazi timbidi ta Jehovha ti ni endete. Ngako ni txi endelwa ngu vathu ni txi tolovela kubarama, kambe ka ditshiku edo ni tumete ku womba-womba navo. Mbimo yi va nga ti womba-womba ni nani ngu Paradhise ni khumbute a ti ni nga nga tigonda ka murumiwa mmweyo awu a dhanwako ku i Jethro ni di ni 5 wa malembe. Jethro ati Zumba Suriname, kambe kumweko ngu mtxima atxi endela didhoropa dathu, a ta gonda Bhiblia ni papa. Jethro ati ni ñola kha kwati ni ku a txi ni dhunda. Va vhovho vango va ti talisa ku ni teka hi ya mitshanganoni ka Tifakazi ta Jehovha, ayi yi nga ti mahelwa ka didhoropa donedo. Se mbimo yi Florence mmweyo ka Tifakazi tile ta timbidi, ditshiku dimwani a ni endete, a hawa a nga ta ni wotisa a txi khene wa ti lava ku gonda to tala, se ni ti khani ina.

Florence ati ya wuya ni mwamna wakwe Justus, se ngu wumbidi wawe va khatile ku gonda ni nani Bhiblia. Mbimo yi va nga wona to kha ni tikoti kulera vona va khatile ku ni gondisa kulera. Ku di pindile mbimonyana ni khatile kulera ni pune. Ditshiku dimwani Florence ni Justus va mani txiavelo txo ya thumela khe Suriname. Se kha ka sala ni m’thu wo ni tshimbitisela gondo. Hambi keto Jehovha kha ni divala.

Kambe kha ta swela, nyaphandule mmweyo wu a dhanwako ku i Floyd a tile kheno Orealla, se a txi txhumayela ngu m’ti ni m’ti a ti ta huma m’tini. Mbimo yi a nga ni wotisa to ni nga ti tsakela kugonda Bhiblia kani ni to seka. Se a njo ku ni wotisa ku “u sekela txani?” Se ni mgete to ni ti gondile dibroxura di di ku O Que Deus Requer de Nós? ni heta ni ku ni ti khatile kugonda dibhuku di di ku Conhecimento Que Conduz à Vida Eterna. * Ni tshumete ni mtxhamusela to ngu kutxani ni ti emile kugonda. Se hi hetisile dibhuku di di ku Conhecimento ni Floyd kambe kha ta swela nene  a khukhile. Ni tshumete ni sala ni si nga ni wo ni gondela Bhiblia.

Hambi keto ngu 2004 Granville ni Joshua, vanyaphandule vambidi vo sawuleka va avetwe ku ta thuma muwa Orealla. Vona va txi txhumayela ngu m’ti ni m’ti se ve ta huma m’tini. Mbimo yi va nga ni wotisa to na ti tsakela ku gonda Bhiblia ni to seka. Se ni va kombete ti to hi khateta kugonda dibhuku di di ku Conhecimento. Ni txi lava ku wona to a ti va no ni gondisa ta fana ni ti ni nga ti gondile kani. Granville a ni gete ti to ka mahwa mitshangano ka dona didhoropa dile. Hambi ku ni nga si khali kuhuma m’tini kudingana 10 wa malembe ni txi ti lava kuya mitshanganoni. Se Granville a ni gute eni beta ka txikarinyana txa marodha e tsula ni nani mitshanganoni.

Ngu kutsimbila ka mbimo Granville a ni kuzetile ti to ni ti bhalisa ka txikolwa txa vathumeli va Mfumo. Ene a ti khene “hambiku u nga lemala kambe wa tikota ku womba-womba. Ditshiku dimwani u na veka mwomba-wombo wa hakubasani. Eto ti na maheka.” Mapswi akwe o tsanisa ma ni ningile themba.

Ni khatile kutxhumayela kumweko ni Granville. Ti txikarata kutsimbila ngu txitulo txa marodha nguko sitarato si ti ni maphala. Se ni kombete Granville e ni beta ka diwilibhali e ni txhovhela. Malulamiselo yawa ma thumile ngutu. Ngu Abril wa 2005 ni bhabhatisilwe. Ngu txikuluveta vanathu va ni ternarile ti to ni thuma ka ta mabhuku ni ka ta wutxenje.

Ngu 2007 ku humelete phango, papa a dhibhile ni dibhoti e fa. Mwaya wathu wu karatekile ngutu. Granville a khongete ni nathu e hi komba mibhalo yo thavelela. Ku di pindile malembe mambidi ku tshumete ku humelela phango yimwani, mwanathu Granville nene a fite ka phango ya dibhoti.

Dibanza dathu di to sala ni dilanda da wuthumeli di si nga ni didhota. Lifo la mwanathu Granville li ni siyete txidilo ene i di mngana wangu wa hombe. Ene a ti ni vhuna ngu didhawa da moya ni da nyama. Adi ngadi kona ku luza ni ningilwe txiavelo txo lera tindimana ta Muwoneleli. Ni lerile tindimana to khata kambe ni khatile kudila ni humisa mirongo. Se ti lavile ni leka kulera tindimana.

Ni khatile kutipfa tshuko mbimo yi vanathu va dibanza dimwani va nga ta ve ta vhuneta a kheno Orealla. Bhetele yi tshumete yi rumela mwanathu Kojo e ta thuma kota nyaphandule wo sawuleka. Ngu kutsimbila ka mbimo mame ni vananda vango va khatile ku gonda Bhiblia ni ku va bhabhatisilwe. Ngu Março wa 2015 ni khatile ku thuma kota dilanda da wuthumeli. Se ngu kutsimbila ka mbimo ni vekile M’wombawombo wangu wo khata wa hakubasani. Ditshiku donedo ni khumbute a ti mwanathu Granville a nga khala ku ni gela ka malembe msana ya ma nga pinda, a txi khene: “Ditshiku dimwani u na veka m’wombawombo wa hakubasani. Atiya ti na maheka.”

Ka mlongoloko wa JW Broadcasting ni gonda ngu vanathu a va va ku ka txiemo txo fana ni txangu. Hambiku va ku ni sikarato sa dihanyo vona va ti mahela mithumo yawe ni ku va zumba va di tsakile. Nanani ni nga sikota ku maha mithumo yo kari. Minavelo yangu njo maha totshe ti ni nga tikotako to ni thumela Jehovha. Ngu toneto ni tekile wu nyaphandule wa mbimo yotshe. Ngu Setembro wa 2019 ni mani txiavelo txo nem ni sa txirinzela. Ngu mtxima wonewo ni khatile ku thuma kota didhota, dibanza dathu di ni 40 wa vahuweleli.

Na va bonga ngutu vanathu a va va nga ni gondela Bhiblia niku ni vhuna ni hetisisa siavelo sango. Kambe ni lava ku bonga ngutu Jehovha aku a nga mbi ni divala.