Hanv 1983-ant zolmol’lom. Hanv lhan aslo tednam mhoji bolaiki bori asli. Punn hanv dha vorsancho zalo tednam, mhoji ak’khi kudd sarki dukhonk lagli. Ani dha vorsam uprant, hanv ek dis sokallim uttlo tednam mhojean halonkuch zaunk na. Hanvem mhoje paim halounk zaito proitn kelo, punn mhojean te halounkuch zaunk na. Tea disa thaun aiz meren, mhojean cholonk zaina. Mhojea duensak lagon mhoji kudd anik vaddonk na. Ani aiz mhoji kudd azun-ui eka bhurgea sarki asa.

Hanv duent zalea uprant thoddea mhoineank mhaka ghora thaun bhair soronk mellonaslem. Tea vellar, don Jehovache Sakxi mhaka bhett diunk ailim. Ghora konn soirim ailear hanv chodd korun liptalo. Punn tea disa teo bailo uloitaleo tem aikonk hanv ravlo. Tim Sobit Bhage vixim uloilim tednam, hanv panch vorsancho aslo tea vellar hanvem aikol’lem tem mhojea ugddasak ailem. Tea vellar, Suriname-antlo Jethro nanvacho ek mixinori mhoineak ek pavtti amchea ganvak bhett ditalo ani mhojea bapai sangata Bible obheas kortalo. Jethro mhojea sangata khub doiall toren vagtalo ani mhaka to khub avoddttalo. Tea bhair, mhojim xepai-xemai pasun mhaka amchea ganvant choltolea Sakxeanchea mittingek gheun voitalim. Tor tea disa tea bailam modle eklen, zachem nanv Florence aslem, tinnem mhaka, tuka anik xikonk zai mhunn vicharlem tednam hanvem hoi mhunn zobab dilo.

Florence, aplo ghov Justus-a sangata porot aili ani tim dogaim mhojea sangata Bible obheas korunk laglim. Mhaka vachunk kollona tem polloun, tannim mhaka vachunk xikoilo ani uprant hanv vachunk laglo. Ek dis tannem mhaka tankam Suriname-ant vochon seva korunk dhaddleant mhunn sanglem. Dukhachem mhunnttlear, mhojea sangata Bible obheas korunk Orealla-nt anik konnuch naslo. Punn Jehova mhaka visronk na.

Thoddeach tempa uprant, Floyd nanvacho ek pioneer Orealla-nt ailo. Ani amcheo zhopddeo asleo thoim to porgottunk ailo tednam taka hanv mell’llo. To mhojea lagim Bible obheas gheunchea vixim ulounk laglo tednam, hanv hansonk laglo. Tem polloun, “Tum kiteak hansta?” mhunn tannem vicharlem. Hanvem taka, Dev Amchea Thaun Kitem Magta? hea pustikecho mhozo obheas zal’lo, ani Knowledge That Leads to Everlasting Life hea pustoka thaun mhojea lagim obheas korunk suru kel’lo mhunn sanglem. * Ani mhozo Bible obheas kiteak fuddem vochonk na tem-ui sanglem. Floyd-an mhojea sangata Knowledge pustokacho urlolo bhag  obheas kelo. Punn uprant, taka pasun dusrea eka zagear seva korunk dhaddlolo. Portun mhozo obheas gheunk konn naslo.

Punn 2004-ant, Granville ani Joshua, hea don khas pioneer-ank Orealla-k dhaddle. Te amchea zhopddeam lagim porgott korunk aile tednam, tankam hanv mell’llo. Ani Bible obheas korunk zai kai mhunn tannim mhaka vicharlem tednam, hanv hansonk laglo. Hanvem tankam, Knowledge pustok survatek thaun xikounk sanglem. Mhaka mhojea poilinchea Bible xikoupeamnim xikoilolem tench te xikoitole kai na tachi khatri korunk zai asli. Amchea ganvant atam mittingo choltat mhunn Granville-an sanglem. Hanv sumar dha vorsam mhojea ghora thaun bhair soronk naslo, tori astana mhaka mittingek vochonk zai aslem. Tor Granville mhaka Raj-ghorant vhoronk ailo. Tannem mhaka eka wheelchair-ar ghalun dukhlun vhelo.

Thoddea tempa uprant, Theocratic Ministry School-ant bhag gheunk Granville-an mhaka urba dili. Tannem mhaka mhunnttlem: “Tum opong aslear pasun tujean ulounk zata. Ek dis tum jahir bhaxonn ditolo. Ani oxem zatolench mhunn mhaka khatri asa.” Tachea hea urbebhorit utramnim mhaka ghottai mell’lli.

Hanv Granville-a sangata porgottnnent bhag gheunk laglom. Punn amche ganvche roste voir-sokol aslolean wheelchair vhoronk kotthin zatalem. Taka lagon, hanvem Granville-ak, hatan dukholta toslea eka karttant ghalun mhaka dukhlun vhoronk sanglem. Oxe toren, porgottnnent vochonk boreak poddlem. Abril 2005-ant hanvem bautizm ghetlo. Uprant rokddench, bhavamnim mhaka Raj-ghorant prokaxonam samballunk, toxench sound system samballunk proxikxonn dilem.

Magir, 2007-ant boat-icho accident zaun mhozo bapui melo. Mhojea familintlim soglim khub dukhi zalim. Granville-an mhojea sangata magnnem kelem, ani Bible-antlea versam thaun amkam buzvonn dili. Don vorsam uprant anik ek dukhachi ghoddnni ghoddli. Boat-icho accident zaun Granville melo.

Amchea lhan sobhent soglim dukhi aslim ani sobha samballunk atam ek-ui vhoddil naslo. Fokot ek sobhecho sevok aslo. Mhozo mogacho ixtt Granville melo mhunn hanv khub dukhi zalo. Jehovachea lagim soronk, ani mhojeo her gorzo purnn korunk tannem mhaka zaito adar dil’lo. Tachea mornna uprant, ek dis Raj-ghorant Pahrogopur obheasa vellar mhaka peregraf vachunk asle. Punn don peregraf vachlea uprant hanv roddonk laglom, mhojea dolleantlean dukham vhanvunk laglim ani mhaka manchier thaun denvon ieunchem poddlem.

Orealla-nt amkam modot korunk anik eke sobhe thaun bhav aile tednam mhaka matxe borem disonk laglem. Tea bhair, xakha ofisan Kojo nanvachea eka khas pioneer-ak dhaddlo. Khuxalkaiechem mhunnttlear, mhoji avoi ani dhaktto bhav pasun Bible obheas gheunk laglim, ani uprant tannim bautizm ghetlo. Mars 2015-ant mhaka sobhecho sevok mhunn nemlo. Tea disa mhojea tonddar hanso, ani dolleant dukam bhorlim. Granville-an mhaka zaitea vorsam poilim sanglolem tem mhojea ugddasak ailem: “Ek dis tum jahir bhaxonn ditolo. Ani oxem zatolench mhunn mhaka khatri asa.”

JW Broadcasting^® kariavolle udexim mhojea sarkea poristhitint aslolea bhav-bhoinnam vixim hanv zannam zaunk pavlom. Tim opong aslear pasun khuxalkaien zaitem kortat. Tor hanv pasun thoddeo vostu korunk xokta mhunn mhaka urba mell’lli. Mhojea lagim asa tem soglem mhaka Jehovak diunk zai aslem dekhun hanvem niemit pioneer seva suru keli. Ani Setembr 2019-ant hanvem chintunk naslolem tem zalem! 40 porgottnnaranchea amchea sobhent mhaka vhoddil mhunn seva korcho sueog mell’llo.

Mhojea sangata Bible obheas korunk ani Jehovachi seva korunk adar dilolea mhojea mogachea bhav-bhoinnancho hanv khub upkari asa. Punn sogleam-von chodd, Jehova mhaka visronk na dekhun hanv tacho khub upkari.