Ngai hpe 1983 hta shangai ai. Asak kaji ai shaloi gaw hkam kaja ai. Raitim, asak 10 ning hta, hkum ting grai machyi hpang wa ai. Lahkawng ning daram na ai hpang, jahpawt mi hta yupra kaw nna rawt wa ai shaloi, n mai shamu mat sai. Lagaw ni hpe shamu yu tim n mai ai. Dai shani kaw nna lam n mai hkawm mat sai. Hkum hkrang mung n kaba wa sai. Dai majaw, dai ni du hkra nye a hkum hkrang gaw ma kaji zawn sha re.

Dai hku byin ai kaw nna nta shinggan de n pru mat sai. Law malawng hku nna nta de manam sa yang ngai makoi nga ai. Raitim, lani mi hta nta de Yehowa Sakse marai 2 du wa ai shaloi hta gaw, ngai hkap tau nna ga shaga ai. Hparadisu a lam tsun dan ai shaloi, asak 5 ning daram hta, na ga ai hpe dum mat ai. Dai aten hta, Tsurinam kaw nga ai sasana magam gun Jethtaro gaw anhte a kahtawng de shata mi hta kalang sa nna, awa hpe Chyum Laika sharin ya ai. Ngai hpe mung tsawra myit hte tsun shaga ai majaw, shi hpe ngai grai hkau ai. Aji awoi ni mung kahtawng hta galaw ai Sakse Hkam ni a zuphpawng de ngai hpe shaga sa ai. Dai shani nta de sa chyai ai num ni kaw nna, nauna Hpalawren gaw kahtap chye mayu ai kun? ngu san ai shaloi, chye mayu ai ngu tsun dat ai.

Hpalawren hte madu wa Jatsatik gaw ngai hpang de sa nna, Chyum Laika sharin ya ai. Ngai laika n chye hti ai hpe sadi hkrup ai majaw, chye hti hkra sharin ya ai. Ngai laika chye hti wa ai. Lani mi hta, Tsurinam kaw shan lit ang ai lam tsun dan ai. Orila hta, ngai hpe Chyum Laika matut sharin ya lu ai ni n nga mat sai. Raitim, ngai hpe Yehowa n malap ai.

Nau n na yang, ningshawng Hpaloi gaw Orila de du wa nna, nta langai hpang langai hkaw tsun sa ai shaloi, ngai hpe mu ai. Chyum Laika hkaja ai lam tsun ai shaloi, ngai mani sumsai byin nga ai majaw, “hpa majaw mani sumsai rai nga ai kun?” ngu nna san ai. Anhte Kaw Na Karai Kasang Hpa Lam Hpyi Nga A Ni? ngu ai laika buk hte sharin ngut nna, Htani Htana Asak Lu Shangun Ai Machye Machyang * laika buk hte pyi sharin hpang wa sai lam tsun dan ai. Hpa majaw matut n hkaja lu ai hpe tsun dan ai shaloi, Machye Machyang laika buk ngut ai du hkra sharin ya ai. Raitim, shi mung kaga shara hta magam gun na matu lit ang ai. Sharin ya na masha bai n nga mat sai.

 2004 hta laksan ningshawng hpunau Granbi hte Jawshawa gaw Orila hta lit ang ai. Nta langai hpang langai hkaw tsun sa ai shaloi ngai hpe mu ai. Chyum Laika sharin mayu ai kun? ngu nna san ai shaloi, ngai bai mani hkrup ai. Machye Machyang laika buk hpe nnan kaw nna bai sharin ya na matu hpyi shawn dat ai. Moi sharin ya ai ni hte maren sha rai kun? ngu chye mayu ai majaw re. Kahtawng hta zuphpawng ni galaw ai lam Granbi tsun dan ai. Nta shinggan de n pru ai 10 ning daram na sai raitim, zuphpawng ni gaw sa lung mayu ai. Granbi gaw nta de du hkra sa shaga ya ai. Ngai hpe leng kap punghkum hte Nawku Htingnu de du hkra shaga mat ai.

Hpang de Theocratic Magam Jawng hta lawm na matu ngai hpe Granbi n-gun jaw ai. “Lam n lu hkawm tim, ga shaga lu ai atsam nga ai. Lani mi hta, shawa mungga pyi htawn lu na re” ngu shi tsun ai. Shi a n-gun jaw ga gaw ngai hpe kamhpa myit grau nga wa shangun ai.

Granbi hte arau ngai hkaw tsun hpang ai. Kahtawng kaw na lam ni gaw marik marawk re ai majaw leng kap punghkum hte gaw n lu sa ai. Dai majaw, ngai hpe lata kanawng leng hte shaga sa na matu Granbi hpe ngai karum hpyi ai. Dai gaw bungli byin ai. 2005 April hta, ngai hkalup hkam ai. Dai hpang hpunau ni gaw ngai hpe nawku hpung na laili laika lajang ai lit hte nsen jak lang ai hte seng ai lit ni hpe shaman ya ai.

2007 hta, hkali dagup ai majaw awa si mat ai. Nta ting grai yawn ai. Granbi gaw arau akyu hpyi ya nna, shalan shabran ya ai Chyum daw ni hti dan ai. Lahkawng ning na ai hpang, Granbi mung hkali dagup nna si mat ai majaw, anhte kalang bai yawn hkyen ai.

Nawku hpung hta myitsu salang n nga mat sai. Hpung magam tau langai sha ngam sai. Granbi si mat ai majaw, grai nan yawn ai. Shi gaw nye a matu jinghku majing zawn re. Wenyi lam hta mung, kaga ra kadawn ai lam hta mung, shi karum ya wa ai. Shi si nna, bat mi na ai shaloi, zuphpawng kaw Sin Langchyi hti na matu ngai lit ang ai. Pang lahkawng du hkra gaw lu hti ai. Raitim, grai hkrap mayu ai majaw, matut n lu hti ai sha pinra ntsa kaw nna yu mat ra ai.

Kaga nawku hpung kaw nna hpunau ni gaw Orila de sa nna karum ya ai majaw, shalan shabran lam lu wa ai. Ginjaw garan rung gaw laksan ningshawng hpunau Kojo hpe sa ya ai. Anu hte kanau Chyum Laika hkaja hpang nna, hkalup hkam ai majaw ngai kabu ai. 2015 March shata hta, hpung magam tau hku nna lit ap hkrum ai. Nau n na yang, shawng nnan hku nna shawa mungga htawn na ahkang lu ai. “Lani mi hta, shawa mungga pyi htawn lu na re” ngu Granbi tsun ga ai hpe myit dum nna, kabu myi prwi pyi hkrat wa ai.

Ngai zawn n kung n kang raitim, ngwi pyaw nga ai Sakse Hkam ni a lam JW TV lamang^® kaw nna chye wa ai. Ngai mung galaw lu ai lam ni nga ai. Yehowa hpe dang lu ai daram sak jaw mayu ai majaw, aten galu ningshawng galaw hpang ai. 2019 September hta, n myit mada da ai shiga du wa ai. Hkaw tsun masha 40 daram nga ai anhte a nawku hpung hta myitsu salang hku nna, magam gun na matu dai shata hta lit ap hkrum ai.

Chyum Laika sharin ya wa ai ni, hkaw tsun magam hta karum ya wa ai ni hpe grai chyeju dum ai. Ngai hpe n malap da ai Yehowa hpe gaw chyeju dum dik htum re.