Anase vaʼekue 1983-pe. Chemitãʼípe cheresãi vaʼekue, péro arekórõ guare 10 áño oñepyrũ hasypaite chéve che rete kompletoite. Ha oiméne 2 áño haguépe, peteĩ pyhareve apáy ha ndaikatuvéima akuʼe. Añehaʼãmbaitéramo jepe amonguʼe che retyma, ikangypaite chehegui ha ndokuʼevéi. Ha upe día guive ndaikatuvéima aguata. Che mbaʼasy káusare ndaikatuvéi avei akakuaa. Upévare koʼag̃aite peve chemichĩ peteĩ mitãicha.

Unos kuánto mése cherasykatu rire ha ndaikatuvéi rire asẽ che rógagui, mokõi testígo de Jehová chevisita. Che ningo akañými vaʼekue og̃uahẽ jave visíta ógape, péro upe díape ahejánte oñeʼẽ chéve umi kuñakarai. Omombeʼúrõ guare chéve oĩtaha peteĩ paraíso, chemanduʼa pe ahendu vaʼekuére arekórõ guare 5 áñorupi. Upe tiémpope, peteĩ misionéro hérava Jethro oikóva Surinámpe oúmi vaʼekue ovisita ore komunida una ves al mes, ha ostudia vaʼekue la Biblia che túandi. Jethro ningo ikalidaiterei vaʼekue chendive, ha che ahayhueterei chupe. Avei che avuelokuéra oho vaʼekue umi rreunión ojapóvape umi Testígo ore komunidápe, ha sapyʼánte cheguerahámi vaʼerã hendivekuéra. Upévare Florence, peteĩva umi kuñakarai ou vaʼekue chevisita upe díape, oporandúrõ guare chéve aikuaasevépa la Biblia heʼíva, haʼe chupe si aikuaaseha.

Upéi Florence ou jey iména Justus ndive, ha oñepyrũ hikuái ostudia la Biblia chendive. Haʼekuéra ohechakuaárõ guare che ndaleekuaaiha, chemboʼe aleekuaa hag̃ua. Ha upe riremínte aleekuaáma cheaño. Peteĩ díape, haʼekuéra heʼi chéve oñeasigna hague chupekuéra oservi hag̃ua Surinámpe. Ambyasyeterei ningo ndaipóri rupi Oreállape peteĩ osegi vaʼerã chembostudia la Biblia. Péro avyʼaiterei Jehová ndahesaráiri hague chehegui.

Upe riremínte, peteĩ prekursór hérava Floyd og̃uahẽ Oreállape, ha otopa cherehe opredika jave oikóvo ore komunidápe. Heʼírõ guare chéve ndastudiaséipa la Biblia, che apukavy, ha haʼe oporandu chéve mbaʼérepa apuka. Upépe amombeʼu chupe astudiáma hague voi pe folléto Mbaʼépa ojerure Ñandejára ñandehegui? ha añepyrũ hague astudia pe lívro El conocimiento que lleva a vida eterna. * Ha amombeʼu chupe mbaʼérepa ndastudiavéi. Floyd ostudiapa chendive pe lívro Conocimiento, péro upéi oñeasigna avei chupe ótro lugárpe. Ha che ndarekovéi jeýma mávandipa asegíta astudia la Biblia.

 Péro áño 2004-pe oñeasigna mokõi prekursór espesiálpe Oreállape hérava Granville ha Joshua. Haʼekuéra opredika kuri oikóvo ore komunidápe ha otopa cherehe. Haʼekuéra oporandúrõ guare chéve ndastudiaséipa la Biblia, che apukavy. Che ajerure chupekuéra ostudia hag̃ua chendive pe lívro Conocimiento iñepyrũ guive. Aikuaasénte kuri chemboʼétapa hikuái la mísma kósa umi ótro chemboʼéma vaʼekue voi. Granville heʼi chéve ojejapoha hína umi rreunión ore komunidápe. Ha ojapómaramo jepe 10 áño nasẽvéi hague che rógagui, ahase kuri pe rreuniónpe. Upémarõ Granville ou che rógape, chemoĩ peteĩ sílla de rruédape ha chegueraha Salón del Réinope.

Tiémpo rire, Granville chemokyreʼỹ añanota hag̃ua pe Eskuéla del Ministério Teokrátikope. Haʼe heʼi chéve: “Nde ningo ndaikatúi reguata, péro ikatu reñeʼẽ. Ág̃a peteĩ díapente remeʼẽta peteĩ diskúrso púvliko. Ág̃ante rehecháta”. Umi mbaʼe heʼíva chemokyreʼỹ ha chepytyvõ ajeroviave hag̃ua chejehe.

Upéi añepyrũ apredika Granville ndive. Péro, heta umi kálle oĩva ore komunidápe ivaieterei peteĩ sílla de rruédape g̃uarã. Upémarõ ajerure Granvíllepe chemoĩ hag̃ua peteĩ karretíllape ha chegueraha. Upéva oikoite kuri. Upéi abril 2005-pe ajevautisa. Upe riremínte, umi ermáno chemboʼe ambaʼapo hag̃ua literatúrape kongregasiónpe, ha añatende hag̃ua sonídore Salónpe.

Rombyasyeterei ningo áño 2007-pe omano haguére che túa oreko rupi peteĩ aksidénte kanóape. Ore família ningo yvýre opyta. Granville oñemboʼe orendive ha olee oréve unos kuánto téxto bíblico orekonsola hag̃ua. Upéi ohasa rire 2 áño, tuichaiterei mbaʼe jey la oikóva orerehe, Granville anga omano avei oreko rupi peteĩ aksidénte kanóape.

Ore kongregasión michĩmíva opyta oñembyasyeterei ha ropyta voi ansianoʼỹre, peteĩ siérvo ministeriálnte opyta. Che ningo añeñandu vaieterei omano haguére che amígo ahayhuetéva Granville. Haʼéngo siémpre chepytyvõ vaʼekue añemoag̃ui hag̃ua Jehováre ha akonsegi hag̃ua heta mbaʼe aikotevẽva. Pe sigiénte rreunión roreko vaʼekuépe haʼe omano rire, otoka chéve alee rrevísta Ñemañaha pe estúdio aja. Oiménengo alee raʼe mokõi párrafo, ha upéi añepyrũ cherasẽ. Pe che resay ningo osegínte voi osyry, upévare aguejýmante pe platafórmagui.

Che añeñandu porã umi ermáno ótra kongregasiongua ou rire orepytyvõ Oreállape. Avei pe sukursál ombou peteĩ prekursór espesiál héravape Kojo. Avyʼaiterei ningo avei che sy ha peteĩ che ermáno imitãvéva oñepyrũrõ guare ostudia ha ojevautisa. Upéi marzo de 2015-pe, añenombra siérvo ministeriál, ha upe riremínte ajapo che primer diskúrso púvliko. Upe díape apuka ha cherasẽ avei chemanduʼávo Granville heʼi vaʼekuére chéve unos kuánto áño upe mboyve: “Ág̃a peteĩ díapente remeʼẽta peteĩ diskúrso púvliko. Ág̃ante rehecháta”.

Umi prográma oĩva rupive JW Broadcástingpe, aikuaa oĩha avei umi ermáno orekóva umi provléma che arekovaichagua. Ha hasykatúramo jepe hikuái, ikatu ojapo heta mbaʼe ha oiko vyʼápe. Che ikatu gueteri avei ajapo heta mbaʼe. Che ningo aipuruse Jehová servísiope che mbaretekue hembymíva guive chéve, upévare añepyrũ ajapo che prekursorádo rregulár. Ha septiembre 2019-pe arresivi peteĩ notísia porã nahaʼarõietéva voi. Upe méspe añenombra aservi hag̃ua ansiánoramo ore kongregasión orekóvape 40 puvlikadór rupi.

Aagradeseterei ningo umi ermáno ha ermána ostudia vaʼekuépe chendive la Biblia, ha chepytyvõ vaʼekue aservi hag̃ua Jehovápe. Ha koʼytevéntema aagradese Jehovápe che pyʼaite guive ndahesaráiri haguére chehegui.