N nase na anu 1983. Na komésu, ami éra un mininu normal. Má kantu N faze 10 anu, N kumesa ta xinti txeu dór na nha korpu interu. Uns dôs anu dipôs, un dia di sédu N korda i N ka staba ta konsigi mexe. Pa más ki N tentaba, N ka konsigi mexe nhas pérna, i es staba sen forsa. Désdi kel dia, nunka más N ka anda. Nha prubléma di saúdi pô-m tanbê ka ta kria más. Oji, inda N ten altura di un mininu.

Dja N tinha alguns mês ki N ka sta saíba di kaza, kantu dôs Tistimunha di Jeová ba vizita-m. Sénpri ki un algen ta baba nha kaza, N ta tenta sukundiba. Má na kel dia, N seta pâpia ku kes dôs mudjer. Es kumesa ta pâpia di Paraízu, i N lenbra kuzê ki N obiba kantu N tinha sinku anu. Na kel ténpu, un misionáriu ki txomaba Jethro, ki ta viveba na Surinami, ta baba nos zóna un bês pa mês i el ta fazeba nha pai studu. Jethro ta trataba mi rei di dretu, i N gostaba txeu di el. Tanbê, nhas avó ta lebaba mi pa alguns runion di Tistimunhas di Jeová ki es ta fazeba na nos zóna. Nton, kantu Florence, ki éra un di kes Tistimunha di Jeová ki ba vizita-m, pergunta-m si N krê prendeba más, N fla-l sin.

Florence volta ku se maridu, Justus, i es kumesa ta faze-m studu. Nton, es odja ma N ka sabia lé i es djuda-m prende lé. Dipôs di un ténpu, N konsigi lé mi sô. Un dia, Florence ku Justus fla-m ma es diziginadu pa ba sirbi na Surinami. Má, na Orealla ka tinha ningen más pa faze-m studu di Bíblia. Má Jeová ka skese di mi.

Ka dura txeu, un pioneru ki txomaba Floyd txiga na Orealla. Timenti el staba ta prega na kes kaza di padja, el atxa-m. Kantu el oferese-m un studu di Bíblia, N kumesa ta ri. El pergunta-m: “Pamodi ki bu sta ta ri?” N splika-l ma dja N studaba bruxura O Que Deus Requer de Nós? i ma N kumesa ta studaba livru Conhecimento Que Conduz à Vida Eterna. * Tanbê N splika-l pamodi ki N para di studa. Floyd kontinua ta faze-m studu na livru Conhecimento, má dipôs el diziginadu pa ba sirbi na otu lugar. Más un bês N staba sen instrutor.

 Má na 2004, dôs pioneru spesial, ki txomaba Granville i Joshua diziginadu pa Orealla. Timenti es staba ta prega na kes kaza di padja, es atxa-m. Kantu es pergunta-m si N krê studaba Bíblia, N ri. N pidi-s pa es studa ku mi otu bês na livru Conhecimento désdi komésu. N kria odjaba si es ta inxinaba mi kes mésmu kuza ki kes otu instrutor inxina-m. Granville fla-m ma es staba ta faze runions na nha zóna. Dja tinha uns 10 anu ki N ka ta saíba di kaza, má N kria sistiba runion. Nton, Granville bai nha kaza, el pô-m na un karinhu di róda i el pintxa-m ti txiga Salon di Reinu.

Más tardi, Granville insentiva-m pa N partisipa na Escola do Ministério Teocrático. El fla-m: “Bu ka ta pode anda, má bu ta pode pâpia. N ten sertéza ma un dia bu ta ben faze un diskursu pa públiku.” Se palavras pô-m ta xinti kunfiansa.

N kumesa ta sai na pregason ku Granville. Má kes strada na nha zóna tinha txeu braku, i éra difísil anda na el ku un karinhu di róda. Nton, N pidi Granville pa pô-m na un karinhu di mô i pa el leba-m pa kes lugar. Kel-li da sértu. Na abril di 2005, N batiza. Poku ténpu dipôs, irmons trena-m pa N kuida di balkon di publikasons i di sistéma di son na kongregason.

Na 2007, nha pai móre na un asidenti di barku. Nha família fika txeu tristi. Granville faze orason ku nos i el konsola-nu ku txeu testu di Bíblia. Dôs anu dipôs, nu fika txeu tristi ku un otu disgrasa. Granville móre na un otu asidenti di barku.

Nos kongregason pikinoti staba tristi, sen ninhun ansion i sô ku un ajudanti di kongregason. Mórti di Granville due-m txeu, el éra un grandi amigu. Sénpri el ta djudaba mi ser amigu di Jeová i ten otus kuza ki N mesteba. Na runion, dipôs ki el móre, mi ki tinha leitura di Sentinéla. N konsigi lé kes dôs primeru parágrafu, má N kumesa ta txora i N ka konsigi para. N tevi ki sai di tribuna.

N kumesa ta xinti midjór kantu irmons di otu kongregason txiga na Orealla pa djuda-nu. Tanbê, Betel manda un pioneru spesial ki txoma Kojo pa ben sirbi na nos zóna. Pa nha alegria, nha mai i nha irmon más pikinoti kumesa ta studa i es batiza. Dipôs, na marsu di 2015, N diziginadu ajudanti di kongregason. Dipôs di un ténpu, N faze nha primeru diskursu pa públiku. Na kel dia, N lenbra di kuzê ki Granville flaba mi alguns anu antis: “N ten sertéza ma un dia bu ta ben faze un diskursu pa públiku.” N fika ta ri i ta txora pamodi N staba xeiu di gratidon.

Na prugramas di JW Broadcasting^®, N konxe stória di irmons ku irmans ki pasa pa situason sima di meu. Sikrê ku algun prubléma di saúdi, es ten un vida okupadu na sirbi Jeová i es é filís. Ami tanbê N ta konsigi faze alguns kuza. N krê daba Jeová tudu kel ki N ta podeba. Pur isu, N bira pioneru fíksu. Na setenbru di 2019, N tevi un grandi surpréza. Na kel mês N diziginadu pa ser ansion na nos kongregason, ki ten uns 40 publikador.

N ta agradese txeu kes irmon ku irmans ki studa ku mi i ki djuda-m na nha trabadju pa Jeová. I más inportanti inda, N ta agradese Jeová txeu pamodi el ka skese di mi.