Ddibaliwe yaka ya 1983. Vyaka dhoroma dha okalawo waga, ddali mugumi ninga ayima enna, mbwenye mwakanihedhimi vyaka kumi ddahiroma wiwa opa maningo etene. Vyaka bili vasogorhova, siku dhahi ddivenyaga na membesi kaddawodha oviddiginya. Masiki na guru dhotene dhakosimi, meddo dhaga kadhaddiginyeya, nne kadhakosawene elobo. Ovenyana sikunene nttile, kaddiwodhile vina wedda wili. Eredda ejile ehiddittukulela ohiwodha wunuwa. Ddabuno, ddili woyevene ninga mwana.

Muvireli myeri dhing’onovi oredda waga wahiddiroddowela ofiyedha ohiwodha odhowa wego; labo dhahi, Anamoona a Yehova eli ahifiya vatakulu vaga. Mudhidhi wafiya vatakulu vaga aleddo miyo ddela ovivita, mbwenye siku nttile ddahattiya ayana abale ologa na miyo. Mulogelani mwaha wa Paraizu, ddahubuwela dhewalegemi baddina vyaka tanu. Nsakanene ntto misionario dhahi wakuweliwa Jethro wakala o Suriname wahidha ttattamwa yehu vina wahiroma omusunza Bibilia na babani. Jethro wanziveliwa vaddiddi na miyo. Miyo ddanziveliwa vina na iyene. Ottiya ejo amudhehu anddittukulela omattugumanoni wa Anamoona akosiwa mwenemwale mmuruddani mwehu. Nona muddivuzele Florence, mwiyana mmodhayavo, akala ddanfuna omusunza Bibilia, miyo ddahirumeela wi ddinofuna.

Florence wahiyela vamodha na mamunaye Justus, otene baroma oddisunziha Bibilia. Muziddiyelani wi miyo kaddaziwa wengesa, awene ahiddikamiyedha osunza wengesa. Movira wa mudhidhi, ddihiroma wengesa ddamwinya. Siku dhahi, atelani abale ahiddipanga wila attomeliwa odhowa olaleya o Suriname. Yokubanyihaya jawi o Orealla kawali muttu wafwanyela oddisunzihavi Bibilia. Mbwenye Yehova, kaddidduwale.

Musongorhomwa, pionero dhahi wakuweliwa Floyd wahidha o Orealla, baniziwana mudhidhi walaleya iyene ramadda na ramadda. Mulogeliye mwaha wa omusunza Bibilia, miyo ddahiroma oteya. Iyene oddivuza, “Onteya nni.” Miyo baddimwaddela wila ddahisunza nivuru, Koddi Mulugu Onfuna [Niya] Wa Iyo? vina ddahiroma osunza nivuru nina, Conhecimento que Conduz à Vida Eterna. * Ddahimuziwiha wila masunzoya ahitxima. Floyd ohipuliha oddisunziha nivuru Conhecimento, mbwenye wattomeliwa odhowa olaba epaddi yina. Ddahijombeliwa wili namasunziha wa Bibilia.

Yaka ya 2004, Granville na Joshua apionero eli avawoka ahittomeliwa o Orealla. Alaleyaga ramadda  na ramadda ahiddifanya vina. Muddivuzele awene akala ddinofuna osunza, miyo ddihiteya. Ddihakumbirha wila ddisunzege nivuru Conhecimento ovenyana omaromo ofiyedha omagomo. Miyo ddafuna ddone akala awene agahiddisunziha dhakanene dhasunzihiwemi na anamasuziha abale oroma. Granville ohiddaddela mburo wakosiwa matugumano. Miyo ddanfuna odhowawo omattugumanoniwa, masiki valimi vyaka kumi ddihibudduwagavo vataku. Nona Granville wadditukula na kadera ya marodda banidhowa o Numbani ya Omwene.

Vasogorhova Granville wahiddaddela wila ddigafuna ddikumbire ddilebeliwe Eskola ya Orumiwi wa Mulugu. Iyene ohiloga: “Weyo wamuragali ndde, mbwenye onowodha ologa. Na sikuna weyo onele okosa diskursu. Kuwaganyedhe, enela opadduwa.” Mazu aye olibiha ahiddiwaraliha.

Ddahiroma odhowa mmabasani a olaleya na Granville. Mbwenye dila dha suwa ejile dhahikaana mbwebwe mwinjene, noona kadhavireya na kadera ya maroda. Sabwa ya ejuwene, ddahimukumbira Granville wi addiwetege na karinya ya mmadani. Dhahene nanwodha wedda. Ddibatiziwe mweri wa Abrili yaka ya 2005. Mwari mwa mudhidhi mung’onovi abali ahiddiswagiha wila ddisasanyedhege manivuru Onumbani ya Omwene vina ddikosege mabasa meena a osasanyedha vipano dhovavihana mazu.

Papayaga okwile mwiko na pangaya yaka ya 2007, eji yali yokubanyiha vaddiddi. Yahakubanyiha amudhihu otene. Granville wahilobela vamodha na iyo vina ohinengesela malebo anipangarhazile. Muvirele vyaka bili, ehipadduwa ngovi yina yokubanyiha—Granville ohikwa mwiko na pangaya.

Mulogo wehu mung’ono wakubanya sabwa ya yopadduwa ejile, kawana vina munddimuwa wa mulugo, mwali mudhari wokamihedha mmodha bahi. Okwa wa Granville ohiddikubanyiha vaddiddi; iyene wali mukwagaya-mukwagaya. Wanddikamihedha vaddiddi mpaddi womuyani vina wanddivaha dhotene dhaddijombela. Mukweliye, sumana ya vasogorhova ekosiwe matugumano mmulogoni, miyo ddahittomeliwa wengesa Nsunzo na A Sentinela. Ddima bili dhoroma, miyo ddahengesa pama; mbwenye vasogorhova ddahiroma wunla ofiyedha mmentoni mwaga odhala mintori. Ddahifiyedha obudduwawo o tribunani.

Ddiromile odheliwa embwenye-mbwenye vadhile mbali wa mulogo mwina wi akamihedhe mulogo wehu w’o Orealla. Vina katti ya elabo yehu yahinirumela mbali Kojo wali pionero wavawoka. Mohagalaliha mwene mama na mbalaga ahiroma omusunza Bibilia ofiyedha obatiziwa. Mweri wa Marsu yaka ya 2015, ddihittomiwa ninga mudhari wokamihedha. Muvirele mudhidhi mung’onovi, ddahikosa diskursu yoroma ya vattaddo. Mudhidhe-nne obule, miyo ddahubuwela dhaddaddele Granville dhawi: “Na sikuna weyo onele okosa diskursu. Kuwaganyedhe, enela opadduwa;” venevo ddihimottiha mintori dhing’onovi.

Mprogaramani ya JW Broadcasting^® miyo ddihisunza mwaha wa abali anna makattamiho oligana na aga. Eddilibihiletxe jawi, awene ankala ohagalalene vina anomukosela mabasa Mulugu, masiki na makattamiho awa a egumi. Nona ddihona wi miyo vina ddinowodha wira yakene. Efunelo yaga ya omukosela Yehova venjene ehiddittukulela olaba ninga pionero wa mudhidhi wetene. Mweri wa Setemburu yaka ya 2019 ddihakela muselu wottabiha vaddiddi wahajedhelemi! Mwere-nne obule, ddahittomeliwa okala munddimuwa wa mulogo wanna anamalaleya 40.

Ddinowatamalela abali vamodha na arogoraya addisunzihile Bibila vina addikamihedhile okosa mabasa aga. Mbwenye onimutamaleletximi vopitta ddi Yehova, vowi iyene kaddidduwale.