Afɔ mi afi 1983. Migbekɛbiiashi lɛ, miyɛ hewalɛ, ni nɔ ko efeee mi. Shi be ni miye afii 10 lɛ, hela ko bamɔ mi waa, ni mihewojiaŋ fɛɛ bɔi mihe waa. No sɛɛ aaafee afii enyɔ lɛ, gbi ko leebi be ni mite shi lɛ, minaji amli fɛɛ ejɔ. Mifee he eko aahu shi minyɛɛɛ manyiɛ. Kɛjɛ nakai gbi lɛ nɔ kɛbashi ŋmɛnɛ lɛ, minyɛko manyiɛ. Hela lɛ hewɔ lɛ, minyɛɛɛ mada dɔŋŋ. Ŋmɛnɛ po kɛ́ ona mi lɛ, mitamɔ gbekɛ bibioo.

Be ni hela lɛ bamɔ mi lɛ, mihɔ shĩa nyɔji abɔ ni mijeee kpo. Kɛkɛ ni gbi ko lɛ, Yehowa Odasefoi enyɔ komɛi ba wɔshĩa lɛ. Bei pii lɛ, kɛ́ mɛi ba wɔshĩa lɛ nakai lɛ, miyateɔ. Shi nakai gbi lɛ, miyateee; mibo Odasefoi lɛ toi. Amɛkɛ mi gba Paradeiso lɛ he sane, ni no hã mikai sane ko ni minu be ni miye afii enumɔ lɛ. Nakai beiaŋ lɛ, maŋsɛɛ sɔɔlɔ ko ni atsɛɔ lɛ Jethro lɛ jɛɔ Suriname ebaa wɔkrowa lɛ shi kome daa nyɔɔŋ nɔ, ni ekɛ mipapa kaseɔ Biblia lɛ. No mli lɛ, misumɔɔ Jethro sane waa, ejaakɛ esumɔɔ misane. Agbɛnɛ hu, no mli lɛ, Odasefoi lɛ feɔ kpeei yɛ wɔkrowa lɛ, ni bei komɛi lɛ, minii kɛ minaa kɛ mi yaa. No hewɔ lɛ, be ni Odasefoi ni basara mi nakai gbi lɛ ateŋ mɔ kome ni atsɛɔ lɛ Florence lɛ bi mi kɛji masumɔ ni akɛ mi akase nii lɛ, mikpɛlɛ nɔ.

Be kroko be ni Florence baa lɛ, ekɛ ewu Justus ba, ni amɛkɛ mi bɔi Biblia lɛ kasemɔ. Amɛna akɛ mileee nikanemɔ, no hewɔ lɛ, amɛtsɔɔ mi nikanemɔ. Fiofio lɛ, mibale nikanemɔ. Be ko be ni Florence kɛ ewu lɛ ba lɛ, amɛkɛɛ mi akɛ ajie amɛ kɛtee Suriname. Mináaa mɔ ko kɛ mi atsa nikasemɔ lɛ nɔ, ni enɛ dɔ mi waa. Shi miishɛɛ sane ji akɛ, Yehowa hiɛ kpaaa minɔ.

No sɛɛ etsɛɛɛ lɛ, gbɛgbalɔ ko ni atsɛɔ lɛ Floyd lɛ ba Orealla. Gbi ko lɛ, eeshiɛ yɛ shĩa fɛɛ shĩa ni ekɛ mi kpe. Be ni ebi mi kɛji masumɔ ni makase Biblia lɛ, miŋmɔ fioo. No hewɔ lɛ, ebi mi akɛ: “Mɛni hewɔ oŋmɔɔ lɛ?” Mikɛɛ lɛ akɛ, akɛ mi ekase Mɛni Nyɔŋmɔ Taoɔ yɛ Wɔdɛŋ? broshuɔ lɛ agbe naa, ni akɛ mi eje Nilee Ni Kɛ Mɔ Yaa Naanɔ Wala Mli * wolo lɛ po kasemɔ shishi. Kɛkɛ ni mitsɔɔ lɛ nɔ hewɔ ni nikasemɔ lɛ nyɛɛɛ atsa nɔ dɔŋŋ lɛ. Floyd kɛ mi gbe Nilee wolo lɛ kasemɔ naa, kɛkɛ ni ajie lɛ hu kɛtee he kroko. Shi kome ekoŋŋ lɛ, mináaa mɔ ko kɛ mi akase nii.

Shi yɛ afi 2004 lɛ, ahã gbɛgbalɔi krɛdɛi enyɔ ba Orealla. Atsɛɔ amɛ Granville kɛ  Joshua. Be ko lɛ, amɛnyiɛ shĩa fɛɛ shĩa shiɛmɔ nitsumɔ lɛ nɔ ni amɛkɛ mi kpe. Be ni amɛbi mi kɛji masumɔ ni amɛkɛ mi akase nii lɛ, miŋmɔ fioo, ni mikɛɛ amɛ akɛ amɛkɛ mi akase Nilee wolo lɛ fɛɛ ekoŋŋ. No mli lɛ, miitao makwɛ kɛji nibii ni amɛbaatsɔɔ mi lɛ kɛ nibii ni atsɔɔ mi be ko ni eho lɛ kpãa gbee lo. Granville kɛɛ mi akɛ, afeɔ asafoŋ kpeei yɛ akrowa lɛ. No mli lɛ, mihi shĩa nɔ ni miihe ashɛ afii 10 ni mijeko kpo. Shi mishwe waa akɛ maya asafoŋ kpeei lɛ. No hewɔ lɛ, Granville wo mi eta obubuafoi ashwiili mli ni etsi mi kɛtee Maŋtsɛyeli Asa lɛ nɔ.

Sɛɛ mli lɛ, Granville wo mi hewalɛ ni miŋma migbɛ́i yɛ Teokrase Sɔɔmɔ Skul lɛ mli. Ekɛɛ mi akɛ: “Onyɛɛɛ onyiɛ, shi obaanyɛ owie. Wɔsɛɛ ko lɛ, obaahã maŋshiɛmɔ. Hemɔ oye ejaakɛ ebaaba mli.” Ewiemɔi nɛɛ wo mi hewalɛ waa diɛŋtsɛ.

Granville ye ebua mi ni mibɔi shiɛmɔ yaa. Shi gbɛjegbɛi ni yɔɔ wɔkrowa lɛ pii ehiii bɔ ni abaanyɛ akɛ obubuafoi ashwiili atsɔ nɔ. No hewɔ lɛ, mikɛɛ Granville akɛ kɛ́ wɔmiiya shiɛmɔ lɛ, ekɛ mi awo wheelbarrow moŋ mli. Wɔna akɛ, no hi kwraa fe obubuafoi ashwiili lɛ. Yɛ April afi 2005 lɛ, abaptisi mi. No sɛɛ etsɛɛɛ lɛ, nyɛmimɛi lɛ tsɔse mi, ni amɛhã mibɔi woji lɛ anɔkwɛmɔ kɛ tsɔne ni akɛtswaa lala nɔkwɛmɔ yɛ Maŋtsɛyeli Asa lɛ nɔ.

Dɔlɛ sane ji akɛ, yɛ afi 2007 lɛ, mipapa kɛ lɛlɛ yaná oshãra ni egbo. Wɔweku lɛ tsui kumɔ waa. Granville kɛ wɔ sɔle, ni ejɛ Ŋmalɛ lɛ mli eshɛje wɔmii. No sɛɛ afii enyɔ lɛ, nɔ nyɔ wɔhiŋmɛiiaŋ ekoŋŋ. Granville kɛ lɛlɛ yaná oshãra ni egbo.

No mli lɛ, wɔyɛ asafoŋ onukpa kome pɛ yɛ wɔsafo lɛ mli, ni ji Granville, kɛ asafoŋ sɔɔlɔ kome. No hewɔ lɛ, be ni egbo lɛ, ebashwɛ asafoŋ sɔɔlɔ lɛ pɛ. Egbele lɛ wo wɔsafo muu lɛ fɛɛ awerɛho, ni edɔ mi waa diɛŋtsɛ, ejaakɛ no mli lɛ, misumɔɔ esane. Eye ebua mi be fɛɛ be koni mi kɛ Yehowa teŋ wekukpaa lɛ mli awa, ni eye ebua mi kɛ mihiamɔ nibii komɛi hu. Klɛŋklɛŋ kpee ni afee yɛ egbele lɛ sɛɛ lɛ, no mli lɛ, mi mikaneɔ Buu-Mɔɔ lɛ mli. Minyɛ mikane klɛŋklɛŋ kukuji enyɔ lɛ, shi agbɛnɛ lɛ, minyɛɛɛ dɔŋŋ. Mibɔi yaafo ni ehiii kpatamɔ. No hewɔ lɛ, awo mi kɛje wiemɔ kpoku lɛ nɔ.

Sɛɛ mli lɛ, nyɛmimɛi jɛ asafo kroko mli amɛbaye amɛbua wɔsafo lɛ, ni no shɛje mimii fioo. Agbɛnɛ hu, nitsumɔhe nine lɛ tsu gbɛgbalɔ krɛdɛɛ ko ni atsɛɔ lɛ Kojo lɛ kɛba wɔsafo lɛ mli. Akɛ mimami kɛ minyɛmi nuu fioo lɛ bɔi Biblia lɛ kasemɔ, ni amɛtee amɛhiɛ ni abaptisi amɛ, ni enɛ hã miná miishɛɛ waa. Kɛkɛ ni yɛ March afi 2015 lɛ, awó mi asafoŋ sɔɔlɔ, ni no sɛɛ lɛ, miná hegbɛ mihã mi-klɛŋklɛŋ maŋshiɛmɔ. Nakai gbi lɛ, mikai nɔ ni Granville kɛɛ mi afii komɛi ni eho lɛ, akɛ: “Wɔsɛɛ ko lɛ, obaahã maŋshiɛmɔ. Hemɔ oye ejaakɛ ebaaba mli.” Miná miishɛɛ waa, ni mihiŋmɛiiaŋ kpala nu.

Vidioi ni ajieɔ yɛ JW Broadcasting^® lɛ nɔ lɛ ehã mina akɛ, nyɛmimɛi komɛi yɛ ni amɛshihilɛ lɛ tamɔ minɔ lɛ nɔŋŋ, shi amɛyɛ miishɛɛ ni amɛmiisɔmɔ Yehowa pɛpɛɛpɛ. Mi hu miimia mihiɛ fiofio. Shwelɛ ni miyɔɔ akɛ mikɛ mihewalɛ fɛɛ asɔmɔ Yehowa lɛ hewɔ lɛ, mibatsɔ daa gbɛgbalɔ. Yɛ September 2019 lɛ, ahã mile akɛ, awó mi asafoŋ onukpa koni miye mibua ni akwɛ wɔsafo lɛ kɛ emli shiɛlɔi aaafee 40 lɛ anɔ. No mli lɛ, mikpaaa gbɛ kwraa, ni ehã miná miishɛɛ waa.

Miida nyɛmimɛi ni kɛ mi kase nii ni amɛye amɛbua mi koni masɔmɔ Yehowa lɛ shi waa. Nɔ ni fe fɛɛ lɛ, miida Yehowa shi waa akɛ, ehiɛ kpaaa minɔ.