Kuv yug rau xyoo 1983. Thaum kuv tseem yau kuv kuj tsis muaj mob dabtsi tiamsis thaum kuv muaj 10 xyoo kuv txawm pib hnov mob mob thoob ib ce. Ob xyoos tom qab, muaj ib tagkis kuv cia li nti tsis taus li lawm. Kuv ua npaum li cas los kuv ob phab ceg yeej tsis muaj zog. Txij thaum ntawd los ces kuv yeej mus tsis taus kev li lawm. Kuv tus mob kuj ua rau kuv tsis loj hlob ntxiv. Niaj hnub no, kuv tseem luaj li ib tug menyuam yaus xwb.

Ob peb lub hlis uas kuv mob thiab mus tsis taus qhovtwg, 2 tug pojniam uas yog Yehauvas Cov Timkhawv tuaj xyuas kuv. Kuv niaj zaus nkaum, tiamsis zaum no kuv ho nrog nkawd tham. Thaum nkawd tham txog lub Vaj Kaj Siab ua rau kuv nco txog thaum kuv muaj 5 xyoos es tus tshaj tawm txawv tebchaws hu ua Yethoos nyob tebchaws Xawlina (Suriname) tuaj xyuas peb. Nws tuaj xyuas peb lub zos ib hlis ib zaug thiab qhia Vajlugkub rau kuv txiv. Yethoos ua zoo heev rau kuv thiab kuv nyiam nws heev. Thaum kuv yawg mus koom Yehauvas Cov Timkhawv tej kev sib txoos hauv peb lub zos los muaj tej thaud nws kuj coj kuv nrog nws mus thiab. Ces thaum Falau-ees (Florence) uas yog ob tug pojniam ntawd ib tug, nug seb kuv puas xav kawm, kuv teb tias kuv xav kawg.

Falau-ees coj nws tus txiv Ntsaxitees (Justus) nrog nws rov qab tuaj qhia Vajlugkub rau kuv. Nkawd qhia kuv nyeem ntawv. Ib ntus tom qab ces kuv nyeem tau kuv lawm. Muaj ib hnub nkawd hais rau kuv tias nkawd raug xa mus tshaj tawm rau tebchaws Xawlina lawm. Tu siab kawg uas thaum nkawd mus lawm tsis muaj leejtwg qhia Vajlugkub rau kuv. Tiamsis kuv zoo siab heev uas Yehauvas nco ntsoov kuv.

Tsis ntev tom qab ntawd ib tug kwvtij tuaj txog ntawm peb lub zos. Nws tuaj nrhiav tau kuv thaum nws mus tshaj tawm ib lub tsev rau ib lub. Nws nug seb kuv puas xav kawm Vajlugkub ces kuv luag ntxhi rau nws. Nws nug kuv hais tias kuv luag ua dabtsi. Kuv qhia rau nws tias kuv twb kawm tag phau Vajtswv Xav Kom Peb Yuav Tsum Ua Dabtsi? Thiab kuv twb pib kawm ib phau ntxiv lawm (Knowledge That Leads to Everlasting Life). * Kuv qhia rau nws tias yog vim li cas kuv thiaj tsis kawm lawm. Nws thiaj qhia kom tag phau ntawv ntawd nrog kuv. Tiamsis nws kuj raug xa mus rau lwm qhov lawm thiab. Ces rov tsis muaj neeg qhia Vajlugkub rau kuv dua.

 Xyoo 2004, Nkaviv (Granville) thiab Yausuas uas yog 2 tug tho kev tshwj xeeb raug xa tuaj tshaj tawm hauv peb lub zos. Nkawd tuaj nrhiav tau kuv thaum nkawd mus tshaj tawm ib lub tsev rau ib lub. Nkawd nug seb kuv puas xav kawm Vajlugkub ces kuv hais luag ntxhi rau nkawd tias nkawd puas kam kawm phau uas tus kwvtij ua ntej kawm nrog kuv. Kuv xav paub seb nkawd puas qhia ib yam nkaus li cov uas qhia kuv ua ntej. Kuv thiaj nug seb nkawd puas kam qhia phau no pib pem hauv paus tuaj. Nkaviv hais rau kuv tias yuav muaj kev sib txoos hauv peb lub zos seb kuv puas mus. Kuv yeej tsis tau tawm rooj tau 10 lub xyoos tiamsis kuv xav mus kev sib txoos. Nkaviv thiaj coj ib lub laub tuaj tos kuv thiab thawb kuv mus Tsev Nceeg Vaj.

Tom qab ntawd Nkaviv txhawb kom kuv rau npe rau txoj Kev Kawm Tshaj Tawm. Nws hais rau kuv tias: “Koj mus tsis taus kev tiamsis koj hais tau lus. Muaj ib hnub twg koj yeej yuav tau cev lus qhuab qhia saum sam thiaj xwb xwb!” Nws cov lus txhawb kuv zog kawg.

Kuv pib mus tshaj tawm nrog Nkaviv. Tiamsis cov kev av hauv peb lub zos tsis tus thiab thawv thawv tsis zoo thawb lub laub. Kuv thiaj kom Nkaviv siv lub laub uas muaj ib lub log xwb thawb kuv. Qhov no pab tau wb kawg. Lub 4 Hlis xyoo 2005 kuv ua kevcai raus dej. Tsis ntev tom qab ntawd, cov kwvtij qhia kom kuv paub saib xyuas cov ntaub ntawv thiab cov twj tso suab hauv lub Tsev Nceeg Vaj.

Tiamsis tu siab kawg, xyoo 2007 kuv txiv mus caij nkoj muaj xwm txheej ua rau nws tas sim neej lawm. Qhov no ua rau peb nyuaj siab kawg. Nkaviv thov Vajtswv nrog peb thiab muab Vajtswv Txojlus los nplig peb siab. Ob xyoos tom qab xwb Nkaviv mus caij nkoj ces ho muaj xwm txheej ua rau nws tas sim neej lawm thiab. Qhov no ua rau peb sawvdaws rov qab nyuaj siab dua ib tom.

Zaum no, peb lub menyuam koom txoos tsis muaj txwj laus lawm, peb tsuas muaj ib tug tub leg num xwb. Kuv tu siab kawg rau qhov Nkaviv yog kuv tus phoojywg zoo. Nws pab kuv muaj kev sib raug zoo nrog Yehauvas thiab pab kuv ntau yam uas kuv cheem tsum. Thaum kuv nyeem Phau Tsom Faj Rau Lub Koom Txoos kuv tsuas nyeem tau thawj ob nqi xwb, kuv txawm los kua muag heev ua rau kuv nyeem tsis taus ntxiv lawm. Kuv thiaj nqis saum lub sam thiaj.

Kuv zoo siab heev thaum muaj cov kwvtij tuaj lwm lub koom txoos tuaj pab peb hauv Auliala. Peb ceg Npe-ee kuj xa kwvtij Khaus Ntsaus (Kojo) uas yog ib tug tho kev tshwj xeeb tuaj pab peb. Kuv kuj zoo siab heev thaum kuv niam thiab kuv tus kwv kawm Vajlugkub thiab ua kevcai raus dej. Lub 3 Hlis xyoo 2015, kuv tau ua ib tug tub leg num. Ib ntus tom qab ntawd, kuv cev kuv thawj zaj lus qhuab qhia. Hnub ntawd kuv zoo siab heev thiab los kua muag thaum kuv xav txog Nkaviv cov lus no: “Muaj ib hnub twg koj yeej yuav tau cev lus qhuab qhia saum sam thiaj xwb xwb!”

Yehauvas Cov Timkhawv Tshooj TV pab kuv paub txog lwm cov kwvtij nkauj muam uas zoo ib yam li kuv. Txawm lawv nyias muaj nyias ib tug mob los lawv yeej ua tau ntau yam thiab muaj kev zoo siab. Kuv xav ua npaum li kuv ua tau rau Yehauvas kuv thiaj li ua ib tug tho kev. Lub 9 Hlis xyoo 2019, kuv tau ua ib tug txwj laus hauv peb lub koom txoos uas muaj li 40 tus tshaj tawm. Qhov nov ua rau kuv xav tsis thoob li!

Kuv ua tsaug rau cov kwvtij nkauj muam uas qhia Vajlugkub rau kuv thiab pab kuv los teev tiam Yehauvas. Tiamsis qhov uas kuv zoo siab tshaj plaws yog qhov uas Yehauvas nco ntsoov kuv.