Ame kwa hampuruka nge mo-1983. Nye apa na kere nonomvhura murongo yipo na tamekere kuzuvha kukora morutu. Konyima zonomvhura mbali, ezuva limwe apa na pindukire ngurangura kapi na vhulire kugenda. Nampili ngomu na kondjere asi ni gende, kapi na kere nononkondo dokugenda. Kutunda ezuva olyo, kapi na genda hena. Uvera wange kwa ninkisa nge ni hageke kukura. Dogoro ngesi ame kumoneka ngwendi munonagona.

Konyima zomakwedi gongandi apa wa kwete nge uvera, ame kwa kere tupu membo apa Nombangi daJehova mbali da wizire pembo lyetu. Rorunzi apa ngava wiza vagenda, ame ngani vanda, nye ezuva limwe ame kwa pulisilire vakadi ava va wizire va uyungise nge. Ngomu va tanterere nge kuhamena Paradisa, ayo kwa diworokesere nge eyi na zuvhire apa na kere koyiha yonomvhura ntano. Posiruwo sina, mutumwa gedina Jethro, ogu ga tungire moSuriname kwa ya dingwire mukunda gwetu ure wokwedi ntani age nga lirongo Bibeli notate. Jethro nga tekura nge nawa. Ame kwa mu here unene. Ntani omama ngava pitura nge pamwe komapongo goNombangi, aga ngaga karere momukunda gwetu. Apa Florence gumwe govakadi vena va ya dingwire nge ezuva lyomuhowo, ga pulire nge nsene na hara kuzuvha ko yoyinzi, ame kwa limbwilire asi na hara.

Florence kwa ka tengwilire ko namugara gwendi Justus, awo kwa tamekere kuronga nge Bibeli. Apa va yi dimbwilire asi ame kapi nayi diva kuresa yipo va rongere nge kuresa. Konyima zosiruwo ame na ya divire kuresa. Ezuva limwe, valikwali owo kwa tanterere nge asi tava va tumu va ka zuvhisire moSuriname. Ayo kwa guvisire nge sili morwa kwato ogu ga kere moOrealla ogu ga vhulire kutwikira kuronga nge Bibeli. Nye Jehova kapi ga divarere nge.

Konyima, muzuvhisi gokukarerera Floyd kwa wizire moOrealla, ano ngomu ga zuvhisire tunda embo zende embo yipo ga gwene nge. Apa ga pulire nge nsene kuvhura ni lironge Bibeli, makura tani menyuna. Ta pura nge asi: “Morwasinke ono kuzorera?” Yipo na mu tanterere asi na mana kulironga nare sifo, Yinke ana hepa ko Karunga kwetu? ntani na tameka kulironga mobuke Ediwo eli ali twara komwenyo gwanarunye. * Tani mu fatwilire eyi na hagekera kulironga. Floyd kwa twikilire kulironga name buke Ediwo, nye konyima nage kwa  mu tumine a ka zuvhisire kwapeke. Elirongo lyange yipo lya hege hena.

Ano mo-2004, Granville naJoshua, vazuvhisi wosiruwo nasinye kwa va tumine moOrealla. Awo kwa zuvhisire tunda embo zende embo, makura yipo va gwene nge. Apa va pulire nge nsene na hara kulironga Bibeli, tani menyuna. Yipo na va tanterere va tamekere ko kuronga nge buke Ediwo. Ame kwa here ni tare nsene eyi nava ronga nge na yi liza neyi va rongere nge vakwawo. Granville yipo ga tanterere nge asi mapongo kwa ku ga ruganena momukunda gwetu. Nampili ngomu na dilire kupwaga membo ure wonomvhura murongo, ame kwa here kuza kepongo. Granville yipo ga pitwire nge, age kwa tulire nge posipundi sange sourema nokusindika nge tu ze kepongo.

Ngomu sa pitire siruwo, Granville kwa korangedere nge ni litjangese moSikora zoUkareli. Age kwa tanterere nge asi: “Ove sirema nye kuvhura o uyunge. Ezuva limwe ngo gava siuyungwa sanavenye, yosili ngo yi sikisa mo.” Nonkango dendi dekorangedo kwa pamekere nge.

Ame kwa tamekere kuza mokuzuvhisa naGranville. Nye sinzi sononzira domomukunda gwetu kwa donapere, nokuvhura si kusindika mo sipundi sange. Yipo na pulire Granville a ture nge mositoroli a sindike nge ngomu twa zuvhisire. Ayo kwa tompokere. MwaKudumogona 2005 yipo na gwene ekuho. Kutunda opo, vanavazinyetu kwa dewire nge ni kare muwapaiki goyimbapiratjangwa moSinyanga ntani nokurugana komambako.

Nye ehudi, mo-2007 otate yipo va dogorokere mehudi lyosiniva. Ayo kwa tu guvisire sili. Granville nga kanderere kumwe nose ntani nokutupa makorangedo gomoBibeli. Konyima zonomvhura mbali, ose kwa guvire hena apa Granville ga dogorokere kehudi lyosiniva.

Kambunga ketu kapi ka kere nomukuronambunga nye mukwafimbunga gumwe tupu ga kere mo. Nomfa daGranville kwa tu gumine sili, age kwa kere kaume gomuwa. Age nga vatere nge noyihepwa yange yopampepo neyi yopanyama. Epongo lyokukwama ko konyima zonomfa dendi, na kere noruha rokuresa noparagarafu domoRuhungu rwElirongo. Ame na vhulire kuresa tupu noparagarafu mbali dokuhova, ano konyima tani tameke kulira. Na hepere kutunda ko kositantara.

Ame kwa tamekere kulizuvha ko hansa apa vanavazinyetu wovagara wokombungakriste zapeke va wizire va ya tu vatere. Ntani mberewa zomutayi kwa tumine muzuvhisi gosiruwo nasinye, munazinyetu Kojo. Ame kwa hefe sili unene apa onane ntani mumbyange gomumati va tamekere kulironga Bibeli ntani konyima va ya gwene ekuho. MwaNsinano 2015 yipo va tulire nge ni kare mukwafimbunga. Konyima ame kwa geve siuyungwa sanavenye. Ezuva olyo ame kwa gende mahodi apa na gazarere eyi ga tanterere nge Granville asi: “Ezuva limwe ngo gava siuyungwa sanavenye.”

Kupitira ko-JW broadcasting^® na dimburura asi koveli vanavazinyetu ava va kara moukaro ngwendi wange. Nye nampili ngomu va kara moukaro owo, awo kurugana yoyinzi ntani va hafa. Name kuvhura ni rugane ko yuma. Eharo lyange lyokuhara kugava kwaJehova eyi nina kuvhura ko, lya tumangeda nge ni kare muzuvhisi gokukarerera. Ano mwaSitarara 2019, ame kwa gwene mbudi zohararasi! Mokwedi oko, kwa tanterere nge asi va tura nge ni kare mukuronambunga mombungakriste zetu omu mwa kara vazuvhusi 40.

Tani pandura vanavazinyetu ava va vatera nge ni lironge Bibeli ntani ni karere Jehova. Unene po, ame kupandura Jehova kweyi ga dira kudivara nge.