ISTWA A TOUT ON VI
« Jéova pa jen oubliyé-mwen »
AN KA rété o Guiyana, adan on vilaj, non a-y sé Orealla. Sé on vilaj Amérendyen é ni 2000 moun apépré ki ka rété la. Vilaj-lasa lwen é pou ay la, fò ou pran swa on ti bato swa on ti avyon.
An fèt an 1983. Lè an té piti an pa jen té malad, é lè an trapé 10 an an mwen, an koumansé ni doulè an tout kò an mwen. É apépré 2 an plita, an lévé on maten é an pa té pé boujé ankò. An goumé mwen té boujé janm-la men janm-la pa té ni fòs ankò. Dépi jou-lasa, an pa’a maché ankò. Akòz dè maladi-la an ni la, an arété grandi é jous alajouné jòdi an menm hòtè ki on timoun.
Dépi plizyè mwa an pa té pé sòti é lèwgadé, on jou, 2 Témwen pasé vwè-mwen akaz. Dabitid, lèwvwè moun té ka vin akaz an té k’ay kaché. Men jou-lasa, an lésé sé 2 madanm-la palé ban mwen. Konm yo té ka palé-mwen dè paradi-la, sa fè-mwen sonjé sa an té tann lèwvwè an té ni 5 an. An tan-lasa ni on misyonè, non a-y sé Jethro, ki té ka préché adan vilaj an nou on fwa adan mwa-la. I té ka viv o Sirinam é lèwvwè i té ka vin i té ka étidyé Labib èvè pap’an mwen. Jethro té janti èvè mwen. A pa ti enmé an té enmé-y ! Anplisdisa, granpèw an mwen é granmèw an mwen té k’ay réinyon èvè Témwen a Jéova adan vilaj an nou é défwa, yo té ka menné-mwen èvè yo. Kifè, lè Florence, yonn adan sé sè-la, mandé-mwen si an té vé konnèt plis asi Labib, an di-y wi tou natirèlman.
Florence viré vwè-mwen èvè mari a-y Justus, é aprésa, yo toulédé koumansé étidyé Labib èvè mwen. Yo rann-yo kont kè an pa té sa li, kifè, yo aprann-mwen li. É déotwa tan apré, an té ka rivé li tousèl. Men on jou, yo voyé frè-la é madanm a-y préché o Sirinam é malérèzman, pa té ni pondòt moun ki té pé kontinyé étidyé Labib èvè mwen. Men érèzman, Jéova pa jen oubliyé-mwen.
Tibwen tan apré, yo voyé on pyonyé a Orealla. Non a-y sé té Floyd. I té ka préché dè kaz-an-kaz é sé konsa i jwenn-mwen. Lèwvwè i pwopozé-mwen étidyé Labib, an mèt-mwen ka souri. Alò, i mandé-mwen : « Men poukwa ou ka souri konsa ? » An di-y kè an té ja étidyé bwochi-la Ce que Dieu attend de nous é kè an té koumansé liv-la La connaissance qui mène à la vie éternelle *. An èspliké-y poukwa an pa té ka étidyé ankò. Kifè, Floyd étidyé rèstan a liv-la èvè mwen. Men aprésa, li osi, yo voyé-y préché ondòt koté. Mi an pa té ni ponmoun pou étidyé Labib èvè mwen ankò !
Men, an 2004, yo voyé Granville é Joshua, 2 pyonyé èspésyal préché a Orealla. Yo té ka préché dè kaz-an-kaz é yo tonbé asi mwen. Lè yo mandé-mwen si an té vé étidyé Labib, an mèt-mwen ka souri. An mandé-yo si yo té pé woukoumansé liv Connaissance la èvè mwen. Sé moun-la ki té étidyé Labib èvè mwen la té aprann-mwen sèwten biten é an té vé vwè si sé frè-lasa té‘é di-mwen menm biten-la. Granville di-mwen kè yo té ka fè réinyon adan vilaj an nou. Menmsi sa té ka fè 10 an apépré kè an po’o té jen sòti akaz an mwen, a pa ti anvi an té anvi alé ! Alò Granville vin akaz, i mèt-mwen asi on chèz-woulant é i pousé-mwen jous an sal-la.
Kèlkè tan apré, Granville ankourajé-mwen enskri-mwen Lékòl Téokratik. Mi sa i di-mwen : « Sé vré, ou enfim, men ou pé palé. On jou ou ké fè on diskou, ou ké vwè ! Sèten sa ké fèt ! ». Lèwvwè i di-mwen sa, sa ankourajé-mwen é sa ban-mwen bon fòs !
An koumansé préché èvè Granville. Men té ni onlo chimen an tè é yo té tèlman démonté kè pou woulé la èvè chèz-woulant la sé té tout on bab ! Alò an di Granville konsa mèt-mwen adan on bouwèt é bouwé-mwen. É sa maché ! An pran lèbatèm an avril 2005. Tibwen tan apré, sé frè-la montré-mwen kijan mwen té okipé-mwen dè sé piblikasyon-la é kijan mwen té okipé-mwen dè son-la é dè sé mikwo-la an Sal di Wayòm la.
An 2007, pap’an mwen pati an bato é i mò pas élis a motè-la blésé-y. Mésyé ! Nou pa té ka atann-nou a sa ! Granville priyé èvè nou é i pran déotwa vèwsé èvè nou pou konsolé-nou. 2 an apré, nou pasé ondòt penn ankò. Kou-lasa, sé Granville ki mò. I pati an bato é yo touvé kò a-y 2 jou apré !
Tout lasanblé an nou té anpenn. Konnyéla la, pa té ni pon ansyen é té ka rété yenki on asistan. Lè Granville mò, a pa ti lapenn sa fè-mwen ! Sé té bon zig an mwen. I toujou édé-mwen rété zanmi èvè Jéova é lè an té bizwen on biten, i té toujou la pou mwen ! 1é réinyon ki fèt apré mò a Granville, yo ban-mwen li Tou dè Gad la. An koumansé li sé prèmyé paragraf-la byen, men lè an rivé an 3èm paragraf la, dlo koumansé koulé an zyé an mwen é an pa té pé arété. An té oblijé désann asi èstrad-la.
An koumansé woufè kò an mwen, lèwvwè yo voyé déotwa frè a ondòt lasanblé édé-nou. Anplis, Bétèl-la voyé on pyonyé èspésyal, non a-y sé té Kojo. Manman-mwen é tifrè an mwen koumansé étidyé é yo pran lèbatèm. A pa ti kontan, an té kontan ! É an maws 2015, an vin asistan. Kèlkè tan apré, an fè 1é diskou an mwen. Jou-lasa an sonjé sa Granville té di-mwen kèlkè lanné avan : « On jou, ou ké fè on diskou, ou ké vwè ! Sèten sa ké fèt ! » Sa fè-mwen souri é dlo sòti an zyé an mwen, tèlman an té ni rèkonésans pou-y !
Grasa JW Broadcasting®, an vin sav kè ni dòt Témwen ki enfim kon mwen. Men menmsi yo malad, yo ka pòté bon mannèv é tchè a yo kontan ! Alò, an ka di kè mwen osi an pé pòté bon mannèv. An té vé ba Jéova tousa an té pé. Sé pousa an vin pyonyé pèwmanan. É an sèptanm 2019, Jéova fè-mwen on bèl siwpriz. Yo nonmé-mwen ansyen adan lasanblé an mwen ki té ni 40 pwoklamatè.
An ka di sé frè é sè-la ki étidyé èvè mwen la é ki édé-mwen sèvi Jéova, mèsi ! Men 1é moun an ka di mèsi sé Jéova, pas i pa jen oubliyé-mwen !
^ par. 8 Sé sé Témwen a Jéova la ki fè liv Connaissance la, men aprézan, yo pa’a fè-y ankò.
