Ich sin im yoer 1983 uf te welt khom. In te eyerste yoore fon mayn leepe, waar ich een kesuntne puup. Awer, wii ich 10 yoer alt waar, hon ich aan kefang xroo phayn in mayn kanse khërper xpiire. Unkefeer tswaay yoore xpeeter, sin ich moynts frii wach kep un khont ich mich net mee weekele. Een tuun wii fiil aanxtrengung hon ich kemacht, ich khont net mee mayn peen weekele. Fon tiise taach am foran, hon ich net mee laafe kriit. Weeche tiise krankheet, hon ich noo kelos se wakse. Hayt, sin ich noch kleen wii een khint.

Phaar moonate noo tas ich krank kep sin un khont net mee ausm mayn haus keen, hon tswaay Yeehoowa sayn Tsayer mich pesuucht. Wën yemant mich pesuuche khom is, ti meyerst tsayt hon ich mich ferxtekelt. Awer in tiise taach, hon ich tii fraae mit mich xpreche kelos. Wii se iwer tas paratiis kexprooch hon, hon ich mich erinert iwer was ich keheert hat wii ich 5 yoer alt waar. In tiise tsayt, Jethro, een misyoneer woo in Suriname keleept hot, hot unser pikaat een mool te moonat pesuucht un ti Piipel mit mayn papa xtutiirt. Jethro hot mich soo kuut pehantelt! Ich hat tëm iwer kërn! Un aach, mayn krooseltere hon mich fer welche fersamlunge fon te Yeehoowa sayn Tsayer kenom, woo waare in unser pikaat kehal. Tan, wii Florence, eene fon te fraae woo in tiise taach mich pesuucht hon, mich kefroot hot ep ich teet kërn mee lërne, hon ich “Yaa!” kesaat.

Florence is mit sayn man, Justus, tsurik khom, un mitsamer hon se aan kefang ti Piipel mit mich xtutiire. Wën se kemërkt hon tas ich wust net leese, hon se mich leese kelërnt. Noo een tsayt, khont ich xon aleen leese. Eene taach, te pheyerche hot mich kesaat tas tii waare kexikt fer in Suriname se preetiche. Es is traurich, awer, es waar nimant aneres in Orealla woo khont wayter ti Piipel mit mich xtutiire. Awer wii kuut tas Yeehoowa hot mich net ferkes.

Klaych tëm noo, een pyoneer woo Floyd keheest hot, is pis Orealla khom. Tee hot mich ketrof wii eyer holshaus tsu holshaus am preetiche waar. Wii eyer kexprooch hot iwer ti Piipel xtutiire, hon ich kelacht. “Warom pist tuu am lache?” — hot eyer mich kefroot. Ich hon iim kesaat tas ich hat xon tas piichelche O Que Deus Requer de Nós? xtutiirt, un hat xon aan kefang tas xtuutyum fom puuch Conhecimento Que Conduz à Vida Eterna. * Ich hon iim aus keleet warom hat ich noo kelos se xtutiire. Floyd hot mit mich xtutiirt was fom puuch Conhecimento  kefeelt hat. Awer tan, waar tee aach kexikt fer in een anere plats tiine. Noch mool, hat ich khee Piipel leerer kehat.

Awer, im yoer 2004, Granville un Joshua, tswaay spetsyaale pyoneere, waare tsu Orealla kexikt. Tii hon fon holshaus tsu holshaus kepreeticht un hon mich kefun. Wën se kefroot hon ep ich wolt ti Piipel xtutiire, hon ich kelacht. Ich hon tëne ferlangt fer tas puuch Conhecimento mit mich fon aanfang aan xtutiire. Ich wolt siin ep tii teete mich ti selwiche tinge in lërne woo mayn friier leerer mich in kelërnt hate. Granville hot mich kesaat tas es waare fersamlunge in te pikaat kehal. Opwool es waare xon neekst 10 yoer woo ich sin net ausm haus kang, wolt ich keen. Tan, Granville is in mayn haus khom, hot mich in een raatxtul kesetst un hot mich pis tëm Raych Saal kexupt.

Xpeeter, Granville hot mich uf kemuut fer teel fon te Teokratix Ministeryaal Xuul mache. Tee hot mich kesaat: “Tuu khanst net laafe, awer tuu khanst xpreche. Eene taach tuust tuu een puuplix reet mache. Es tuut sicher pasiire!” Sayn ufmuutiche wërter hon mich koraaj kep.

Ich hon aan kefang mit Granville se preetiche. Awer, fiile fon te krunt xtroose fon te pikaat hate tsu fiil leche fer een raatxtul. Tan, hon ich Granville ferlangt fer mich in een xupkhare tuun un mich hiner un heyer xupe. Tas hot kans kuut pariirt! In april fon 2005, waar ich ketaaft. Klaych tëm noo, hon ti priiter mich keiipt fer ti puplikatsyoone un te som fon te kemaynt uf phase.

Unkliiklich, im yoer 2007, is mayn fater kextorep in een xif unfal. Unser familye is mechtich traurich kep. Granville hot mit uns kepeet un hot uns ketreest mit welche tekste fon te Piipel. Tswaay yoore xpeeter, een aner unklik hot uns aarich traurich kelos — Granville is in een xif unfal kextorep.

Unser kleene kemaynt, woo soo traurich waar, is mit khee elteste un mit ploos eene ministeryaal tiiner keplip. Granville sayn toot hot mayn hërts wee kemacht; tee waar wërklich eene liipe froynt kewees. Tee hot mich imer keholef mayn kaystliche un fiisixe neetichkheete uf phase. Aan te fersamlung noo sayn toot, hat ich ti flicht fer ti apsetse fon tëm Wachthorm xtuutyum leese. Ti eyerste tswaay apsetse hon ich leese kriit. Awer tan, hon ich aan kefang se prile un ti treene hon net noo kelos se laafe... ich praucht ausm palk keen.

Ich hon aan kefang mich peser fine wën ti priiter fon een aner kemaynt sin pis Orealla khom fer uns helfe. Ti Filyaal hot aach Kojo, een spetsyaal pyoneer kexikt. Es hot mich aarich kefrayt, wën mayn muter un mayn yinger pruuter hon aan kefang ti Piipel xtutiire un hon sich taafe kelos. Tan, im mërts fon 2015, sin ich wii ministeryaal tiiner in kesetst. Mit te tsayt, hon ich mayn eyerste puuplix reet kemacht. In tiise taach, hon ich in te selwich tsayt kelacht un keprilt wën ich traan ketenkt hon iwer Granville sayn wërter, phaar yoore tsurik: “Eene taach tuust tuu een puuplix reet mache. Es tuut sicher pasiire!”

Torich ti prokrame fon te JW Broadcasting^®, hon ich tsu wise kriit iwer anere priiter un xwestere woo tuun eenliche situatsyoone wii mayns mit mache. Opwool se krank sin, khene se fiile tinge mache un sin froo. Ich khan aach noch welche tinge mache. Ich wolt tsu Yeehoowa kepe tas pestes woo ich khont! Weeche tas, hon ich aan kefang wii rekulaar pyoneer tiine. Un, im septemper fon 2019, hon ich een notisye kriit woo ich net kewaart hon. In tiise moonat, hon ich tsu wise kriit tas ich waar wii elteste in kesetst kep in unser kemaynt, woo unkefeer 40 puplikatoore hat.

Ich sin petanklich fer ti liipe priiter un xwestere woo hon mit mich xtutiirt un mich keholef hon Yeehoowa tiine. Un, iwer ales, sin ich aarich petanklich tas Yeehoowa hot mich nii net ferkes.