Natawo ko niadtong 1983. Sa bata pa ko, himsog ko, pero pagka-10 anyos nako, misugod kog bati ug grabeng kasakit sa tibuok nakong lawas. Mga duha ka tuig sa ulahi, pagmata nako usa ka buntag niana, di na ko kalihok. Bisag unsaon nako, di gyod nako malihok ang akong mga bitiis. Wala na ni umoy. Sukad niadtong adlawa, wâ na gyod ko kalakaw. Tungod sab sa akong sakit, wâ na ko motubo. Karon, mora gihapon kog bata kagamya.

Pipila ka bulan na kong way gawasgawas sa balay dihang may mibisita nga duha ka Saksi ni Jehova. Kon duna mi bisita, sagad motago ko, pero nianang adlawa, nakig-estorya ko sa maong mga babaye. Samtang naghisgot sila bahin sa Paraiso, nahinumdom ko sa akong nadunggan dihang mga singko anyos ko. Niadtong panahona, ang misyonaryo nga si Jethro, nga taga-Suriname, mobisita sa among baryo kas-a sa usa ka bulan aron mag-Bible study kang Papa. Buotan kaayo si Jethro nako ug ganahan kaayo ko niya. Usahay, iuban pod ko sa akong lolo ug lola sa tigom sa mga Saksi sa among baryo. Busa dihang gipangutana ko ni Florence, usa sa mga babaye nga miduaw nako nianang adlawa, kon ganahan ba kong mokat-og dugang, miingon kog oo.

Mibalik si Florence uban ang iyang bana, si Justus, ug ila kong giestadihan. Dihang namatikdan nila nga dili ko kamaong mobasa, gitudloan ko nilag basa. Sa ngadtongadto, kamao na kong mobasa. Usa ka adlaw niana, giingnan ko nila nga maasayn sila sa Suriname. Naguol ko kay walay lain sa Orealla nga makapadayon sa pag-study nako. Pero maayo na lang kay wala gyod ko kalimti ni Jehova.

Wala madugay, si Floyd nga usa ka payunir miabot sa Orealla, ug nakaplagan ko niya samtang namalaybalay siya. Dihang naghisgot siya bahin sa pagtuon sa Bibliya, mipahiyom ko. “Nganong mipahiyom man ka?” nangutana siya. Ako siyang giingnan nga nahuman na kog study sa brosyur nga Unsay Gikinahanglan sa Diyos Kanato? ug nasugdan na nako ang librong Kahibalo nga Motultol sa Kinabuhing Walay Kataposan. * Ako siyang giestoryahan kon nganong nahunong ang pagtuon. Gipadayon ni Floyd ang pag-Bible study nako sa librong Kahibalo hangtod nga nahuman kini, pero giasayn sab siya sa laing lugar. Wala na poy nag-study nako.

 Pero niadtong 2004, ang mga espesyal payunir nga si Granville ug Joshua giasayn sa Orealla. Namalaybalay sila, ug nakaplagan ko nila. Dihang gipangutana ko nila kon gusto ba kong mag-study, mipahiyom ko. Ako silang gihangyo nga estadihan ko sa librong Kahibalo sugod sa sinugdan. Gusto nakong makita kon ang ilang itudlo pareho ra ba sa gitudlo sa mga nag-study nako sa una. Giingnan ko ni Granville nga may mga tigom nga ginahimo sa among baryo. Bisag halos 10 ka tuig na kong way gawasgawas sa balay, gusto kong motambong. Busa miadto si Granville sa balay ug gipasakay ko sa wheelchair ug iya ning gitulod paingon sa Kingdom Hall.

Sa ulahi, gidasig ko ni Granville nga magpaenrol sa Teokratikanhong Tunghaan sa Ministeryo. Iya kong giingnan: “Di ka kalakaw, pero makasulti ka. Moabot ang adlaw nga magpakigpulong ka. Mahitabo gyod nâ.” Ang iyang pagdasig nakahatag nakog kompiyansa sa kaugalingon.

Misugod kog sangyaw uban kang Granville. Pero daghang dalan sa baryo ang lisod maagian sa wheelchair. Maong gihangyo nako si Granville nga ibutang ko sa karetilya ug itulod ni. Mas okey to. Pagka-Abril 2005, nabawtismohan ko. Wala madugay human niana, gibansay ko sa mga brader sa pag-atiman sa literatura sa kongregasyon ug pag-operit sa sound system sa Kingdom Hall.

Pero makapaguol kay niadtong 2007, si Papa namatay sa aksidente sa pambot. Naguol kaayo ang among pamilya. Si Granville nag-ampo uban namo ug nagbasag makapahupayng mga teksto sa Bibliya. Duha ka tuig sa ulahi, naguol na sab kaayo mi sa laing trahedya​—si Granville namatay sa aksidente sa pambot.

Ang among gamayng kongregasyon wala nay ansiyano; usa na lang ka ministeryal nga alagad ang nahibilin. Nasakitan kaayo ko sa kamatayon ni Granville kay suod kaayo mi. Giatiman gyod ko niya sa espirituwal ug sa pisikal. Sa tigom human sa iyang kamatayon, akoy naasayn nga magbasa sa mga parapo sa Bantayanang Torre. Nakaya pa nako ang unang duha ka parapo, pero misugod kog hilak ug wâ na gyod ko moundang. Kinahanglan kong mohawa sa plataporma.

Nalipay ko dihang may mga brader gikan sa laing kongregasyon nga nangabot aron motabang namo dinhi sa Orealla. Nagpadala pod ang sangang buhatan ug espesyal payunir, si Kojo. Nalipay ko dihang ang akong mama ug manghod nga lalaki misugod pag-Bible study ug nabawtismohan. Dayon, pagka-Marso 2015, natudlo ko ingong ministeryal nga alagad. Ngadtongadto, mihatag ko sa akong unang pakigpulong publiko. Nianang adlawa, nakapahiyom ko ug nakahilak dihang nahinumdoman nako ang giingon ni Granville pipila ka tuig sa miagi: “Moabot ang adlaw nga magpakigpulong ka. Mahitabo gyod nâ.”

Pinaagi sa mga programa sa JW Broadcasting^®, nahibaloan nako ang bahin sa mga igsoon nga popareho nakog kahimtang. Bisag duna silay depekto sa lawas, daghan silag nahimo ug malipayon sila. Ako pod, duna pay mahimo. Gusto nakong ihatag kang Jehova ang akong maarangan, maong nag-regular payunir ko. Ug niadtong Septiyembre 2019, nakadawat kog wala damhang panalangin! Natudlo ko ingong ansiyano sa among kongregasyon nga may mga 40 ka magmamantala.

Mapasalamaton ko sa minahal nga mga brader ug sister nga nag-study nako ug nagtabang nako sa pag-alagad kang Jehova. Labaw sa tanan, mapasalamaton ko nga wala gyod ko kalimti ni Jehova.