Nasyaiwe mwaka wa 1983. Myakanĩ yakwa ya mbee, naendeee nesa. Ĩndĩ nĩ na myaka ĩkũmi, nĩnambĩĩe kwalw’a nĩ mwĩĩ mũno. Nĩvathelile myaka ta ĩlĩ ndyĩw’a ũu, na ĩndĩ mũthenya ũmwe naamũka neethĩa nditonya kũkĩla. Natatie ũndũ ndonya nĩtambye, ĩndĩ maaũ makwa mayaĩ na kavinya o na kamwe. Kuma mũthenya ũsu, ndyaatambya ĩngĩ. Na eka ũu, ũwau ũsu nĩwatumie nĩeka kwĩana. Ũmũnthĩ ũkambona, ndũmbathũkany’a na kana.

Mũthenya ũmwe ĩtina wa kũmina myei kauta ndaumaala nyũmba, nĩtwathokeiwe nĩ aka elĩ ma Ngũsĩ. O na kau nĩnakothaa kwĩvitha yĩla aeni mooka kwitũ, mũthenya ũsu nĩneetĩkĩlilye aka asu maneene nakwa. Yĩla mambĩĩie kũelesya ĩũlũ wa Nthĩ Nzaũ, nĩnalilikanile maũndũ neewie nĩ na ũkũũ wa myaka ĩtano ũu. Ĩvindanĩ yĩu naĩ wa myaka ĩtano, ve misonalĩ wakothaa kũka ũtũinĩ witũ yĩmwe kwa mwei, na nĩweemanyĩasya Mbivilia na ĩthe wakwa. Misonalĩ ũsu eetawa Jethro na ekalaa nthĩ ya Suriname. Jethro nĩwanguaa nesa, na nĩnamwendete mũno. O na ĩngĩ, Ngũsĩ nĩsyeekĩte mũvango wa kwĩkaa maũmbano ũtũinĩ witũ, na ũmau na ũsũa nĩmanguaa tũkathi maũmbano amwe. Kwoou yĩla Florence, ũmwe wa ala aka elĩ Ngũsĩ, wangũlilye kana no nende kwĩmanyĩsya maũndũ maingangĩ, nĩneetĩkĩlile.

Florence nĩwasyokie e na mũũme, Justus, na mambĩĩa kũmanyĩsya Mbivilia. Yĩla meethĩie ndyĩsĩ kũsoma, nĩmambĩĩe kũmanyĩsya kwĩka ũu. Ĩtina wa kavinda, nĩnamanyie kũsoma. Ĩndĩ mũthenya ũmwe, mambĩie kana nĩmatũmiwe makatavany’e nthĩ ya Suriname. Neewie natũlĩka ngoo mũno nũndũ vayaĩ mũndũ ũngĩ kĩsionĩ kya Orealla waĩ aendeea kũmanyĩsya Mbivilia. Ĩndĩ nĩnĩtanaa nũndũ Yeova ndaaũlwa ninyie.

Ĩtina wa kavinda, ve vainia weetawa Floyd wookie kĩsionĩ kya Orealla, na ambĩthĩie aitavany’a nyũmba kwa nyũmba. Yĩla wandavisye mũvango wa kwĩmanyĩsya Mbivilia, nĩneewie mũyo. Yĩla woonie ũu angũlilye, “Nĩ kyaũ kyatuma ũtana?” Namwĩie kana nĩnaminĩte mbulosua Ngai Endaa Twĩke Ata?, na nĩnambĩĩte kũsoma ĩvuku Ujuzi Uongozao Kwenye Uhai Udumuo Milele. * O na nĩnamũeleisye nĩkĩ naekie kwĩmanyĩsya. Floyd nĩwaendeeie kũmanyĩsya kĩlungu kĩla kyatialĩte kya ĩvuku Ujuzi, ĩndĩ ĩtina wa kavinda o nake nĩwatũmiwe akatavany’e  kĩsionĩ kĩngĩ. Ũu watumie nĩkosa ĩngĩ mũndũ wa kũmanyĩsya Mbivilia.

Ĩndĩ mwaka wa 2004, mavainia elĩ ma mwanya, ala nĩ Granville na Joshua, nĩmatũmiwe kĩsionĩ kitũ. Mambĩthĩie maitavany’a nyũmba kwa nyũmba. Yĩla mangũlilye kana nĩngwenda kwĩmanyĩsya, nĩnatanie. Namakũlilye mamanyĩsye ĩvuku Ujuzi kuma kĩlungu kya mbee. Nendaa nĩsisye ethĩwa memanyĩsya o maũndũ ala namanyĩĩtw’e nĩ ala maĩ mbee woo. Granville nĩwandavisye kana ve maũmbano meekawa kĩsionĩ. O na kau naminĩte myaka ta ĩkũmi ndauma mũsyĩ, nĩnendie kũthi maũmbanonĩ asu. Nĩ kana nĩvike Nyũmbanĩ ya Ũsumbĩ, Granville nĩwambilĩĩile kasululunĩ na akasukuma nginya vo.

Tũendeangĩe, Granville nĩwanthangaaisye nĩyĩandĩkĩthye Sukulunĩ ya Ũthũkũmi wa Kĩtheokulasi. Ambĩie-ĩ, “Ndũtonya kũthi, ĩndĩ no ũneene. Mũthenya ũmwe, ũkaumya ũvoo wa andũ onthe. Ndi na nzika kana ũkeeka ũu.” Ndeto syake nĩsyambĩkĩie vinya mũno.

Nĩnesie kwambĩĩa kũtavany’a vamwe na Granville. Ĩndĩ ndwaĩ ũndũ wĩ laisi kũthi kũtavany’a na kasululu nũndũ nzĩa mbingĩ kĩsionĩ kitũ syaĩ nthũku mũno. Kwoou namwĩie anzukumae nĩ kamiinĩ. Kĩu kyatethisye mũno. Twĩ Mwei wa 4, 2005, nĩw’o navatisiwe. Kavinda kanini ĩtina wa vau, ana-a-asa nĩmamanyĩisye kũtetheeasya mũvĩanĩ wa mavuku na wa wasya Nyũmbanĩ ya Ũsumbĩ.

Ĩndĩ mwakanĩ wa 2007, nĩtwakwatiwe nĩ ũndũ wa kũmakya mũno. Ĩthe wakwa aũmĩie mũno e na ĩsiwa na akw’a ĩtina wa mĩthenya mĩvũthũ. Mũsyĩ witũ wakũnĩkie mũno. Granville nĩwavoyie vamwe naitũ, na atũsomea maandĩko ma kũtũkiakisya. Myaka ĩlĩ ĩithela, nĩtwakũnĩkie ĩngĩ mũno yĩla Granville wakwie ĩtina wa ĩsiwa yĩla waendete nayo kũvota kĩw’ũnĩ.

Kakundi kaitũ kaĩ na kyeva kingĩ, na katiiwe kate na mũtumĩa. No mũtetheesya ũmwe tũ wa kĩkundi waĩ vo. Kĩkw’ũ kya Granville kyandinie mũno nũndũ twaĩ ndũũ vyũ. Nĩwandetheeasya mũno kĩ-veva na kĩ-mwĩĩ. Wakyumwa ũla waatĩĩe ĩtina wa kĩkw’ũ kyake, naĩ na kĩanda kya kũsoma tũlungu Ĩsomonĩ ya Mũsyaĩĩsya. Nasomie tũlungu twĩlĩ twa mbee nesa. Ĩndĩ ĩtina wa vau, nambĩĩa kũĩa. Naĩie weethĩa no numie ngyukwaanĩ.

Nesie kũkwata kavaa yĩla ana-a-asa kuma kĩkundi kĩngĩ mookie kũtetheesya kakundi kaitũ ka Orealla. O na ovisi wa ũvonge nĩwatũtũmĩie vainia wa mwanya weetawa Kojo. Nĩnatanie mũno yĩla inyia-akwa na mwanake mũinawa mambĩĩe kwĩmanyĩsya Mbivilia na mesa kũvatiswa. Na ĩndĩ Mwei wa 3, 2015, nĩnatw’ĩkĩthiw’e mũtetheesya wa kĩkundi. Ĩtina wa kavinda, nĩnaumisye ũvoo wakwa wa mbee wa andũ onthe. Sua ũsu nĩnalilikanile kĩĩ Granville wandavisye: “Mũthenya ũmwe, ũkaumya ũvoo wa andũ onthe. Ndi na nzika kana ũkeeka ũu.” Ũndũ ũsu watumie nĩtana mũno nginya netĩkya methoi.

Vulongulamu sya JW Broadcasting^® nitumĩte nĩmanya kana ve ana-a-asa na eĩtu-a-asa methĩawa na mathĩna ta makwa. Ĩndĩ o na kau nĩmethĩawa na mathĩna asu, mekalaa me atanu na nĩmeanĩasya maũndũ maingĩ. O nakwa ve o maũndũ mana ndonya kwĩanĩsya. Wendi wakwa wa kũtũmĩa kavinya konthe kala nĩ nako nĩmũthũkũme Yeova, nĩwatumie nosa ũvainia wa kĩla ĩvinda. Na twĩ Mwei wa 9, 2019, nĩnataviw’e ũndũ ndataĩĩe. Neeiwe kana nĩnĩnyuviwe nĩthĩwe mũtumĩa kĩkundinĩ kitũ kya atavany’a ta 40!

Nĩnĩmatũngĩaa mũvea ana-a-asa na eĩtu-a-asa endwa ala mamanyĩisye Mbivilia na mandetheesya nĩmũthũkũme Yeova. Na ũndũ ũla mũnene, nĩnĩtũngaa mũvea mũno nũndũ Yeova ndaaũlwa ninyie.