Xinyoʼlaak saʼ li chihabʼ 1983. Usta yaal naq nintaw chaq rusilal linyuʼam, abʼan naq xinket 10 chihabʼ, xinʼok rekʼankil naq qʼaxal ra linjunxaqalil. Naq ak xnumeʼk wiibʼ chihabʼ, saʼ jun kutan naq xʼajk wu inkʼaʼ chik xinruuk rekʼasinkil wibʼ. Usta xinyal rekʼasinkil li waʼ, abʼan inkʼaʼ xinruuk xbʼaanunkil. Chalen saʼ li kutan aʼan inkʼaʼ chik xinruuk chi bʼeek. Ut saʼ xkʼabʼaʼ li yajel aʼan inkʼaʼ chik xinkʼiik, joʼkan naq chanchanin jun li chʼinaʼal.

Naq ak xnumeʼk wiibʼ oxibʼ po, wiibʼ li qanaʼchin aj testiiw re li Jehobʼa xooʼeʼrulaʼani. Junelik ninmuq chaq wibʼ chiruhebʼ li ulaʼ, abʼan saʼ li kutan naq xooʼeʼrulaʼani ebʼ li qanaʼchin aʼan, xinʼaatinak rikʼinebʼ. Naq yookebʼ chi aatinak wikʼin chirix li Chʼinaʼusil Naʼajej, xnaqʼ saʼ inchʼool naq, naq wank oobʼ chihabʼ we, laj Jethro jun aj puktesinel li nataqlaak saʼ jalan chik tenamit, naʼelk chaq toj Surinam jun sut chiru li po re rulaʼaninkil linkʼalebʼaal ut re xtzolbʼal linyuwaʼ chirix li Santil Hu. Sa ninkʼam wibʼ rikʼin laj Jethro xbʼaan naq chaabʼil xnaʼlebʼ wikʼin. Joʼkan ajwiʼ, linnaʼchin ut linyuwaʼchin wank sut nikineʼxkʼam saʼebʼ li chʼutam li nekeʼxbʼaanu ebʼ laj testiiw re li Jehobʼa saʼ li qakʼalebʼaal. Joʼkan bʼiʼ, naq jun rehebʼ li qanaʼchin, aʼ li xFlorence, kixpatzʼ we ma nawaj xnawbʼal xkomon li naʼlebʼ chirix li Santil Hu xinye re, naq joʼkan.

Moqon li xFlorence rochbʼen laj Justus, li xbʼeelom, xeʼwulak wiʼ chik chi wulaʼaninkil ut xeʼok intzolbʼal chirix li Santil Hu. Saʼ xkʼabʼaʼ naq xeʼxkʼe reetal naq inkʼaʼ ninnaw ilok ru hu, xeʼxkʼut chiwu chanru xbʼaanunkil. Ut naq xnumeʼk wiibʼ oxibʼ po xintzol ilok ru hu. Saʼ jun kutan xeʼxye we naq xeʼtaqlaak chi puktesink saʼ li tenamit Surinam. Qʼaxal kirahoʼk saʼ linchʼool xbʼaan naq maajun chik aj Testiiw kikanaak Orealla li truuq intzolbʼal chirix li Santil Hu. Abʼan makachʼin naq kisahoʼk saʼ inchʼool naq xinkʼe reetal naq li Jehobʼa inkʼaʼ xinxtzʼeq chirix xchʼool.

Chirix chik aʼan, kikʼulunk laj Floyd jun aj kʼamolbʼe saʼ li puktesink. Saʼ jun kutan xinrulaʼani naq yook chi puktesink chirekabʼlal. Naq xyeechiʼi intzolbʼal chirix li Santil Hu, xinseʼek. «Kʼaʼut naq nakatseʼek?», chan we. Xinye re, naq ak xintzol li hu Kʼaru naxpatzʼ qe li Yos? ut naq ak xintikibʼ xtzolbʼal li tasal hu El conocimiento que lleva a vida eterna. * Xinchʼolobʼ ajwiʼ re kʼaʼut naq xinkanabʼ tzolok chirix li Santil Hu. Xinchoy xtzolbʼal li tasal hu Conocimiento rikʼin laj Floyd, abʼan kitaqlaak ajwiʼ aʼan chi kʼanjelak chiru li Yos saʼ jalan chik naʼajej. Maaʼani wiʼ chik kikanaak re intzolbʼal.

 Abʼan saʼ li chihabʼ 2004 xeʼwulak saʼ linkʼalebʼaal laj Granville ut laj Joshua, wiibʼ aj kʼamolbʼe saʼ li puktesink li nekeʼxbʼaanu 130 hoor. Nekeʼpuktesink chaq chirekabʼlal joʼkan naq xineʼxtaw. Naq xeʼxpatzʼ we ma nawaj tzolok chirix li Santil Hu, xinseʼek. Xinye rehebʼ naq nawaj wiʼ chik xtzolbʼal li tasal hu Conocimiento. Xwaj xnawbʼal ma juntaqʼeet li naʼlebʼ teʼxkʼut chiwu joʼ xeʼxkʼut chiwu li wiibʼ chi hermaan li xeʼtzolok chaq we. Kixye we laj Granville naq saʼ linkʼalebʼaal naʼuxmank ebʼ li chʼutam. Usta jayeʼq lajeebʼ chihabʼ tana maajiʼ chik ninʼelk saʼ ochoch, xwaj xik. Joʼkan naq laj Granville kikʼulunk saʼ ochoch ut xinxkʼam toj saʼ li Chʼutlebʼaal Kabʼl saʼ jun li tem li naru xbʼeresinkil.

Moqon chik, laj Granville kixwaklesi inchʼool re tzʼaqonk saʼ li tzolok chirix xpuktesinkil li chaabʼil esilal. Kixye we: «Yaal naq wank jun li rahilal saʼ laajunxaqalil, abʼan nakatruuk chi aatinak. Saʼ jun kutan taakʼe junaq li seeraqʼ. Yaal li ninye aawe». Kʼajoʼ naq xwaklesi ut xkʼojobʼ inchʼool li raatin.

Xinʼok chi puktesink rochbʼen, abʼan kʼajoʼ xyibʼal ru ebʼ li bʼe li wank saʼ linkʼalebʼaal. Joʼkan naq moko ninruuk ta xik saʼ li tem li naru xbʼeresinkil. Joʼkan bʼiʼ, xinye re naq chinxkʼamaq saʼ jun li kareet, ut xqataw rusilal xbʼaanunkil aʼin. Kikubʼeek inhaʼ saʼ li po abril 2005. Chirix chik aʼan, ebʼ li hermaan xeʼxkʼut chiwu chanru xjekʼinkil ebʼ li hu saʼ li chʼuut ut chanru roksinkil li kʼanjelobʼaal re xyaabʼ kuxej.

Ra xyeebʼal, abʼan saʼ li chihabʼ 2007, linyuwaʼ kitʼaneʼk saʼ haʼ ut kixtochʼ ribʼ chi kaw chiru li xmotor li jukubʼ joʼkan naq kikamk. Ebʼ linkomon ut laaʼin, kʼajoʼ naq kirahoʼk saʼ qachʼool. Laj Granville kitijok saʼ qakʼabʼaʼ ut kixkʼojobʼ qachʼool rikʼin li Santil Hu. Wiibʼ chihabʼ chirix aʼan, xqakʼul wiʼ chik jun li nimla rahilal: li xjukubʼ laj Granville kisobʼeʼk rubʼel haʼ ut aʼan kikamk.

Tik xchʼina junes kikanaak li qachʼuut. Maajun chik li cheekel winq ut jun ajwiʼ laj tenqʼanel saʼ li chʼuut. Qʼaxal ra kiwekʼa naq kikamk laj Granville, xbʼaan naq aʼan chaq jun li wamiiw li junelik xinxtenqʼa rikʼin li naʼajmank chiwu saʼ linpaabʼal ut saʼ linjunxaqalil. Saʼ li xbʼeen chʼutam li xqabʼaanu naq ak kikamk chik laj Granville, laaʼin xintzʼaq chi xyaabʼasinkil li junjunq chi raqal re li Tzolok chirix li hu Laj Kʼaakʼalehom. Xinruuk xyaabʼasinkil li xbʼeen ut li xkabʼ raqal, abʼan inkʼaʼ chik xinkuy wibʼ ut xinʼok chi yaabʼak. Ut saʼ xkʼabʼaʼ naq inkʼaʼ xinkanabʼ yaabʼak, inkʼaʼ xinchoy xyaabʼasinkil li hu.

Xʼok chi sahoʼk saʼ inchʼool naq wiibʼ oxibʼ li hermaan re jalan chik chʼuut xeʼchalk Orealla re qatenqʼankil. Joʼkan ajwiʼ, li qamolam kixtaqla chaq laj Kojo jun aj kʼamolbʼe saʼ li puktesink li naxbʼaanu 130 hoor. Kʼajoʼ naq kisahoʼk saʼ inchʼool naq linnaʼ ut li wiitzʼin xeʼok chi xtzolbʼal li Santil Hu ut xeʼkubʼeek xhaʼ. Saʼ li po marzo 2015, xinxaqabʼaak joʼ aj tenqʼanel saʼ li chʼuut. Chirix chik aʼan, xinkʼe li xbʼeen inseeraqʼ saʼ li chʼutam re xraqik xamaan. Saʼ li hoonal aʼan xinjultika chi sa saʼ linchʼool li kixye we laj Granville junxilaj : «Saʼ jun kutan taakʼe junaq li seeraqʼ. Yaal li ninye aawe».

Saʼ xkʼabʼaʼ li tustukil kʼanjel re JW Broadcasting^®, ninnaw li resil xyuʼam wiibʼ oxibʼ li hermaan li nekeʼxkʼul joʼ ninkʼul laaʼin. Usta wank jun li rahilal saʼebʼ li xjunxaqalil, kaw nekeʼkʼanjelak chiru li Yos ut sahebʼ saʼ xchʼool. Laaʼin ajwiʼ ninruuk xbʼaanunkil wiibʼ oxibʼ li naʼlebʼ. Saʼ xkʼabʼaʼ naq xwaj xbʼaanunkil chixjunil li wank saʼ wuqʼ saʼ li xkʼanjel li Jehobʼa xinʼok joʼ aj kʼamolbʼe saʼ li puktesink li naxbʼaanu 70 hoor. Ut kisach inchʼool naq saʼ li po septiembre 2019 xineʼxxaqabʼ choʼq cheekel winq saʼ linchʼuut bʼarwiʼ wank tana 40 aj puktesinel.

Qʼaxal ninbʼanyoxi rehebʼ li hermaan li xeʼxkʼut chiwu li yaal ut xineʼxtenqʼa chi kʼanjelak chiru li Jehobʼa. Abʼan li qʼaxal ninbʼanyoxi aʼan naq li Jehobʼa inkʼaʼ xinxtzʼeq chirix xchʼool.