Tsaʼ quila pañimil (chʼocʼayon) ti 1983. Weñʌch tsaʼ cajiyon ti colel pero cheʼ bʌ 10 jaxto c jabilel tsaʼ caji cubin chaʼan cʼux pejtelel c bʌcʼtal. Cheʼ bʌ tsaʼ ñumi chaʼpʼejl jab, ti jumpʼejl sʌcʼajel tsaʼ caji cubin chaʼan maʼañix miʼ mejlel c ñijcan bʌ. Anquese tsaʼ c chaʼle wersa c ñijcan c yaʼ pero maʼañix i pʼʌtʌlel. Cʼʌlʌl ti jimbʌ ora, maʼañix tsaʼ mejliyon ti xʌmbal. I tiʼ caj jiñi cʼamʌjel, maʼañix tsaʼ cajiyon ti bej colel. Jin chaʼan, cheʼ ñojel tsaʼ cʌyleyon bajcheʼ juntiquil chʼiton.

Añix chaʼpʼej uxpʼejl uw maʼañic mic loqʼuel ti cotot cheʼ bʌ chaʼtiquil xʼixic i testigojoʼ bʌ Jehová tsiʼ julaʼtayon lojon. Lʌcʼʌl tiʼ pejtelel ora cheʼ bʌ an majqui miʼ cʼotel ti julaʼ tij cotot maʼañic mic loqʼuel, pero ti jimbʌ ora tsaʼ loqʼuiyon c pejcan jiñi testigojob. Cheʼ bʌ woli (choncol) i subeñoñob chaʼan jiñi Paraíso, tsaʼ j cʼajtesa chaʼan cheʼ bʌ joʼpʼejl jaxto c jabilel juntiquil misionero tilem bʌ ti Surinam i cʼabaʼ Jethro, miʼ cʼotel yaʼ ti Orealla junyajl ti jujumpʼejl uw i miʼ yʌqʼuen estudio c papá. Wen tsaʼ j qʼuele Jethro come wen uts yicʼoton. Cheʼ jaʼel, jiñi c tatuch yicʼot chuchuʼ an i tajol tsiʼ pʌyʌyoñob majlel ti jiñi tempa bʌ muʼ bʌ i melob jiñi i testigojob Jehová yaʼ ti Orealla. Jin chaʼan, cheʼ bʌ Florence, i junticlel jiñi xʼixic tsaʼ bʌ i julaʼtayon tiʼ cotot, tsiʼ cʼajtibeyon mi com c ñumen cʌn chuqui miʼ yʌl jiñi Biblia, i tsaʼ c sube chaʼan comʌch.

Florence tsaʼ chaʼ cʼoti yicʼot jiñi i ñoxiʼal i cʼabaʼ Justus, i tsiʼ teche i yʌqʼueñoñob estudio. Cheʼ bʌ tsiʼ qʼueleyob chaʼan mach cujil i pejcʌntel jun, tsiʼ cʌntesayoñob. Ti wiʼil, c bajñelix mic pejcan jiñi jun. Ti jumpʼejl bʌ qʼuin, Florence yicʼot Justus tiʼ subeyoñob chaʼan mi caj i majlelob ti Surinam come yaʼ tsaʼ chojquiyob majlel ti subtʼan. Chʼijyemtic jax tsaʼ cubi come maʼañic majqui tsaʼ cʌyle ti Orealla mejl bʌ i bej aqʼueñon estudio. Pero wen tijicña tsaʼ cubi c bʌ come tsaʼ j qʼuele chaʼan Jehová maʼañic tsaʼ ñajʌyi i chaʼañon.

Mach jalic tsaʼ ñumi, tsaʼ cʼoti ti Orealla juntiquil precursor i cʼabaʼ Floyd. Ti jumpʼejl bʌ qʼuin, cheʼ bʌ woli (yʌquel) ti subtʼan ti otot tac, tsaʼ cʼoti i julaʼtañon. Cheʼ bʌ tiʼ subeyon mi com c chʼʌm jumpʼejl estudio loqʼuem bʌ ti Biblia, tsaʼ c chaʼle tseʼñal. I tsiʼ cʼajtibeyon: «¿Chucoch maʼ chaʼlen tseʼñal?». Tsaʼ c sube chaʼan tsaʼix aqʼuentiyon estudio yicʼot jiñi folleto: ¿Chuqui miʼ cʼajtin Dios ti lac tojlel?, yicʼot chaʼan tsaʼix c teche estudio yicʼot jiñi libro: El conocimiento que lleva a vida eterna. * Cheʼ jaʼel, tsaʼ c sube chucoch tsaʼ j cʌyʌ c chʼʌm estudio. Tsaʼ cujtesa j qʼuel yicʼot Floyd jiñi libro Conocimiento, pero tsaʼ chojqui majlel ti subtʼan jaʼel ti yambʌ parte.  Cheʼ jiñi, chaʼ maʼañix majqui tsaʼ mejli i bej aqʼueñon estudio.

Pero cheʼ ti 2004, Granville yicʼot Joshua tsaʼ cʼotiyob ti Orealla, tiʼ chaʼticlelob añob bajcheʼ precursor especial. Cheʼ bʌ woliyob ti subtʼan ti otot tac, tsaʼ cʼoti ti cotot. Cheʼ bʌ tsiʼ cʼajtibeyoñob mi com c chʼʌm jumpʼejl estudio, tsaʼ c chaʼle tseʼñal. Tsaʼ c subeyob chaʼan mic tech qʼuel lojon tiʼ tejchibal jiñi libro Conocimiento come com j qʼuel mi lajalʌch chuqui tac mi caj i cʌntesañoñob cheʼ bajcheʼ jiñi yambʌlob tsaʼ bʌ i yʌqʼueyoñob estudio. Granville tiʼ subeyon chaʼan ila ti Orealla miʼ yujtel tempa bʌ tac. Anquese añix 10 jab maʼañic mic loqʼuel ti cotot, tsaʼʌch c mulaj majlel. Jin chaʼan, Granville tsiʼ pʌyʌyon majlel ti jumpʼejl silla de rueda yaʼ ti Yotlel tempa bʌ.

Ti wiʼil, Granville tiʼ subeyon chaʼan mi cotsan c bʌ ti jiñi Escuela chaʼan bʌ i Yeʼtel Dios. Tiʼ subeyon: «Machʌch maʼañic maʼ mejlel ti xʌmbal, pero a wujilʌch tʼan. Ti jumpʼejl bʌ qʼuin mi caj a ñusan jumpʼejl discurso. Muʼto caj a qʼuel». Jiñi tsaʼ bʌ i subeyon tsiʼ yʌqʼueyon c tijicñʌyel yicʼot tsaʼ c ñopbe i tʼan.

Tsaʼ c teche subtʼan yicʼot Granville, pero wocolʌch chaʼan mic majlel ti silla de rueda come mach ñoj weñic jiñi bij tac ti Orealla. Jin chaʼan, tsaʼ c sube chaʼan miʼ pʌyon majlel ti carretilla i ñumen weñix tsaʼ cajiyon lojon ti subtʼan. Cheʼ ti abril i chaʼan 2005 tsaʼ c chʼʌmʌ jaʼ. Mach jalic tsaʼ ñumi, jiñi hermanojob tsiʼ cʌntesayoñob bajcheʼ miʼ mejlel c chaʼlen coltaya ti yʌcʼol jiñi revista tac yicʼot chaʼan mij qʼuel jiñi sonido am bʌ tiʼ Yotlel tempa bʌ.

Chʼijyemtic jax, pero cheʼ ti 2007, jiñi c papá tsiʼ taja jumpʼejl accidente yaʼ ti barco i cheʼ bʌ tsaʼ ñumi chaʼpʼej uxpʼejl qʼuin tsaʼ chʌmi (sajti). Wen chʼijyem tsiʼ yubiyob i bʌ jiñi c familia. Granville tsiʼ mele oración yicʼot tsiʼ cʼʌñʌ jiñi Biblia chaʼan miʼ ñuqʼuesan lon c pusicʼal. Pero tsaʼ ñumi chaʼpʼejl jab, tsaʼ lon c ñusa yambʌ wocol: Granville tsaʼ chʌmi jaʼel cheʼ bʌ tsiʼ taja jumpʼejl accidente ti barco.

Mach wen cabʌloñic lojon tij congregación i wen chʼijyem tsaʼ lon cubi. Cheʼ jaʼel, maʼañix mi juntiquilic anciano i cojach an juntiquil siervo ministerial. Wen chʼijyem tsaʼ cubi c bʌ cheʼ bʌ tsaʼ chʌmi Granville come jiñʌch juntiquil camigo tsaʼ bʌ c wen cʼuxbi, tsaʼ bʌ i coltayon tiʼ pejtelel ora chaʼan mic lʌcʼtesan c bʌ ti Jehová yicʼot tsiʼ coltayon ti yan tac bʌ i cʼʌjñibal bʌ c chaʼan. Ti jiñi ñaxam bʌ tempa bʌ tsaʼ bʌ lon c mele cheʼ bʌ chʌmeñix, an tic wenta c pejcan jiñi párrafo tac ti jiñi Estudio i chaʼan Lac Tsictesʌbentel. Tsaʼixto ujti c pejcan chaʼpʼejl párrafo, pero tsaʼ cajiyon ti uqʼuel. Come maʼañic tsaʼ j cʌyʌ uqʼuel tsaʼ jubiyon ti plataforma.

Ñumen wen tsaʼ caji cubin c bʌ cheʼ bʌ an hermanojob ti yambʌ congregación tsaʼ bʌ tiliyob i coltañon lojon ila ti Orealla. Cheʼ jaʼel, jiñi sucursal ti choco tilel juntiquil precursor especial i cʼabaʼ Kojo. Tsiʼ wen aqʼueyon c tijicñʌyel cheʼ bʌ jiñi c mamá yicʼot jiñi chʼiton bʌ quijtsʼin tsiʼ techeyob i chʼʌm estudio i tsiʼ chʼʌmʌyob jaʼ. Cheʼ ti marzo i chaʼan 2015, tsaʼ ochiyon ti siervo ministerial. Ti wiʼil, tsaʼ c ñusa jiñi ñaxam bʌ c discurso. Tsaʼ c chaʼle tseʼñal yicʼot uqʼuel ti jimbʌ ora come tsaʼ j cʼajtesa tsaʼ bʌ i subeyon Granville: «Ti jumpʼejl bʌ qʼuin mi caj a ñusan jumpʼejl discurso. Muʼto caj a qʼuel».

Jiñi JW Broadcasting^® an i coltayon chaʼan mij cʌn yambʌ hermanojob lajaloʼ bʌ i wocol bajcheʼ c chaʼan. Anquese cʼamob añʌch chuqui tac miʼ melob yicʼot tijicñayob. Joñon jaʼel añʌch chuqui tac miʼ mejlel c mel. Come com c melben i yeʼtel (troñel) Jehová cheʼ bajcheʼ cʼamel mic mejlel tsaʼ ochiyon ti precursor regular. I tsaʼ toj sajti c pusicʼal cheʼ bʌ ti septiembre i chaʼan 2019 tsaʼ waʼchocontiyon ti anciano ti lon j congregación, baqui an 40 xsubtʼañob.

Mi cʌqʼuen wocolix i yʌlʌ jiñi cʼuxbibil bʌ hermanojob yicʼot hermanajob tsaʼ bʌ i cʌntesayoñob tiʼ sujmlel yicʼot tsiʼ coltayoñob chaʼan mic melben i yeʼtel Jehová. Pero mic ñumen aqʼuen wocolix i yʌlʌ come Jehová maʼañic ñajʌyem i chaʼañon.