Natawo ako sang 1983. Sang bata pa ako, wala ako sing ginabatyag sa akon lawas. Pero sang dies anyos ako, nakabatyag ako sang grabe nga pagpalanakit sa akon bilog nga lawas. Pagligad sang mga duha ka tuig, indi na ako makahulag pagbugtaw ko. Ginapilit ko nga pahulagon ang akon mga tiil pero indi ko na ini mahulag. Sugod sadto nga adlaw, indi na gid ako makalakat. Bangod sang akon balatian, wala man ako magtaas. Daw bata lang ako gihapon kadaku asta subong.

Pagligad sang pila ka bulan nga ara lang ako sa amon balay, may nagkadto sa amon nga duha ka babayi nga mga Saksi ni Jehova. Nagapanago ako kon may magkadto sa amon balay. Pero sadto nga tion, gin-istorya ko sila. Samtang ginasugid nila ang parte sa Paraiso, nadumduman ko ang nabatian ko sang una sang mga lima ka tuig pa lang ako. Nagakadto sadto sa amon baryo ang isa ka misyonero nga si Jethro nga taga-Suriname. Nagakadto sia sa amon kada bulan para tudluan sang Biblia si Tatay. Nanamian gid ako sa iya kay mabuot sia sa akon. Kon kaisa, ginadala man ako ni Lolo kag ni Lola sa mga miting sang mga Saksi nga ginahiwat sa amon baryo. Gani sang ginpamangkot ako ni Florence nga isa sa mga babayi nga nagkadto sa balay kon gusto ko magtuon sang Biblia, nagsugot ako.

Nagbalik si Florence upod ang iya bana nga si Justus, kag gintudluan nila ako sang Biblia. Natalupangdan nila nga indi ako kabalo magbasa, gani gintudluan nila ako magbasa. Sang ulihi, kabalo na ako magbasa. Isa ka adlaw ginsilingan nila ako nga iasayn na sila sa Suriname. Nasubuan ako kay wala na sing magatudlo sa akon sa Biblia sa Orealla. Pero nalipay ako kay wala gid ako ginkalimtan ni Jehova.

Wala magdugay, nag-abot sa Orealla ang isa ka payunir nga si Floyd. Naistorya niya ako sang nagpamalaybalay sia. Sang ginaistorya niya ako parte sa pagtuon sang Biblia, nagyuhum ako. “Ngaa nagyuhum ka?” pamangkot niya. Ginsilingan ko sia nga natapos ko na ang pagtuon sa brosyur nga Ano ang Ginapatuman sang Dios sa Aton? kag naumpisahan ko na ang pagtuon sa libro nga Ang Ihibalo nga Nagadul-ong sa Kabuhi nga Walay Katapusan. * Ginpaathag ko sa iya kon ngaa nauntat ang akon pagtuon. Ginpadayon ni Floyd ang pagtuon sang Biblia sa akon. Natapos namon ang pagtuon sa Ihibalo nga libro, pero gin-asayn man sia sa iban nga lugar. Wala na liwat sing magatudlo sang Biblia sa akon.

Pero sang 2004, duha ka espesyal payunir nga sanday Granville kag Joshua ang gin-asayn sa Orealla. Sang nagpamalaybalay sila, naistorya nila  ako. Sang ginpamangkot nila ako kon gusto ko magtuon sang Biblia, nagyuhum ako. Ginpangabay ko sila nga tun-an namon ang Ihibalo nga libro halin sa umpisa. Gusto ko mabal-an kon bala ang ila itudlo sa akon pareho gid sa mga natun-an ko sa mga una nga nagtudlo sa akon. Ginsilingan ako ni Granville nga may mga miting nga ginahiwat sa amon baryo. Halos napulo ka tuig na nga wala ako makagua sa balay, pero gusto ko gid magtambong. Gani ginsugat ako ni Granville kag gintulod niya ang akon wheelchair pakadto sa Kingdom Hall.

Sang ulihi, ginpalig-on ako ni Granville nga magpalista para sa Teokratikong Eskwelahan Para sa Ministeryo. Nagsiling sia: “Bisan indi ka makatindog, wala man diperensia ang imo paghambal. Maabot ang tion nga magapamulongpulong ka sa kongregasyon. Sigurado ako nga masarangan mo ina.” Napalig-on gid ako sa iya ginsiling.

Sang ulihi, nag-upod na ako kay Granville sa pagbantala. Pero batsihon ang kalabanan nga dalan sa baryo, gani mabudlay mag-wheelchair. Gani ginpangabay ko si Granville nga wheelbarrow na lang ang amon gamiton. Mas mahapos ini itulod sangsa wheelchair. Nabawtismuhan ako sang Abril 2005. Wala magdugay, ginhanas ako sang mga brother kon paano atipanon ang mga literatura sa kongregasyon kag kon paano mag-operate sang sound system sang Kingdom Hall.

Sang 2007, nahulog si Tatay sa sakayan kag grabe ang iya pilas. Napatay sia pagligad sang pila ka adlaw. Daw indi mabaton sang amon pamilya ang natabo. Ginbisitahan kami ni Granville. Dayon nangamuyo sia kag nagbasa sang makapaumpaw nga mga teksto sa Biblia. Pagligad sang duha ka tuig, isa naman ka trahedya ang natabo. Nalunod ang ginasakyan ni Granville kag napatay sia.

Grabe gid ang kasubo sang amon gamay nga kongregasyon. Wala na kami sing gulang kag isa na lang ka ministeryal nga alagad. Suod ko nga abyan si Granville, gani nasubuan gid ako. Ara gid sia pirme para buligan ako nga mangin suod kay Jehova kag para asikasuhon ang akon mga kinahanglanon. Sa amon pinakauna nga miting pagkatapos sang natabo kay Granville, ako ang nakaasayn nga magbasa sang mga parapo sa Pagtinuon sa Ang Lalantawan. Asta lang sa parapo dos ang akon nabasa kay naghibi na lang ako kag indi ko na mapunggan ang akon mga luha. Gani nagpanaug ako sa stage.

Medyo naumpawan ang akon kasubo sang may nag-abot nga mga brother halin sa iban nga kongregasyon para buligan kami sa Orealla. Gin-asayn man sang branch office sa amon kongregasyon si Kojo nga isa ka espesyal payunir. Nalipay gid ako kay nagtuon man sang Biblia si Nanay kag ang akon manghod nga lalaki, kag nabawtismuhan sila. Dayon sang Marso 2015, gintangdo ako bilang ministeryal nga alagad. Sang ulihi, nagpamulongpulong ako sa kongregasyon sa pinakauna nga tion. Sadto nga adlaw, nadumduman ko ang ginsiling sa akon ni Granville pila ka tuig na ang nagligad. “Maabot ang tion nga magapamulongpulong ka sa kongregasyon. Sigurado ako nga masarangan mo ina.” Nagayuhum ako kag nagatulo ang akon mga luha tungod sa kalipay sang ginadumdom ko ini.

Paagi sa mga programa sa JW Broadcasting^®, nakita ko ang mga kauturan nga pareho man sa akon ang sitwasyon. Pero bisan pa may mga kasablagan sila, madamo sila sing ginahimo sa ila pag-alagad kag malipayon gihapon sila. Gani nahunahuna ko nga madamo pa man ako sang puede himuon. Gusto ko gid nga alagaron si Jehova sa bug-os ko nga masarangan, gani nagregular payunir ako. Kag sang Septiembre 2019, isa pa gid ka pagpakamaayo ang nabaton ko. Gintangdo ako bilang gulang sa amon kongregasyon nga mga 40 ang manugbantala.

Nagapasalamat gid ako sa mga kauturan nga nagtudlo sang Biblia sa akon kag nagbulig sa akon nga makabantala. Labaw sa tanan, nagapasalamat gid ako kay Jehova kay wala niya ako ginkalimtan.