1983 a biẹ mẹn. Egbe wo daan mẹn ẹghe nin mẹn rẹ ha wanre. Sokpan, mẹn ki dọ ha ribhi ikpe igbe, egbe rebhe da wo munhẹn ha ba mẹn. Ikpe eva ki gbera nin egbe rẹ ha ba mẹn, mẹn bha yẹ ha sabọ khian. Ọsewewiẹ ọkpa nin mẹn riọ bhi owe ọnan rẹ sunu. Mẹn rẹ dọnmhegbe nin mẹn lueghe oẹ nọnsẹmhẹn, ọ bha lueghe. Rẹ na bhi ọne ukpẹdẹ nin rẹ dọ sẹbhi ẹlẹnan nian, mẹn iyẹ sabọ khian. Ranmhude ọne emianmhẹn nan, egbe nọnsẹmhẹn bha yẹ ha wanre. Ọnan zẹle ẹlẹnan nian, egbe nọnsẹmhẹn sẹyẹ dia khere bọsi obhokhan.

Mẹn bha yẹ ha dagbare, ẹkẹ uwa ọkpa mẹn ki wo ha dia. Uki eso ki gbera, Esali Jehova eva da rẹnẹ sẹbhi eji mẹn ye. Arẹmiẹn eriọbhe ha vae bhi isẹmhan, mẹn ki dọ nẹhe, mẹn bha nẹhe ẹghe nin ene Esali Jehova nan rẹ vae. Mẹn da re otọ nin ele rẹ ne mẹn talọ. Beji ele rẹ ha tẹmhọn Agbọn Ọfubhegbe nin Osẹnobulua mun vade man mẹn, mẹn da wo ha yere emhin nin mẹn họnlẹn ẹghe nin mẹn rẹ ha yi ikpe isẹn, ẹghe nin misiọnari ọkpa natiọle Jethro rẹ dọ ha man aba mẹn iBaibo. Agbaẹbho natiọle Suriname Jethro da ha nyẹnlẹn. Uki-uki ọle rẹ vae dọ ha tẹmhọn Osẹnobulua bhi agọ nọnsẹmhan. Ẹkẹ-ẹjẹjẹ ọle rẹ wo ne mẹn lu emhin, mẹn da yẹ wo manman hoẹmhọn ọlẹn. Sẹyẹ, aba mẹn nọn khua bi inẹn mẹn nọn khua ki ha re mẹn rẹkhan egbe yo ikolo oga ọsi Esali Jehova. Bhiriọ, ẹghe nin Florence, nọn ha yi ọkpa bhi ene Esali Jehova ne rẹnẹ ji mẹn, rẹ nọọn mẹn si mẹn guanọ nin mẹn luẹ ba ebi mẹn họnlẹn, mẹn da wo yọle ehe.

Florence da re ọdọ ọle rẹkhan egbe kie vae. Justus hi elin nọnsi ọdọ ọle. Ele veva da munhẹn ha man mẹn iBaibo. Ele ki kere ghe mẹn isabọ tie ebe, ele da man mẹn ebi a rẹ tie ebe yẹ. Akizẹbue, mẹn da wo sabọ tobọmẹn ha tie ebe. Ẹdẹ ọkpa, ele da taman mẹn ghe, a je ele ha khian Suriname nin ele dọ ha ga bhi enin. Ọ da wo ba mẹn bhi egbe a ghe, ọria soso bha yẹ ha ribhi agọ nọnsẹmhẹn nọn ha vae dọ ha man mẹn iBaibo. Ọkpakinọn, Jehova bha ye mẹn an.

Ọ bha sẹ bue gbe nin ele kpanọ, ọkanẹfan ọkpa natiọle Floyd da vae dọ ha nyẹnlẹn bhi agọ nọnsẹmhan. Ẹghe nin ọle rẹ ha tẹmhọn Osẹnobulua rẹ na bhi uwa rẹ sẹbhi uwa, ọle da sẹbhi isẹmhẹn. Ọle ki taman mẹn ghe, ọle dẹ dọ ha man mẹn iBaibo, mẹn da ha jiẹ. Ọle da nọọn mẹn yọle, “Bezẹle nin uwẹ da jiẹ?” Mẹn da taman ọlẹn ghe, mẹn ka luẹ brokiọ natiọle What Does God Require of Us? sotọ, ghe mẹn bhọ munhẹn fo ha luẹ ebe natiọle Knowledge That Leads to Everlasting Life. * Mẹn da taman ọlẹn ghe, ẹbho ne ka ha man mẹn emhin kpanọ zẹle nin mẹn da zobọ. Bhiriọ, Floyd hi ọnọn ki man mẹn Knowledge That Leads to Everlasting Life sotọ. Ọkpakinọn, a da yẹ je  ọle ha khian agbaẹbho ọbhebhe nin ọle dọ ha ga bhi enin. Ejayenan nian, mẹn bha yẹ gbo ha mhọn ọria nọn ha vae dọ ha man mẹn iBaibo.

Bhi 2004, a da je Granville bi Joshua vae bhi agọ nọnsẹmhan, nin ele dọ ha lu iwẹnna ọkanẹfan kpataki bhi enan. Ele da yẹ miẹn mẹn ẹghe nin ele rẹ ha tẹmhọn Osẹobulua rẹ na bhi uwa rẹ sẹbhi uwa. Ele ki nọọn mẹn si ọ dẹ yẹẹ mẹn rẹ luẹ iBaibo, mẹn da ha jiẹ. Mẹn da taman ele nin ele kie na bhi otọ munhẹn man mẹn Knowledge That Leads to Everlasting Life. Bezẹle? Ranmhude mẹn guanọ nin mẹn fẹghe si emhin nin ele ha man mẹn le, dẹ dikẹ bhi emhin nin ẹbho ne ka ha man mẹn emhin man mẹn le. Granville da taman mẹn ghe a mhọn eji a da do ikolo oga bhi ọne agọ nan. Arẹmiẹn ikpe igbe ọ ki khian nian nin mẹn bha rẹ sabọ sibhi uwa re, ọ da ha ghọn mẹn nin mẹn rẹ yo. Bhiriọ, Granville da mun mẹn ọbhi wheelchair yẹ rẹkpa mẹn sua ọle ha khian Kindọn Họọ.

Akizẹbue, Granville da taman mẹn ghe nin mẹn deba ene re ọta man bhi Theocratic Ministry School. Ọle da yọle: “Arẹmiẹn uwẹ isabọ khian, uwẹ sabọ talọ. Ẹdẹ ọkpa, uwẹ dẹ re ọta ogbakha man. Ọ dẹ sunu.” Ọne ọta nan da wo manman ziẹn mẹn udu.

Mẹn da munhẹn ha deba Granville dagbare dọ ha tẹmhọn Osẹnobulua. Ọkpakinọn, ọ da ha nọghọ nan rẹ ha sua ọne wheelchair gbera uwedẹ nesẹmhan, ranmhude, ene uwedẹ bha kpolo a, ido-ido vuọn ọlẹn. Ranmhude ọnan, mẹn da taman Granville nin ọle ha mun mẹn ọbhi wheelbarrow, ranmhude, ọnan ha lẹkhẹ nẹ nan rẹ sua na bhi uwedẹ nesẹmhan. Bhi April 2005 mẹn da mianmẹn. Ọ bha sẹ bue gbe nin mẹn mianmẹn fo, ibhio mhan da man mẹn ebi a rẹ gbẹloghe ebe yẹ bhi ẹkẹ agbotu, bi ebi a rẹ gbẹloghe ene emhin nan noo rẹ talọ bhi ikolo oga yẹ.

Bhi ukpe 2007, aba mẹn da yu bhi okọ nọn ruẹ bhi ẹdẹ. Ọnan da wo ba azagba-uwa mhan bhi egbe a. Granville da deba mhan nan erọnmhọn yẹ re iBaibo ko mhan udu re. Ikpe eva ki gbera nin ọnan sunu, emhin ọbhebhe da gbo sunu nọn yẹ ba mhan bhi egbe a. Obhio mhan nin Granville da yẹ yu bhi okọ nọn ruẹ bhi ẹdẹ.

Mhan bha yẹ ha mhọn ọwanlẹn soso bhi agbotu nọnsẹmhan. Ọnọn zẹ sikẹ ewanlẹn ukpọkpa mhan ha mhọnlẹn. Uyumhin ọsi Granville wo manman ba mhan bhi egbe. Mẹn bi ọle wo manman sikẹ egbe nọnsẹn bii imọẹ. Ọle wo rẹkpa mẹn sikẹ Jehova. Ọle da yẹ rẹkpa mẹn rẹ sabọ miẹn emhin ne bunbun rẹ ha gbẹloghe egbe. Bhi ikolo oga nan do ẹghe nin ọle rẹ yu fo, a da taman mẹn ghe, mẹn hi ọnọn ha tie ebe Ọkhuẹughe. Mẹn ki tie uduọle nin ọhẹnhẹn bi ọnọn ọzeva fo, mẹn da wo ha viẹ. Ranmhude ọne eviẹ bha ka fo, mẹn da sibhi eji a da mundia talọ re.

Mẹn da fẹkẹ ha miẹn ikoudure ẹghe nin ibhio mhan bhi agbotu ọbhebhe ki rẹ vae dọ ha rẹkpa mhan. Bẹtẹ da yẹ je ọkanẹfan kpataki ọkpa bu mhan. Kojo hi elin ọlẹn. Ọ da wo ha ti mẹn bhọ ghe, inẹn mẹn bi obhio mẹn nin okpea da munhẹn ha luẹ iBaibo. Ele da yẹ mianmẹn. Bhi March 2015, a da re mẹn ọbhi ihe ọsi ene zẹ sikẹ ewanlẹn. Ẹghe eso ki gbera, mẹn da re ọta ogbakha man bhi ọsi ọhẹnhẹn. Ọne ukpẹdẹ nin, amẹn eviẹ da wo ha si mẹn bhi ẹlo re ẹghe nin mẹn rẹ ha yere ọta nin Granville taman mẹn ikpe eso ne gbera. Ọle da taman mẹn yọle: “Ẹdẹ ọkpa, uwẹ dẹ re ọta ogbakha man. Ọ dẹ sunu.”

Bhi JW Broadcasting^®, mẹn ki wo ha daghe ibhio mhan nan miẹn ghe, arẹmiẹn ele ribhi idia nọn diabe ọne imẹn ye, ele sẹyẹ wo ghọnghọn yẹ lu eka nin ele ha sabọ lu. Bhiriọ, mẹn dẹ yẹ sabọ miẹn eka nin mẹn ha lu. Ranmhude mẹn guanọ nin mẹn re ahu nin mẹn mhọnlẹn rebhe rẹ ga iJehova, mẹn da zegbere ha lu iwẹnna ọkanẹfan. Bhi September 2019, emhin esili da wo sunu ji mẹn! Ọne uki nin, a da re mẹn ọbhi ihẹ ọsi ọwanlẹn bhi ẹkẹ agbotu. Itue 40 mhan khin bhi agbotu nọnsẹmhan.

Mẹn yi ibhio mhan obulu nin ele rẹ rẹkpa mẹn lẹn iBaibo yẹ dọ ha ga iJehova. Jehova mẹn re ekhuẹnmhẹn nọn ke okhun nẹ nan, ranmhude, ọle bha ye mẹn an.