1983 ah ka chuak. A hmasa ah cun a dammi ngakchia pakhat ka rak si, asinain kumhra ka hun si tikah ka pum dihlak in a hung fak. Kumhnih hrawng a rauh hnuah zingkhat cu ka tho i ka cawl kho ti lo. Ka tha chuah in zeitlukin kaa zuam hmanhah ka ke cu a cawl kho ti lo. Mah ni thawkin lam ka kal kho ti lo. Ka zawtnak ruangah ka pum zong a ṭhang ti lo. Atu tiang ngakchia bantukin ka fa rih.

Thla tawmpal chung inn in ka chuah khawh lo lioah Jehovah Tehte pahnih nih an ka leng. Mileng an rat tik paohah kaa thup tawn, asinain mah ni cu mah nu hna he bia kan i ruah. Paradis kong an ka chimh tikah kum nga ka si lio i ka rak cawnmi kong kha ka hngalh ṭhan. Mah lioah Suriname ah a ummi missionary a simi Jethro cu thlakhat voikhat kan khua ah a ra i ka pa kha Baibal a cawnpiak. Jethro nih dawtnak he a ka pehtlaih. Cucaah amah kha ka tlaihchan tuk. Mah lengah ka pi le ka pu nih kan khua ah Jehovah Tehte Hna nih an tuahmi pumhnak ah an ka kalpi tawn. Mah ni ah kan inn ah a rami Florence nih tam deuh in cawn na duh maw tiah a ka hal i ka duh tiah ka rak ti.

Florence le a vapa Justus nih Baibal an ka cawnpiak. Carel ka thiam lomi kha an hngalh tikah carel thiam dingin an ka bawmh. Mah hnu tlawmpal ah keimah tein ka hun rel khawh. Nikhat ah mah nuva hna nih Suriname ah phungchim dingin rian pek kan si tiah an ka chimh. Ngaihchiat awk ngai a simi cu Orealla ah Baibal a ka cawnpiak kho dingmi ahohmanh an um ti lo. Asinain lunglawmh awk ngai a simi cu Jehovah nih a ka philh lo.

Mah hnu tlawmpal ah hmaikal a simi Floyd cu Orealla ah a phan i innkhat hnu innkhat phungchim a kal lioah kan i tong. Baibal cawnpiaknak kong a ka chimh tikah ka ni. “Zeicah na nih?” tiah a ka hal i Pathian Nih Zeidah A Kan Hal? timi brochure cu ka cawn dih cang i Zungzal Nunnak ah a Hruaimi Hngalhnak * timi cauk ka cawn lio a si tiah ka ti. Cun Baibal ka cawn ti lonak a ruang zong kha ka chimh. Cucaah Floyd nih Hngalhnak timi cauk kha hmangin a ka cawnpiak, asinain anih zong a dang hmun ah rian pek a rak si ṭhan. Cuti cun Baibal cawnpiaktu ka hun ngei ṭhan ti lo.

 Asinain 2004 ah hmaikal pahnih a simi Granville le Joshua cu Orealla ah rian pek an si. Innkhat hnu innkhat phungchim an kal lioah kan i tong. Baibal cawn na duh maw tiah an ka ti i ka ni. Hngalhnak cauk kha a hram thawkin cawnpiak dingin ka hal hna. A hmasa a ka cawnpiaktu hna nih an ka cawnpiakmi kong he aa khat maw ti kha hngalh ka duh caah a si. Granville nih khua ah pumhnak kan tuah tiah a ka chimh. Inn in ka chuah lonak cu kumhra hrawng a si cang caah pumh kha ka duh tuk. Granville nih kekual bunhmi leng kha a ka nampiak i a ka don caah kaa pum kho.

Mah hnuah Granville nih Phungchim Ning Cawnnak ah i tel dingin tha a ka pek. Hitin a ka ti: “Pum tlamtling lo na si ko nain bia na chim kho, cucaah nikhatkhat cu zapi caah phung na chim kho te lai. Cutin na tuah khawh hrimhrim te lai.” Cu bantuk thazaang peknak bia nih mahle mah zumhnak a ka ngeihter.

Granville he phungchimnak ah ka hun i tel. Asinain khua i lam cu a ṭhat lo caah kekual bunhmi leng in kal cu a har. Cucaah Granville kha nammi leng hnuhpiak awkah bawmhnak ka hal. Cutin kan timhtuahmi cu a tlam a tling tuk. 2005, April ah tipil ka rak ing. Mah hnu tlawmpal ah unaupa pawl nih Khrihfabu ah cauk zohkhenh ning le Biakinn ah sehlei thilri tlaih ning kha an ka cawnpiak.

Ngaihchiat awk ngai a simi cu 2007 ah ka pa cu tilawng accident in a rak thi. Cucaah kan chungkhar ningin kan lung a rawk tuk. Granville nih thla a kan campiak i Baibal in thazaang a kan pek. Kum hnih hnuah Granville zong tilawng accident in a thih caah kan ngaih a chia tuk.

Kan Khrihfabu ah Khrihfa upa pakhat hmanh an um ti lo, bu rianṭuantu pakhat lawng a um. Granville cu ka hawikom ṭha tuk a si caah a thihmi cu ka ngaih a chia tuk. Thlaraulei he pumsalei he ka herhmi kha a ka bawmh. A thih hnu zarh pumhnak ah Vennak Innsang rel dingin rian thiah ka rak si. Catlangbu pahnih ka rel lioah ka ṭap, ka ngam khawh ti lo caah pulpit in ka ṭum.

A dang Khrihfabu i unau pawl nih Orealla ah ra in an kan bawmh caah ka lung a dam deuh. Cun zung ṭengnge zong nih kan khua ah hmaikal unaupa Kojo kha rian an pek. Ka nu le ka naupa zong Baibal an cawng i tipil an in caah kaa lawm tuk. 2015, March ah bu rianṭuantu pakhat in rian pek ka si. Mah hnuah zapi ca phungchimnak kha hmasa bik ka rak pek. Mah ni ah unaupa Granville nih hitin a rak ka chimmi bia kong kha ka ruat i a nih zong ka ni i a ṭap zong ka ṭap: “Nikhatkhat cu zapi caah phung na chim kho te lai. Cutin na tuah khawh hrimhrim te lai.”

JW Broadcasting^® program chung i keimah sining he aa khatmi unau pawl sinin tampi ka cawn. Pum tlamtling lo an si ko nain thil tampi kha hlawhtling tein an tuah khawh i nuam tein an nung. Kei zong nih thil cheukhat pawl kha ka tuah khawh ve. Jehovah caah ka si khawh chungin i pek ka duh caah hmaanhmaan hmaikal pakhat ka hung si. 2019, September ah kaa ruahchan lomi thawngpang pakhat ka rak theih. Thawngthanhtu 40 a ummi kan Khrihfabu ah Khrihfa upa pakhat in rian pek ka si.

Baibal a ka cawnpiakmi hna le phungchim rian ah i tel kho dingin a ka bawmmi unau hna cungah kaa lawm tuk. A hleiin Jehovah nih a ka philh lo caah kaa lawm tuk.