Mi meke aini 1983. Di mi be moo nyoni sani á be e du mi. Ma di mi tapu tin yali, mi sikin bigin hati mi. Wan sani fu tu yali baka dati, di mi weki wan mamanten neen mi á poi sekeseke. Mi feti fu puu mi futu a pe a de te mi weli. Fanafu a dei de, mi á waka moo so. Mi á be e goo moo tu. Nownow mi sikin nyoni enke wan pikinnengee ete.

Wantu mun baka di mi á be poi waka moo, tu Yehofa Kotoigi kon a wi osu. Gaanse leisi te sama be kon a wi osu, mi á be e wani den si mi, ma a dei de mi taki anga den tu uman ya. Di den bigin taigi mi sani fu a paladeisi, mi membee wan sani di mi be yee di mi be abi 5 yali. A ten de wan pionili den e kai Jethro, di be e tan a Saanan be e kon sutudeli Beibel anga nda wan leisi wan mun. Jethro be e libi bun anga mi. Mi be lobi en manii. Son leisi mi gaandda anga mi gaanmma be e tyai mi go a den komakandaa fu Yehofa Kotoigi di be e holi a Orealla. Neen meke di Florence, wan fu den uman di be kon a wi osu a dei de akisi mi efu mi wani sabi moo, mi taigi en taki a bun.

Florence anga en man Justus bigin sutudeli Beibel anga mi. Di den si taki mi á sabi leisi, den leli mi leisi. Baka wan pisiten, miseefi be poi leisi. Wan dei den taigi mi taki den ná poi kon a mi moo, bika den sende den go a Saanan fu go peleiki. Taa sama á be de a Orealla fu sutudeli anga mi.

Ma a á langa baka dati, neen wan pionili den e kai Floyd kon a Orealla. Mi anga en miti wan dei di a be e peleiki osu fu osu. Di a akisi mi efu mi wani sutudeli Beibel, mi booko lafu. Neen a akisi mi saide mi e lafu. Mi taigi en taki mi sutudeli a San Gado e aksi foe wi? bolosilo kaba te mi be bigin anga a Sabi di e tjari joe go na têgo libi * buku. Mi taigi en saide mi nai sutudeli moo. Floyd sutudeli a Sabi-buku go doo anga mi te enke u kaba a buku ya. Ma baka dati den sende en go a wan taa peesi tu. Sama á be de fu sutudeli anga mi baka.

 Aini 2004 den sende tu spesuutu pionili kon a Orealla. Den nen a be Granville anga Joshua. Mi anga den man ya miti di den be e peleiki osu fu osu. Di den akisi mi efu mi wani sutudeli, mi booko lafu, neen mi akisi den fu den sutudeli a Sabi buku anga mi. Mi be wani sabi efu a denseefi sani den be o leli mi. Granville taigi mi taki komakandaa be e holi a Orealla. A omen yali mi á be e komoto aini mi osu a ten de, ma mi be wani go a den komakandaa. Neen meke Granville kon teke mi anga wan lolosutuu tyai go na a Kownukondee zaal.

Baka wan pisiten, Granville gi mi taanga-sikin fu poti mi nen na a Teyokalasiya Diniwooko-sikoo. A taigi mi taki: ‘A tuu taki yu á poi waka, ma i poi taki. Wan dei yu o holi lezing. Mi sabi taki i poi.’ Den sani di a taki gi mi taanga-sikin.

Mi bigin peleiki makandaa anga Granville. Ma omen fu den pasi á be bun, neen meke wi á be poi go na ala peesi anga a lolosutuu fu mi. Neen meke mi akisi Granville fu toto mi aini wan koloiwagi. A so u be man go a omen peesi. Mi dopu aini april 2005. A á langa baka dati neen den baala leli mi wooko na a buku kasi. Den leli mi tu fa mi mu pee poku na a komakandaa.

Aini 2007, nda dede a wan ongooku fasi anga boto. Ná pikin fii u fii a sani ya. Granville be e begi anga u. A be e leisi tekisi aini Beibel fu toosutu u tu. Tu yali baka dati, wan taa ogii pasa di seke u. Granville dede a wan ongooku fasi anga boto tu.

Ná pikin tyali a kemeente tyali. Now wi á be abi owluman moo tu. A wan dinali namo u be abi. Granville a be mi mati. A dede fi en du mi ogii te. A be du ala san a poi fu yeepi mi fu toon Yehofa mati. A be e yeepi mi anga taa sani di mi be abi fanowdu tu. A taa komakandaa baka di a dede a mi be mu leisi na a Wakititolen sutudi. Mi pinapina leisi den fosi paragraaf, ma baka dati mi á be poi holi en moo, mi bigin kee. Mi be abi fu komoto na a podium.

Di wantu taa baala kon yeepi a pikin kemeente fu wi a Orealla mi bigin kisi miseefi baka. A beikantoo be sende wan taa spesuutu pionili fu kon yeepi u tu. Den e kai en Kojo. Ná pikin poolo mi poolo di mma anga mi pikin baala bigin sutudeli Beibel. Aini maart 2015 mi toon wan dinali. Baka wan pisiten mi holi mi fosi lezing. A dei de anga ala wataa-ain mi pakisei a sani di Granville be taigi mi. A be taki: ‘Wan dei, yu o holi lezing. Mi sabi taki i poi.’

Te mi e luku JW Broadcasting^® mi e si taa baala anga sisa di siki leti enke mi. Ma toku den e piisii anga san den poi du. Miseefi poi du son sani. Fu di mi be wani gi Yehofa ala mi kaakiti, meke mi bigin du a pionili wooko. Aini september 2019 mi fende wan taa gaandi. Mi á be poi biibi di mi yee taki mi toon owluman. A 40 peleikiman be de aini a kemeente a ten de.

Mi e gi ala den baala anga sisa di sutudeli anga mi, anga den wan di e yeepi mi fu dini Yehofa daa. Ma a sama di mi e moo gi daa, a Yehofa, bika a á feegete mi.