Ukpe 1983 a yẹ omẹ. Nọ mẹ jọ ọmaha, eware e jẹ riẹ nya ziezi, rekọ nọ mẹ jọ ikpe ikpe oma mẹ kpobi u te mu omẹ họ ẹda gaga. Nọ oware wọhọ ikpe ivẹ e vrẹ no, u wo irioke ẹdẹ jọ nọ mẹ rọwo ze, mẹ gbẹ jẹ sae kpare owọ họ. Mẹ jẹ daoma gaga re mẹ kpama dikihẹ rekọ awọ ivẹ mẹ na e jọ yọlọ. No umuo ẹdẹ yena vrẹ, mẹ gbẹ sae nya onya viere he. Ẹyao na ọ tẹ ko omẹ fihọ otọ, mẹ gbẹ rro vrẹ ere he.

Nọ mẹ jọ uwou te emerae ivẹ no, Isẹri Jihova ivẹ e tẹ nyaze uwou mai. Oke ọsosuọ nọ erara e tẹ ziọ uwou mai, mẹ rẹ dhẹ dhere, rekọ ẹdẹ yena nọ eyae ivẹ na e rọ nyaze na mẹ gaviezọ kẹ ae. A ta kpahe Aparadase, kẹsena mẹ tẹ kareghẹhọ oware nọ me wuhrẹ oke nọ mẹ jọ oware wọhọ ikpe isoi. Evaọ oke yena, imishọnare nọ a re se Jethro nọ ọ jẹ rria obọ Suriname ọ jẹ hae nyaze ẹwho mai ẹsiẹvo amara. O je wuhrẹ Ebaibol kugbe ọsẹ mẹ. Jethro ọ jẹ hae riẹ omẹ ru gaga. Fikiere ọ were omẹ wo umuo ho. U te no ere no, ẹsejọ ọsẹ gbe oni ologbo mẹ a jẹ hae wha omẹ kpohọ iwuhrẹ Isẹri Jihova nọ a je ru evaọ ẹmẹwho mai na. Nọ aye jọ nọ a re se Florence evaọ usu eyae ivẹ nọ e ziọ uwou mai na ọ nọ omẹ sọ mẹ gwọlọ wuhrẹ Ebaibol, mẹ tẹ rọwo.

Florence avọ ọzae riẹ nọ a re se Justus a te mu Ebaibol họ ewuhrẹ kugbe omẹ. Nọ a ruẹ nọ mẹ riẹ obe ese he, a te je wuhrẹ omẹ epanọ a re se obe. Ẹmẹrera na mẹ tẹ te riẹ ese. Ẹdẹ jọ ọzae-avọ-aye na a tẹ vuẹ omẹ nọ a dhe rai kpobọ Suriname no. O da omẹ gaga inọ me gbe wo ohwo ọvo nọ o ti wuhrẹ Ebaibol kugbe omẹ evaọ Orealla ha. Rekọ mẹ thọrọ Jihova ẹro ho.

U kri hi, ọkobaro nọ a re se Floyd ọ tẹ ziọ obọ Orealla. Nọ ọ jẹ ta usi uwoma no uwou-owhre ruọ uwou-owhre, ọ tẹ nyaziọ uwou mai. Ọ tẹ ta kẹ omẹ nọ ọ gwọlọ wuhrẹ Ebaibol kugbe omẹ. Me te kpohwẹ ku unu. Ọ tẹ nọ omẹ nọ, “Fikieme whọ be rọ hwẹ?” Mẹ tẹ ta kẹe nọ me wuhrẹ ibroshọ Eme Ọghẹnẹ Ọ Gwọlọ Mi Omai? na re no, me te je mu obe Eriariẹ Nọ I Re Su Kpohọ Uzuazọ Ebẹdẹ Bẹdẹ họ ewuhrẹ no. * Kẹsena mẹ tẹ vuẹe oware nọ mẹ rọ seba ewuhrẹ. Floyd o te wuhrẹ abọ nọ o kiọkọ evaọ obe Eriariẹ na kugbe omẹ. Kẹsena a te je vi ei kpohọ oria ọfa. Ere ohwo nana nọ o je wuhrẹ kugbe omẹ na ọ rọ jẹ nyavrẹ.

 Kẹsena evaọ 2004, a te vi ekobaro obọdẹ ivẹ nọ a re se Granville avọ Joshua ziọ Orealla. Nọ a jẹ ta usi uwoma no uwou ruọ uwou, a tẹ nyaziọ uwou mai. Nọ a nọ omẹ sọ mẹ gwọlọ wuhrẹ Ebaibol, me te je kpohwẹ ku unu. Mẹ tẹ ta kẹ ae nọ jọ a wuhrẹ omẹ obe Eriariẹ no uzou ọsosuọ ze. Mẹ jẹ gwọlọ riẹ sọ eware nọ ahwo ọsosuọ na a wuhrẹ omẹ na eye evona a ti wuhrẹ omẹ re. Granville ọ tẹ vuẹ omẹ nọ a bi ru ewuhrẹ evaọ ẹwho na. Dede nọ o joma te ikpe ikpe no nọ me ri kpohọ oria ovo ho, mẹ tẹ ta nọ me re kpohọ ewuhrẹ. Nọ oke ewuhrẹ o joma te no, Granville ọ tẹ rehọ akaba-ọmo ghelie omẹ kpobọ Ọgwa Uvie.

Nọ me kpohọ ewuhrẹ te oria jọ no, Granville ọ tẹ vuẹ omẹ nọ me fi odẹ hotọ kẹ Isukulu Odibọgba Esuo-Ọghẹnẹ. Ọ ta kẹ omẹ nọ: “Mẹ riẹ nọ whọ sae nya ha, rekọ whọ sae ta ẹme. Ẹdẹ jọ whọ te kẹ ovuẹ ogbotu. Whọ te ta nọ mẹ ta.” Ẹme nọ ọ ta kẹ omẹ na ọ lẹliẹ udu ruọ omẹ awọ.

Me te mu Granville họ elele kpohọ usi uwoma. Rekọ idhere buobu evaọ ẹwho mai e rrọ egegọdọ. Fikiere o rẹ jọ bẹbẹ re a rọ akaba-ọmo mẹ na ghelie omẹ. Mẹ tẹ ta kẹ Granville nọ ọ hae wọ omẹ fihọ iwhibaro ghelie. Kọ ere ma je ro kpohọ usi uwoma. Kẹsena evaọ Ane 2005, mẹ tẹ họ-ame. U kri hi, inievo na a te mu omẹ họ ewuhrẹ epanọ mẹ sae rọ rẹrote ebe gbe ekwakwa ikporakporo evaọ obọ Ọgwa Uvie.

Evaọ 2007, nọ ọsẹ mẹ o je bi okọ, o te kie fihọ ame jẹ nwa oma gaga. O te whu. O da omẹ gaga. Oware na o kẹ uviuwou na soso uye. Brọda Granville ọ nyaziọ uwou mai, ọ tẹ lẹ kugbe omai je se eria Ebaibol jọ kugbe omai nọ o lẹliẹ omai kru udu ga. Nọ ikpe ivẹ e vrẹ no, oware ese ofa o tẹ jẹ via. Okọ u zue Granville, o te whu.

Oware nọ o via na o kẹ inievo na uye gaga. Obọnana ma gbe wo ọkpako ukoko ho, odibo oruiruo ọvo ma wo. Uwhu Granville o da omẹ te ẹzi, ogbẹnyusu mẹ ọye o whu no na. Ọye họ ohwo nọ ọ jẹ rẹrote omẹ, je fiobọhọ kẹ omẹ evaọ ukoko na. Ewuhrẹ nọ ma nya evaọ oka nọ o ro whu na, mẹ a fihọ nọ me se Uwou-Eroro Na. Udugaga me ro se edhe-ẹme ọsosuọ gbe ọrọ avọ ivẹ, irui-oviẹ i te bi su no omẹ aro ze pata pata, mẹ gbẹ sai se viere he. Me te no eplatfọmo na.

Uwhremu na nọ inievo jọ a nyaze ti fiobọhọ kẹ omai evaọ ukoko mai evaọ Orealla, uweri na u te mu omẹ oma họ eno. Uwou ogha u te je vi ọkobaro obọdẹ jọ nọ a re se Kojo ziọ ukoko mai. Eva e were omẹ gaga nọ oni mẹ gbe oniọvo ọmaha mẹ a mu Ebaibol họ ewuhrẹ. Uwhremu na a tẹ te họ-ame. Kẹsena evaọ Asa 2015 a tẹ rọ omẹ mu odibo oruiruo. Nọ oke jọ o vrẹ no mẹ tẹ kẹ ovuẹ ogbotu ọsosuọ mẹ. Ẹdẹ yena mẹ kareghẹhọ ẹme nọ Granville ọ ta kẹ omẹ ikpe nọ i kpemu inọ: “Ẹdẹ jọ whọ te kẹ ovuẹ ogbotu. Whọ te ta nọ mẹ ta.” Onana o lẹliẹ eva were omẹ gaga, yọ irui-oviẹ i no omẹ aro ze dede.

Mẹ jọ JW Broadcasting^® ruẹ inievo buobu nọ i wo ọkpọ ẹbẹbẹ mẹ na. Ghele na, a be gọ Jihova vrẹ avọ evawere. Mẹ ruẹ nọ mẹ sae daoma vi enẹ wọhọ epanọ inievo nana a bi ru na. Fikiere me te mu ọkobaro oke-kpobi họ. Eva e were omẹ gaga nọ a rọ omẹ mu ọkpako ukoko evaọ Azie 2019. Enwenọ iwhowho-uvie udhuvẹ e rrọ ukoko mai.

Me yere Jihova gaga nọ ọ rọ rehọ inievo na fiobọhọ kẹ omẹ wuhrẹ Ebaibol na jẹ nyaharo evaọ ukoko na. Eva e were omẹ gaga inọ mẹ thọrọ Jihova ẹro ho.