Nayanakak idi 1983. Normalak iti umuna a tawtawen ti kinaubingko. Ngem idi 10 ti tawenko, nakariknaak iti nakaro nga ut-ot iti intero a bagik. Agarup dua a tawen kalpasanna, nariingak iti maysa nga agsapa a diak makakuti. Diak maikuti dagiti sakak uray pilitek. Sipud idin, saanakon a makapagna. Simmardeng metten ti panagdakkelko. Agingga ita, bassitak latta a kas iti maysa nga ubing.

Sumagmamano a bulan nga addaak iti balaymi sipud idi nagsakitak ket adda dua a Saksi ni Jehova a bimmisita. Kaaduanna nga aglemmengak no adda dagiti bumisita, ngem iti dayta nga aldaw, nakisaritaak kadagiti babbai. Bayat nga ibagbagada ti maipapan iti Paraiso, nalagipko ti nangngegko idi agarup lima ti tawenko. Iti daydi a tiempo, maysa a misionero nga agnagan Jethro a taga-Suriname ti binulan a bumisita iti purokmi ken iyadalanna iti Biblia ni tatangko. Nakasingsingpet kaniak ni Jethro ket magusgustuak isuna. Inkuykuyogdak met idi da lolo ken lolak iti sumagmamano a gimong dagiti Saksi, a maang-angay iti purokmi. Maysa nga aldaw, adda babbai a bimmisita kaniak. Idi dinamag ti maysa kadakuada a ni Florence no kayatko ti makasursuro iti ad-adu pay, nagwenak.

Nagsubli ni Florence a kaduana ti asawana a ni Justus, ket rinugiandak nga iyadalan iti Biblia. Idi nadlawda a diak ammo ti agbasa, sinuruandak nga agbasa. Idi agangay, ammokon ti agbasa. Maysa nga aldaw, imbaga da Florence ken Justus a maidestinodan idiay Suriname. Makapaladingit ta awan ti mangituloy a mangyadal kaniak iti Biblia. Ngem maragsakanak ta dinak pulos linipatan ni Jehova.

Di nagbayag, simmangpet ditoy Orealla ti maysa a payunir nga agnagan Floyd. Naam-ammonak bayat a mangaskasaba iti binalaybalay. Idi imbagana kaniak ti maipapan iti panagadal iti Biblia, immisemak. “Apay nga umis-isemka?” insaludsodna. Imbagak a nalpaskon a naadal ti broshur nga Ania ti Kalikaguman ti Dios Kadatayo? ken nairugik metten nga adalen ti libro a Pannakaammo a Mangiturong iti Biag nga Agnanayon. * Inlawlawagko no apay a naisardeng ti panagadalko. Naileppas nga inyadal kaniak ni Floyd ti libro a Pannakaammo, ngem idi kuan, naidestino met iti sabali a lugar. Awan manen ti mangyadal kaniak iti Biblia.

Ngem idi 2004, naidestino ditoy Orealla ti dua nga special pioneer a da Granville ken Joshua.  Nabirokandak bayat a mangaskasabada iti binalaybalay. Idi dinamagda no kayatko ti agadal, immisemak. Kiniddawko nga iyadalda kaniak ti libro a Pannakaammo manipud iti rugi. Kayatko a maammuan no ti isuroda ket kas met laeng iti insuro dagiti dati a nangyadal kaniak. Imbaga ni Granville nga adda dagiti gimong a maang-angay iti purokmi. Nupay saanak a pimmampanaw iti balaymi iti dandani 10 a tawen, kayatko ti umatender. Isu a dinagasnak ni Granville ken impatugawnak iti maysa a wheelchair sa induronnak agingga iti Kingdom Hall.

Idi agangay, pinaregtanak ni Granville a makiraman iti Teokratiko nga Eskuelaan ti Panagministro. Imbagana: “Adda depekto ti bagim, ngem makasaoka. Addanto aldaw nga agpalawagka met iti publiko. Sigurado dayta.” Timmured ti pakinakemko gapu iti makaparegta nga imbagana.

Nangrugiak a mangasaba a kaduak ni Granville. Ngem lasonglasong ti adu a kalsada iti lugarmi isu a saan a mabalin a mausar ti wheelchair. Imbagak ngarud ken Granville nga ilugannak lattan iti karetilia (wheelbarrow) sanak iduron. Epektibo unay dayta. Idi Abril 2005, nabautisaranak. Di nagbayag, sinanaydak dagiti kakabsat a mangasikaso kadagiti literatura ti kongregasion ken iti sound system ti Kingdom Hall.

Ngem makapaladingit ta idi 2007, natay ni tatangko gapu iti aksidente iti bangka. Naklaat ti pamiliami. Inkararagannakami ni Granville ken nangibasa kadagiti makaliwliwa a teksto ti Biblia. Dua a tawen kalpasanna, naladingitankami iti sabali manen a trahedia—natay ni Granville iti aksidente iti bangka.

Ti bassit ken agladladingit a kongregasionmi ket awananen iti panglakayen ken addaan laengen iti maysa a ministerial nga adipen. Talaga a nasakit kaniak ti ipapatay ni Granville ta ipatpategko isuna a gayyem. Simamatalek a tinulongannak a suminged ken Jehova ken maaddaan iti dadduma pay a kasapulak. Iti gimong kalpasan ti ipapatayna, siak ti nadutokan nga agbasa kadagiti parapo para iti Panagadal iti Pagwanawanan. Nabasak pay met ti umuna a dua a parapo, ngem idi kuan, nagsangitakon ket saanen nga agsardeng dagiti luak. Kapilitan a bimmabaak iti stage.

Simmayaat ti riknak idi immay dagiti kakabsat iti sabali a kongregasion tapno tulongandakami ditoy Orealla. Nangibaon met ti sanga nga opisina iti maysa nga special pioneer a ni Kojo. Nakaragragsakak idi nagpayadal iti Biblia ni nanangko ken ti adingko a lalaki sa nagpabautisarda idi agangay. Kalpasanna, idi Marso 2015, nadutokanak kas ministerial nga adipen. Idi kuan, imparangko ti kaunaan a palawagko iti publiko. Iti dayta nga aldaw, nakaisem ken nakaluaak gapu iti panagyamanko a nanglagip iti imbaga ni Granville adu a tawenen ti napalabas: “Addanto aldaw nga agpalawagka met iti publiko. Sigurado dayta.”

Babaen kadagiti programa ti JW Broadcasting^®, naam-ammok dagiti kakabsat a kapadak ti situasionda. Ngem uray adda depekto ti bagida, adu latta ti maar-aramidanda ken naragsakda. Uray siak, adda latta dagiti kabaelak nga aramiden. Gapu ta kayatko nga ipaay ken Jehova ti aniaman a pigsa nga adda kaniak, natignayak nga ag-regular pioneer. Ket idi Septiembre 2019, adda naawatko a di ninamnama a damag! Iti dayta a bulan, naammuak a nadutokanak kas panglakayen iti kongregasionmi a buklen ti agarup 40 nga agibumbunannag.

Agyamyamanak gapu kadagiti ipatpategko a kakabsat a lallaki ken babbai a nangyadal kaniak ken timmulong kaniak a mangitungpal iti ministeriok. Kangrunaanna, agyamyamanak ta dinak pulos linipatan ni Jehova.