Neyana ngà turi 1983. Normal ngà mabba ta kabbikku ngem turi mafulu i dagukku, gavva nga mataka-taki i interu nga baggì. Tapus dua dagun i nappasa, tadday nga umma ta pallukag ku, ari ngà ngana makaguyu. Ariakku gapa ngana meguyu i takkì. Adde turi, kakku ngana makalakag. Nafektan natun i paddakal ku. Adde sangawe, gittana abbing i katannakku.

Piga vulan nga agga-dian ngà ta balay turi ta nabbisita i dua tu babbay nga Saksi. Nu egga ira bisita, kanayun ngà nga mattagu. Ngem tatun, inarubakku ira. Turi ta kinagida nio i meyannung ta Paraiso, nanono ku uli yari i naginnà tagga ta lima i dagukku. Egga bi i taga-Suriname nga misionero nga mangngagan tu Jethro nga mittan kada vulan nga mallayyagayya ta bario mi anna i-Bible study-na si yamà. Masippo si Jethro anna kakayà ku yayya. Kanayunnà gapa nga ivulu na kakè anna kako ku ta study ira na Saksi ta bario mi. Turi ta niyavu nio ni Florence, yari i tadday nga babay nga nakibbida niakan tari nga aggaw, nu kayà ku nga maggigiammu, minanugu ngà.

Turi ta nanoli si Florence ta balemi, nivuluna i atawana nga si Justus tapus ni-Bible study-dà. Nakannammuadda nga kakku ammu i mabbibbig yatutta sinudduaddà adde ta ammù ngana i mabbibbig. Mittan, kinagi na magatawa nio nga magali ngana ira ta Suriname tapenu tari ngana ira mallayyagayya. Megafu tatun, awan ngana tu tanakuan nga mangi-Bible study nio ta Orealla. Ngem magayayya ngà lagapa megafu ta kannà vuluvuga kinattaman ni Jehova.

Ari nabbayag, egga i payunir nga mangngagan tu Floyd nga minay ta Orealla tapus nasimmuannà turi ta namala-balay yayya. Turi ta niyavuna nu kayà ku i mab-Bible study, nangngizzi ngà. Tapus kunna: “Ngatta mangngizzi ka?” Kinagì nisa nga nabalikku ngana nga gigiammuan i brosiur nga Ano ang Hinihiling ng Diyos sa Atin? anna pinegafuanakku ngana gapa nga gigiammuan i libru nga Ang Kaalaman na Umaakay sa Buhay na Walang-hanggan. * Tapus niyistorià nga nagimmang yari paggigiammù yari tu nituloy mi yatun ni Floyd. Ngem neyali yayya ta tanakuan nga teritoria yari tu awan mana tu mangi-Bible study nio.

Egga i minay nga dua tu espesial payunir ta Orealla turi ta 2004. Danatun di Granville anni Joshua. Naleraddà turi ta namala-balay ira.  Turi ta niyavutadda nu ikaya ku i mab-Bible study, nangngizzi ngà. Nikiddò nira nu awayya mi nga gigiammuan uli i libru nga Kaalaman tapenu masingakku nu parefu i itudduda ta nappasa ira tu nanuddu nio. Inimbitannà ni Granville ta study. Maski paga mafulu dagun nga agga-dian ngà laman ta balemi, ikaya ku i umay. Sinundunà ni Granville anna ni-wheelchairnà maffunta ta Kingdom Hall.

Kinagi nio ni Granville nga mappa-enrol ngà ta Theocratic Ministry School. Kunna nio: “Kurug tu kammu makalakag ngem makabida ka mabba. Siguradu nga duttal saw i aggaw nga mappalappa ka ta publiko.” Gafu tatun nga kinagina, nassikan i nono ku.

Namegafu ngà ngana nga mallayyagayya kavulu si Granville. Ngem aru nga dalan ta bario mi i rough road. Ari nga puede i wheelchair tatun. Yatutta nikiddò kani Granville nga itakenà ta karatera (wheelbarrow) tapus itubbana yatun. Efektibo yatun nga kingnguana. Turi Abril 2005, nabawtisowan ngà tapus sinanaynà na brother ira nga tangngawan i literatura na kongregasion pati yari sound system na Kingdom Hall.

Kaddaraddam ta natay i yamà turi ta 2007 megafu ta nabigaran yayya ta makina na nattakayanna nga barangay. Maraddam i interu familia mi. Minay si Granville tapenu ipakimallo kami anna nangibibbig yayya tu makapagaram ira nga teksto ta Biblia. Dua ragun i nappasa, nakaddagakkami ta tadday mana nga trahedia. Natay si Granville gafu ta naaksidente i nattakayanna nga barangay.

Baddi laman i kongregasiommi yatutta fermi i daddammi gafu ta awan ngana tu elder mi anna tattadday ngana laman i ministerial mi. Mataka-taki i patay ni Granville. Iddeddukakku yayya nga kofun. Dakal i uffunna nio ta espiritual nga papprogresò kunne na gapa ta karuan nga pakawagakku. Ta tumunug nga study mi, sakan i taga-bibbig tu parapo ta Paggigiammu tu Passifusifutan. Kabalikku nga nabbibbig tu dua nga parapo, kakku ngana mafugaddan i tumangi. Nikazzadà ngana ta stage.

Minalappaw i panageno ku turi ta inuffunan nakami na wawwaragi ta tanakuan nga kongregasion taw ta Orealla. Zinog gapa na panga nga ofisina i tadday nga espesial payunir nga si Kojo. Magayayya ngà ta nab-Bible study gapa anna nabawtisowan si yenà anna i uriakku nga lalaki. Tapus turi Marso 2015, nabbalin ngà tu ministerial. Ari nabbayag, nappalappa ngà ngana. Yatun i ollollu. Tatun nga aggaw, gumalo anna makatangi ngà ta manono ku i dati nga kinagi ni Granville niakan: “Siguradu nga duttal saw i aggaw nga mappalappa ka ta publiko.”

Nagirò ta programa ira na JW Broadcasting^® tu aru gapa i wawwaragi nga kaparehù tu situasion. Maski paga egga i diferensiada, aru lagapa i makuada anna magayayya ira. Ammù tu aru gapa i makuà. Ikaya ku nga iyawa i interu sikakku kani Jehova yatutta nappayunir ngà. Ta Setiembre 2019, magayayya ngà ta nakannammuakku tu natunno ngà bilang elder ta kongregasiommi nu sitaw 40 i publisher.

Mappabalo ngà ta wawwaragi nga nangi-Bible study nio anna nanguffun niakan nga masserbi kani Jehova. Daka-dakal gapa i pappabalo ku ta ariannà vuluvuga kinattaman ni Jehova.