Nasemekelwe mu 1983. Byo najinga mwanyike, najinga na butuntulu bwa mubiji bwawama, bino byo nafikizhe myaka jikumi, natendekele kumvwa mubiji yense kukola. Byo papichile myaka ibiji, juba jimo lukelo byo nabuukile, nakankelwe kwenda. Naesekele na ngovu kuba’mba ñende, bino nakankelwe. Kufumatu jo ja juba, kechi naendelepo jibiji ne. Kino kikola kyandengejile ne kuleka kukoma. Kufika ne lelo jino, njitu nobe mwana wa mucheche.

Pa bañondo bacheche, naikelengatu mu nzubo kufuma juba jo nakolelwe, kabiji juba jimo, Bakamonyi ba kwa Yehoba babiji baishile pa nzubo. Javula pa nzubo inge paiya benyi, nafyamanga, bino pa jije juba kechi nafyamine ne. Byo baambile pa Paladisa, bamvulwilemo kintu kyo naumvwinepo saka nji na myaka itanu. Pa kyokya kimye, mishonale waikalanga mu Suriname waiyanga pa muzhi wetu jimo pa ñondo na kufunjisha batata Baibolo. Ba Jethro bammweshanga bingi kifyele. Nebatemenwe bingi. Kabiji bimye bimo bankambo bansendangako ku kupwila kwa Bakamonyi kwaikelanga monka mu muzhi wetu. Onkao mambo, umo pa boba banabakazhi babiji baishile wa jizhina ja Florence byo angipwizhe inge kya kuba nakebelenga kufunjilapo byavula, nakumbwile’mba, ee, mwane.

Ba Florence baishile ja bubiji pamo ne bamwata wabo, abo ba Justus kabiji batendekele kumfunjisha Baibolo. Byo bamwene’mba kechi nayukile kutanga ne, bamfunjishe kutanga. Mu kuya kwa kimye, natendekele kwitangila amiwa mwine. Juba jimo, bano ba mulume ne mukazhi bambuujile’mba bebatuma kuya na kwingijila ku Suriname. Kyataminekotu kyajinga kya kuba’mba, mu Orealla kechi mwajingapo muntu wa kumfunjisha Baibolo ne. Bino kyawaminekotu ke kya kuba’mba, Yehoba kechi wandubileko ne.

Kechi pabanjile ne, mu muzhi wa Orealla mwaishile painiya wa jizhina ja Floyd kabiji wantaaine kimye kyo ayilenga na kusapwila ku nzubo ku nzubo. Byo angipwizhe pa kufunda Baibolo, namwemwesejile na lusekelo. Wangipwizhe’mba, “Ki ka kimulengela kumwemwesela?” Namubuujile namba napwishishe kufunda mu buloshuwa wa kuba’mba Nanchi Lesa Ukebaka Kwiatweba? kabiji natendekele kufunda mu buku wa Kuyuka Kutangijila ku Bumi bwa Myaka. * Nalumbulwile kyalengejile’mba ndeke kufunda. Ba Floyd bamfunjishe bitango byashajileko mu buku wa Kuyuka, bino pa kupitapo kimye, nabo bebatumine ku mpunzha ikwabo. Nashajile jikwabo kwa kubula ba kumfunjisha Baibolo.

 Nangwa byonkabyo, mu 2004, bapainiya beikajila babiji, ba Granville ne ba Joshua, bebatumine kwiya na kwingijila mu Orealla. Byo basapwijilenga ku nzubo ku nzubo bantaaine. Bangipwizhe inge kya kuba nakebelenga kufunda, namwemwesejile. Nebabuujile’mba mbena kukeba kufunda buku wa Kuyuka kufumatu ko atatwila. Nakebelenga kuyuka inge bakonsheshe kufunjisha byonka byamfujishenga bakwabo. Ba Granville bambuujile’mba banengezhezhe kupwila mu muzhi. Nangwa kya kuba kechi nakyendelepo kufuma pa nzubo pa myaka jikumi ne, bino nakebeshe kutanwako. Onkao mambo, ba Granville baishile na kunshikula ne kumbika pa kakinga ka bilema ne kunsenda ku Nzubo ya Bufumu.

Mu kuya kwa kimye, ba Granville bantundaikile kunembesha mu Sukulu wa Lufunjisho lwa Mwingilo wa Lesa. Baambile’mba: “Mwi bakilema, bino mwakonsha kwamba. Juba jimo, mukamba ne jashi ja mvula bantu. Kechi mukakankalwa ne.” Bino byambo byandengejile kuleka kwilengulula.

Natendekele kwingijila pamo ne ba Granville mwingilo wa kusapiwla. Pano bino, mikwakwa yavula mu uno muzhi kechi yawama kwendamo na kakinga ka bilema ne. Onkao mambo, nalombele ba Granville kumbika mu ngolofwana ne kwiyendesha pa kuya na kusapwila. Kwingijisha ngolofwana kwaingijile bingi bulongo. Nabatizhiwe mu April 2005. Byo papichiletu moba acheche, balongo bamfunjishe bya kwingijila ku mabuku ne ku biñambañamba bya kwambilamo mu Nzubo ya Bufumu.

Mu 2007 batata bafwile mu mapuso na bwato. Kisemi kyetu kyajinga na bulunda bukatampe. Ba Granville betulombejileko ne kwitubuulako byambo bya lutekenesho biji mu Baibolo. Byo papichile myaka ibiji, kitukankamikile bingi, ba Granville nabo bafwile mu mapuso na bwato.

Kipwilo kyetu kyanjingatu kicheche kyashajile kwa kubula mukulumpe mu kipwilo, twajingatu na nkwasho umo. Lufu lwa ba Granville lwankolele bingi ku muchima mambo bajinga balunda nami ba pa muchima. Bankwashishe kwikala na bulunda bwakosa ne Yehoba ne kunkwasha mu bintu byavula bya mu bwikalo. Pa kupwila kwalondejilepo kufuma kimye kyo bafwile, yami najinga pa mutanchi wa kutanga mafuka pa Lufunjisho lwa Kyamba kya Usopa. Natangiletu bulongo mafuka atanshi abiji, bino ko kyakayanga natendekele kujila kabiji mipolo yapichilengatu. Bamfumishepotu pa mutuntamo.

Natendekele kukasuluka kimye balongo bafumine pa kipwilo kikwabo kyo baishile na kwitukwasha mu Orealla. Kabiji ofweshi wa musampi watumine ba Kojo, bapainiya beikajila. Kintu kyandetejile lusekelo ke kya kuba’mba ba mama ne nkasami wamulume batendekele kufunda Baibolo kabiji babatizhiwe. Kepo mu March 2015, bantongwele kwikala nkwasho mu kipwilo. Mu kuya kwa kimye, naambile jashi ja mvula bantu jitanshi. Pa jo ja juba, najinga na lusekelo kabiji najijile ne mipolo pa kuvuluka byambuujile ba Granville amba: “Juba jimo, mukamba ne jashi ja mvula bantu. Kechi mukakankalwa ne.”

Kutamba mitanchi ya pa JW Broadcasting^® kwandengela kumona Bakamonyi bakwabo baji mu lukatazho lwipasha na lo nji nalo. Bino nangwa kya kuba balemana, babena kuba bintu byavula ne kwikala bwikalo bwa lusekelo. Ne amiwa mbena kuba bintu byavula bingi. Kukebesha kwingijila Yehoba papelela bulume bwami kwantundaikile kwikala painiya wa kimye kyonse. Kabiji mu September 2019 natambwijile sawakya wawama bingi ye nabujilenga kuketekela. Mu uno ñondo, bambuujile’mba bantongola kwikala mukulumpe mu kipwilo kyetu kyajinga na basapwishi kukila pa 40.

Nsanchila bingi balongo ne banyenga bamfunjishe Baibolo ne kunkwasha kwingila bulongo mwingilo wa Lesa. Kyakila pa byonse, mbena kusanchila bingi Yehoba mambo kechi wandubileko ne.