Mo fèt an 1983. Lò mo té piti, mo té roun timoun byenpòrtan, mé lò mo pran mo 10 an, a pa ti doulò mo koumansé santi annan tout mo kò. Dé lannen apré, roun jou bonmanten mo pa té pouvé boujé mo janm. Menm si mo té ka éséyé boujé yé, mo pa té ka rivé. Dipi sa jou-a, mo pa jen maché ankò. Mo maladi anpéché mo grandi osi. Jòdla, mo kou roun timoun toujou.

Sa té ka fè plizyèr mwa mo pa té pouvé soti di mo kaz lò dé madanm Témwen Jéova vini. Lò moun-yan té ka vini, mo té abitchwé séré mo kò, mé sa jou-a, mo asèpté kouté yé. Kou yé té ka palé di Paradi-a, sa fè mo sonjé sa mo té tandé lò mo té gen 5 an. Sa tan-an, roun misyonèr yé ka aplé Jétro, ki té ka rété Sirinam, té ka vini annan vilaj-a roun fwa chak mwa é té ka étidyé Labib-a ké mo papa. Jétro té janti ké mo. Mo té kontan l’ bokou. Anplis di sa, mo granpapa ké mo granmanman té ka mennen mo annan réinyon Témwen Jéova-ya té ka fè annan nou vilaj. Atò, lò roun annan sa dé madanm-yan, yé té ka aplé Florans, doumandé mo si mo té lé étidyé Labib-a, mo di wi.

Florans rouvini ké so mari, Jistis, é yé koumansé étidyé Labib-a ké mo. Lò yé wè ki mo pa té konnèt li, yé idé mo anprann li. Apré roun ti moman, mo koumansé li mo rounso. Mé roun jou, yé voyé yé préché Sirinam. É i pa té gen pyès moun Oréala ki té pouvé kontinyé étidyé Labib-a ké mo. Mé, Jéova pa bliyé mo.

Roun ti moman apré sa, roun pyonyé, yé ka aplé Flòyd rivé Oréala, vini koté nou lò i té ka préché di kaz an kaz. Lò i doumandé mo pou étidyé Labib-a, mo ari. I doumandé mo poukisa mo té ka ari. Mo di li ki mo té ja étidyé ti liv Ce que Dieu attend de nous ? é mo té koumansé étidyé liv La connaissance qui mène à la vie éternelle *. Mo èspliké li poukisa mo té arété étidyé. Flòyd kontinyé étidyé ké mo larèstan liv Connaissance-a, mé li osi pati préché rounòt koté. Sa kou-a ankò, mo pa té gen pyès moun pou étidyé Labib-a ké mo.

 Mé an 2004, yé voyé dé pyonyé èspésyal, Granvil ké Jochwa, pou préché Oréala. Yé préché di kaz an kaz, é yé trouvé mo. Lò yé doumandé mo si mo té lé étidyé, mo ari. Mo doumandé yé étidyé liv Connaissance-a ké mo dipi koumansman-an. Mo té lé wè si yé té ké anprann mo menm bagaj-ya ki sa-ya ki té étidyé ké mo anvan. Granvil di mo ki yé té ka fè réinyon annan vilaj-a. Magré mo pa té lésé mo kaz dipi près 10 an déja, mo té lé alé. Atò, Granvil vini chaché mo : i mété mo annan roun chèz roulant é i pousé mo jik Sal di Rwayonm-an.

Pita, i ankourajé mo enskri pou L’école du Ministère Théocratique. I di mo : « To andikapé, mé to pouvé palé. Roun jou, to ké bay roun diskour douvan tout moun. Asiré, to ké fè l’ ! » Sa i di mo bay mo plis konfyans.

Mo koumansé préché ké Granvil. Mé chimen annan vilaj-a, a té latè, é roun patché pa té bon pou roulé asou ké roun chèz roulant. Atò, mo doumandé Granvil mété mo annan roun brouwèt é pousé mo toupatou. Sa byen maché. An avril 2005, mo batizé. Apré sa, frè-ya fòrmé mo pou mo okipé di piblikasyon-yan é pou mo okipé di sistèm mikro-ya annan Sal di Rwayonm-an.

Malérèzman, an 2007, mo papa mouri annan roun aksidan bato. Nou fanmi té boulvèrsé. Granvil priyè ké nou é ankourajé nou ké Labib-a. Dé lannen apré, rounòt malò mété nou atè : Granvil mouri annan roun aksidan bato.

Nou piti asanblé, ki té gen chagren, pa té gen ansyen ankò épi rounsèl asistan. Mo té gen bokou lanpenn paské mo zanmi Granvil té mouri. I toujou idé mo divini pi pròch ké Jéova, é i toujou idé mo pou trapé bokou ròt bagaj mo té bézwen. Annan réinyon apré so lanmò, mo té gen pou li Tourdégard-a. Mo rivé li dé prémyé paragraf-ya, mé apré sa, a pa ti pléré mo koumansé pléré san mo pa té pouvé arété. Mo té blijé désann di èstrad-a.

Mo koumansé santi mo kò pi byen lò plizyèr frè di rounòt asanblé vini Oréala pou idé nou. Filyal-a voyé osi Kojo, roun pyonyé èspésyal. Mo té kontan toubonnman, lò mo manman ké roun di mo frè koumansé étidyé é batizé. Apré sa, an Mars 2015, mo divini asistan. Apré roun ti moman, mo bay mo prémyé diskour. Sa jou-a, mo pléré é mo ari an menm tan lò mo sonjé sa Granvil té di mo plizyèr lannen anvan : « Roun jou, to ké bay roun diskour douvan tout moun. Asiré, to ké fè l’ ! »

Gras a Télé JW, mo anprann ki bokou frè ké sò annan menm sitiasyon ké mo. Mé menm si yé andikapé, yé pouvé fè roun patché bagaj, é yé gen tchò kontan. Mo menm osi, mo pouvé fè sèrten bagaj toujou. Mo té lé bay Jéova tousa mo té pouvé, a pou sa mo divini pyonyé pèrmanan. Apré sa, roun bèl bagaj mo pa té ka antann rivé mo. An sèptanm 2019, mo divini ansyen annan nou asanblé, koté i gen 40 proklamatèr !

Mo ka di frè ké sò-ya ki étidyé Labib-a ké mo mèrsi paské yé idé mo sèrvi Jéova. É pi enpòrtan-an, mo ka di Jéova mèrsi paské i pa janmen bliyé mo !