Hna hnaho lo macatre 1983. Ka lolo hi la meleng lo eni a co. Ngo ame hë la kola 10 lao macatreng, kolo ha akötre la ngönetreing. Thupene la lue macatre, eni a hlë e hmakany nge thatreine hë ni enijëne la lue wacang nge pëhë trengecatreng. Qaane ju hi la drai cili, thatreine hmaca kö ni tro. Hnene la mecing matre kösë nekönatr palahi ni.

Itre treu ne eni a umë ngöne la hnalapa, nge hna traqa hnene la lue Temoë Iehova. Hnenge hna majemine zae ngöne la kola traqa la itre atr. Ngo ame lo drai cili, hnenge hna lapa troa drei nyidro. Hnei nyidroti hna qeje Paradraiso koi ni, nge eni hmaca mekune lo eni a 5 lao macatreng. Hnei Jethro, ketre mesinare ka mel e Suriname, hna lapa traqa e nöjei treu ngöne la tribu matre troa ini Tusi Hmitrötr memine la kemeng. Lolo la thiina i nyidrë, nge ka tru nyidrëti koi ni. Nge ame itre xaa ijin, hnene la lue qaqaang hna tro sai ni kowe la icasikeu ne la itre Temoë Iehova ngöne la tribu. Celë hi matre, ame la kola hnyingë ni hnei Florence troa ini tus, ke, hnenge hna canga kapa.

Hnei Florence hna bëeke me Justus, föi eahlo, matre troa ini tus me eni. Hnei nyidroti hna ini ni troa e tus. Ngo ame la ketre drai, hnei nyidroti hna qaja koi ni ka hape, hna upi nyidro troa cainöj e Suriname. Pëkö atr e Orealla ka troa nyihnai nyidro troa ini tusi me eni. Ngo tha hna thëthëhmi ni kö hnei Iehova.

Thupene lai, hnei Floyd, ketre pionie, hna traqa e Orealla nge hnei nyidrë hna cainöj koi eahun. Ame la nyidrëti a sipo ni troa ini tus, hnenge hna dredrehnyima. Öni Floyd: “Hnauëne la eö a hnyima?” Öning ka hape, ase hë ni inine la boroshüre Nemene La Hnei Akötresieti Hna Thele The Së? me nyiqane la itus hna hape, Atrehmekune Ka Eatrongë Nyipunie Kowe La Mele Ka Pë Pun. * Ketre, hnenge hna qaja koi nyidrë la kepin matre tha eni hmaca kö a ini tus. E cili, hnenge hmaca hna ini tus me afenesine me nyidrë la itus Atrehmekune. Ngo ame e thupen, hna upi nyidrëti fe kowe la ketre nöj, matre tha ini tusi hmaca kö ni.

 Ngo ame hë lo 2004, hna traqa hnei Granville me Joshua, lue pionie hut. Hnei nyidroti hna cainöje trootro uti hë traqa kowe la hnalapang. Ame la nyidroti a hnyinge koi ni matre troa ini tus, hnenge hna dredrehnyima. Hnenge hna sipo nyidro troa inine hmaca la itus Atrehmekune, matre troa wang laka, caasi hi la itre ini hnei nyidroti hna hamën memine lo itre xaa Temoë. Nge hnei Granville hna qaja ka hape, hetre icasikeu ngöne la tribu. Ngo traqa koi 10 lao macatre ne eni a umë. Ame pe, eni a ajane troa sine la icasikeu. E cili, hnei Granville hna ati ni hune la ikatr me ukune uti hë traqa kowe la Uma Ne Baselaia.

Thupene lai, hnei Granville hna ithuecatre koi ni troa sine la Ini Ne Cainöj Qaathei Akötresie. Öni angeic: “Nyipici laka, ka sinaatr eö, ngo ijiji eö hi troa ithanata. Atre hi ni laka, tro eö elany a cile fë cainöj!” Celë hi lai ka ithuecatre koi ni.

Nge hnenge hna nyiqane cainöj me Granville. Ngo pine laka ngazo la itre gojeny, matre jole troa tro memine la ikatr. E cili, hnenge hna sipo Granville troa ati ni hune i buruet matre troa cainöj ngöne la itre hnalapa. Nge ame hë la Eiperem 2005, eni a xomi bapataiso. Hnene la itre trejin hna ami ni troa cilëne la hnë ami tus me kuci ikaho ngöne la ekalesia.

Ame la 2007, kola meci hnei kaka hune he. Hace me hleuhleu la mele hun. Ngo hnei Granville hna ce thithi me eahun me e la itre xötr ka ithuecatr. Thupene la lue macatre, hna traqa fe la ketre akötre ka tru koi hun. Hnei Granville fe hna meci hune la ketre he.

Celë hi matre, pëhë qatre thup nge caasi hi la atre ixatua. Hace me hleuhleu la hning thupene la meci Granville ke, nyidrëti la sineeng hna hnim. Hnei nyidrëti palahi hna ceme eni. Hnei nyidrëti hna xatua ni ngöne la nyipici me ngöne la meleng. Ame la icasikeu thupene la nyidrëti a mec, eni la ka e la Ita Ne Thup. Hnenge hi hna e la lue pane paragaraf nge hnenge hna treij. Pëkö ka atreine troa aupune la itre treijeng, matre hna autinyi ni qa ngöne la ita hmitrötr.

Kola nango aupune la hning ngöne la kola traqa hnene la itre trejin ne la ketre ekalesia troa xatua hun. Ketre, hnene la filial hna upi Kojo, ketre pionie hut. Atraqatre la madrineng ke, hnei nenë memine la neköi jining hna ini tus me xomi bapataiso. Nge ame lo Maac 2015, hna acili ni troa atre ixatua. Thupene lai, hnenge hna cile fë la pane cainöjeng. E cili, eni hmaca mekun lo hna qaja hnei Granville, ka hape: “Atre hi ni laka, tro eö elany a cile fë cainöj!” Hnenge hna dredrehnyima me treij.

Jëne la JW Télédiffusion, hnenge hna öhne laka, alanyimu la itre trejin ka cile kowe la itre jol ka traqa koi ni. Ngacama itre ka sinatr angatr, ngo angatr a madrin ke, tru catre la itre huliwa hnei angatr hna kuca. Ijijinge fe troa hane tui angatr. Eni a ajane troa nue la trengecatreng troa huliwa i Iehova. Celë hi matre hnenge hna xom la huliwa ne pionie lapa. Ame la Semitrepa 2019, hna acili ni troa qatre thup ne la ekalesia. Drei la ketre manathithi ka tru!

Tru catre la hni ne oleng kowe la itre trejin ka ini tusi me eni me ce cainöj me eni. Ngo ame la ka sisitria catr ke, eni a olene koi Iehova ke, tha hnei Nyidrëti kö hna thëthëhmi ni!