O wɔsi 1983 niŋ ya veluŋ ni. Mɛɛ nda velu ya, I waŋnuŋ kɛndiaa nyɛkɛndɛi. Kɛ mɛɛ ya fuuluu wɔsilaŋ tɔ, mi dialloŋ kpou kandu ya nɛiyo. Wɔsilaŋ la tiɔɔŋ okoŋ kɔɔli, mɛɛ ya tendu o luaaŋ idii pilɛ, I nɔla mi chɛŋ o kpele le. Mi kindi kindiŋ le chɔnɔŋndo kɛ pelei bɛɛ I nɔla mi kpeŋa le. Chɔŋ niŋ a paaleleŋ mbo kua kɛ, I tiu lɛ ba le mi kuɛ le. Mi naa bii ya wo tosa I hiu lɛ lachi a hindɔɔ le. Hali suŋ suŋ bɛɛ, wana che ya pɛ aa poombɔɔ ya cho wɔ ni.

Mɛɛ ya chii paŋgoŋ tiŋ chiɛɛniŋ a naa hoo, mi Seiyaa Chɛhowaa a ŋiɔɔŋ huŋ o naalo bɛɛ. Te mialla ndaa hiŋ pɛ paandu, mi yaa veŋnuŋ. Kɛ paaleleŋ, mi chɛl mi waŋ laanduaa kaŋ suaa o ya lo. Mɛɛ nda wa ya tɛɛsiallo a Kpele Hɛnɛkiɔɔ okɔɔ, mi loonuŋ a nyɛ ya tuei niŋ paandu wo mɛɛ ya wa wɔsilaŋ la ŋuɛɛnu. A teleŋ koŋ, misiɔnalueenɔ pilɛ wa Suluinam diolaŋ aa Chɛtulo. Mi ndoo hiŋ finya nuu Baabuiyo pɛɛkoo o sɔndɔkɔlɔ naa lepilɛ o paŋgei niŋ. Mi Chɛtulo ndoo bii ya nyɛkɛndɛi nduyɛ, ya bɛɛ yaa kaala ndu bɔɔ. Mi Seiyaa Chɛhowaa ndaa bii vɛlɛ bɔŋaŋndaŋ o sɔndɔkɔlɔ naa a teleŋ koŋ. Mi finya ni mamaa a mama nuu ndaa kuɛ a ya o bɔŋaŋndaŋ lapum. Lelaŋ mɛɛ waŋ laanduaa kaŋ opilɔɔ Fulɔluɛŋ nyuna ya te I yeema pɛ mi pɛɛku Baabuiyo, mi chɛl.

Mɛɛ Fulɔluɛŋ miiŋgu, mbo huŋ teleŋ cheleŋ nda Chɔsitɔɔ pɔnɔ ndɔ. Nduyɛ, ma kandu Baabuiyo pɛɛkoo a ya. Mɛɛ nda sina maa I chiee diomndaŋ veeloo le, ma pɛɛku ya. Mɛɛ teleŋ tiŋ hiou, mi kandu diomndaŋ veeloo a ba ni. Paale pilɛ, mi pɔnɔɔ a lanɔɔ hoo dimulla maa a yɔŋ nda Suluinam le yooŋgu kɛndɔɔ dimioo. Mi tambu kɔl tau kanifuule, wana cheleŋ ve lɛ Oliala le mbo hiou lachi a ya Baabuiyo pɛɛkoo le. Kɛ Chɛhowa puɛɛnuŋ a ya okɔɔ kposoŋ te.

Mɛɛ nda kuɛ, nyɔɔ viu bɛɛ le ma yɔŋ vɛlɛ kɔɔfanɔ cheleŋ Oliala diolaŋ Fulɔid. Paale pilɛ, o wa yooŋgu kɛndɔɔ dimioo chiɛiyo a chiɛiyo mbo komalla. Mɛɛ o nyuna ya te I yeema pɛ mi pɛɛku Baabuiyo, mi mam muɛɛŋ. Mbo nyuna ya aa: “Le yɛɛ ŋ cho yɛ mamɔɔ?” Mi dimul ndu maa I chii niŋ yauwo hoo pɛɛku What Does God Require of Us? Nduyɛ mi kandu o pilɔɔ Knowledge That Leads to Everlasting Life. * Mi chɔm ndu le sabu ya cho lɛ pɛɛku le wo. Mi Fulɔid siou ya pɛɛku yau diiŋ ndɔ ya kandu koŋ pɛɛkoo wo. Kɛ nyɔɔ viu le ma yɔŋ ndu vɛlɛ naa cheleŋ. Ii nɔ lɛ vɛlɛ wana le ya Baabuiyo pɛɛku le.

 O wɔsi 2004 niŋ, ma yɔŋ kɔɔfaa teŋgeŋnda o naalo Oliala chiee, Gulaŋvel a Chɔɔsuaa. Nda bɛɛ wa yooŋgu kɛndɔɔ dimioo chiɛiyo a chiɛiyo ma komalla. Mɛɛ nda nyuna ya te I yeema pɛ mi pɛɛku Baabuiyo, mi mam muɛɛŋ. Mi dimul nda le ma kandu ya vɛlɛ pɛɛkoo yau diiŋ ndɔ yaa chii niŋ koŋ pɛɛku wo. Yaa yeema mi sina te nyɛ nda cho ya pɛɛku wo cho wa nyɛ pilɛ a nyɛ Fulɔid a Chɔsitɔɔ waa pɛɛku ya wo. Mi Gulaŋvel dimulla maa a kandu bɔŋaŋndaŋ biyɔɔ o sɔndɔkɔlɔ naa. Mi che bɛɛ ndoo chua niŋ suɛi wɔsila tɔ yaa kue ba ba le, kɛ yaa yeema mii kuɛ o baŋaŋndo. Le hei, mi Gulaŋvel huŋ kɛsi ya o kandu namtaa niŋ miŋ kua o Toŋgo leMasaa.

Mɛɛ teleŋ tiŋ hiou, mi Gulaŋvel dɛɛniaa ya le mi yɔŋguŋ o Sukuu Mandaa iMɛlɛkayaa. Mbo dimulla aa: “Mi che bɛɛ namtanɔɔ ŋ cho ni, kɛ a tiuba ma soo. O wa niŋ o lepala niŋ ma yɔŋgu suɛi luŋnde. Keŋ nɔ le yɔŋnɔŋndo.” Mi kɔl dɛɛniaa o ke ya hoo wo luei ya yoomuaŋ tau.

Mi kandu yooŋgu kɛndɔɔ dimioo naa Kulaŋvel. Kɛ kandu namtaa ndoo pala bɔɔ nyindɔɔ o sɔndɔkɔlɔ naa. Kanifuule, nɛilaŋ laa niŋ lapi le. Lelaŋ, mi dimul Kulaŋvel le mbo wou ya o wiibayɛiyo (buluvɛtioo) niŋ mbo wa ya nyindɔɔ. I wa tɛtɛlɛ le wiibayɛiyo nyindɔɔ mbo hiau kandu namtaa. Mi sɔla yiŋɔɔ a Nyaakuɛiyo wɔsi 2005. Mɛɛ ya yiŋ, mi puaapiliaa pɛɛku ya waltaŋ lapum o kundaa niŋ. Ma pɛɛku ya le wallo tosaa o fondaŋ layauwo, a o maasii ŋchondoo.

Kɛ mi kɔl tambɛiyo komalla vɛlɛ o wɔsi 2007 ve niŋ. Finya nuu wa kɔlaŋ o dɛndɛ mamɛŋndo niŋ mi kpundɔɔ komal ndu. Nduyɛ nyɔɔ viu bɛɛ le mbo wu. Mi kɔltaŋ la laasiaŋ naa kpou mɛɛ kɛkɛ sɔla piɔmndo. Mi Kulaŋvel ndoo piɛi a naa latulu nduyɛ mbo chɔm naa bolii Baabui dɛɛniaa naa kɔllo ve. Mɛɛ wɔsioŋ hiou ŋmuuŋ okoŋ kɔɔli, mi i cheleŋ del vɛlɛ naa choo. Kulaŋvel bɛɛ lo kɔlaŋ o dɛndɔɔ niŋ mbo lo o peelo.

Mɛɛ Kulaŋvel sɔla piɔmndo, mi kunda naa bii mɔnɛi tau. Ŋ ve a bɔɔ le, nduyɛ naŋ nɔ lɛ bɛndu kunda le mɛɛ buɛi malalaŋndo opilɛ. Piɔm Kulaŋvel wo chuu ya bɔɔ kɔl tambɛiyo. Chaaŋ ni kɛndɛ kɛndɔɔ o wa ni. Ndu wa ya malaa ni le mi nɔ chaŋyɛi kpɛɛluŋnde a Mɛlɛka, nduyɛ mi ndoo ke ya nyɛm ya hau ba woŋ ŋtiŋ. Mɛɛ naŋ kuɛ o baŋaŋndo o piɔm ndɔɔ kɔɔli, ma dimulla le mi veelu diomndaŋ o Bandu Mɛŋgɛlaa niŋ. Mɛɛ ya chii diomndaŋ veelu o pɛlta tiɔɔŋnda taselaŋ niŋ, mi kandu chaŋndo. Mɛmiaŋ ma wa ya tolɔɔ pulaa pulaa okoŋ, ma huŋ faŋa ya o biŋndo choo.

Mi kandu kɔllo kɛsioo mɛɛ puaapiliaa fula o kunda cheleŋ niŋ, ma huŋ le naa malaa Oliala. Mi lɛuve yɔŋ naa vɛlɛ kɔɔfanɔ teŋgeŋndo diolaŋ aa Kocho. Mi naŋ kɔl tau mɛɛ kala nuu a pɔmbɔ nuu kandu Baabuiyo pɛɛkoo ma sɔla yiŋɔɔ. Nduyɛ a Fuoo wɔsi 2015, ma yulu ya iso le waa buɛi malalaŋndo. Nduyɛ mɛɛ teleŋ tiŋ hiou, mi yɔŋgu suɛi luŋii tasei. Paaleleŋ, mi loonuŋ a nyɛ Kulaŋvel ndoo dimulla wo okɔɔ. Mi ndoo dimulla aa: “O wa niŋ o lepala niŋ ma yɔŋgu suɛi luŋnde. Keŋ nɔ le yɔŋnɔŋndo. Mi mam muɛɛŋ nduyɛ mi mɛmɛma kɔl kɛndiaŋ ma tualla kpasu kpasu.”

Tɛlivisiɔŋ Seiyaa Chɛhowaa mala ya niŋ tau. O mala ya niŋ le chɔɔ puaapiliaa a ndepiliaa naŋ cho o bahawɛila pilɛlaŋ niŋ nda. Mi che bɛɛ a cho wanaa kɛndiaa le, kɛ a cho a nyaale nduyɛ ma wa yoomu ndaa soliŋndo kpeku le Chɛhowa piɛiyo. I nɔla wɔ mi tosa sɔɔŋ pum. Le sabu koŋ, I yeema mi soliŋ yoomuma niaŋ kpeku le Chɛhowa piɛiyo. Lelaŋ pɛŋ ya chua kɔɔfale lɔɔlɔɔ leŋ ni. Mi sɔla yooŋgu kɔl kɛndɔɔ a Tapioo o wɔsi 2019 niŋ. O paŋgii keŋ niŋ nda yulu ya iso ni le waa bɛndu kundaa. Nduyɛ kunda naa nɔ wanaa dimiaa yooŋgu kɛndiaa le ŋwaŋ 40.

I nɔ bɔɔ balika melaa le puaapiliaa a ndepiliaa pɛɛku ya Baabuiyo wa. Nda mala ya ni mi wa hau Chɛhowa piɛiyo. Kɛ i hiou kpou ve, balika bɛndoo cho le Chɛhowa kanifuule, o puɛɛnuŋ a ya okɔɔ le.