Naburhwaga omu mwaka gwa 1983. Omu myaka ntanzi-ntanzi y’akalamo kani, naliri mwana ogwerhe amagala menja. Aliko nagerere mu myaka 10, omubiri gwani gwahwanza kuluma. Hagerere nka myaka ebiri ntya, lusiku luguma nazuka, ntanachigalaga kulambagira. Ntako ntahinya-hinyaga amagulu mani, aliko wapi, nta misi yalichilimo. Kurhenga olola lusiku, ntachilambagiraga chiro n’akatyu. Obola bulwala bwani bwanarhuma naba lugarha. Kugera zene, inchili nka mwana mudorho.

Nabaga namalire myezi migeke eyi ntali narhenga omu nju amango Bahamirizi babiri ba Yehova bandambagiriraga. Nakazaga zigana kuchibisha amango abantu balemaga bayinja kundola, aliko lero olola lusiku naganira n’abola bakazi. Babere bali bashambala eju ye Paradizo, nayibuka ebintu nayunvaga amango naligwerhe nka myaka erhano ntya. Mw’amola mango, misiyonere muguma waliyirikirwe Jethro, walilamire omu chihugo che Suriname, ayinjaga alambagirira olugo lwerhu liguma omu mwezi, anayigiriza darha Ebiblia. Jethro aliri anyereka olukogo. Nalimusimire bwenene. Kandi, shokulu na mugaka bakazaga kumpeka oku mbuganano z’Abahamirizi zakazaga kujirika omu lugo lwerhu. Bobola Florence, mukazi muguma mw’abola bakazi bandambagiriraga mu olola lusiku, ambazize akaba nshondere kumenya binene, nayemera.

Florence agaluka n’eba waliyirikirwe, Justus, nahwanza kuyiga Ebiblia haguma nabo. Amango bamenya oku ntaliyinji kusoma, banyigiriza kusoma. Hagerere esiku nahwanza kuchisomera nyinine. Lusiku luguma, oyola mulume na mukage bambwira oku babarhumire kukolera omu chihugo che Suriname. Ech’okugayisa kuli kubona oku nta muntu walichiliri omu Orealla wakagenderere kunyigiriza Ebiblia. Aliko echisimize, kuli kubona oku Yehova arhanyibagiraga.

Hagerere esiku, painiya muguma waliyirikirwe Floyd ahika omu Orealla, ananshimana amango aliri ahubiri nju oku nju. Ambwirire eju y’okuyiga Ebiblia, nasheka. Ambaza, “bichi oli washekera?” Namubwira oku nabaga nayigire akatabu Mungu Anataka Tufanye Nini? n’oku nabaga nahwanzi kuyiga echitabu Ujuzi Uongozao Kwenye Uhai Udumuo Milele. * Namubalira echarhumaga efunzo lyani lyayumanga. Floyd anyiriza esura z’echitabu Ujuzi zabaga zayorhere, aliko naye ayinja kuhabwa  engabane y’okukolera omu yindi eneo. Kandi nashuba kubera buzira mwalimu we Biblia.

Omu mwaka gwa 2004, Granville na Joshua, bapainiya babiri baminuzize, barhumwa omu Orealla. Bambuganaga amango bayinjaga bahubiri nju oku nju. Bambazize akaba nsimire kuyiga Ebiblia, nasheka. Nababwira banyigirize echitabu Ujuzi kuhwanziza oku murhondero. Nalilonzeze kulola akaba nabo banyigiriza ebintu bili nk’eby’abalimu bani b’embere banyigirizaga. Granville ambwira oku hali embuganano zijirika omu lugo. Chiro akaba oku nabaga namamala nka myaka 10 ntya burharhenga ahambuga, nasima ngere oku mbuganano. Granville av’ayinja kuntola ahambuga, ampira omu kinga lyani ly’ebilema anshunika kugera oku Chumbi ly’Obwami.

Hagerere esiku, Granville ampira omurhima nani nchiyandikise oku Masomo me Chiteokrasi. Aderha ntya: “Oli chilema, aliko wakaderha. Lusiku luguma, nji wageza ejambo. Kweri nji byaba ntyo.” Ebyola binwa byampira omurhima bwenene.

Nahwanza kuja omu kasi k’okuhubiri haguma na Granville. Aliko mabarabara manene m’omu lugo lwerhu malibihire bwenene, n’ekinga ly’ebilema lirhakagalire kugeramo. Nava nabwira Granville ampire omu mburuweti n’okunshunika. Okujira ntyo kwalintabere bwenene. Omu Mwezi gwa 4, 2005, nabatizwa. Hagerere siku zigeke, bene-berhu bankomeza omu kukola oku bitabu by’echibaga n’okukola oku bintu by’okuyongeza omulenge omu Chumbi ly’Obwami.

Lero ech’okugayisa bwenene, omu mwaka gwa 2007 darha azika omu bote. Omulala gwerhu gwagaya bwenene. Granville asalira haguma nerhu n’okurhusomera amandiko me Biblia m’okurhuheba omurhima. Hagerere myaka ebiri, obwindi buhanya bubi bwenene bwarhugerera; Granville naye azika omu bote.

Echibaga cherhu chigeke chigwerhe mugayo gunene eju y’emishibo, chaja chabera buzira mushamuka, na mugwasi w’akasi muguma. Olufu lwa Granville lwalindumire oku murhima bwenene; aliri mwira mwinja. Buli mango aliri antabala nyegere Yehova bwenene, n’okuntabala mpate bintu binene by’omubiri nalikenere. Embuganano yakulikiraga olufu lwage, nyenaliri nasoma ebifungo amango m’enyigirizo z’Omuna g’Omulanzi. Nasoma bifungo bibiri by’oburhanzi, enyuma y’aho nahwanza kulaka bwenene n’okushesha emiziga. Nava narhenga oku estrade.

Nahwanza kuchiyunva bwinja amango bene-berhu kurhenga omu chindi chibaga bayinjaga kurhurhabala omu Orealla. Kandi ebiro by’omurhabi byarhuma painiya muguma ominuzize waliyirikirwe Kojo. Nasima amango mama na mwene-werhu mudorho bahwanza kuyiga Ebiblia banabatizwa. Omu Mwezi gwa 3, 2015, naba mugwasi w’akasi. Harhalegamaga, nageza ejambo lyani lya burhanzi. Olola lusiku nawaza bwenene, nanarhoza emiziga y’obusime amango nyibuka ebila binwa Granville ambwiraga, habaga hamagera emyaka: “Lusiku luguma, nji wageza ejambo. Kweri nji byaba ntyo.”

Kugerera eprograme ya JW Télédiffusion, namenyere bene-berhu nabo bali omu hali eli nk’eyani. Aliko chiro akaba ntyo, bali bagala kukola bintu binene, banagwerhe obusime. Nani nakanachikola bintu bilebe. Nalilonzeze kujira okwani koshi ngalire omu kasi ka Yehova, che charhumaga narhondera obupainiya b’oku kahunda. Kandi kweri nayunva emyazi ntalilangalire omu Mwezi gwa 9, 2019! Mw’ogola mwezi, nayunva oku nkala ndi mushamuka omu chibaga chili mu bahubiri 40 ntya.

Mbwirire bene-berhu na bali-berhu koko, okubona banyigirizaga n’okuntabala nkolere Yehova. N’echikulu mu byoshi, mbwirire Yehova koko bwenene okubona arhanyibiriraga.