Әз дь сала 1983-да һатьмә буйине. Гава әз бьчʹук бум, сьһʹәта мьн баш бу, ле гава әз 10 сали бум, мьн дь бәдәна хԝәда ешәкә гьран тʹәхмин кьр. Ԝәкә 2 сал шунда, гава әз сьбәһе һʹьшйар бум, мьн нькарьбу льнгед хԝә бьльвиньм. Жь ԝе рʹожева, әз нькарьм бьмәшьм. Ӧса жи, нәхԝәшийа мьн буйә сәбәб кӧ бәжна мьн бь ԛаси бәжна зарʹокәки майә.

Паши кӧ әз чәнд мәһа ль мале мам, дӧ Шәʹдед Йаһоԝа һатьн мала мә. Гава меван дьһатьн, мьн һәртʹьм дьхԝәст хԝә вәшарта, ле ԝе рʹоже, мьн тʹәви дӧ жьнька хәбәр да. Гава ԝана бәʹса щьнәте кьр, тьштәки кӧ мьн бьһистьбу гава әз ԝәкә 5 сали бум, һат бира мьн. Һьнге, мисйонерәки бь наве Щетро, йе кӧ ль Суринаме дьжит, мәһе щарәк дьһат гӧнде мә у Кʹьтеба Пироз баве мьн һин дькьр. Щетро мәрьвәки пʹьрʹ дьлгәрм бу, у мьн ԝи пʹьрʹ һʹьз дькьр. Ӧса жи, кальк у пирька мьн әз дьбьрьм һьнә щьвинед Шәʹдед Йаһоԝа, йед кӧ ль гӧнде мә дьһатьн дәрбаз кьрьн. Ләма, гава Флоренсйе – йәк жь жьнькед кӧ ԝе рʹоже һатьн сәрледана мьн – пьрси кʹа әз дьхԝазьм һе зедә әʹламәти бьстиньм, мьн гот «Әре».

Флоренс тʹәви мере хԝә Щустус диса һатә бал мә, у ԝана тʹәви мьн һинбуна Кʹьтеба Пироз дәстпекьр. Гава ԝана фәʹм кьр кӧ әз нькарьм бьхуньм, ԝана али мьн кьр кӧ әз хԝәндьне һин бьбьм. Ԝәхт шунда, мьн ида дькарьбу бе аликʹарийе бьхуньм. Рʹожәк, ԝана мьнрʹа гот кӧ әԝ һатьн кʹьфш кьрьн кӧ ль Суринаме хьзмәт бькьн. Чь һʹәйф ә кӧ ль Ореаллайе тʹӧ кәс тʹӧнәбу кӧ һинбуна мьн бәрдәԝам бькә. Әз пʹьрʹ ша мә кӧ Йаһоԝа әз диса жи бир нәкьрьм.

Пʹьрʹ ԝәхт дәрбаз нәбу кӧ пешәнгәки бь наве Флойд һат Ореаллайе, у ԝәхта кӧ әԝи мьзгин мал бь мал бәла дькьр, әԝи әз дитьм. Гава әԝи пьрс кьр кʹа әз дьхԝазьм Кʹьтеба Пироз һин бьбьм йан на, әз кʹәнийам. Әԝи жь мьн пьрси: «Тӧ чьма дькʹәни?» Мьн гот кӧ мьн ида брошура бь наве «Хԝәде Чь жь Мә Дәʹԝа Дькә?» хьлаз кьрьбу у кʹьтеба «Занәбун кӧ Дьбә бәрбь Жийина Һʹәта-Һʹәтайе» * дәстпекьр кьрьбу. Мьн ԝирʹа зәлал кьр кӧ һинбуна  мьн чьма нивида ма. Мә әв кʹьтеб хьлаз кьр, ле паше, Флойд жи һат шандьн щики дьн. Әз диса бе дәрсдар мам.

Дь сала 2004-да, дӧ пешәнгед мәхсус йед бь наве Гранвил у Щошуа һатьн кʹьфш кьрьн кӧ ль Ореаллайе хьзмәт бькьн. Ԝәхта кӧ ԝан мал бь мал хьзмәт дькьр, ԝан әз дитьм. Гава ԝана пьрс кьр кʹа әз дьхԝазьм Кʹьтеба Пироз һин бьбьм йан на, әз кʹәнийам. Мьн дьхԝәст кʹьтеба «Занәбун» жь дәстпекева леколин бькьм. Мьн дьхԝәст бьдита кʹа тьштед кӧ әԝ һин дькьн, бь тьштед кӧ әз бәре һин бубум, әʹйни нә йан на. Гранвил мьнрʹа гот кӧ ль гӧнд щьвин тен дәрбаз кьрьн. Әз незики 10 сала жь мале дәрнәкʹәтьбум, ле мьн дьхԝәст кӧ һәрʹьм щьвине. Ләма Гранвил әз бь әʹрәбәйа сәԛәта бьрьм Ода щьвате.

Ԝәʹдә шунда, Гранвил әз һелан кьрьм кӧ әз ль Мәкʹтәба Хьзмәта Теократик готара бьхуньм. Әԝи гот: «Рʹаст ә, тӧ нькари бьмәши, ле тӧ дькари хәбәр ди. Рʹожәке, тӧйе готара бьхуни. Әз сәд сәләфи баԝәр ьм». Готьнед ԝи мерхаси да мьн.

Мьн тʹәви Гранвил бәлакьрьна мьзгине дәстпекьр. Ле бәле, рʹейед гӧнде мә һаԛас хьраб бун кӧ мьн нькарьбу бь әʹрәбәйа сәԛәта рʹева һәрʹьм. Ләма мьн жь Гранвилрʹа гот кӧ бьра әԝ мьн ль дәстгәрәке бьдә рʹуньштьн у мьн бьгәрʹинә. Бь ви аԝайи, мьн ида бь рʹьһʹәти хьзмәт дькьр. Ль мәһа Нисане йа сала 2005, әз һатьм ньхӧмандьн. Паше, бьра әз һин кьрьм кӧ әз ль әʹдәбйәтед щьвате у ль система дәнг йа Ода щьвате щабдар бьм.

Дь сала 2007-да, баве мьн дь ԛәзикеда мьр. Малбәта мә пʹьрʹ хәмгин бу. Гранвил тʹәви мә дӧа кьр у бь рʹезед Кʹьтеба Пироз бәрдьли да мә. Ле сәд һʹәйф кӧ 2 сал шунда, ԛәйька Гранвил ноԛ бу, у әԝ жи мьр.

Шина щьвата мәйә бьчʹук, гьран бу. Ида тʹӧ рʹуспи тʹӧнә бу, у тʹәне бәрдәстики щьвате һәбу. Мьн жь Гранвил пʹьрʹ һʹьз дькьр. Әԝи жь һәр алийава али мьн кьрьбу. Ль щьвина пешьн паши мьрьна ԝи, хԝәндәване «Бьрща Ԛәрәԝьлийе» әз бум. Паши кӧ мьн дӧ абзас хԝәнд, әз һаԛас гьрийам кӧ мьн нькарьбу бьхуньм.

Гава бьред жь щьватәкә дьн һатьн Ореаллайе кӧ али мә бькьн, әз ша бум. Ӧса жи, филиал пешәнгәки мәхсус бь наве Кожо шанд бал мә. Дийа мьн у бьре мьни бьчʹук жи һинбуна Кʹьтеба Пироз дәстпекьрьн у һатьн ньхӧмандьн. Ль мәһа Адаре йа сала 2015, әз бум бәрдәстийе щьвате. Чәндәк шунда, мьн щара пешьн готар хԝәнд. Ԝе рʹоже, мьн бь шькьрдари ани бира хԝә кӧ чәнд сал бәре, Гранвил мьнрʹа чь готьбу: «Рʹожәке, тӧйе готара бьхуни. Әз сәд сәләфи баԝәр ьм».

Бь сайа бәрнамед JW Бродкастинг, мьн дитийә кӧ һʹале һьнә хушк у бьра мина һʹале мьн ә. Диса жи, әԝана бәхтәԝар ьн, у дь хьзмәтеда пешдачуйи нә. Әз һе дькарьм һьнә тьшта бькьм. Мәсәлә, жь бәр кӧ мьн дьхԝәст чь жь дәсте мьн те бона Йаһоԝа бькьм, әз бумә пешәнге һәртʹьм. Ль мәһа Илоне йа сала 2019, мьн хәбәрәкә пʹьрʹ хԝәш станд. Ль щьвата мә, йа кӧ теда ԝәкә 40 мьзгинван һәнә, әз ԝәк рʹуспи һатьм кʹьфш кьрьн.

Әз жь хушк у бьред һежа, йед кӧ тʹәви мьн һинбуна Кʹьтеба Пироз дәрбаз дькьр у али мьн дькьр кӧ әз мьзгине бәла бькьм, пʹьрʹ рʹази мә. У әз жь дьл шькьрдар ьм кӧ Йаһоԝа әз бир нәкьрьмә!